1 Timotiya 6 - Testamente Leyimpsha Xichangana

¹ Lava varhwexiweke mpingu wa vukarawa, avateke vinyi va vona tani lavafanelaka kuxiximiwa, lesvaku vito ra Xikwembu ni lesvi hisvijondzisaka, svingatshuki svisoliwa.

² Lavanga ni vinyi va vapfumeli, vangavayeyisi hi kuvona lesvaku i vamakwavu Hosini; kambe vafanele kuvatirhela hi malwandla, hi kutiva lesvaku vinyi lava vapfuniwaka hi kutirheliwa hi ndlela leyi, i vapfumeli lavarhandzekaka. Jondzisa vanhu timfanelo leto, uvaleleta tona.

Tijondzo tohambuka ni rifuwo ra ntiyiso

³ Loko munhu mun'wana ajondzisa svotiviwa hi yena, lesvihambaneke ni marito lawa mahanyaka ya ntiyiso ya Hosi ya hina Kriste Yesu, ni jondzo leyifambelanaka ni vukhongeli,

⁴ munhu yelweyo wa kutikulisa ni kutikukumuxa, angativi nchumu. Afa hi kunavela kuphikizana ni madzolonga henhla ka marito ntsena, svinga lesvivangaka mavondzo, ni madzolonga, ni kurhuketelana, ni kulumbetana;

⁵ nasvona svivanga kuholova xikarhi ka vanhu lavaboleke miyanakanyu ni kulahlekeliwa hi ntiyiso, lavayanakanyaka lesvaku vukhongeli i ndlela yokuma rifuwo.

⁶ Hakunene vukhongeli lebzinga ni kutsaka ka mbilu i rifuwo lerikulu.

⁷ Hikuva ahitanga ni nchumu misaveni, nasvona hingakala hingafambi ni nchumu, loko hisuka kola misaveni.

⁸ Hikolaho, loko hili ni svakuja ni sviyambalu, hitakolwa hi svona.

⁹ Kambe lavanavelaka rifuwo, vawela ndzingweni, mintlhan'wini ya kunavela lesvotala lesvingapfuniki nchumu, kunga kunavela loku kudlayisaka vanhu, ni kuvapeta khombzeni ni le kuloveni.

¹⁰ Hikuva kurhandza ngopfu male i rimintsu ra lesvobiha hinkwasvu; hi yo mhaka ya kunavela male ngopfu leyi yingahambukisa van'wana, vatshika vupfumeli, kutani timbilu ta vona tingheniwa hi svivilelo lesvotala.

Ta nyimpi leyinene ya kupfumela

¹¹ Kambe loko ali wena, munhu wa Xikwembu, fambela kule ni svilo lesvi hinkwasvu. Kongoma kululama, ni vukhongeli, ni kupfumela, ni rirhandzu, ni kutiyisela, ni timpsalu.

¹² Lwana nyimpi leyinene ya kupfumela; khoma svitiya, vutomi lebzingaheliki, lebzi ungavitaniwa hikolaho ka bzona ni kuveka vumboni lebzinene henhla ka bzona, mahlweni ka vanhu lavotala lavangakutwa.

¹³ Mahlweni ka Xikwembu lexinyikaka vutomi ka svilo hinkwasvu, ni le mahlweni ka Kriste Yesu lweyi avekeke vumboni lebzinene mahlweni ka Pontiyo Pilato, nakubzela nili:

¹⁴ Hlayisa minawu, ungavi ni xivati ni xisandzu, kuyafika loko Hosi ya hina Kriste Yesu ahumelela.

¹⁵ Kuhumelela loku kutakombisiwa rivaleni hi nkama wakona, hi lweyi akatekeke, lweyi anga ni matimba ali yexe, Hosi ya tihosi ni Mufumi wa vafumi.

¹⁶ Hi yena ntsena lweyi angaliki ni kufa, lweyi ayakeke kuvonakaleni lokungatshineleliwiki; kuhava munhu ni mun'we lweyi atshamaka amuvona, kumbe lweyi akotaka kumuvona. Ka yena akuve kuchaviseka ni kufuma, hilaha kungaheliki. Amen.

¹⁷ Kambe loko vali lava vanga ni rifuwo ra misava leyi, vabzele lesvaku vangatikulisi, kumbe kuveka kulangutela ka vona rifuweni leringatiyangiki, kambe vaveka kulangutela ka vona ka Xikwembu: Hi xona xihinyikaka hi ntalu svilo hinkwasvu, lesvaku hitiphina ha svona.

¹⁸ Vabzele kuyendla lesvinene, vatala rifuwo ra mintirho leyinene, vanyika, vativa ni kupambulela van'wana.

¹⁹ Hi ndlela leyi vatihlengeletela xuma lexinene, lexitiyeke, xa minkama leyitaka, lesvaku vatayamukela vutomi bza ntiyiso.

²⁰ Wena Timotewu, hlayisa lesvivekiweke mandleni ya wena. Fambela kule ni kuvulavula sva hava lesvingaliki na vukhongeli, ni kukanetana hi lesvihlayiwaka “vutivi”, kasi ahi bzona.

²¹ Van'wana hi kusvilandzelela, valahlekeliwile hi vupfumeli. Timpsalu ative na n'wina.