1 Timotiya 5 - Testamente Leyimpsha Xichangana

Ta timfanelo ta vapfumeli

¹ Ungaholoveli xijuhati, kambe xikhutaze kufana ni tatana wa wena; ka majaha ufanele kumakhoma kufana ni vamakwenu vaxinuna.

² Vavasati lavajuhaleke uvalanguta kufana ni vamamana, ni vanhwanyana kufana ni vamakwenu vaxisati, hi ndlela ya kubasa matlhelo hinkwawu.

³ Xixima vafelakazi lavanga vona hi ntiyiso.

⁴ Loko wansati wa mufelakazi ali ni vana kumbe vatukulu, avarhange vajondza timfanelo ta vona ta vukhongeli hi tlhelo ra njangu wa ka vona, ni kutiva svin'wana kukhensa vapsali va vona, hikuva hi svona lesviyamukelekaka mahlweni ka Xikwembu.

⁵ Wansati wa mufelakazi lweyi anga wa ntiyiso, loko asale ali yexe, na avekile kutshemba ka yena ka Xikwembu, kutani atshama na ali karhi akombela ka xona ni kukhongela vusiku ni nhlekanhi.

⁶ Kasi lweyi anavelaka kutiphina ntsena, afile hambi loko ahahanya.

⁷ Leleta timhaka leti, lesvaku vatapfumala xisandzu.

⁸ Loko munhu angapfuni maxaka ya yena, ngopfungopfu lavanga va njangu wa yena wa ntiyiso, ayalile vupfumeli, kutani abihile kutlula ni lweyi angapfumeliki.

⁹ Wansati wa mufelakazi, aatsalisiwe ntsena loko ali ni malembe ya ntlhanu wa makume ni rin'we (60), nasvona lweyi aatekiwile hi nuna mun'we ntsena;

¹⁰ nakona afanele kuva ni vumboni lebzitwalaka hi tlhelo ra mintirho leyinene ya yena, kufana ni kuwundla vana hi ndlela yakona, ni kutsakela vayendzi, ni kuhlampsa milenge ya vahlawuliwa va Xikwembu, ni kupfuna lava vaxanisekaka, ni kutshama na ali karhi ayendla lesvinene hi matlhelo hinkwawu.

¹¹ Kambe yala kutsala mavito ya vavasati va vafelakazi lavampsha; hikuva loko vangheniwa hi kunavela, valava kutekiwa, kutani vafularhela Kriste.

¹² Svosvo svivavangela kuyavanyisiwa, hikuva vatlulile kutiboha ka vona kosungula.

¹³ Nasvona, vavasati va vafelakazi lavampsha vajondza kuloloha; varhendzeleka hi minjangu ya van'wana, kungali hi mhaka ya kuloloha ntsena, kambe vahundzuka vahlevi ni vavangi va timholova hi kufamba vavulavula lesvi vangafaneliki kusvivula.

¹⁴ Mina anitatsakela lesvaku vavasati va vafelakazi lavampsha vatekiwa, vakuma vana, vahlayisa minjangu ya vona, vanganyiki nala nkama wa kuhleva.

¹⁵ Hikuva ni svosvi van'wana vahambukile ndleleni, valandzelela Sathana.

¹⁶ Loko mupfumeli waxisati ali ni maxaka lawa manga vafelakazi, aavapfune; kereke yingatshuki yitikeliwa, lesvaku yitakota kupfuna lavanga vafelakazi va ntiyiso.

¹⁷ Yendla lesvaku vakulukumba lavatirhaka khwatsi ntirho wa vufambisi vaxiximiwa svinene, ngopfungopfu lavatikarhatelaka Rito ni kujondzisa,

¹⁸ hikuva Matsalwa mali: “Ungatshuki upfala nomo wa homu, loko uli karhi uhula ha yona!” Nasvona, “Mutirhi alulameliwile hi hakelo ya yena.”

¹⁹ Ungayamukeli mhaka ya kumangalela mukulukumba, handle ka vumboni bza vanhu vambirhi kumbe vanharhu.

²⁰ Loko kuli ni vakulukumba lava vaphikelelaka kujoha, vatshinye rivaleni, lesvaku lavan'wana vatachava.

²¹ Mahlweni ka Xikwembu ni ka Kriste Yesu ni ka tintsumi letohlawuleka, nakukhongotela svinene kuhlayisa timfanelo leti, ungatekeli kuyavanyisa, nakona ungayi hi nghohe.

²² Ungatsutsumeli kutlhanteka munhu mavoko, nasvona ungatinghenisi svijohweni sva mun'wana munhu. Tihlayise, utshama na ubasile.

²³ Ungahanwi mati ntsena, kambe nwana vhinyunyana, hi lesvi ukarhatekaka hi le ndzeni, ni hikolaho ka mavabzi ya wena ya nkarhi ni nkarhi.

²⁴ Svijoho sva vanhu van'wana svi le rivaleni, svivayisa kuyavanyisiweni, kambe svijoho sva van'wana svivoneka ndzhaku ka nkama ntsena.

²⁵ Hi ndlela yoleyo, na yona mintirho leyinene yi le rivaleni, kambe hambi loko yin'wana yingavoneki, yingakala yingatshami na yifihlekile.