1 Timotiya 4 - Testamente Leyimpsha Xichangana

Ta vajondzisi va mavunhwa

¹ Kutani-ke, Moya wuhlaya wutiyisile lesvaku masikwini lamataka, van'wana vatahambana ni vupfumeli, hi mhaka ya kulandza mimoya leyikanganyisaka ni tijondzo ta madimoni,

² ni hikolaho ka kukanganyisiwa hi vahembi lava vafeke mapfalu.

³ Vakanganyisi lava vayalisa kutekana, valerisa lesvaku kutshikiwa svakuja lesvi Xikwembu xisvitumbuluxeke lesvaku sviyamukeliwa hi kukhensa hi lava vapfumelaka ni kutiva ntiyiso.

⁴ Hikuva hinkwasvu lesvi svitumbuluxiweke hi Xikwembu i svinene, kutani aku na lexi xifanelaka kunyenyiwa, loko xiyamukeliwa hi kukhensa,

⁵ hikuva svihlawulekisiwile hi rito ra Xikwembu ni xikhongelo.

Ta nandza lwenene wa Kriste Yesu

⁶ Loko uyandlala timhaka leti mahlweni ka vamakwerhu, utava nandza lwenene wa Kriste Yesu, utava lweyi awundliweke maritweni ya vupfumeli ni ya tijondzo letinene leti ufambeke ha tona.

⁷ Ungavi ni mhaka ni minkaringana ya vuphukuphuku leyingaliki ni vukhongeli. Titolovete kuva mukhongeli,

⁸ hikuva hambi loko kuchukachukisa miri kuli loku kupfunaka hi matlhelo man'wana, vukhongeli bzipfuna hi matlhelo hinkwawu, nasvona bzitshembisa vutomi bza nkama lowu, ni bza lowutaka.

⁹ Rito leri ritiyile, rifanela kuyamukeliwa hi mandla mambirhi.

¹⁰ Hitirha svinene ni kutikarhatela svona, hikuva hivekile kutshemba ka hina ka Xikwembu lexihanyaka, lexinga muponisi wa vanhu hinkwavu, ngopfungopfu wa lavapfumelaka.

¹¹ Leleta ni kujondzisa svilo lesvi.

¹² Kungavi ni lweyi achipisaka vumpsha bza wena, kambe vana xikombiso xikarhi ka vapfumeli hi mavulavulela ni mahanyela ya wena, hi rirhandzu ni kupfumela ni kutenga.

¹³ Tinyikete kuhlayela vanhu Matsalwa, ukhongotela ni kujondzisa, nikondza nifika.

¹⁴ Ungatlangi hi nyiko leyi unga na yona, leyi uyikumeke siku leri vakulukumba vakutlhantekeke mavoko, vaprofeta lesvi ungatava svona.

¹⁵ Yendla timfanelo leti, na utinyiketela ka tona, lesvaku hinkwavu vatavona hilaha uyaka mahlweni hakona.

¹⁶ Tikambisise hi wexe, ni jondzo leyi uyijondzisaka. Tiya ka svona, hikuva loko uyendlisa svosvo, utatiponisa ni kuponisa vayingisi va wena.