1 Timotiya 3 - Testamente Leyimpsha Xichangana

Ta mahanyela ya vabixopo ni vadiyakoni va kereke

¹ Rito leri ritiyile, leringe: Loko munhu anavela kuva murisi wa kereke, anavela ntirho lowunene.

² Hikolaho, bixopo afanele kuva munhu lweyi angaliki na xisandzu, aave wanuna wa nsati mun'we, atikhoma, axiximeka, atsakela vayendzi, akota kujondzisa.

³ Angatinyiketi kunwa bzala, kumbe munhu wa tinyimpi, kambe aave lweyi wa kurhula, angavi ni vumpsaka, nasvona angavi lweyi arhandzaka ngopfu male.

⁴ Afanela kufambisa khwatsi njangu wa yena, avona lesvaku vana va yena vajondzisiwa kuyingisa, vava ni xichavu hi kuhetiseka.

⁵ Hikuva loko munhu angakoti kufambisa njangu wa yena, atasvikotisa kuyini kufambisa kereke ya Xikwembu xana?

⁶ Angavi munhu lweyi ahakupfumelaka, hikuva angatshuka ateliwa hi kutikulisa atikukumuxa, kutani ayavanyisiwa kufana na Diyavulosi.

⁷ Nasvona afanela kuva lweyi vanhu va le handle vamuxiximaka, hikuva nkama wun'wana angawela kusandziweni ni le ntlhan'wini wa Diyavulosi.

Ta mahanyela ya vatirheli kerekeni

⁸ Vadiyakoni kerekeni na vona vafanele kuva lava vaxiximekaka, vavulavula ntiyiso, vangatinyiketi bzaleni, vangavi lavanavelaka bindzu robiha;

⁹ vafanele kuhlayisa xihundla xa vupfumeli hi ripfalu leribaseke.

¹⁰ Nasvona, avarhange hi kukambiwa, kutani loko vatikomba lesvaku ava na xisandzu, vangatirha ntirho wa vona wa vudiyakoni kerekeni.

¹¹ Hi ndlela yoleyo vadiyakoni va xisati avaxiximeke, vangavi valumbeti, kambe vatshembeka ka svilo hinkwasvu.

¹² Vadiyakoni kerekeni avave ni nsati mun'we, vafambisa khwatsi vana va vona ni minjangu ya vona.

¹³ Hikuva vadiyakoni lavayendlaka ntirho wa vona kerekeni hi nawu wakona, vatinyika xiyimu lexinene, nasvona vatiyisiwa svinene kupfumeleni ka vona ka Kriste Yesu.

Ta xihundla xa vukhongeli bza hina

¹⁴ Natshemba lesvaku nitata koseno ka wena kungali khale, kambe ni kutsalela timhaka leti,

¹⁵ lesvaku loko nitshuka nihlwela, utasvikota kutiva hilaha munhu angahanyaka hakona loko ali njangwini wa Xikwembu, yinga kereke ya Xikwembu lexihanyaka, mhandze leyikulu ni xiseketelo xa lesvinga ntiyiso.

¹⁶ Hakunene, hingatiyisa lesvaku xihundla xa vukhongeli bza hina i xikulu: “Ahumelelile tani hi munhu, ahlayiwile lweyi alulameke moyeni, avoniwile hi tintsumi; apaluxiwile matikweni, apfumeliwile laha misaveni, atekeliwa henhla kukwetsimeni.”