1 Timotiya 2 - Testamente Leyimpsha Xichangana

Ta magandzelela akerekeni

¹ Loko svilitano, xosungula, ninavela hi matimba lesvaku kukombela, ni kukhongela, ni kukhongelela, ni kukhensa, sviyendleliwa vanhu hinkwavu,

² sviyendleliwa ni tihosi ni hinkwavu lavanga svitshan'wini sva le henhla, lesvaku hikota kuhanya vutomi bza kurhula ni kutsaka, lebzinga bza vukhongeli ni lebzi bzixiximekaka hi matlhelo hinkwawu.

³ Lesvi i svinene, svayamukeleka mahlweni ka Xikwembu muponisi wa hina,

⁴ lexinavelaka lesvaku vanhu hinkwavu vaponisiwa, vafika laha vakotaka kutiva lesvi svinga ntiyiso.

⁵ Hikuva ku ni Xikwembu xin'we, nasvona ku ni Muyimeli mun'we lweyi ahlanganisaka Xikwembu ni vanhu, yena Kriste Yesu munhu wa ntiyiso,

⁶ lweyi atinyiketeke kuva muponisi wa vanhu hinkwavu; hi bzona vumboni bza makungu ya Xikwembu, lebzingahumelela hi nkama lowufanekelaka.

⁷ Kutani, hi svona lesvingayendla lesvaku nivekiwa kuva muchumayeli wa Rito ni mupostola (nivula lesvi svitiyeke, anihembi), nijondzisa vamatiko ta kupfumela ni ta ntiyiso.

⁸ Hikolaho, ninavela lesvaku, tindhawini hinkwatu, vavanuna vakhongela na vatlakusile mavoko lawa mabaseke, kuli hava kukariha kumbe madzolonga.

⁹ Hi ndlela yoleyo na vona vavasati avayambale lesvingakhomisiki tingana, vatisasekisa hi mpimo, kumbe kutibombisa hi misisi leyihorhiweke, kumbe hi vuhlalu bza risima, kumbe hi sviyambalu svodura ngopfu;

¹⁰ kambe avatibombise hi mintirho leyinene, hilaha svifanelaka hakona vavasati lavativulaka va vukhongeli.

¹¹ Wansati aajondze na amiyelile, ava lweyi ayingisetaka hi kuhetiseka.

¹² Anipfumeleli wansati kujondzisa kumbe kufambisa wanuna; afanele kutshama na amiyelile.

¹³ Hikuva kurhangile Adamu avumbiwa, kulandza Evha.

¹⁴ Nasvona, ahi Adamu lweyi akanganyisiweke, kambe i wansati lweyi akanganyisiweke, kutani awela kujoheni.

¹⁵ Hambi svilitano, wansati ataponisiwa hi lesvi avelekaka vana, loko atiyisela kupfumeleni ni le rirhandzwini ni le kubaseni, na ali ni kutikhoma.