इब्रानिन 5 - भगवान कर सच्चा बचन

¹ हर अक्ठी पुजारी मनसेन मसे चुने जथै, अउ जउन भगवान सबंध के बातन हे मनसेन के अगुवाई करै के निता ठहराय जथै, जेखर लग ऊ उपहार अउ पाप के माफ के निता बलि चढावा।

² ऊ बिना समझदार अउ भुलाय भटके मनसेन के संग कोवड बेउहार के सकथै, काखे ऊ खुदय ढिलवन लग घररेहर हबै।

³ इहैनिता उके अपन पापन के निता अउ ओसनेन मनसेन के पापन के निता बलि चढामैके पडथै।

⁴ कउनो अपन खुद हइ इज्जत के पद नेहको अपनाथै, पय सबझन हारुन के जसना भगवान के दवारा बोलाय जथै।

⁵ इहैनिता मसीह अपन मन लग परधान याजक बनके महिमा नेहको पाथै, पय भगवान उके पुजारी बनाइस, फेर अउ ऊ कथै, “तै मोर टोरवा हबस, मै आज लग तोर बाफ बन गय हव।”

⁶ अउ अक्ठी आने जिघा हे ऊ कथै, “तै मलिकिसिदक के जसना, जुगजुग के निता पुजारी बने रही।”

⁷ यीसु हइ दुनिया अपन देह हे रहत चिल्लाय-चिल्लाय के अउ आंसू बोहोय-बोहोय के भगवान लग, जउन उके मरै लग बचाय सकथै, पराथना अउ बिनती करिस अउ आदरपूरवक समरपन के कारन सुने गइस।

⁸ टोरवा होय भरमा ऊ दुख सहि के आदेस के मानै के सिखिस,

⁹ अउ अक बेर सिध्द बन जाय लग उन सबझन के निता जउन ओखर आदेस के मानथै, ऊ सबरोज के मुकति के कारन बन गइस।

¹⁰ अउ भगवान के दवारा मलिकिसिदक के जसना उके पुजारी के पद मिलिस।

नियाव छांडै के खिलाप चेतावनी

¹¹ एखर बारे हे हमही बोहत कुछु कहैके हबै, पय इन बातन के समझै के कठिन हबै, काखे तुम समझै हे असली हबा अउ बोहत सुने लगे हबा।

¹² हइ टेम तक तुमही गुरू हुइ जायके चाही, पय हइ जरूरी हुइ गय हबै कि कउ तुमही फेरै भगवान के बचन सिखामै, तुमही भात खायका नेहको बकि दूध के जरूरत हबै।

¹³ जउन दूध पिये के आसरित रथै, ऊ लरका हबै उके भगवान के बचन के चिनारी नेहको होय हबै।

¹⁴ पय ठोस खाना सियान मनसेन के निता हबै, जेहमा लगेतार परयोग करके खुद के बुराई लग अलगे करै के निता परयास करे हबै।