2 कुरि 3 - भगवान कर सच्चा बचन

नबा टीमा के हरवाह

¹ का हम फेर अपन बडाई करै लागथै? या हमके आने मनसेन के जसना हइ हमर निता जरूरी हबै कि हम तुमके सिफारिस के चिट्ठी देखइ अउ तोर लग मांगी?

² हमर चिट्ठी तुम खुदय हबा, हमर हिरदय हे लिखररे हर जउन सबके दवारा चीन्हे अउ पढे जाय सकथै।

³ अउ तुमो असना दिखाथा जसना तुम मसीह के चिट्ठी हबा, जउन हमर सेबा दवारा लिखवाय हबै, जेही सियाही लग नेहको बलुक जिन्दा भगवान के आतमा लग लिखे गय हबै, जेही पथरा के पटिया हे नेहको, बलुक मनसे के हिरदय के पटिया हे लिखररे हबै।

⁴ हम मसीह के कारन भगवान के आगू असना दाबा करैका भरोसा हबै।

⁵ असना नेहको हबै कि हम खुद हे एतका सक्ति हबै, जउन सोचै लगे हबै, कि हम खुद लग कुछ के सकथन बलुक हमके सक्ति भगवान लग मिले हबै।

⁶ उहै हमके नबा टीमा के काम करै के काबिल बनाइस, हइ सब्द के सेबक नेहको, पय आतमा के हबै, लिखररे हर नियम मिरतू के जनम देथै, पय आतमा जीवन देथै।

⁷ सेबा के काम अगर पथरा के पटिया हे खोदे गय अक्छर हे लिखररे हर मिरतू के टीमा एतका उजियार रथै, कि इस्राएल के मनसे मूसा कर नजर लग अकजाइ नेहको देख सकिन, अउ हइ उजियार धीरे-धीरे कम होउत जात रथै।

⁸ फेर आतमा लग टीमा सेबा अउ बोहत उजियार काखे नेहको होही।

⁹ अउ फेर जब दोसी ठहराय बाले सेबा हे एतका उजियार हबै, ता ऊ सेबा हे केतका उजियार होही, जउन धरमी ठहराय बाले सेबा हबै।

¹⁰ काखे जउन पहिले उजियार लग भरपूर रथै, ऊ अब ऊ उजियार के आगू जउन ओखर लग कहुं जादा उजियार हबै, ऊ उजियार रहित हुइ गय हबै।

¹¹ अगर ओखर उजियार असना रथै, जउन लगेतार कम होउत रथै, ता ओखर उजियार, जउन हरमेसा स्थिर हबै, अउ केतका जादा उजियार होही।

¹² इहै आसा के कारन हमर बात बगैर डर के हबै।

¹³ हम मूसा कर जसना नेहको हवन, जउन अपन मुंह हे परदा डाले रथै कि इस्राएल के मनसे ऊ धीरे-धीरे कम होउत उजियार के झइ देख पामै।

¹⁴ सही हे इस्राएल के मनसे के दिमाक बंद हुइ गय रथै, काखे आज तक पुरान नियम देय के मउका हे उहै परदा पडे रथै, काखे हइ परदा सिबाय मसीह के दवारा हटाय जथै।

¹⁵ आज तक जब-जब मूसा कर किताब पढे जथै ता पढै बालेन के मन हे परदा पडे रथै।

¹⁶ पय जब कउनो के हिरदय परभु के पल्ला मुडथै ता ऊ परदा हटाय दय जथै।

¹⁷ हइ परभु ऊ आतमा हबै अउ जिहां कहुं परभु के आतमा मउजूद हबै उहां छुटकारा हबै।

¹⁸ अउ जिहां तक हम सबके सबाल हबै, हमर छाप हे परदा नेहको हबै अउ हम सब अइना के मेर परभु के उजियार के धियान करथन हइ मेर हम धीरे-धीरे परभु के उजियार हे बढथन हइ उजियार परभु लग मिलथै, मतलब आतमा लग।