Titu 2 - Sura Magasaꞌ: Bahangapa sura Pototowiá to Sae hai Pototowiá to Woꞌu

Tauna to maroꞌa pambiárána ina mampeuláꞌi paturoꞌ to toꞌu

¹ Agáiáná io Titu, hangaa-ngaa nupaturoꞌheꞌ hintotoꞌ hai paturoꞌ to toꞌu.

² Ane tobaleilo to matoama miꞌi, hangaa-ngaa nupaturoꞌheꞌ bona raisá momeeꞌ peundeꞌána laluraꞌ haduduáraꞌ, bona bábehiáraꞌ hintotoꞌ rabiláꞌ, hai bona manótó laluraꞌ. Pepoináláiraꞌ i Pueꞌ Iesu hangaa-ngaa maróhó ntepuꞌu. Hangaa-ngaa maꞌahiꞌheꞌ i hángká rángáraꞌ, hai mantahaheꞌ i lalu kapári.

³ Noꞌonoꞌ woꞌo towawine to matoina miꞌi. Nupaturoꞌheꞌ bona bábehiáraꞌ hintotoꞌ i tauna to mengkoruꞌ i Pueꞌ Ala. Rápáꞌna, ineeꞌheꞌ motitibei hángká rángáraꞌ, hai ineeꞌheꞌ paka malangu. Ngkáliꞌna riꞌi, hangaa-ngaa mopaturoꞌheꞌ oaꞌ hángká rángáraꞌ bona maroꞌa bábehiáraꞌ.

⁴ Ane noꞌonoꞌi bábehiáraꞌ towawine to matoina iti, peisámoheꞌ mopaturoꞌ towawine to maleheꞌ mani, bona raisá woꞌo mampokaꞌahiꞌ toámáraꞌ hai ánáꞌraꞌ,

⁵ bona manótó laluraꞌ, magasaꞌ tueꞌraꞌ, madotaheꞌ mokádipurá ánáꞌraꞌ hai támbiraꞌ, maꞌahiꞌ laluraꞌ, hai mengkoruꞌheꞌ i toámáraꞌ. Ane noꞌonoꞌi pambiáráraꞌ, tiꞌara ina ara tauna to peisá mosalaꞌi ngkóráꞌna Pueꞌ Ala.

⁶ Noꞌonoꞌheꞌ woꞌo tobaleilo to maleheꞌ mani. Hangaa-ngaa nupaturoꞌheꞌ bona moisáheꞌ momeeꞌ upu-upu peundeꞌána laluraꞌ to kadake.

⁷ Hai io Titu, bábehiámu hangaa-ngaa mewaliꞌ pándiriꞌ to maroꞌa. Ane mepaturoꞌkoꞌ, hangaa-ngaa hangko i lalumu ntepuꞌu, hai hangaa-ngaa manótó bábehiámu.

⁸ Laluitamu hangaa-ngaa manótó oaꞌ, hai to tiꞌara ara salaꞌiána. Ane noꞌonoꞌi bábehiámu, ina mahiliheꞌ to moewaꞌkoꞌ, láwiꞌ tiꞌara ara álásáraꞌ mosalaꞌikeꞌ.

⁹ Ane hawiꞌ, hangaa-ngaa nupaturoꞌheꞌ bona mengkoruꞌheꞌ i pueꞌraꞌ i pákáꞌ-pákáꞌna, hai mampeuláꞌiheꞌ oaꞌ peundeꞌána pueꞌraꞌ. Ineeꞌheꞌ mampombeheheꞌá pueꞌraꞌ,

¹⁰ hai ineeꞌheꞌ moala ngkábuni párewána pueꞌraꞌ. Ngkáliꞌna riꞌi, hangaa-ngaa rapakaroꞌa-roꞌa oaꞌ bábehiáraꞌ, bona mewaliꞌheꞌ tauna to peisá rapoinálái pueꞌraꞌ. Ane noꞌonoꞌ kamaroꞌana bábehiáraꞌ hai pambiáráraꞌ iti, upu-upu tauna ina tediiꞌ laluraꞌ i paturoꞌraꞌ mokana i Pueꞌ Ala Topohómpóꞌ Salaꞌ.

Hangaa-ngaa tapakaroꞌa bábehiántaꞌ

¹¹ Kabulána laluna Pueꞌ Ala tongawaꞌ miꞌi i upu-upu tauna, láwiꞌ Ia mobungkáhi miꞌi rárá bona peisákeꞌ tehómpóki hangko i huku dósántaꞌ.

¹² Hai Napaturoꞌkeꞌ bona mokábáhákeꞌ bábehiántaꞌ to mouláꞌ peá peundeꞌána laluntaꞌ hai tiꞌara hintotoꞌ hai peundeꞌána Pueꞌ Ala. Ia mopaturoꞌkeꞌ bona tabábehi bábehiá to hintotoꞌ, tapakanótó laluntaꞌ, hai mengkoruꞌkeꞌ i Hia lántuꞌántaꞌ mani ara i duniáꞌ deꞌe.

¹³ Deꞌe-deꞌe, mampegiá manikeꞌ pewaliꞌna to tahárungá, ia miꞌi popatongawaꞌna kuasaꞌna hai peawaꞌna Pueꞌ Ala hai Iesu Kerisitu Topohómpóꞌ Salaꞌtaꞌ.

¹⁴ Iesu iti to mampehuhuꞌá wátáNa rapapate mosulewátáikeꞌ, bona Nakábáhákeꞌ hangko i upu-upu bábehiántaꞌ to kadake, hai Napopewaliꞌkeꞌ taunáNa to magasaꞌ to moundeꞌ mobábehi apa to maroꞌa.

¹⁵ Mewaliꞌ Titu, upu-upu to teukiꞌ miꞌi deꞌe hangaa-ngaa nupaturoꞌáheꞌ. Nupakaróhó laluraꞌ hai nukámbáróáheꞌ ane paraluu. Ineeꞌkoꞌ mahili, láwiꞌ raweꞌimokoꞌ kuasaꞌ mopaturoꞌheꞌ. Ineeꞌheꞌ nupatodáhi ba heáná peá mopakóiꞌkoꞌ. Hangaa-ngaa rabiláꞌkoꞌ tauna.