Titu 1 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Sura deꞌe hangko i kódóꞌ Paulu, huoꞌána Pueꞌ Ala hai surona Iesu Kerisitu. Pueꞌ Ala mopileꞌiaꞌ mewaliꞌ suroNa, hai Nahuoꞌaꞌ bona kupakaróhó pepoináláiraꞌ tauna to Napileꞌi. Nahuoꞌaꞌ woꞌo mopaturoꞌáheꞌ paturoꞌ to toꞌu, bona raisá noumbá haneꞌi peisáheꞌ tueꞌ hintotoꞌ hai peundeꞌána Pueꞌ Ala.

² Onoꞌ miꞌi haneꞌi tahárungá kaꞌina molámbiꞌtaꞌ katueꞌ to maroꞌa to tiꞌara mokahópóꞌá, nodo to nadándiákeꞌ Pueꞌ Ala hangko tiꞌara mani duniáꞌ deꞌe Napopewaliꞌ. Hai Pueꞌ Ala tiꞌara modongkoꞌ.

³ Mewaliꞌ i tempó to Napakanótó, Napopaisá ngkóráꞌNa i tauna to Napileꞌi miꞌi moliu bágóꞌkuꞌ mopahaweꞌ Ngkóráꞌ Marasa. Iti to napoináláiáꞌaꞌ Pueꞌ Ala, Topohómpóꞌ Salaꞌtaꞌ.

⁴ Sura deꞌe kupakatu i hio Titu to kupoánáꞌ, láwiꞌ hampepepoináláikeꞌ. Mekakaeaꞌ i Pueꞌ Ala Umántaꞌ, hai i Kerisitu Iesu Topohómpóꞌ Salaꞌtaꞌ, bona mowátiꞌkoꞌ hai moweꞌikoꞌ roꞌa ngkatueꞌ.

Pinátuá hangaa-ngaa maroꞌa bábehiána

⁵ Kupatoroꞌkoꞌ i puló Kereta, bona nuꞌurusi to paraluu mani i lalu jemaꞌa, hai nupileꞌi tauna i upu-upu wánuá to peisá motadulakoi jemaꞌa ionoꞌ.

⁶ Tauna to nupileꞌi mewaliꞌ pinátuá, hangaa-ngaa tauna to tiꞌara peisá rasalaꞌi, hai hadua peá toinána. Ánáꞌnaheꞌ hangaa-ngaa mepoináláiheꞌ woꞌo i Kerisitu, hai hangaa-ngaa maroꞌa bábehiáraꞌ.

⁷ Tauna to motadulakoi jemaꞌa, hira miꞌi to mokádipurá bágóꞌna Pueꞌ Ala. Onoꞌ miꞌi haneꞌi hangaa-ngaa nupileꞌi tauna to tiꞌara peisá rasalaꞌi. Rápáꞌna, to tiꞌara: mampepemahile, masodo, paka malangu, gampaꞌ mabukoꞌ, ba to mampeliꞌ peá porasiꞌáraꞌ haduduáraꞌ.

⁸ Ngkáliꞌna riꞌi, tauna to nupileꞌi mewaliꞌ pinátuá, hangaa-ngaa: moisá motarima torare, moundeꞌ oaꞌ mobábehi to maroꞌa, manótó laluna, bukeꞌ pekiri, magasaꞌ tueꞌraꞌ, hai to mobuku momeeꞌ peundeꞌána laluraꞌ haduduáraꞌ.

⁹ Hangaa-ngaa motibaaꞌheꞌ maroꞌa paturoꞌ to toꞌu to ratarima miꞌi. Paturoꞌ iti peisá rapoinálái. Hangaa-ngaa rabábehi noꞌonoꞌ bona peisáheꞌ mopaturoꞌ tauna hangko i paturoꞌ to toꞌu iti, bona mopakaróhó laluraꞌ, hai bona rabuku mohániki tauna to moewaꞌ paturoꞌ iti.

Tauna to moánti paturoꞌ to salaꞌ hangaa-ngaa rakámbáróá

¹⁰ Tunggáiángkuꞌ mopaturoꞌ noꞌonoꞌ, láwiꞌ handaꞌ tauna to moewaꞌ paturoꞌraꞌ tadulako jemaꞌa, pelumbuꞌna miꞌi toSarani toIahudiꞌ to manguliꞌ tauna hangaa-ngaa ratileꞌ. Mopakanawoꞌheꞌ tauna moliu laluitaraꞌ to tiꞌara mobunduꞌ.

¹¹ Tauna iti hangaa-ngaa nukóntóheꞌ. Ineeꞌheꞌ nupaliu mepaturoꞌ, láwiꞌ hantámbi-hantámbi mewaliꞌheꞌ wuli ánti pepaturoꞌraꞌ. Tunggáiáraꞌ tauna to moánti paturoꞌ to salaꞌ iti, bona molámbiꞌ peheꞌ rasiꞌ. Mehihiliꞌi peá bábehiáraꞌ iti!

¹² Hangkoia ara hadua tauna hangko i puló Kereta to rarekeꞌ nabiꞌ. Ia manguliꞌ node: “ToKereta, upu-upuheꞌ modongkoꞌ, nodoheꞌ binataꞌ to maila, woro hai loheheꞌ.”

¹³ Toꞌu ntepuꞌu laluita iti! Mewaliꞌ hangaa-ngaa nukámbáróá ntepuꞌuheꞌ toKereta, bona mepoináláiheꞌ i paturoꞌ to toꞌu.

¹⁴ Nupaturoꞌheꞌ bona ineeꞌheꞌ mampoinálái darita mpatururaꞌ toIahudiꞌ ba mouláꞌ peá párentáraꞌ tauna to mosápuáka paturoꞌ to toꞌu.

¹⁵ I tauna to magasaꞌ laluraꞌ, upu-upuna magasaꞌ. Agáiáná tauna to kedái laluraꞌ hai tiꞌaraheꞌ mepoinálái, tiꞌara ara to magasaꞌ, láwiꞌ pekiriraꞌ hai laluraꞌ kedái.

¹⁶ Rauliꞌ, moisáheꞌ Pueꞌ Ala, agáiáná bábehiáraꞌ tiꞌara hiolaꞌ hai apa to rauliꞌ iti. Metitidiꞌi bábehiáraꞌ. Mosápuákaheꞌ Pueꞌ Ala hai tiꞌaraheꞌ mau mengkoruꞌ i Hia. Tiꞌara woꞌo rabuku mobábehi apa to maroꞌa.