Roma 9 - Sura Magasaꞌ: Bahangapa sura Pototowiá to Sae hai Pototowiá to Woꞌu

ToSáráeliꞌ hai Ngkóráꞌ Marasa (9:1–11:36) Handaꞌheꞌ toIahudiꞌ tiꞌara mepoinálái i Iesu

¹ Toꞌu ntepuꞌu laluitangkuꞌ deꞌe, tiꞌaraꞌaꞌ modongkoꞌ. Kerisitu to moisá lalungkuꞌ, hai kamanótóna lalungkuꞌ deꞌe nasabiki Inao to Magasaꞌ.

² Mapári ntepuꞌu kuhádi hai masusa ntepuꞌu lalungkuꞌ, láwiꞌ hangka toSáráeliꞌkuꞌ tiꞌaraheꞌ mau mepoinálái i Iesu.

³ Ane peisái, rángina miꞌi kódóꞌ to molámbiꞌ pekambo hai tegáákiaꞌ hangko i Kerisitu, asalaꞌ hangka toSáráeliꞌkuꞌ tehómpóki hangko i huku dósáraꞌ.

⁴ Hangkoia toSáráeliꞌ molámbiꞌmoheꞌ handaꞌ pewátiꞌ hangko i Pueꞌ Ala, láwiꞌ hira miꞌi to Napileꞌi hai Napopewaliꞌ nodo ánáꞌNa haduduáNa. Pueꞌ Ala mopatongawaꞌáheꞌ kuasaꞌNa hai peawaꞌNa, hai ánti podándiNa i toSáráeliꞌ hangkoia, haneꞌi ara pohintuwuꞌraꞌ hai Pueꞌ Ala. Napoweꞌiheꞌ HawaꞌNa hai Napaturoꞌáheꞌ rárá menómbá. Handaꞌ dándi to napahaweꞌ Pueꞌ Ala i toSáráeliꞌ.

⁵ Kaiꞌ pemuleꞌánaꞌangkaiꞌ Burahima, Isakiꞌ hai Iako, toiorungkiꞌ to Napileꞌi Pueꞌ Ala. Hai Datu Topehómpóꞌ, mouláꞌ karapoánákaNa, Ia woꞌo tepasuaꞌ pemuleꞌáraꞌ, hai melumbuꞌ kuasaꞌna Kerisitu iti hangko i upu-upuna. Ia miꞌi Pueꞌ Ala to hintotoꞌ tatóiá duuꞌna i rue-ruena. Ami!

Tiꞌara upu-upu pemuleꞌána Burahima to napileꞌi Pueꞌ Ala molámbiꞌ pewátiꞌ

⁶ Mewaliꞌ ineeꞌ riꞌi nipekiri dándina Pueꞌ Ala i toSáráeliꞌ mbero-mbero. Tiꞌara! Bateꞌna tebukeki, láwiꞌ hangko i oloꞌraꞌ pemuleꞌána Sáráeliꞌ, tiꞌaraheꞌ upu-upu rapileꞌi mewaliꞌ taunána Pueꞌ Ala.

⁷ Láwiꞌ i oloꞌraꞌ pemuleꞌána Burahima, tiꞌaraheꞌ upu-upu narekeꞌ Pueꞌ Ala ánáꞌna Burahima, láwiꞌ Pueꞌ Ala modándi miꞌi i Burahima, Nauliꞌ, “Bateꞌna peá pemuleꞌána Isakiꞌ to ina Kurekeꞌ ánáꞌmu.”

⁸ Ara lempóna to kaladu: tiꞌara upu-upu pemuleꞌána Burahima to mewaliꞌ ánáꞌna Pueꞌ Ala, bateꞌna peá tauna to rapoánáka hiolaꞌ hai dándina Pueꞌ Ala to mewaliꞌ ánáꞌNa.

⁹ Láwiꞌ ánáꞌna Burahima to rahangaꞌ Isakiꞌ rapoánáka hiolaꞌ hai dándina Pueꞌ Ala i Burahima. Pueꞌ Ala mohángáꞌá Burahima node: “Rekeꞌ-rekeꞌna tempó deꞌe pare mai, ina mesuleꞌAꞌ, hai i tempó iti, Sáráꞌ toinámu ina moánáka hadua ánángkóiꞌ tobaleilo.”

¹⁰ Hai tiꞌara iti peá. {Hangko i tuntukáná Esau hai Iako, taisá noumbá Pueꞌ Ala mopileꞌi tauna bona mewaliꞌ taunáNa.} Esau hai Iako iti, toporopaꞌheꞌ to naꞌánáka Ribeka. Isakiꞌ ia miꞌi umáraꞌ, hai ia hadua toiorungkiꞌ.

^11-12 Hangko tiꞌara mani Ribeka moánáꞌ, Pueꞌ Ala molaluita i hia, Nauliꞌ, “Ánáꞌmu towutuꞌ ina mengkoruꞌ i ádina.” Lempóna: hangko tiꞌara maniheꞌ rapoánáka, hai hangko tiꞌara maniheꞌ moisá apa to maroꞌa ba apa to kadake, napakanótó miꞌi Pueꞌ Ala heáná to ina Napileꞌi bona molámbiꞌ pewátiꞌ. Nabábehi noꞌonoꞌ, bona taisá ntepuꞌu: i kaNapileꞌiraꞌ Pueꞌ Ala tauna mewaliꞌ taunáNa, tiꞌaraheꞌ Napileꞌi ánti kamaroꞌana bábehiáraꞌ, agáiáná Napileꞌiheꞌ ánti peundeꞌáNa haduduáNa.

¹³ I lalu Sura Magasaꞌ, tabásá laluitana Pueꞌ Ala to teukiꞌ node: “Iako riꞌi to Kupileꞌi, agáiáná Esau tiꞌara.”

Pueꞌ Ala to mobutusi heáná to ina molámbiꞌ pewátiꞌ

¹⁴ Mewaliꞌ, apa mani to peisá ina tauliꞌ? Ba tiꞌara hintotoꞌ popakanótóna Pueꞌ Ala? Ineeꞌ nipekiri katiꞌárána manótó Pueꞌ Ala ane Ia mopileꞌi to hadua hai tiꞌara mopileꞌi to haduána!

¹⁵ Hangaa-ngaa nibuhinao laluitana Pueꞌ Ala i nabiꞌ Musa hangkoia to manguliꞌ: “Kódóꞌ miꞌi to mopakanótó i heáná tauna to ina Kupatongawaꞌá kamaꞌahiꞌKuꞌ, hai i heáná tauna to ina Kupatongawaꞌá kabulána laluNgkuꞌ.” (Pesuwuꞌá 33:19)

¹⁶ Mewaliꞌ, ane Pueꞌ Ala mampoinao mampetudeꞌá kamaꞌahiꞌNa i hadua tauna, tiꞌara peundeꞌána tauna to mopakanótó iti, tiꞌara woꞌo rapakanótó ánti bábehiána tauna, agáiáná Pueꞌ Ala haduduáNa to mopakanótó.

¹⁷ Hangaa-ngaa nibuhinao woꞌo apa to naukiꞌ Musa mokana laluitana Pueꞌ Ala i Piraoꞌ, Nauliꞌ, “Kupopewaliꞌkoꞌ datu bona ina tepabukeꞌi tunggáiáNgkuꞌ, hai moliu i hio, ina Kupatongawaꞌ kuasaꞌKuꞌ álána hangaꞌKuꞌ ina rapomahile i humalele duniáꞌ.”

¹⁸ Mewaliꞌ, taisá ntepuꞌu: Pueꞌ Ala mopatongawaꞌ ahiꞌNa i heáná tauna to Napileꞌi, hai Ia woꞌo peisá mopamatuꞌa laluna tauna ntániꞌna. Peisá Nabábehi noꞌonoꞌ mouláꞌ peundeꞌáNa haduduáNa.

Kamabukoꞌna Pueꞌ Ala hai kamaroꞌana laluNa

¹⁹ Mewaliꞌ bateꞌna araheꞌ tauna to ina mekuneꞌ, “Ane Pueꞌ Ala peisá mobábehi apa peá mouláꞌ peundeꞌáNa haduduáNa, moapa riꞌi haneꞌi Ia mosalaꞌi mani bábehiántaꞌ to kadake, láwiꞌ tiꞌara ara haweꞌ hadua to peisá moewaꞌ peundeꞌáNa?”

²⁰ Halalu-halalu, ineeꞌ niuliꞌ noꞌonoꞌ! Tiꞌara hintotoꞌ ane kitaꞌ peá tauna molaluitakeꞌ noꞌonoꞌ i Pueꞌ Ala. Peisá paꞌi kori manguliꞌ i topeteru, “Moapa riꞌi haneꞌiaꞌ nupanodeꞌe?”

²¹ Mole topoteru kori iti peisá mobábehi kori mouláꞌ peundeꞌána haduduána. Hangko i hangkumuꞌ tampoꞌ pólóꞌ, peisá nabábehi rompákáꞌ kori; to maroꞌa ntepuꞌu, hai to rapakeꞌ peá alo-alona.

²² Noꞌonoꞌ woꞌo Pueꞌ Ala makuasaꞌ mobábehi apa peundeꞌáNa i kitaꞌ. Katoꞌuána, ara tauna to kadake to hintotoꞌ ntepuꞌu nakabukoꞌi Pueꞌ Ala bona tongawaꞌ kamakuasaꞌNa. Hintotoꞌ ntepuꞌuheꞌ rahuku duuꞌna i rue-ruena, agáiáná kehapiꞌ noꞌonoꞌ, Pueꞌ Ala sabaraꞌ mani i tauna iti.

²³ Ánti kamasabaraꞌNa, tongawaꞌ peawaꞌna tueꞌNa i tauna to Napileꞌi ina motarima kamaꞌahiꞌNa. Napatimamaꞌámoheꞌ ami, bona molámbiꞌheꞌ gáláꞌraꞌ i lalu peawaꞌna tueꞌNa iti.

²⁴ Kitaꞌ miꞌi deꞌe to Napileꞌi molámbiꞌ pewátiꞌ iti, hai tiꞌara peá hangko i oloꞌkiꞌ toIahudiꞌ, agáiáná araheꞌ woꞌo to Napileꞌi hangko i oloꞌraꞌ to tiꞌara toIahudiꞌ.

²⁵ I lalu sura to naukiꞌ nabiꞌ Hosea hangkoia, Pueꞌ Ala manguliꞌ node: “Tauna to tiꞌara taunáNgkuꞌ hai to tiꞌara moisá ahiꞌKuꞌ, ina Kupileꞌiheꞌ mewaliꞌ taunáNgkuꞌ hai ina Kupatongawaꞌáheꞌ kamaꞌahiꞌKuꞌ.” (Hosea 2:22)

²⁶ “Hangkoia Pueꞌ Ala manguliꞌ i tauna to i hamboloꞌna: ‘Kómu tiꞌarakou taunáNgkuꞌ.’ Agáiáná ina haweꞌ tempóna Pueꞌ Ala to tueꞌ ina manguliꞌ i tauna iti: ‘ÁnáꞌKuꞌmokou!’ ” (Hosea 1:10b)

²⁷ Hai Iesaia woꞌo molaluita hangkoia kana i hangka toSáráeliꞌna node: “Kehapiꞌ miꞌi kahandaꞌraꞌ toSáráeliꞌ nodo kahandaꞌna wungi i wiwi tahiꞌ, agáiáná tiꞌara handaꞌ to ina molámbiꞌ katehómpóꞌ.

²⁸ Tiꞌara piꞌi marue, Pueꞌ ina mobutusi kárá-káráraꞌ upu-upu tauna to i duniáꞌ.” (Iesaia 10:22-23)

²⁹ Ara woꞌo laluita ntániꞌna to naukiꞌ nabiꞌ Iesaia to manguliꞌ node: “Ane ketiꞌarai nakámpáikeꞌ Pueꞌ Ala to Makuasaꞌ bona ara pemuleꞌántaꞌ, ketunamokeꞌ, hibali hai toSodomo hai toGumora hangkoia.” (Iesaia 1:9)

Heáná peá to mepoinálái i Kerisitu, ina natarima Pueꞌ Ala

³⁰ Mewaliꞌ apa mani to peisá ina tauliꞌ? Tauna to tiꞌaraheꞌ toSáráeliꞌ tiꞌara mampeliꞌ rárá bona mewaliꞌheꞌ manótó i peitána Pueꞌ Ala. Agáiáná kehapiꞌ noꞌonoꞌ, araheꞌ bahangapa tauna hangko i oloꞌraꞌ to napakanótó miꞌi Pueꞌ Ala ánti pepoináláiraꞌ, áláraꞌ mewaliꞌ manótó i peitáNa.

³¹ Hai toSáráeliꞌ, to maruemoheꞌ woꞌo mampeliꞌ rárá bona mewaliꞌheꞌ manótó i peitána Pueꞌ Ala moliu pampeuláꞌiraꞌ Paturoꞌna Musa, tiꞌaraheꞌ molámbiꞌ to rapeliꞌ iti.

³² Moapa riꞌi haneꞌi toSáráeliꞌ tiꞌara molámbiꞌ to rapeliꞌ iti? Láwiꞌ mehárungá peheꞌ i bábehiáraꞌ haduduáraꞌ, ia miꞌi, pampeuláꞌiraꞌ Paturoꞌna Musa, tiꞌaraheꞌ mehárungá i Pueꞌ Ala. Tehubeheꞌ i watu, {ia miꞌi Datu Topehómpóꞌ},

³³ nodo to teukiꞌ hangkoia: “Nipehádingi mpakaroꞌa! Kuwoli miꞌi hambuaꞌ watu i Buluꞌ Sio. Handaꞌ tauna ina tehube i watu iti, áláraꞌ tepámbáká. Agáiáná heáná peá to mepoinálái i Hia, tiꞌara ina rapakahiliá láwiꞌ pehárungáraꞌ ina tebukeki.” (Iesaia 28:16)