Biblia Todo Logo
Bìoball air-loidhne

- Sanasan -

Roma 7 - Sura Magasaꞌ: Bahangapa sura Pototowiá to Sae hai Pototowiá to Woꞌu


Tiꞌarapokeꞌ tetakaꞌ i upu-upu Paturoꞌna Musa láwiꞌ mohintuwuꞌmokeꞌ hai Kerisitu

1 Mewaliꞌ halalu-halalu, ina taꞌala pándiriꞌ hangko i áturá topopárentá. Tiꞌara paꞌi niꞌisá, lántuꞌántaꞌ mani tueꞌ, bateꞌna tueꞌkeꞌ mouláꞌ áturá-áturá. Agáiáná ane matemokeꞌ, tiꞌara piꞌi ara kuasaꞌna áturá iti i kitaꞌ.

2 Rápáꞌna, ara hadua towawine to mohamboko. Ane tueꞌ mani toámána, bateꞌna tetakaꞌ i toámána mouláꞌ áturá pohamboko. Agáiáná ane mate miꞌi toámána, tekábáhá miꞌi hangko i áturá to motakaꞌ towawine iti i toámána.

3 Mewaliꞌ, rápáꞌna ane towawine iti mombekádipurá hai tobaleilo ntániꞌna tangaꞌna mani tueꞌ toámána, lempóna towawine iti mebualosi. Agáiáná ane mate miꞌi toámána, tekábáhá miꞌi hangko i áturá pohamboko. Mewaliꞌ ane mampohambokoá tobaleilo ntániꞌna, tiꞌara terekeꞌ mebualosi.

4 Mewaliꞌ halalu-halalu, noꞌonoꞌ woꞌo kitaꞌ: áturá-áturá peisá rapándiriꞌ nodo hambokontaꞌ to hangkoia. Hangkoia tetakaꞌkeꞌ i Paturoꞌna Musa. Agáiáná deꞌe-deꞌe, ane matekeꞌ hingkakani hai Kerisitu, tiꞌarapokeꞌ tetakaꞌ i áturá-áturá iti, láwiꞌ mohintuwuꞌkeꞌ hai Kerisitu to tueꞌ huleꞌ hangko i kapate. Ánti pohintuwuꞌtaꞌ hai Kerisitu, katueꞌtaꞌ mobunduꞌ i Pueꞌ Ala.

5 Hangkoia, tempóna tiꞌara manikeꞌ mepoinálái i Iesu, mampoinao pekeꞌ oaꞌ mobábehi to kadake mouláꞌ peundeꞌána laluntaꞌ, hai apa to rakóntóákeꞌ i Paturoꞌna Musa, napokaiti riꞌi to tapoinao oaꞌ tabábehi. I lalu katueꞌtaꞌ hangkoia, wátántaꞌ tapakeꞌ mobábehi dósá, álána hintotoꞌkeꞌ rahuku mate hai tegáákikeꞌ hangko i Pueꞌ Ala.

6 Agáiáná deꞌe-deꞌe, tekábáhámokeꞌ hangko i Paturoꞌna Musa to motakaꞌkeꞌ hangkoia, láwiꞌ matemokeꞌ hingkakani hai Kerisitu. Mewaliꞌ, tiꞌarapokeꞌ mouláꞌ rárá to sae hai mouláꞌ áturá-áturá to teukiꞌ bona peisákeꞌ mampeuláꞌi peundeꞌána Pueꞌ Ala. Ngkáliꞌna riꞌi deꞌe-deꞌe, mouláꞌkeꞌ rárá to woꞌu hai kuasaꞌna Inao to Magasaꞌ mokale i laluntaꞌ bona peisákeꞌ mengkoruꞌ i Pueꞌ Ala.


Kamadósántaꞌ tongawaꞌ hangko i Paturoꞌna Musa

7 Babilaꞌ ara to ina mekuneꞌ: Ane noꞌonoꞌi, ba áturána Musa kadake? Tiꞌara! Hawaꞌ to napopolumao Musa iti, maroꞌa, láwiꞌ hangko i hawaꞌ iti, taisá apa to rauliꞌ dósá. Ane rápáꞌna tiꞌara ara párentá to manguliꞌ: “Ineeꞌkou mampokaelu apa peá to ara i hángká rángámu,” ketiꞌara kuisá kakadakena lalungkuꞌ hai apa to rauliꞌ, “Ineeꞌ nipokaelu.”

8 Agáiáná i tempóngkuꞌ mohádi párentá to noꞌonoꞌ hangko i Paturoꞌna Musa, liu-liu dósá mokale i lalungkuꞌ, álána mentumbuꞌ mampopengaa pekiri to kadake hai tetámbái riꞌi peundeꞌángkuꞌ morámpu handaꞌ párewá ngkáduniáꞌ. Ane rápáꞌna tiꞌara ara Paturoꞌna Musa to mopakanótó apa to rauliꞌ dósá, ketiꞌara ara kuasaꞌna dósá mopakanawoꞌaꞌ.

9 Hangkoia, hangko tiꞌara mani kuisá Paturoꞌna Musa, kuꞌuliꞌ riꞌi maroꞌa ntepuꞌu katueꞌkuꞌ. Agáiáná i kakuisána paturoꞌ iti, dósá mokale i lalungkuꞌ,

10 álána kuꞌuliꞌ i lalungkuꞌ: hintotoꞌ ntepuꞌu ane rahukuaꞌ mate hai ragáákiaꞌ hangko i Pueꞌ Ala. Katoꞌuána, tunggáiána Paturoꞌna Musa bona molámbiꞌaꞌ katueꞌ to maroꞌa,

11 agáiáná i tempóngkuꞌ mohádi Paturoꞌna Musa, dósá mokale i lalungkuꞌ. Mewaliꞌ ánti Hawaꞌ iti, napakanawoꞌaꞌ dósá, álána hintotoꞌaꞌ rahuku mate hai tegááꞌaꞌ hangko i Pueꞌ Ala.

12 Mewaliꞌ, párentána Pueꞌ Ala to napahaweꞌ Musa bateꞌna magasaꞌ, manótó hai maroꞌa.

13 Babilaꞌ ara to ina mekuneꞌ: Ba Paturoꞌna Musa to maroꞌa iti to mogáákiaꞌ hangko i Pueꞌ Ala? Tiꞌara. Agáiáná, ánti kakuisána Paturoꞌna Musa iti, tetámbái peundeꞌángkuꞌ mobábehi dósá, haneꞌiaꞌ tegááki hangko i Pueꞌ Ala. Hangko i Párentá to maroꞌa iti, tongawaꞌ miꞌi kakadakena dósángkuꞌ.


Tiꞌara tabuku mampeuláꞌi Párentána Pueꞌ Ala láwiꞌ dósá ara i laluntaꞌ

14 Mewaliꞌ halalu-halalu, taisá ntepuꞌu, Párentána Pueꞌ Ala bateꞌna maroꞌa láwiꞌ mentóáꞌ hangko i Inao to Magasaꞌ. Agáiáná kódóꞌ tauna to madósáꞌaꞌ, láwiꞌ napohawiꞌaꞌ dósá.

15 Kupowuli bábehiángkuꞌ haduduángkuꞌ, láwiꞌ bábehiá to maroꞌa to kupoinao kubábehi, tiꞌara riꞌi iti to kubábehi, hai apa to kukáhihiꞌ, iti riꞌi to kubábehi!

16 Agáiáná ane kubábehi bábehiá to kuisá tiꞌara hintotoꞌ hai peundeꞌána Pueꞌ Ala, lempóna kupokana ntepuꞌu katoꞌuna PárentáNa.

17 Mewaliꞌ, katoꞌuána tiꞌara kubábehi to tiꞌara maroꞌa iti ánti peundeꞌángkuꞌ haduduángkuꞌ, agáiáná ánti dósá to mokuasaꞌi lalungkuꞌ.

18 Peundeꞌángkuꞌ, kupoinao mobábehi bábehiá to maroꞌa, agáiáná tiꞌara kubuku, onoꞌ miꞌi haneꞌi kuisá kódóꞌ deꞌe tauna to madósá, tiꞌara ara to maroꞌa i lalungkuꞌ haduduángkuꞌ.

19 Tiꞌara kubábehi apa to maroꞌa mouláꞌ peundeꞌángkuꞌ, agáiáná to paka kubábehi ia miꞌi bábehiá to kadake to tiꞌara kuꞌundeꞌ.

20 Mewaliꞌ ane kubábehi bábehiá to tiꞌara kuꞌundeꞌ, lempóna, tiꞌara kubábehi ánti peundeꞌángkuꞌ haduduángkuꞌ, agáiáná kubábehi ánti dósá to mokuasaꞌi lalungkuꞌ.

21 Iti miꞌi to paka mewaliꞌ i lalu katueꞌkuꞌ: kuꞌundeꞌ mobábehi apa to maroꞌa, agáiáná bábehiá to kadake riꞌi to paka kubábehi.

22 I lalungkuꞌ, kupokana ntepuꞌu apa to teukiꞌ i lalu Párentána Pueꞌ Ala,

23 agáiáná tiꞌara riꞌi iti to kupeuláꞌi, láwiꞌ i lalu katueꞌkuꞌ ara kuasaꞌ to ntániꞌna to monangiaꞌ. I lalungkuꞌ, kuꞌundeꞌ ntepuꞌu mampeuláꞌi Párentána Pueꞌ Ala, agáiáná kuasaꞌ dósá to i lalu katueꞌkuꞌ moewaꞌ peundeꞌángkuꞌ iti, álána nanangiaꞌ dósá hai kupeuláꞌi peundeꞌána lalungkuꞌ to kadake.

24-25 Mewaliꞌ katueꞌkuꞌ node: i lalungkuꞌ kuꞌundeꞌ ntepuꞌu mampeuláꞌi Párentána Pueꞌ Ala, agáiáná nakuasaꞌiaꞌ dósá ánti peundeꞌána lalungkuꞌ to kadake. Hintotoꞌaꞌ rahuku mate hai tegáákiaꞌ hangko i Pueꞌ Ala. Meahiahiꞌ ntepuꞌuaꞌ! Heáná wongkódóꞌá to ina mohómpókiaꞌ hangko i katueꞌkuꞌ deꞌe to nakuasaꞌi dósá? Kutóiá Pueꞌ Ala láwiꞌ Ia to mohómpókiaꞌ hangko i kamasalaꞌkuꞌ deꞌe moliu i kamateNa Pueꞌtaꞌ Iesu Kerisitu!

Bahasa Behoa Shorter Bible © Indonesian Bible Society, 2015.

Indonesian Bible Society
Lean sinn:



Sanasan