Roma 16 - Sura Magasaꞌ: Bahangapa sura Pototowiá to Sae hai Pototowiá to Woꞌu

Tabeá hai paturoꞌ to kahópóꞌána

¹ Deꞌe-deꞌe, ina kupopaisáꞌákou kaheánána Pebe. Ia iti towawine to paka motulungi jemaꞌa to ara i wánuá Kengkerea.

² Kupembiáꞌ bona nitarima mpakaroꞌa i lalu hangaꞌna Pueꞌ Iesu, láwiꞌ ia halalu hampepepoináláimi. Hintotoꞌ nibábehi noꞌonoꞌ ánti peuláꞌmi i Iesu. Ane ara apa-apa to naparaluu, kupembiáꞌ bona nitulungi, láwiꞌ handaꞌ woꞌo tauna to natulungi, tepasuaꞌ kódóꞌ.

³ Tabeángkuꞌ nipahaweꞌ i Pirikila hai Akila. Tohamboko iti rángángkuꞌheꞌ to mampopolumao woꞌo bágóꞌna Kerisitu Iesu.

⁴ Hangkoia, hira hungkuꞌntoheꞌ ina rapapate i tempóraꞌ mampelae katueꞌkuꞌ. Ánti petulungiraꞌ iti, kuꞌuliꞌ handaꞌ kamaroꞌana, hai tiꞌara kódóꞌ peá, agáiáná upu-upu toSarani to tiꞌaraheꞌ toIahudiꞌ manguliꞌ woꞌo handaꞌ kamaroꞌana i hira.

⁵ Nipahaweꞌ woꞌo tabeángkuꞌ i halalu hampepepoináláintaꞌ to hirámpu i támbiraꞌ Pirikila hai Akila. Tabeá i Epenetu to kupokaꞌahiꞌ. Ia miꞌi to rungu-runguna mepoinálái i Kerisitu i poropensi Asia.

⁶ Hai tabeá woꞌo i Maria. Rumihi pobágóꞌna motulungikou.

⁷ Nipahaweꞌ woꞌo tabeángkuꞌ i Andoroniku hai Iunia. Hira iti, hangka toIahudiꞌkuꞌheꞌ to ratarungku hingkakani hai kódóꞌ. Hai hira iti rabiláꞌ ntepuꞌu upu-upu surona Kerisitu. Maruemoheꞌ mepoinálái i Kerisitu. Hangko tiꞌara maniaꞌ mepoinálái i Kerisitu, ambiꞌraꞌ miꞌi mepoinálái.

⁸ Tabeá i Ampiatu to kupokaꞌahiꞌ i lalu hangaꞌna Pueꞌ Iesu.

⁹ Tabeá i Ubanu, rángángkiꞌ mampopolumao bágóꞌna Kerisitu. Tabeá woꞌo i Sataki to kupokaꞌahiꞌ.

¹⁰ Tabeá i Apele to molámbiꞌ handaꞌ kapári, agáiáná kehapiꞌ noꞌonoꞌ, meuláꞌ mani i Kerisitu. Tabeá i Aritobulu hantámbi hai upu-upu to toroꞌ i támbina.

¹¹ Tabeá i Herodio, hangka toIahudiꞌkuꞌ. Tabeángkuꞌ woꞌo i Nakisu hantámbi hai upu-upu halalu hampepepoináláintaꞌ to toroꞌ i támbina.

¹² Tabeá i Tiripena hai Tiriposa. Towawine to roduaheꞌ iti, mampopolumaoheꞌ ntepuꞌuheꞌ bágóꞌna Pueꞌ. Tabeá woꞌo i Perisi to kupokaꞌahiꞌ. Ia mobágóꞌ matimi mampopolumao bágóꞌna Pueꞌ.

¹³ Tabeá i Rupuꞌ hai i hinána to kurekeꞌ nodo inángkuꞌ. Rupuꞌ iti to madota ntepuꞌu mampopolumao bágóꞌna Pueꞌ.

¹⁴ Nipahaweꞌ tabeángkuꞌ i Asikiritu, Pelego, Heme, Patoroba, Herema hai upu-upu halalu hampepepoináláintaꞌ to hirámpu hingkakani hai hira.

¹⁵ Tabeá i Pilologu, Iulia, Nereu hai ádina towawine, hai tabeá woꞌo i Olimpa hai upu-upu halalu hampepepoináláintaꞌ to hirámpu hingkakani hai hira.

¹⁶ Mombetabe-tabemokou hangko i lalumi ntepuꞌu. Upu-upu jemaꞌa ieneꞌ mopakatu tabeáraꞌ haweꞌ i kómu.

¹⁷ Halalu-halalu, kupembiáꞌ ntepuꞌu i kómu: hangaa-ngaa maingáꞌ-ingáꞌkou i tauna to mopaꞌara posisalaꞌ i oloꞌraꞌ tauna to mepoinálái. Mampoinaoheꞌ mopakanawoꞌkou moliu paturoꞌraꞌ to mosisalaꞌ hai paturoꞌ to rapaturoꞌámokou. Nikaraohiheꞌ tauna to noꞌonoꞌ!

¹⁸ Láwiꞌ tauna to noꞌonoꞌ bábehiáraꞌ, tiꞌaraheꞌ mampopolumao bágóꞌna Pueꞌtaꞌ Kerisitu, agáiáná mouláꞌ peheꞌ peundeꞌána laluraꞌ haduduáraꞌ. Mopamaluluheꞌ laluraꞌ tauna moliu laluitaraꞌ, haneꞌi mopakanawoꞌheꞌ tauna to tiꞌara maniheꞌ moisá apa-apa.

¹⁹ Agáiáná ane kómu, handaꞌ miꞌi tauna to moisá pengkoruꞌmi i paturoꞌna Pueꞌ Ala. Góeꞌaꞌ i kakuhádina bábehiámi iti. Peundeꞌángkuꞌ bona niꞌisá ntepuꞌu i lalu katueꞌmi apa to maroꞌa hai apa to tiꞌara maroꞌa.

²⁰ Pueꞌ Ala to mampoweꞌikeꞌ katinda lalu, Ia to ina moropuꞌ kuasaꞌna Datu Tokadake, hai Ia mampoweꞌikeꞌ kuasaꞌ monangi Datu Tokadake iti. Mekakaeaꞌ i Pueꞌ Ala bona nawátiꞌkou oaꞌ Pueꞌtaꞌ Iesu Kerisitu. Ami!

²¹ Timotiu rángángkuꞌ mobágóꞌ, mopahaweꞌ tabeána i kómu halalu hampepepoináláingkiꞌ to toroꞌ i Roma. Noꞌonoꞌ woꞌo Lukiu, Iaso hai Sosipate, hangka toIahudiꞌkuꞌheꞌ.

²² Kódóꞌ Teretiu to mewaliꞌ topoukiꞌna Paulu sura deꞌe. I lalu hangaꞌna Pueꞌ Iesu, mopahaweꞌaꞌ woꞌo tabeángkuꞌ haweꞌ i kómu.

²³ Gaiu woꞌo mopahaweꞌ tabeána. Kódóꞌ Paulu, toroꞌaꞌ i támbina, hai jemaꞌa i kótá deꞌe pakaheꞌ hirámpu ieneꞌ. Eratu to mokádipurá dóiꞌ kótá, hai halaluntaꞌ woꞌo Kuartu mopahaweꞌ tabeáraꞌ. [

²⁴ Ahiꞌ to mahile hangko i Pueꞌtaꞌ Iesu Kerisitu mamporángákou upu-upu. Ami.]

²⁵ Tatóiá miꞌi Pueꞌ Ala, láwiꞌ Ia to makuasaꞌ mopakaróhó pepoináláimi moliu Ngkóráꞌ Marasa to kupahaweꞌákou, bona niꞌisá kaheánána Iesu Kerisitu. I átuna miꞌi parena, Ngkóráꞌ Marasa mokana i Iesu Kerisitu iti tewuniángi.

²⁶ Agáiáná deꞌe-deꞌe Pueꞌ Ala to tueꞌ duuꞌna i rue-ruena, mopatongawaꞌámokeꞌ tunggáiáNa, onoꞌ haneꞌi taisá miꞌi lempóna apa to raukiꞌ nabiꞌ-nabiꞌ hangkoia. TunggáiáNa iti rapahaweꞌ i tauna i humalele duniáꞌ hiolaꞌ hai párentáNa, bona upu-upu tauna peisá mepoinálái hai mengkoruꞌ i Hia.

²⁷ Ia miꞌi to moisá upu-upuna. Ia miꞌi to tiꞌara ara kahibaliána. Tatóiá miꞌi Pueꞌ Ala duuꞌna i rue-ruena ánti bágóꞌna Iesu Kerisitu. Ami! Hangko i kódóꞌ, PAULU