Roma 11 - Sura Magasaꞌ: Bahangapa sura Pototowiá to Sae hai Pototowiá to Woꞌu

Araheꞌ toSáráeliꞌ to napopentárá Pueꞌ Ala bona mewaliꞌ taunáNa

¹ Mewaliꞌ, kupekuneꞌ: {ánti pesápuákaraꞌ toSáráeliꞌ i Pueꞌ Ala} ba Pueꞌ Ala mosápuákaꞌangkaiꞌ woꞌo upu-upu toSáráeliꞌ? Tiꞌara! {Tongawaꞌ hangko i katueꞌkuꞌ haduduángkuꞌ.} Kódóꞌ deꞌe toSáráeliꞌaꞌ, pemuleꞌánaꞌaꞌ Burahima hangko i toBenami, {ánáꞌna Iako, hai kódóꞌ deꞌe napileꞌi Pueꞌ Ala mewaliꞌ huoꞌáNa}.

² Pueꞌ Ala tiꞌara mosápuáka upu-upu toSáráeliꞌ to Napileꞌi miꞌi hangko i rungu-runguna. Hangaa-ngaa nibuhinao tuntukáná nabiꞌ Eliá to teukiꞌ i lalu Sura Magasaꞌ. Tempóna Eliá mosalaꞌi toSáráeliꞌ i lindoꞌna Pueꞌ Ala, nauliꞌ:

³ “Ó Pueꞌ, hira mopapate nabiꞌ-nabiꞌMu, hai mogeroheꞌ woꞌo paintuá popenómbángkiꞌ i Hio. Bateꞌna perái kódóꞌ to tueꞌ, hai rapeliꞌaꞌ woꞌo ina rapapate!” (1 Datu-datu 19:10,14)

⁴ Apa pehániꞌna Pueꞌ Ala? Nauliꞌ node: “{Ineeꞌ nupekiri haduduámu perái,} láwiꞌ ara maniheꞌ pitu sábuna tauna to Kupopentárá. Hira iti, bateꞌna taunáNgkuꞌ, láwiꞌ tiꞌaraheꞌ haweꞌ hangkani molingkudu menómbá i ánitu to rahangaꞌ Baꞌal.”

⁵ Noꞌonoꞌ woꞌo deꞌe-deꞌe. Araheꞌ woꞌo toSáráeliꞌ to mepoinálái láwiꞌ napileꞌimoheꞌ Pueꞌ Ala ánti kabulána laluNa,

⁶ tiꞌara ánti kamaroꞌana bábehiáraꞌ. Ane rápáꞌna Napileꞌiheꞌ bona moháwángi bábehiáraꞌ to maroꞌa, lempóna tiꞌaraheꞌ Napileꞌi ánti kabulána laluNa.

⁷ Ane hantóiꞌ peheꞌ toSáráeliꞌ to napileꞌi Pueꞌ Ala, haneꞌiheꞌ mewaliꞌ manótó i peitáNa, noumbámoheꞌ to ntániꞌna? Mampeliꞌheꞌ rárá bona mewaliꞌheꞌ manótó i peitána Pueꞌ Ala, agáiáná to rapeliꞌ iti tiꞌara ralámbiꞌ láwiꞌ matuꞌa laluraꞌ hai mentibongoꞌheꞌ i pekióꞌna Pueꞌ,

⁸ nodo to teukiꞌ hangkoia i lalu Sura Magasaꞌ: “Pueꞌ Ala mopatuhu miꞌi laluraꞌ, hai Natuko mátáraꞌ bona tiꞌaraheꞌ moisá rárá to toꞌu. Talingaraꞌ woꞌo Natuko bona haweꞌ deꞌe-deꞌe, tiꞌaraheꞌ mohádi bámbári to toꞌu.” (Pohuleki 29:4, Iesaia 29:10)

⁹ Kubuhinao woꞌo laluitana Datu Daudiꞌ hangkoia kana i hangka toIahudiꞌna to mewaliꞌ ewálina. Nauliꞌ Daudiꞌ: “Ó Pueꞌ, hampóáꞌworia posusa kagóeꞌraꞌ iti ina mopakanawoꞌheꞌ, haneꞌi molámbiꞌheꞌ rugiꞌ hai pehuku, bona teháwángi bábehiáraꞌ to kadake.

¹⁰ Nupamakáindi pampeitáraꞌ bona tiꞌaraheꞌ peisá meita. Nupamapáriheꞌ duuꞌna maꞌángkárá pehádiraꞌ mantódihá kapári.” (Sura Petóiá 69:23-24)

ToSáráeliꞌ manawoꞌ ánti pesápuákaraꞌ, hai tauna ntániꞌna molámbiꞌ katehómpóꞌ

¹¹ Mewaliꞌ, kupekuneꞌ wopiꞌi: ánti katiꞌáráraꞌ mepoinálái i Iesu, haneꞌi kahandaꞌraꞌ toSáráeliꞌ ina tegááꞌheꞌ hangko i Pueꞌ Ala, ba iti molempónga tiꞌara piꞌi ara pehárungáraꞌ? Tiꞌara! Tunggáiána Pueꞌ Ala tiꞌara noꞌonoꞌ. Ánti peꞌewaꞌraꞌ toSáráeliꞌ iti, tauna to tiꞌaraheꞌ toSáráeliꞌ peisáheꞌ molámbiꞌ katehómpóꞌ bona toSáráeliꞌ ina mahiniꞌheꞌ i katehómpóꞌ to ralámbiꞌ iti álána ina mepoináláiheꞌ woꞌo.

¹² Ánti posápuákaraꞌ Pueꞌ Iesu, handaꞌ toSáráeliꞌ tiꞌara molámbiꞌ pewátiꞌ to bukeꞌ-bukeꞌ hangko i Pueꞌ Ala, agáiáná handaꞌ tauna to tiꞌaraheꞌ toSáráeliꞌ i humalele duniáꞌ molámbiꞌ pewátiꞌ iti. Mewaliꞌ ane morasiꞌheꞌ tauna to tiꞌara toSáráeliꞌ láwiꞌ toSáráeliꞌ tiꞌara mepoinálái, pelumbuꞌna mani ane mepoináláiheꞌ toSáráeliꞌ. Ina morasiꞌ ntepuꞌu tauna i duniáꞌ ane toSáráeliꞌ menosoꞌ hai mesuleꞌheꞌ huleꞌ i Pueꞌ Ala!

¹³ Kómu to tiꞌarakou toIahudiꞌ, bona niꞌisá: kódóꞌ deꞌe surona Pueꞌ Iesu to Nahuoꞌ mopahaweꞌ Ngkóráꞌ Marasa i kómu to tiꞌara toIahudiꞌ. Bágóꞌ deꞌe kupomahile ntepuꞌu onoꞌ haneꞌi kupopolumao mpakaroꞌa,

¹⁴ láwiꞌ kuhárungá kaꞌina áráraꞌ hangka toIahudiꞌkuꞌ to moita tauna to tiꞌaraheꞌ toIahudiꞌ to mepoinálái i Pueꞌ Iesu álána mahiniꞌheꞌ, hai rapoinao woꞌo mepoinálái i Hia haneꞌi ara to molámbiꞌ katehómpóꞌ.

¹⁵ Ánti kanasápuákana Pueꞌ Ala toIahudiꞌheꞌ iti, tebungkáhi miꞌi rárá i upu-upu tauna i duniáꞌ bona mohintuwuꞌheꞌ hai Pueꞌ Ala. Mewaliꞌ, ina morasiꞌ ntepuꞌuheꞌ tauna i duniáꞌ ane toIahudiꞌ mepoinálái i Iesu hai Pueꞌ Ala motarimaheꞌ huleꞌ. I tempó iti, peisáheꞌ rapándiriꞌ nodo tomate to tueꞌ huleꞌ.

Pándiriꞌ hangko i kau saitu

¹⁶ Ane rótiꞌ to rungu-runguna wali magasaꞌ miꞌi hai rapopenómbá i Pueꞌ Ala, lempóna rótiꞌ to upu-upuna mewaliꞌ woꞌo magasaꞌ. Noꞌonoꞌ woꞌo, ane kálándá maroꞌa, dáꞌána woꞌo ina tueꞌ maroꞌa láwiꞌ mentóáꞌ hangko i kálándána. {Lempóna: toIahudiꞌ ina mewaliꞌ wopiꞌi taunána Pueꞌ Ala, láwiꞌ toioruraꞌ woꞌo taunána Pueꞌ Ala.}

¹⁷ ToIahudiꞌ peisáheꞌ rapándiriꞌ nodo hampóꞌá kau saitu to rakádipurá. Dáꞌána hanggááꞌ nahapeki Pueꞌ Ala, hai i pohapekiána iti, Napatakaꞌ dáꞌá kau saitu to tiꞌara rakádipurá, bona dáꞌángkau iti tueꞌ hangko i kálándá kau to rakádipurá. Dáꞌángkau to Napopentakaꞌ iti, ia miꞌi kómu to tiꞌarakou toIahudiꞌ.

¹⁸ Agáiáná halalu-halalu, ineeꞌkou mampepemahile. Ineeꞌkou mosalaꞌi toIahudiꞌ to rapándiriꞌ nodo dáꞌángkau to rahapeki iti. Hangaa-ngaa nibuhinao: kómu rapándiriꞌ nodo dáꞌángkau to rapatakaꞌ, hai tiꞌara dáꞌángkau to mopatueꞌ kálándá, ngkáliꞌna riꞌi kálándá to mopatueꞌ dáꞌángkau. {Lempóna: kómu to tiꞌarakou toIahudiꞌ molámbiꞌ pewátiꞌ hangko i toIahudiꞌ, tiꞌara toIahudiꞌ to molámbiꞌ pewátiꞌ hangko i kómu!}

¹⁹ Babilaꞌ ara to ina manguliꞌ, “Dáꞌángkau iti rahapeki bona peisáꞌangkaiꞌ rapatakaꞌ ionoꞌ.”

²⁰ Halalu-halalu, upu-upuna iti toꞌu, agáiáná hangaa-ngaa nibuhinao: hira ratibe láwiꞌ tiꞌaraheꞌ mepoinálái i Iesu. Kómu rapatakaꞌ, láwiꞌ mepoináláikou. Mewaliꞌ ineeꞌkou mampepemahile, ngkáliꞌna riꞌi hangaa-ngaa mengkaiwóiꞌkou hai maingáꞌ-ingáꞌkou, {láwiꞌ ane mosápuákakou Pueꞌ Iesu to mohómpóki dósámi, kómu woꞌo ina Nahapeki.}

²¹ Ane Pueꞌ Ala motibe toIahudiꞌ to peisá rapándiriꞌ nodo dáꞌángkau to mentakaꞌ i wátána kau hangko i rungu-runguna, apa mani kómu to rapatakaꞌ pekou i bókóꞌ.

²² Mewaliꞌ taisá ntepuꞌu kamaꞌahiꞌna Pueꞌ Ala, hai taisá woꞌo karumihina pehukuNa. Hintotoꞌ miꞌi kaNahukuraꞌ tauna to mesápuáka, agáiáná Napokaꞌahiꞌkou, asalaꞌ mepoináláikou oaꞌ i kamaꞌahiꞌNa. Ane tiꞌarakou mepoinálái, ina Natibekou woꞌo!

²³ Ane toIahudiꞌ to mosápuáka Iesu menosoꞌheꞌ hangko i pesápuákaraꞌ, hira ina napopentakaꞌheꞌ huleꞌ Pueꞌ Ala, láwiꞌ ara kuasaꞌNa mopatakaꞌheꞌ huleꞌ.

²⁴ Ane kómu to rapándiriꞌ nodo dáꞌángkau hangko i kau to tiꞌara rakádipurá, peisá rapopentakaꞌ i wátá kau to rakádipurá, apa mani dáꞌángkau hangko i kau to rakádipurá peisá rapopentakaꞌ huleꞌ, láwiꞌ dáꞌánaheꞌ ami kau iti.

Kamaꞌahiꞌna Pueꞌ Ala i upu-upu tauna

²⁵ Halalu-halalu! Kupoinao kuhángáꞌákou apa tunggáiána Pueꞌ Ala to tewuniángi hangkoia i tauna. Kuhángáꞌáꞌákou deꞌe bona ineeꞌkou mampekiri kómu peá to mapánde. Bona niꞌisá: deꞌe-deꞌe hanggááꞌ toSáráeliꞌ matuꞌa mani laluraꞌ, agáiáná kamatuꞌana laluraꞌ iti ina mewaliꞌ duuꞌna upu-upu tauna to tiꞌara toIahudiꞌ to napakanótó miꞌi Pueꞌ Ala mewaliꞌ taunáNa, ina mepoináláiheꞌ.

²⁶ Hangko ionoꞌ, handaꞌ toSáráeliꞌ ina tehómpóki hangko i huku dósáraꞌ. Ina tebukeki apa to teukiꞌ hangkoia i lalu Sura Magasaꞌ. Nauliꞌ Pueꞌ Ala node: “Hangkani tempó, ina mesupaꞌ Topehómpóꞌ hangko i Sio, hai Ia ina mopakaraoꞌ upu-upu salaꞌ hangko i pemuleꞌána Iako.” (Iesaia 59:20-21)

²⁷ “Deꞌe miꞌi dándiNgkuꞌ i hira: i tempó iti, ina Kuámpungi dósáraꞌ.” (Ieremia 31:33-34)

²⁸ Deꞌe-deꞌe, handaꞌ toIahudiꞌ mewaliꞌ maniheꞌ ewálina Pueꞌ Ala, láwiꞌ tiꞌaraheꞌ mau mampoinálái Ngkóráꞌ Marasa. Mewaliꞌ, morasiꞌkou to tiꞌara toIahudiꞌ to mepoinálái. Agáiáná kehapiꞌ noꞌonoꞌ, toIahudiꞌ iti bateꞌraꞌ napokaꞌahiꞌ oaꞌ Pueꞌ Ala, láwiꞌ hira miꞌi to Napileꞌi hangkoia hiolaꞌ hai dándiNa i toioruraꞌ.

²⁹ Ane Pueꞌ Ala mopileꞌi hai mowátiꞌ tauna, tiꞌara Nabáliki pekiriNa, hai pewátiꞌ iti tiꞌara ina Nadiiꞌ huleꞌ.

³⁰ Kómu to tiꞌarakou toIahudiꞌ, hangkoia tiꞌarakou mengkoruꞌ i Pueꞌ Ala, agáiáná deꞌe-deꞌe motarimamokou kamaꞌahiꞌna Pueꞌ Ala ánti pesápuákaraꞌ toIahudiꞌ.

³¹ Noꞌonoꞌheꞌ woꞌo toIahudiꞌ. Deꞌe-deꞌe handaꞌheꞌ to tiꞌara mengkoruꞌ i Pueꞌ Ala, onoꞌ miꞌi haneꞌi kómu to tiꞌarakou toIahudiꞌ motarimamokou kamaꞌahiꞌna Pueꞌ Ala. Agáiáná hangkani tempó, hira iti ina motarimaheꞌ huleꞌ kamaꞌahiꞌna Pueꞌ Ala hibali hai kómu.

³² Ánti katiꞌárántaꞌ mengkoruꞌ i Pueꞌ Ala, onoꞌ miꞌi haneꞌi nodokeꞌ to ratarungku. Pueꞌ Ala mobábehi noꞌonoꞌ bona Ia peisá mopatongawaꞌ kabulána laluNa i kitaꞌ upu-upu.

Petóiá i Pueꞌ Ala

³³ Mahile ntepuꞌu kamaroꞌana Pueꞌ Ala! Kaladu ntepuꞌu pekiriNa hai Naisá upu-upuna! Heáná paꞌi tauna to peisá mopáresáꞌ pobutusiNa? Heáná paꞌi tauna to moisá upu-upu tunggáiána bábehiáNa? Teukiꞌ woꞌo hangkoia i Sura Magasaꞌ:

³⁴ “Heáná paꞌi tauna to moisá pekirina Pueꞌ Ala? Hai heáná paꞌi to peisá mopaturoꞌ?” (Iesaia 40:13)

³⁵ “Heáná paꞌi to peisá mampoweꞌi ba apa-apa i Pueꞌ Ala bona Pueꞌ Ala hangaa-ngaa moháwángi woꞌo i hia? Tiꞌara ara haweꞌ hadua.” (Aiubi 41:11)

³⁶ Láwiꞌ upu-upuna to ara, Pueꞌ Ala to mampopewaliꞌ hai Ia to mokuasaꞌi, bona Ia peá to rapomahile. Tatóiá miꞌi Pueꞌ Ala duuꞌna i rue-ruena! Ami!