Roma 10 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Halalu hampepepoináláingkuꞌ! Kupoinao ntepuꞌu bona hangka toSáráeliꞌkuꞌ tekábáháheꞌ hangko i huku dósáraꞌ. Onoꞌ miꞌi haneꞌi hangko i lalungkuꞌ ntepuꞌu kupekakaeáheꞌ oaꞌ i Pueꞌ Ala.

² Kuisá maróhó ntepuꞌu peundeꞌáraꞌ mengkoruꞌ i Pueꞌ Ala, láwiꞌ kusabiki miꞌi katueꞌraꞌ. Agáiáná tiꞌaraheꞌ moisá rárá to manótó to napatimama Pueꞌ Ala.

³ Ánti katiꞌárána raisá mampeliꞌ rárá to toꞌu bona mewaliꞌheꞌ manótó i peitána Pueꞌ Ala, raundeꞌ mani mouláꞌ ráráraꞌ haduduáraꞌ, onoꞌ miꞌi haneꞌi tiꞌaraheꞌ mouláꞌ rárá to napakanótó Pueꞌ Ala.

⁴ Upu-upu tunggáiána Pueꞌ Ala to teukiꞌ i Paturoꞌna Musa, tebukeki miꞌi moliu Kerisitu, onoꞌ miꞌi haneꞌi, heáná peá to mepoinálái i Iesu Kerisitu, ina mewaliꞌ manótó i peitána Pueꞌ Ala.

Heáná peá to mepoinálái i Iesu, tehómpóki hangko i huku dósáraꞌ

⁵ Ara laluitana nabiꞌ Musa hangkoia to manguliꞌ node: “Heáná peá to mampeuláꞌi upu-upu to teukiꞌ i lalu Párentána Pueꞌ Ala, ia miꞌi to ina molámbiꞌ katueꞌ to maroꞌa.” (Áturá Menómbá 18:5)

^6-7 Agáiáná ara mani laluitana Musa to manguliꞌ: deꞌe-deꞌe peisákeꞌ mewaliꞌ manótó i peitána Pueꞌ Ala ánti pepoináláintaꞌ. Teukiꞌ node: “Ineeꞌ niuliꞌ i lalumi: ‘Heáná to hangaa-ngaa mengkaheꞌ lao i surugáꞌ, hai heáná woꞌo to hangaa-ngaa mendáulu lao i katoroꞌá tomate?’ ” (Pohuleki 30:12) Lempóna: tiꞌarakeꞌ paraluu mengkaheꞌ lao i surugáꞌ mampeliꞌ Kerisitu, láwiꞌ Kerisitu mendáulu miꞌi mai i kitaꞌ. Tiꞌara woꞌo taparaluu mendáulu lao i katoroꞌá tomate mampeliꞌ Kerisitu, láwiꞌ Kerisitu tueꞌ huleꞌ hangko i oloꞌraꞌ tomate.

⁸ Láwiꞌ ara teukiꞌ node: “Ngkóráꞌna Pueꞌ hungkuꞌ ntepuꞌu i kómu. Ngkóráꞌ iti peisá nipailalu hai peisá woꞌo nipahaweꞌ i tauna ntániꞌna.” (Pohuleki 30:12-14) Ngkóráꞌ to kipahaweꞌ i upu-upu tauna iti, ia miꞌi bámbári pepoinálái:

⁹ Ane nipangákuꞌ i lindoꞌna tauna ntániꞌna: “Iesu ia miꞌi Pueꞌ,” hai ane nipoinálái i lalumi Pueꞌ Ala mopatueꞌ huleꞌ Iesu hangko i kapate, bateꞌna ina tehómpókikou hangko i huku dósámi.

¹⁰ Ánti pepoináláintaꞌ i Iesu to hangko i laluntaꞌ ntepuꞌu, onoꞌ miꞌi haneꞌi narekeꞌmokeꞌ Pueꞌ Ala manótó i peitáNa. Hai ánti katapangákuꞌna miꞌi Iesu, onoꞌ miꞌi haneꞌi tehómpókimokeꞌ hangko i huku dósántaꞌ.

¹¹ I lalu Sura Magasaꞌ teukiꞌ node: “Heáná peá to mepoinálái i Hia, pehárungáraꞌ ina tebukeki.” (Iesaia 28:16)

¹² To teukiꞌ iti, bateꞌna kana i upu-upu tauna, láwiꞌ tiꞌara ara posisalaꞌna toIahudiꞌ hai tauna to tiꞌara toIahudiꞌ. Hadua peá Pueꞌtaꞌ, hai mahile ahiꞌNa i upu-upu tauna to membiáꞌ tulungi i Hia bona tehómpókiheꞌ.

¹³ Láwiꞌ i lalu Sura Magasaꞌ teukiꞌ node: “Heáná peá to meraruaꞌ i Pueꞌ, bateꞌna tehómpókiheꞌ hangko i huku dósáraꞌ.” (Ioeli 2:32)

Kehapiꞌ toIahudiꞌ mohádi Ngkóráꞌ Marasa, agáiáná handaꞌheꞌ to mosápuáka Pueꞌ Ala

¹⁴ Agáiáná noumbá miꞌi paꞌi kameraruaꞌraꞌ i Pueꞌ ane tiꞌara maniheꞌ mepoinálái? Noumbá miꞌi woꞌo kaꞌina mepoináláiraꞌ i Pueꞌ, ane tiꞌara maniheꞌ mohádi Ngkóráꞌ Marasa? Noumbá miꞌi woꞌo kaꞌina mohádiraꞌ Ngkóráꞌ Marasa, ane tiꞌara ara tauna to mopahaweꞌáheꞌ?

¹⁵ Hai noumbá miꞌi paꞌi kaꞌina rapahaweꞌna, ane tiꞌara ara tauna to nahuoꞌ Pueꞌ Ala? Nodo to teukiꞌ hangkoia i lalu Sura Magasaꞌ: “Maroꞌa ntepuꞌu kahaweꞌraꞌ tauna to moánti bámbári to maroꞌa!” (Iesaia 52:7)

¹⁶ Ara miꞌi tauna to rahuoꞌ moánti Ngkóráꞌ Marasa, agáiáná tiꞌara upu-upu tauna motarima Ngkóráꞌ Marasa iti. Ara laluitana nabiꞌ Iesaia hangkoia to manguliꞌ: “Pueꞌ, heáná paꞌi to mepoinálái i bámbári to kipahaweꞌ?” (Iesaia 53:1)

¹⁷ Mewaliꞌ, tauna hangaa-ngaa mohádi sieruꞌ Ngkóráꞌ Marasa, hangko peisáraheꞌ mepoinálái. Hai Ngkóráꞌ Marasa iti ia miꞌi bámbári kana i Kerisitu.

¹⁸ Mewaliꞌ kupekuneꞌ: Ba Ngkóráꞌ Marasa iti tiꞌara mani rahádi toSáráeliꞌ? Manótó miꞌi karahádina, láwiꞌ i lalu Sura Magasaꞌ teukiꞌ node: “Bámbári iti tehawuka miꞌi i humalele duniáꞌ. Ngkóráꞌ iti rapahaweꞌ miꞌi i upu-upu tauna.” (Sura Petóiá 19:5)

¹⁹ Mewaliꞌ mekuneꞌaꞌ: Ba toSáráeliꞌ tiꞌaraheꞌ moisá tunggáiána Pueꞌ Ala iti? Raisá miꞌi, láwiꞌ hira miꞌi to rungu-runguna mohádi laluitana Pueꞌ Ala to napahaweꞌ moliu nabiꞌ Musa hangkoia, to manguliꞌ node: “Kómu toSáráeliꞌ, ina Kupamahiniꞌkou i kamoitami ahiꞌKuꞌ i tauna to tiꞌaraheꞌ toSáráeliꞌ. Ina nipokóiꞌ inao i kamoitami pekádipuráNgkuꞌ i tauna to tiꞌaraꞌAꞌ moisá hangkoia.” (Pohuleki 32:21)

²⁰ Hai pebáiꞌ ntepuꞌu nabiꞌ Iesaia i kamopahaweꞌna ngkóráꞌna Pueꞌ Ala to manguliꞌ node: Nauliꞌ Pueꞌ Ala: “Tauna to tiꞌaraꞌAꞌ mampeliꞌ, hira riꞌi to molámbiꞌAꞌ. Hai Kupatongawaꞌámoheꞌ kaheánáNgkuꞌ i tauna to tiꞌaraꞌAꞌ mokióꞌ.” (Iesaia 65:1)

²¹ Agáiáná kana i toSáráeliꞌ, Pueꞌ Ala manguliꞌ node: “Kehapiꞌ maruemoheꞌ Kukióꞌ tauna bona mesuleꞌheꞌ i Kódóꞌ, agáiáná hira tiꞌaraheꞌ mau, láwiꞌ matuꞌa oaꞌ laluraꞌ.” (Iesaia 65:2)