Roma 1 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Sura deꞌe hangko i kódóꞌ Paulu, huoꞌána Iesu Kerisitu, to Napileꞌi mewaliꞌ suroNa moánti Ngkóráꞌ Marasa to hangko i Pueꞌ Ala.

² Hangkoia, hangko tiꞌara mani Iesu haweꞌ i duniáꞌ, Pueꞌ Ala modándi miꞌi moliu nabiꞌ-nabiꞌ mokana i Ngkóráꞌ Marasa, hai iti to teukiꞌ i lalu Sura Magasaꞌ.

³ Ngkóráꞌ Marasa iti kana i Ánáꞌna Pueꞌ Ala, Pueꞌtaꞌ Iesu Kerisitu. Mouláꞌ karapoánákaNa, Ia tauna, hadua pemuleꞌána Datu Daudiꞌ.

⁴ Agáiáná Iesu Ia miꞌi woꞌo Ánáꞌna Pueꞌ Ala, hai Ia magasaꞌ hibali hai Pueꞌ Ala. Upu-upuna iti tongawaꞌ, láwiꞌ Pueꞌ Ala mopatueꞌ huleꞌ hangko i kapate. Ia miꞌi Pueꞌtaꞌ Iesu Kerisitu!

⁵ Ánti kaꞌIesuna, Pueꞌ Ala mampoweꞌiaꞌ pewátiꞌ mahile, láwiꞌ Napileꞌiaꞌ mewaliꞌ suroNa, bona kódóꞌ to moánti Ngkóráꞌ Marasa i humalele duniáꞌ i tauna to tiꞌara toIahudiꞌ, bona mepoináláiheꞌ hai mengkoruꞌheꞌ i Pueꞌ Iesu, duuꞌna hangaꞌna Iesu rapomahile.

⁶ Noꞌonoꞌ woꞌo kómu toSarani to i kótá Roma. Kahandaꞌámi tiꞌarakou toIahudiꞌ, agáiáná Pueꞌ Ala mokióꞌkou woꞌo mewaliꞌ taunána Iesu Kerisitu.

⁷ Onoꞌ miꞌi haneꞌi kupakatu sura deꞌe i upu-upu toSarani to ara i Roma. Pueꞌ Ala mampokaꞌahiꞌkou hai mokióꞌkou mewaliꞌ taunáNa to magasaꞌ. Mekakaeaꞌ i Pueꞌ Ala Umántaꞌ hai i Pueꞌ Iesu Kerisitu bona Nawátiꞌkou hangko i kabulána laluNa hai mampoweꞌikou roꞌa ngkatueꞌ.

Paulu mampoinao moweoꞌheꞌ toSarani to ara i Roma

⁸ Ioru-oru, kuꞌuliꞌ handaꞌ kamaroꞌana i Pueꞌ Ala ánti kakómuna halalu-halalu. Peisá kuꞌuliꞌ noꞌonoꞌ ánti pewátiꞌ to talámbiꞌ hangko i Iesu Kerisitu. Kuꞌuliꞌ handaꞌ kamaroꞌana láwiꞌ kamaróhóna pepoináláimi i Pueꞌ Iesu tebámbári i humalele duniáꞌ.

⁹ Hangko i lalungkuꞌ ntepuꞌu mampopolumaoaꞌ bágóꞌ to naweꞌiaꞌ Pueꞌ Ala. Bágóꞌkuꞌ iti, mopahaweꞌ Ngkóráꞌ Marasa mokana i ÁnáꞌNa. Hai Pueꞌ Ala moisá ntepuꞌu lalungkuꞌ. Naisá kakukábeláimi oaꞌ i lalu pekakaengkuꞌ.

¹⁰ Kupembiáꞌ i lalu pekakaengkuꞌ, ane Napokana Pueꞌ Ala, bona Napoweꞌiaꞌ tempó lao moweoꞌkou.

¹¹ Kupoinao ntepuꞌu mampohidupaꞌákou, bona moliu kódóꞌ, ina molámbiꞌkou pewátiꞌ hangko i Inao to Magasaꞌ to ina mopakaróhó pepoináláimi.

¹² Tunggáiángkuꞌ bona kitaꞌ peisákeꞌ mombepakaróhó mpolalu, láwiꞌ kitaꞌ hingkakanimokeꞌ mepoinálái i Iesu Kerisitu.

¹³ Halalu-halalu, katoꞌuána handaꞌ miꞌi kánina kupoinao moweoꞌkou, agáiáná paka ara to mosalemporiaꞌ. Tunggáiángkuꞌ lao moweoꞌkou, bona ara wuaꞌna pobágóꞌkuꞌ i kótámi, nodo wuaꞌna pobágóꞌkuꞌ i oloꞌraꞌ tauna to tiꞌara toIahudiꞌ i wánuá-wánuá ntániꞌna.

¹⁴ Kupoinao lao i kótámi, láwiꞌ kupoinao ntepuꞌu mopahaweꞌ Ngkóráꞌ Marasa i upu-upu tauna, maroꞌa i to moisá básáraꞌ hai ádáraꞌ toIunani, maroꞌa to tiꞌara; maroꞌa to mosikolaꞌ hai to tiꞌara mosikolaꞌ.

¹⁵ Onoꞌ miꞌi haneꞌi kupoinao ntepuꞌu mopahaweꞌ Ngkóráꞌ Marasa i kómu woꞌo to toroꞌ i kótá Roma.

Hangko i Ngkóráꞌ Marasa, taisá noumbá rárána Pueꞌ Ala morekeꞌkeꞌ manótó i peitáNa

¹⁶ Tiꞌaraꞌaꞌ mahili mopahaweꞌ Ngkóráꞌ Marasa, láwiꞌ moliu Ngkóráꞌ Marasa iti, Pueꞌ Ala mopatongawaꞌ kuasaꞌNa mokábáhá tauna hangko i huku dósá, heáná peá to mampoinálái Ngkóráꞌ Marasa iti, rungu-runguna toIahudiꞌ, haweꞌ-haweꞌ woꞌo tauna to tiꞌaraheꞌ toIahudiꞌ.

¹⁷ Hangko i Ngkóráꞌ Marasa iti, taisá noumbá rárána bona mohintuwuꞌkeꞌ huleꞌ hai Pueꞌ Ala. Node rárána: mewaliꞌkeꞌ manótó i peitáNa ánti pepoináláintaꞌ i Hia. Tiꞌara ara rárá ntániꞌna, láwiꞌ i lalu Sura Magasaꞌ teukiꞌ miꞌi node: “Tauna to manótó i peitána Pueꞌ Ala, hira miꞌi to molámbiꞌ katehómpóꞌ ánti pepoináláiraꞌ.”

Handaꞌ tauna hintotoꞌ molámbiꞌ pehukuna Pueꞌ Ala ánti kamadósáraꞌ (1:18–3:20) Handaꞌ tauna moisá kaꞌárána Pueꞌ Ala, agáiáná tiꞌaraheꞌ mau menómbá i Hia

¹⁸ Hangko i surugáꞌ, Pueꞌ Ala haduduáNa mopatongawaꞌ kamabukoꞌNa ánti upu-upu dósá to ara i laluraꞌ tauna hai upu-upu bábehiáraꞌ to kadake. Hai ánti bábehiáraꞌ to kadake iti, tauna mosápuáka paturoꞌ to toꞌu.

¹⁹ Upu-upu tauna moisá miꞌi i laluraꞌ kana i Pueꞌ Ala, láwiꞌ Pueꞌ Ala haduduáNa to mopakanótóáheꞌ.

²⁰ Kehapiꞌ tiꞌara taita lenggeꞌna Pueꞌ Ala, agáiáná hangko i pewaliꞌána duniáꞌ, tauna moisá kaꞌárána Pueꞌ Ala, láwiꞌ hangko i upu-upu to Napopewaliꞌ, tongawaꞌ kamahilena tueꞌNa, hai tongawaꞌ woꞌo kuasaꞌNa to tiꞌara mokahópóꞌá. Mewaliꞌ, tiꞌara ara tauna to peisá manguliꞌ, “Tiꞌara kuisá kaꞌárána Pueꞌ Ala.”

²¹ Kehapiꞌ raisá ntepuꞌu kaꞌárána Pueꞌ Ala, agáiáná tiꞌaraheꞌ mebiláꞌ, hai tiꞌaraheꞌ woꞌo metóiá. Pampekiriraꞌ tiꞌara mobunduꞌ, hai bebeheꞌ láwiꞌ laluraꞌ makáindi hai karaoꞌheꞌ hangko i Pueꞌ Ala.

²² Rapekiri mapándeheꞌ, mole riꞌi bebeheꞌ!

²³ Tiꞌaraheꞌ mau menómbá i Pueꞌ Ala to tueꞌ haweꞌ i rue-ruena, hai to tiꞌara ara katebálikiáNa. Menómbáraheꞌ i lenggeꞌ ánitu to rabábehi haduduáraꞌ mouláꞌ lenggeꞌna tauna to hampaiꞌ peá katueꞌraꞌ i duniáꞌ deꞌe. Menómbá peheꞌ i ánitu to rabábehi nodo lenggeꞌ tádáhi ba binataꞌ to mendólóꞌ, hai binataꞌ to mobiti iba.

²⁴ Mewaliꞌ, ánti katiꞌárána raundeꞌ tauna menómbá i Pueꞌ Ala, onoꞌ miꞌi haneꞌi Napatodáhimoheꞌ mouláꞌ peundeꞌána laluraꞌ to kadake, álána mobábehiheꞌ salaꞌ to metitidiꞌi hai mehihiliꞌi i wátáraꞌ hai i hángká rángáraꞌ.

²⁵ Tiꞌaraheꞌ mampoinálái apa to toꞌu mokana i Pueꞌ Ala, ngkáliꞌna raundeꞌ riꞌi mampoinálái apa to salaꞌ. Loheheꞌ menómbá i Pueꞌ Ala to mampopewaliꞌheꞌ, ngkáliꞌna to napopewaliꞌ riꞌi Pueꞌ Ala to rapenómbái hai to rapengkoruꞌi. Mole katoꞌuána, Tomampopewaliꞌ riꞌi to hangaa-ngaa tatóiá duuꞌna i rue-ruena. Ami!

²⁶ Mewaliꞌ, ánti katiꞌáráraꞌ mau menómbá i Pueꞌ Ala, agáiáná menómbáraheꞌ i to ntániꞌna, onoꞌ miꞌi haneꞌi Napatodáhimoheꞌ mouláꞌ peundeꞌána laluraꞌ to mepakahiliá iti, haweꞌ-haweꞌ i towawine, tiꞌarapoheꞌ mobábehi bábehiá to hintotoꞌ. Towawine mamposambokoá hangka towawinena.

²⁷ Noꞌonoꞌ woꞌo tobaleilo: tiꞌaraheꞌ mamposambokoá towawine, agáiáná moundeꞌraheꞌ hangka tobaleiloraꞌ. Tobaleilo mobábehi bábehiá to tiꞌara hintotoꞌ i hangka tobaleiloraꞌ, hai bábehiá iti mepakahiliá. Kahópóꞌána, molámbiꞌheꞌ pehuku to hintotoꞌ hai bábehiáraꞌ to salaꞌ ntepuꞌu iti.

²⁸ Ánti katiꞌáráraꞌ moundeꞌ mopangákuꞌ Pueꞌ Ala i lalu pekiriraꞌ, onoꞌ miꞌi haneꞌi Pueꞌ Ala mopatodáhi pekiriraꞌ mewaliꞌ kadake, álána mobábehiheꞌ to tiꞌara hintotoꞌ.

²⁹ Handaꞌ pákáꞌna dósá hai pekiri to tiꞌara manótó i laluraꞌ. Kadake bábehiáraꞌ, mehioroꞌ, mopakadakeheꞌ tauna, mahiniꞌheꞌ, mepapateheꞌ, mosisalaꞌheꞌ, modongkoꞌheꞌ, mombekáhihiꞌheꞌ hai moánti-ántiheꞌ laluita.

³⁰ Mopapakóiꞌheꞌ hángká rángáraꞌ, mokáhihiꞌheꞌ Pueꞌ Ala, tiꞌaraheꞌ mebiláꞌ, mampepemahileheꞌ, hai mampopetóiáheꞌ. Mampeliꞌheꞌ rárá to woꞌu mobábehi to kadake. Tiꞌaraheꞌ mengkoruꞌ i tosaeraꞌ.

³¹ Tiꞌaraheꞌ moundeꞌ moisá peundeꞌána Pueꞌ Ala, tiꞌaraheꞌ mobukeki dándiraꞌ, tiꞌaraheꞌ maꞌahiꞌ i hángká rángáraꞌ, tiꞌaraheꞌ mambuhinao hángká rángáraꞌ.

³² Moisá ntepuꞌuheꞌ áturána Pueꞌ Ala to manguliꞌ heáná peá to noꞌonoꞌ, hangaa-ngaa rahuku mate. Agáiáná kehapiꞌ noꞌonoꞌ, mobábehi peheꞌ oaꞌ bábehiá to kadake, hai mampokagóeꞌraheꞌ tauna to mobábehi woꞌo to noꞌonoꞌ.