Pilipi 4 - Sura Magasaꞌ: Bahangapa sura Pototowiá to Sae hai Pototowiá to Woꞌu

Paturoꞌ to kahópóꞌána

¹ Mewaliꞌ, halalu-halalu to kupokaꞌahiꞌ hai kukabilai: kupembiáꞌ bona nipakaróhó pepoináláimi i Pueꞌ. Kómu miꞌi to kupomahile hai kupokagóeꞌ ntepuꞌu.

² Halalungkuꞌ Euodia hai Sintike! Kupembiáꞌ bona mohintuwuꞌmokou huleꞌ nodo to hintotoꞌ i tauna to mepoinálái i Pueꞌ.

³ Hai Susugo hampopobágóꞌkuꞌ to tetidaꞌ lalumu, kupembiáꞌ bona nutulungi wohiraꞌá towawine to rodua iti, bona ineeꞌmoheꞌ paka mosisalaꞌ. Tangaꞌkuꞌ mani hingkakani hai kómu, madotaheꞌ mamporángáꞌaꞌ mopahaweꞌ Ngkóráꞌ Marasa hingkakani hai Keleme hai hampopobágóꞌkuꞌ to ntániꞌna. Hangaꞌraꞌ upu-upu teukiꞌ miꞌi i lalu Sura Ngkatueꞌ, {láwiꞌ molámbiꞌmoheꞌ katueꞌ to tiꞌara mokahópóꞌá}.

⁴ Halalu-halalu, hangaa-ngaa góeꞌkou oaꞌ ánti pohintuwuꞌmi hai Pueꞌ. Hangkani mani kuꞌuliꞌ: hangaa-ngaa góeꞌkou.

⁵ Kuhárungá upu-upu tauna ina moisá kamaroꞌana lalumi. Ineeꞌ nikáláliꞌá, tiꞌara piꞌi marue ina haweꞌ Pueꞌ.

⁶ Ineeꞌ karaoꞌ inaomi. Ineeꞌkou mampokalááꞌ ba apa peá. I pákáꞌ-pákáꞌna mekakaekou, membiáꞌkou tulungi i Pueꞌ Ala, hai niuliꞌ handaꞌ kamaroꞌana i Hia.

⁷ Ane nipaisarenga katueꞌmi bukeꞌ-bukeꞌ i Pueꞌ Ala, Ia ina mampoweꞌikou katinda lalu ánti pohintuwuꞌmi hai Kerisitu Iesu, hai katinda lalu iti melumbuꞌ hangko i apa to nipekiri, hai mentóáꞌ hangko i Pueꞌ Ala to mokámpái lalumi hai pekirimi.

⁸ Kahópóꞌána halalu-halalu, kupembiáꞌ bona nipailalu oaꞌ upu-upu to maroꞌa hai to hintotoꞌ ratóiá. Apa to toꞌu, apa to hintotoꞌ rabiláꞌ, apa to naundeꞌ Pueꞌ Ala, apa to magasaꞌ, apa to meraeꞌ, hai apa to teádái, iti miꞌi to hangaa-ngaa nipailalu.

⁹ Apa to nipegurui hangko i kódóꞌ, maroꞌa paturoꞌkuꞌ to nihádi hai nitarima, maroꞌa bábehiángkuꞌ to niꞌita, iti miꞌi to hangaa-ngaa nibábehi. Ane nibábehi to noꞌonoꞌ, Pueꞌ Ala ina mamporángákou hai mopatinda lalumi.

Paulu manguliꞌ handaꞌ kamaroꞌana i toPilipi ánti petulungiraꞌ

¹⁰ Halalu-halalu, góeꞌ ntepuꞌu lalungkuꞌ, hai motóiáꞌaꞌ Pueꞌ Iesu, láwiꞌ kehapiꞌ maruemokeꞌ tiꞌara mohidupaꞌ, hangkani mani nipakatuáꞌaꞌ petulungimi. Tiꞌara kuꞌuliꞌ katiꞌárángkuꞌ piꞌi nibuhinao hangkoia, ngkáliꞌna riꞌi nibuhinaoaꞌ oaꞌ; agáiáná bahangapa kamaruena, tiꞌarakou nampakaꞌ motulungiaꞌ.

¹¹ Tunggáiángkuꞌ manguliꞌ noꞌonoꞌ, tiꞌara ánti kaꞌárána to kuparaluu. Apa peá to ara i kódóꞌ, kupogáná miꞌi hai kupokagóeꞌ.

¹² Kuhádiá miꞌi tueꞌ i tempóngkuꞌ makuraꞌ, hai kuhádiá miꞌi woꞌo tueꞌ i tempóngkuꞌ nakaꞌarai. Kehapiꞌ apa miꞌi to morampeaꞌ, maroꞌa i tempóna ara pandeꞌkuꞌ, maroꞌa i tempóna tiꞌara ara pandeꞌkuꞌ, handaꞌ ba hantóiꞌ, nakaꞌarai ba tiꞌara nakaꞌarai, góeꞌ oaꞌ lalungkuꞌ.

¹³ Kubuku motarima apa peá to mewaliꞌ, láwiꞌ Kerisitu to mopakaróhó lalungkuꞌ.

¹⁴ Agáiáná kehapiꞌ noꞌonoꞌ, maroꞌa ntepuꞌu lalumi motulungiaꞌ tangaꞌkuꞌ i lalu kapári deꞌe.

¹⁵ Niꞌisá miꞌi halalungkuꞌ toPilipi, rungu-runguna tempóngkuꞌ mopahaweꞌ Ngkóráꞌ Marasa i kótámi, hai i kapohuꞌkuꞌ hangko i tampoꞌ Makedonia, tiꞌara ara jemaꞌa ntániꞌna to motulungiaꞌ, bateꞌna peá kómu.

¹⁶ Hai tiꞌara onoꞌ peá, agáiáná i kamakuraꞌkuꞌ i tempóngkuꞌ hungkuꞌ mani i kómu i kótá Tesalonika, bahangapa kánina nipakatuáꞌaꞌ petulungimi.

¹⁷ Kuꞌuliꞌ noꞌonoꞌ, tiꞌara ánti kamampoinaongkuꞌ ina molámbiꞌ wopiꞌi kabulá lalumi. Ngkáliꞌna riꞌi, peundeꞌángkuꞌ bona ina nitarima handaꞌ pewátiꞌ to hangko i Pueꞌ Ala ánti petulungimi iti i kódóꞌ.

¹⁸ Mewaliꞌ bona niꞌisá: upu-upu to nipakatu, kutarima miꞌi hangko i Epaporoditu. Pakatumi iti tiꞌara peá magáná, agáiáná melábi hangko i apa to kuparaluu. Kabulá lalumi iti mopagóeꞌ Pueꞌ Ala, nodo popenómbá to mawongi.

¹⁹ Hai Pueꞌ Ala to kupenómbái, Ia miꞌi to ina mopaꞌara hinángkáꞌna to niparaluu, mouláꞌ kapebukuNa to tiꞌara ara kamakuraꞌna, láwiꞌ mohintuwuꞌmokou hai Kerisitu Iesu.

²⁰ Tatóiá miꞌi Pueꞌ Ala Umántaꞌ duuꞌna i rue-ruena. Ami.

Tabeá to kahópóꞌána

²¹ Kupembiáꞌ bona nipahaweꞌ tabeángkuꞌ i upu-upu tauna to ara i hinti i Pilipi, to mepoinálái i Kerisitu Iesu. Halalu hampepepoináláimi to araheꞌ ieneꞌ hingkakani hai kódóꞌ mopahaweꞌheꞌ woꞌo tabeáraꞌ i kómu.

²² Hai upu-upu toSarani i kótá Roma deꞌe, pelumbuꞌna miꞌi hira to mobágóꞌ i támbina Datu Mahile, mopahaweꞌheꞌ woꞌo tabeáraꞌ i kómu halalungkiꞌ.

²³ Kupembiáꞌ bona Iesu Kerisitu Pueꞌtaꞌ mowátiꞌkou upu-upu hangko i kabulána laluNa. Hangko i kódóꞌ, PAULU