Pilipi 2 - Sura Magasaꞌ: Bahangapa sura Pototowiá to Sae hai Pototowiá to Woꞌu

Hangaa-ngaa mohintuwuꞌ hai mengkaiwóiꞌkeꞌ nodo Iesu

¹ Mewaliꞌ halalu-halalu, maróhó lalumi ánti pohintuwuꞌmi hai Kerisitu. Lindó lalumi láwiꞌ napokaꞌahiꞌkou Kerisitu. Inao to Magasaꞌ mamporángákou. Mombepokaꞌahiꞌkou hadua hai hadua.

² Onoꞌ miꞌi haneꞌi kupembiáꞌ bona mohintuwuꞌkou hadua hai hadua, mombepokaꞌahiꞌ ntepuꞌukou, nipahambuaꞌ lalumi, hai nipahibali tunggáiámi. Ane nibábehi noꞌonoꞌ, ina góeꞌ ntepuꞌuaꞌ.

³ Ineeꞌ pekou mampekiri katueꞌmi haduduámi, ineeꞌkou mampepemahile. Rángina miꞌi mengkaiwóiꞌkou, hai hangaa-ngaa nirekeꞌ tauna ntániꞌna melumbuꞌ hangko i kómu.

⁴ Ineeꞌ pekou mampekiri wátámi haduduámi, agáiáná hangaa-ngaa nitulungi hángká rángámi.

⁵ Pambiárámi hangaa-ngaa nodo pambiárána Kerisitu Iesu:

⁶ kehapiꞌ hibali Kerisitu hai Pueꞌ Ala, Ia tiꞌara motibaaꞌ kahibaliNa hai Pueꞌ Ala,

⁷ agáiáná Nakábáhá upu-upuna iti, hai rapoánáka nodo tauna biásá. I katueꞌNa nodo tauna, Ia tueꞌ nodo hawiꞌ.

⁸ I tempóNa tueꞌ i wongko duniáꞌ deꞌe hibali hai tauna, Natunggái mengkaiwóiꞌ hai Napeuláꞌi peundeꞌána Pueꞌ Ala, duuꞌNa rapapate i kau mombehape.

⁹ Onoꞌ miꞌi haneꞌi Pueꞌ Ala mopaireá ntepuꞌu Kerisitu, hai Naweꞌi hangaꞌ to melumbuꞌ kamakuasaꞌna hangko i upu-upu hangaꞌ to ara,

¹⁰ bona upu-upu to tueꞌ ina mampomahile hangaꞌna Iesu, maroꞌa to i surugáꞌ, maroꞌa to i duniáꞌ, maroꞌa to i katoroꞌá tomate. Upu-upuraꞌ ina molingkudu mengkoruꞌheꞌ i Hia,

¹¹ hai ina rapangákuꞌ, “Iesu Kerisitu ia miꞌi Pueꞌ,” álána Pueꞌ Ala Umántaꞌ rapomahile.

Pueꞌ Ala mampopokale laluntaꞌ bona mampeuláꞌikeꞌ peundeꞌáNa

¹² Mewaliꞌ halalu-halalu to kupokaꞌahiꞌ, kuisá kamampeuláꞌimi hawaꞌna Pueꞌ Ala tempóngkuꞌ mani ara hingkakani hai kómu. Pelumbuꞌna mani deꞌe-deꞌe i tempóngkuꞌ karaoꞌ hangko i kómu, kupembiáꞌ bona nipakaroꞌa bábehiámi hai nibábehi apa to hintotoꞌ i tauna to nahómpóki miꞌi Pueꞌ Ala hangko i huku dósáraꞌ, duuꞌna tiꞌara ara kamakuraꞌmi. Mengkoruꞌkou i Pueꞌ Ala, hai nipokalááꞌ mobábehi apa to kadake,

¹³ láwiꞌ Pueꞌ Ala to mampopokale lalumi haneꞌi nipoinao mampeuláꞌi peundeꞌáNa, hai Ia to mampoweꞌikou karóhó lalu bona nibuku mouláꞌ peundeꞌáNa.

¹⁴ I pákáꞌ-pákáꞌna to nibábehi, ineeꞌkou mohume-hume ba mombehániꞌ-hániꞌ,

¹⁵ bona tongawaꞌ i upu-upu tauna kakómuna ánáꞌna Pueꞌ Ala, to tiꞌara ara kamasalaꞌmi, magasaꞌ tueꞌmi hai tiꞌara ara tunggáiámi to kadake. Toroꞌkou i oloꞌraꞌ tauna to motengkoꞌ bábehiáraꞌ hai kadake laluraꞌ, agáiáná mewangkaꞌkou nodo betue to mewangkaꞌ i lalu kakáindiána

¹⁶ tangaꞌmi mopahaweꞌ i hira Ngkóráꞌ Marasa to mopaꞌara katueꞌ to tiꞌara mokahópóꞌá. Mewaliꞌ halalu-halalu, ane noꞌonoꞌi oaꞌ bábehiámi, i alo kahaweꞌána huleꞌ Kerisitu, ina góeꞌ lalungkuꞌ láwiꞌ bábehiámi iti to mopatongawaꞌ katiꞌárána mbero-mbero bágóꞌkuꞌ i oloꞌmi, hai upu-upu to kupaturoꞌákou mobunduꞌ i katueꞌmi.

¹⁷ Mepoináláikou i Pueꞌ Iesu, hai nipaisarenga katueꞌmi i Hia. Katueꞌmi nodo popenómbá to nihuhuꞌ i Pueꞌ Ala. Mewaliꞌ ane kódóꞌ rahuku mate, kaꞌina mabubuna waheꞌkuꞌ mopagánái popenómbámi iti. Mewaliꞌ kehapiꞌaꞌ mate ánti pobágóꞌkuꞌ mopahaweꞌákou Ngkóráꞌ Marasa, bateꞌna kuꞌuliꞌ handaꞌ kamaroꞌana i Pueꞌ Ala, hai ina góeꞌaꞌ hingkakani hai kómu.

¹⁸ Kuhárungá woꞌo ina góeꞌkou hingkakani hai kódóꞌ láwiꞌ katueꞌtaꞌ tahuhuꞌ mpuꞌu miꞌi i Pueꞌ Ala.

Timotiu hai Epaporoditu

¹⁹ Ane peundeꞌána Pueꞌ Iesu, kuhárungá Timotiu ina kuhuoꞌ lao moweoꞌkou, bona lindó lalumi. Hai ane mesuleꞌ mai, ina lindóaꞌ woꞌo mohádi apa to nauliꞌ mokana i kómu.

²⁰ I oloꞌraꞌ tauna to ara ieneꞌ, bateꞌna peá Timotiu to hampepekiri hai kódóꞌ, láwiꞌ toꞌu-toꞌu mpuꞌu napoinao moisá noumbá katueꞌmi deꞌe-deꞌe.

²¹ To ntániꞌna mampekiri peheꞌ katueꞌraꞌ haduduáraꞌ, tiꞌaraheꞌ mampekiri peundeꞌána Iesu Kerisitu.

²² Agáiáná tongawaꞌ katetidaꞌna Timotiu, láwiꞌ ia mobágóꞌ hingkakani hai kódóꞌ mopahaweꞌ Ngkóráꞌ Marasa. Hai Timotiu deꞌe kurekeꞌ nodo ánáꞌkuꞌ i lalu pobágóꞌkiꞌ.

²³ Mewaliꞌ, ane kuisá miꞌi noumbá karabutusina kárá-kárángkuꞌ, ia ina kuhuoꞌ lao moweoꞌkou.

²⁴ Hai kuisá ánti petulungina Pueꞌ, tiꞌara piꞌi marue kódóꞌ woꞌo ina laoaꞌ moweoꞌkou.

²⁵ Ane halaluntaꞌ Epaporoditu, to marue miꞌi nihuoꞌ maiaꞌ modurei, rángina miꞌi kuhuoꞌ ioru mesuleꞌ lao i kómu. Ia iti rángángkuꞌ mobágóꞌ. Kipári-pári mampeámpárái Ngkóráꞌ Marasa hangko i tauna to moewaꞌ paturoꞌkiꞌ. Hai Epaporoditu iti motulungiaꞌ woꞌo i lalu kamapáringkuꞌ.

²⁶ Rángina kuhuoꞌ mesuleꞌ deꞌe-deꞌe, láwiꞌ ia mabila ntepuꞌu miꞌi i kómu upu-upu, hai masusa laluna láwiꞌ nihádi miꞌi kamaduꞌana.

²⁷ Rumihi kamaduꞌana haneꞌi hungkuꞌ miꞌi ina mate. Agáiáná kahópóꞌána maroꞌa huleꞌ láwiꞌ napokaꞌahiꞌ Pueꞌ Ala. Hai Pueꞌ Ala mopatongawaꞌ woꞌo kamaꞌahiꞌNa i kódóꞌ, láwiꞌ Epaporoditu iti Napakauriꞌ. Ane kematei, ketetámbái kawiorangkuꞌ.

²⁸ Onoꞌ miꞌi haneꞌi hawiáꞌ ina kuhuoꞌ mesuleꞌ lao i kómu, bona ane mohidupaꞌ wopakou, ia ina mopalindókou, hai ina tinda lalungkuꞌ.

^29-30 Mewaliꞌ, kupembiáꞌ bona nitarima i kagóeꞌna lalumi nodo to hintotoꞌ i halaluntaꞌ to mepoinálái i Pueꞌ. Hungkuꞌ napomate ánti pobágóꞌna i Kerisitu. Ia tiꞌara mpuꞌu mampekiri wátána haduduána, láwiꞌ napoinao motulungiaꞌ ieneꞌ. Ia mewaliꞌ sulewátámi, láwiꞌ tiꞌarakou nampakaꞌ motulungiaꞌ ieneꞌ. Hai kupembiáꞌ bona nibiláꞌ woꞌo upu-upu tauna to hibali hai ia.