Pewaliꞌána 40 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iusupu mopakanótó lempóna patururaꞌ toratarungku

¹ Marue-rue, rodua hawiꞌna daturaꞌ toMásiriꞌ, iamoheꞌ topokádipurá painuna datu hai toporótiꞌna, mobábehiheꞌ salaꞌ i datu.

² Mewaliꞌ mabukoꞌ Piraoꞌ i tauna to rodua iti,

³ onoꞌ miꞌi haneꞌi rapopesuaꞌheꞌ i lalu petarungkuá to ara i támbina tadulako topokámpái támbina datu. Ionoꞌ woꞌo Iusupu ratarungku.

⁴ Tadulako topokámpái támbina datu mohuoꞌ Iusupu mokádipuráheꞌ. Marueheꞌ woꞌo ratarungku.

⁵ Hangkani tempó tangaꞌ káindi, topokádipurá painuna datu hai toporótiꞌna mampaturuáheꞌ. Patururaꞌ tiꞌara hibali, hai lempóna woꞌo tiꞌara hibali.

⁶ Mepulo, i kahaweꞌna miꞌi Iusupu, ia moita kamasusana laluraꞌ,

⁷ onoꞌ miꞌi haneꞌi nakuneꞌheꞌ, “Moapa riꞌi haneꞌi masusa lalumi alo deꞌe?”

⁸ Mehániꞌheꞌ, “Iakáindi mampaturuáꞌangkaiꞌ, agáiáná tiꞌara ara to peisá molempónga paturungkiꞌ iti.” Nauliꞌ Iusupu, “Bateꞌna peá Pueꞌ Ala to peisá mopakanótó lempóna paturu. Nituntu mai iti paturumi.”

⁹ Nauliꞌ topokádipurá painu iti, “I lalu paturungkuꞌ, kuita ara hampóꞌá anggoroꞌ i lindoꞌkuꞌ.

¹⁰ Kau anggoroꞌ to kuita iti modáꞌá tálu dáꞌána. Dáꞌá-dáꞌána iti mantepuꞌu motaweꞌ hai mohehe duuꞌna mowuaꞌ haweꞌ mangka.

¹¹ I tempó iti tangaꞌkuꞌ motibaaꞌ painuána Piraoꞌ, kuala wuaꞌ anggoroꞌ iti hai kupieꞌ i painuána Piraoꞌ haneꞌi kuhuhuꞌá.”

¹² Nauliꞌ Iusupu, “Deꞌe miꞌi lempóna paturumu iti: tálu dáꞌána iti lempóna tálu alona.

¹³ I lalu tálu alona deꞌe, Piraoꞌ ina mampopesuwuꞌkoꞌ, moámpungikoꞌ hai mampopesuleꞌkoꞌ i bágóꞌmu hangkoia. Io ina mokádipurá wopakoꞌ painuna Piraoꞌ.

¹⁴ Agáiáná ane maroꞌa miꞌi katueꞌmu, ineeꞌaꞌ nukáláliꞌá. Kupembiáꞌ nupahaweꞌ i Piraoꞌ noumbá katueꞌkuꞌ deꞌe, bona napopesuwuꞌaꞌ woꞌo hangko i petarungkuá deꞌe.

¹⁵ Láwiꞌ katoꞌuána, kódóꞌ hangkoia rapongkoꞌaꞌ wongkódóꞌá mai hangko i tampoꞌraꞌ toIberani, hai hungkaꞌkuꞌ ieneꞌ i tampoꞌ Másiriꞌ, tiꞌaraꞌaꞌ haweꞌ hangkani mobábehi to kadake to hintotoꞌ ratarungkuáꞌaꞌ.”

¹⁶ Kanahádina toporótiꞌ lempóna paturuna topokádipurá painuna datu iti maroꞌa, ia woꞌo modarita i Iusupu, nauliꞌ, “Kódóꞌ woꞌo mampaturuáꞌaꞌ. I lalu paturungkuꞌ, kuhóꞌá tálu bingkaꞌna rótiꞌ.

¹⁷ Bingkaꞌ to i wongko ntepuꞌu moꞌóntóꞌ mampopengaa rótiꞌ kuántiá Piraoꞌ, agáiáná haweꞌheꞌ tádáhi mai motilóꞌ-tilóꞌ rótiꞌ to kuhóꞌá iti.”

¹⁸ Mehániꞌ Iusupu, “Deꞌe miꞌi lempóna paturumu iti: tálu bingkaꞌna lempóna tálu alona.

¹⁹ I lalu tálu alona, Piraoꞌ ina mohuoꞌ tauna mopapatekoꞌ, hai wátámu ina ratóe i kau, haneꞌi óntóꞌmu ratilóꞌ tádáhi.”

²⁰ Tálu alona hangko ionoꞌ, Piraoꞌ mamposusai tinuwuꞌna mobábehi susa mahile, hai mokióꞌheꞌ upu-upu topobágóꞌna. Napohawaꞌáheꞌ bona topokádipurá painuna hai toporótiꞌna rapopesuwuꞌ hangko i petarungkuá raꞌántiheꞌ i lindoꞌraꞌ upu-upu topobágóꞌna.

²¹ Topokádipurá painuna Piraoꞌ rapopesuleꞌ wopiꞌi i bágóꞌna hangkoia,

²² agáiáná toporótiꞌna ratóe duuꞌna mate hintotoꞌ hai apa to nauliꞌ miꞌi Iusupu.

²³ Ánti kamaroꞌana miꞌi katueꞌna, topokádipurá painuna datu iti tiꞌara piꞌi mambuhinao Iusupu, mole nakáláliꞌá riꞌi.