Pewaliꞌána 28 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Hangko ionoꞌ, Isakiꞌ mokióꞌ miꞌi Iako, haneꞌi nawátiꞌ hai napohawaꞌá, nauliꞌ, “Ineeꞌkoꞌ mampotoina toKánáꞌá.

² Rángina miꞌi laokoꞌ i tampoꞌ Pádá-Árá i tinánaheꞌ Betueli pueꞌmu, hai nupotoina hadua ánáꞌna Lábá, wutuꞌna inámu.

³ Tapembiáꞌ i Pueꞌ Ala to Makuasaꞌ bona Nawátiꞌkoꞌ i pohambokomu duuꞌna handaꞌ ánáꞌmu hai ueꞌmu, hai bona mewaliꞌkoꞌ toioruraꞌ handaꞌ kadatuá.

⁴ Tapembiáꞌ woꞌo bona Pueꞌ Ala mowátiꞌkoꞌ hai pemuleꞌámuheꞌ bona nipososora tampoꞌ deꞌe mouláꞌ dándiNa hangkoia i umángkuꞌ Burahima. Deꞌe-deꞌe toroꞌ manikeꞌ ieneꞌ nodo pekeꞌ tohaweꞌ, agáiáná i alo to ina haweꞌ, tampoꞌ deꞌe ina mewaliꞌ tampoꞌmi.”

⁵ Roo onoꞌ, Isakiꞌ mampopeángkáꞌ miꞌi Iako ánáꞌna lao i Lábá i tampoꞌ Pádá-Árá. Lábá ia miꞌi ánáꞌna Betueli toÁrá iti, wutuꞌna Ribeka, ináraꞌ Iako hai Esau.

Esau motoina wopiꞌi

⁶ Hangko ionoꞌ, Esau mohádi apa to napahaweꞌ umána i tempóna mowátiꞌ Iako. Mewaliꞌ, naisá miꞌi Esau, Iako nahuoꞌ miꞌi umána lao i tampoꞌ Pádá-Árá bona mampeliꞌ to ina mewaliꞌ toinána ionoꞌ, hai napaingáꞌi umána bona ineeꞌ mampotoina toKánáꞌá.

⁷ Naisá miꞌi woꞌo Esau pengkoruꞌna Iako i hawaꞌraꞌ tosaena hai kapohuꞌna miꞌi lao i tampoꞌ Pádá-Árá.

⁸ Hangko ionoꞌ, tongawaꞌ miꞌi i Esau katiꞌárána naundeꞌ umána towawine toKánáꞌá.

⁹ Onoꞌ miꞌi haneꞌi Esau lao i Sumaila ánáꞌna Burahima, bona mampotoina ánáꞌna to rahangaꞌ Mahalaꞌ. Mahalaꞌ iti ia miꞌi ádina Nebaioꞌ.

Paturuna Iako i Beteli

¹⁰ I tempó iti, Iako pohuꞌ miꞌi hangko i wánuá Baraseba ina lao i kótá Hara.

¹¹ I katámpuna alo, ia haweꞌ i hambuaꞌ katoroꞌá hai hambengi ionoꞌ. Ia moala hambuaꞌ watu napoálónga, haneꞌi maturu.

¹² Tiꞌara marue hangko ionoꞌ, ia mopaturuá. I paturuna iti, naita hambuaꞌ tukaꞌ to tindáꞌ hangko i tampoꞌ haweꞌ i langiꞌ. I tukaꞌ iti, naita malaꞌekanaheꞌ Pueꞌ Ala mendáulu mengkaheꞌ.

¹³ Hai PUEꞌ meángkáꞌ i hintáiꞌna Iako, haneꞌi mongkóráꞌ, Nauliꞌ, “Kódóꞌ miꞌi deꞌe PUEꞌ to napenómbái Burahima pueꞌmu hai to napenómbái Isakiꞌ umámu. Tampoꞌ paturuámu deꞌe, ina Kuweꞌikoꞌ haweꞌ-haweꞌ i pemuleꞌámu.

¹⁴ Ina Kupahandaꞌ pemuleꞌámu nodo kahandaꞌna awu i duniáꞌ. Ina memuleꞌheꞌ, hai ina mokatoroꞌiheꞌ humalele duniáꞌ. Ánti kaꞌiona hai pemuleꞌámu, upu-upu tauna i duniáꞌ ina molámbiꞌheꞌ pewátiꞌ.

¹⁵ Bona nuisá, io bateꞌna ina Kuporángákoꞌ hai Kukámpáikoꞌ oaꞌ iumbá peá kalaoámu, hai ina Kuántikoꞌ mesuleꞌ mai i tampoꞌ deꞌe, láwiꞌ ina Kuporángákoꞌ duuꞌna Kubukeki upu-upu to Kudándiámokoꞌ.”

¹⁶ Mearó miꞌi Iako, nauliꞌ i laluna, “Toꞌu ntepuꞌu PUEꞌ ara i katoroꞌá deꞌe, agáiáná hangko eneꞌ riꞌi kakuisána.”

¹⁷ Ánti kamalááꞌna Iako haneꞌi nauliꞌ, “Meriringkuꞌi ntepuꞌu katoroꞌá deꞌe! Tongawaꞌ deꞌe támbina Pueꞌ Ala. Ieneꞌ miꞌi babaꞌá surugáꞌ!”

¹⁸ Kahalona mepulo-pulo, Iako moala miꞌi watu to napoálónga, napatindáꞌ haneꞌi nabubuhi lana saitu bona mewaliꞌ watu pambuhinaoána pampatongawaꞌna Pueꞌ Ala i hia.

¹⁹ Katoroꞌá iti nahangaꞌ Beteli, lempóna: “támbina Pueꞌ Ala”. Hangkoia kótá iti rahangaꞌ Lusi.

²⁰ Roo onoꞌ, modándi miꞌi Iako i Pueꞌ Ala, nauliꞌ, “Ane Nuporángáꞌaꞌ hai Nukámpáiaꞌ i polumaongkuꞌ deꞌe, hai Nuweꞌiaꞌ pandeꞌ hai waruꞌ,

²¹ hai ane Nuántiaꞌ huleꞌ i kamaroꞌa-roꞌa i támbina umángkuꞌ, Io PUEꞌ to ina mewaliꞌ Pueꞌ Alangkuꞌ, hai bateꞌna Io peá to kupenómbái.

²² Hai kudándi woꞌo, ina kugáláꞌáKoꞌ hanggáláꞌ hampuloꞌ hangko i upu-upu to Nuweꞌiaꞌ. Hai watu pambuhinaoá to kuaró deꞌe ina mewaliꞌ penómbáꞌá i Hio.”