Pampetudeꞌá 9 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Roo onoꞌ, malaꞌeka to kalima motawueꞌ woꞌo tamburuꞌna, hai kuita hadua malaꞌeka to nodo hambuaꞌ betue to manawoꞌ miꞌi hangko i langiꞌ tóá i duniáꞌ. Malaꞌeka iti raweꞌi pegili babaꞌ pingke pehukuá to tiꞌara tehukáꞌ kakaladuna.

² Betue iti mobungkáhi babaꞌ pingke pehukuá. Kanabungkáhina, mentumbuꞌ miꞌi rámbu to rumukuꞌ, nodo rámbu to mesupaꞌ hangko i walombo to mahile. Alo hai laerawa mewaliꞌ makáindi, natóróbumbungi rámbu to hangko i pingke pehukuá iti.

³ Hangko i lalu rámbu iti, mesuwuꞌmoheꞌ mai katupeeꞌ haneꞌi mengkatóá i duniáꞌ. Katupeeꞌ iti raweꞌiheꞌ kuasaꞌ mehóiꞌ, nodo pehóiꞌraꞌ kalajengki.

⁴ Katupeeꞌ iti, tiꞌaraheꞌ rapaliu mopakarugiꞌ rumpuꞌ ba kau ba tudaꞌ-tudaꞌ. To peisá rapamarugiꞌ, bateꞌna tauna peá to tiꞌara ara petándáina Pueꞌ Ala i kireraꞌ.

⁵ Hai tiꞌaraheꞌ woꞌo rapaliu mopapate tauna, agáiáná rapaliu peheꞌ mepopeahiahiꞌ lima wulána kamaruena. Kamaháina pehóiꞌraꞌ katupeeꞌ iti nodo woꞌo kamaháina pehóiꞌraꞌ kalajengki.

⁶ Onoꞌ miꞌi haneꞌi i lalu lima wulána iti, tauna ina mampeliꞌheꞌ rárá bona mateheꞌ, agáiáná tiꞌara ara. Ánti kamaꞌángkárána pehádiraꞌ, onoꞌ haneꞌi rapoinao miꞌi mate, agáiáná tiꞌaraheꞌ oaꞌ mewaliꞌ mate.

⁷ Lenggeꞌraꞌ katupeeꞌ iti nodo lenggeꞌ dárá to rapesaweꞌi surudadoꞌ lao mombeala. I wuáꞌraꞌ ara to nodo tatali buláwá. Lindoꞌraꞌ nodo lindoꞌ tauna.

⁸ Wuluraꞌ malóe nodo weluáꞌ towawine, hai ngihiraꞌ maróhó nodo ngihi singá.

⁹ Pondáraꞌ teháláꞌ hai badu besiꞌ. Pokániꞌ kápiraꞌ nodo peruuna handaꞌ kereta to radiiꞌ dárá lao mombeala.

¹⁰ Ikuraꞌ hai pehóiꞌraꞌ nodo iku hai pehóiꞌraꞌ kalajengki. I ikuraꞌ iti, ara kuasaꞌ mampopeahiahiꞌheꞌ tauna lima wulána kamaruena.

¹¹ Ara daturaꞌ to mopárentáheꞌ. Daturaꞌ iti ia miꞌi malaꞌeka to kadake to mokámpái pingke pehukuá. Hangaꞌna i lalu básá Iberani ia miꞌi Abadon. I lalu básá Iunani Apolion, lempóna: Topegero.

¹² Hópóꞌ miꞌi pepopeahiahiꞌ to rungu-runguna, agáiáná ara mani rompákáꞌ pepopeahiahiꞌ to ina meusungi.

¹³ Roo iti, malaꞌeka to kaꞌini motawueꞌ tamburuꞌna. Kuhádi wambaꞌ hangko i iba tánduꞌ i hokina paintuá dupaꞌ to rabábehi hangko i buláwá to i lindoꞌna Pueꞌ Ala.

¹⁴ Nauliꞌ wambaꞌ iti i malaꞌeka to kaꞌini, “Nukábáhámoheꞌ malaꞌeka to iba to tetimpuku i uwai Epara.”

¹⁵ Nakábáhá mpuꞌumoheꞌ. Malaꞌeka to iba iti rapatimama miꞌi ami bona i pare, i wulá, i alo hai i jaa to napakanótó Pueꞌ Ala, peisáheꞌ mohuoꞌ surudadoꞌraꞌ bona mopapate hanggáláꞌ tálu hangko i upu-upu tauna {to tiꞌara mengkoruꞌ i Pueꞌ Ala}.

¹⁶ Surudadoꞌ topodárá to meuláꞌ i hira, rongatu juta kahandaꞌraꞌ. Kuisá kahandaꞌraꞌ, láwiꞌ ara to mohángáꞌáꞌáꞌaꞌ.

¹⁷ Surudadoꞌ hai dárá to rapesaweꞌi to kuita i lalu pampetudeꞌá iti, upu-upuheꞌ mebadu besiꞌ. Baduraꞌ malei nodo api to roreꞌ, maiti nodo rámbu, hai mabádáꞌ nodo taꞌilokoꞌ. Wuáꞌ dáráraꞌ nodo wuáꞌ singá, hai hangko i lalu ngángáraꞌ mesuwuꞌ mai api, rámbu hai belerang.

¹⁸ Hanggáláꞌ tálu hangko i tauna, rapapate hai tálu pákáꞌna pepopeahiahiꞌ, ia miꞌi api, belerang hai rámbu to mesuwuꞌ hangko i ngángáraꞌ dárá iti.

¹⁹ Kamakuasaꞌraꞌ dárá iti ara i ngángáraꞌ hai i ikuraꞌ, láwiꞌ ikuraꞌ mowuáꞌ nodo wuáꞌ lelótó to metilóꞌ. Ikuraꞌ iti rapakeꞌ woꞌo mampopeahiahiꞌ tauna.

^20-21 Agáiáná pentáráꞌána tauna to tiꞌara rapapate i pepopeahiahiꞌ iti, bateꞌraꞌ peá tiꞌara mau menosoꞌ hangko i bábehiáraꞌ to kadake. Tiꞌaraheꞌ mau menosoꞌ hangko i pepapateraꞌ, pedotiraꞌ, panakoraꞌ, hai bábehiáraꞌ to metitidiꞌi. Tiꞌaraheꞌ woꞌo mokábáhá penómbáraꞌ i setáꞌ hai i lenggeꞌ ánitu kehapiꞌ to rapenómbái iti rabábehi peá haduduáraꞌ hangko i buláwá, peráꞌ, tembaga, watu, ba hangko i kau. Hai lenggeꞌ iti, tiꞌaraheꞌ meita, tiꞌaraheꞌ mehádi, hai tiꞌaraheꞌ woꞌo peisá molumao.