Pampetudeꞌá 7 - Sura Magasaꞌ: Bahangapa sura Pototowiá to Sae hai Pototowiá to Woꞌu

Pueꞌ Ala mampetándái toIahudiꞌ bona rapetawaꞌi hangko i rugiꞌ

^1-2 Hangko ionoꞌ, kuitaheꞌ iba malaꞌeka to meángkáꞌ i iba boloꞌna duniáꞌ, hadua tándáꞌ i wongko, hadua tándáꞌ i wóiꞌ, hadua tándáꞌ i pembetoá alo, hadua tándáꞌ i katámpuá alo. Motahaheꞌ wui bona tiꞌara ara wui to mewui i tahiꞌ ba i lorena ba i kakau. Hai kuita hadua malaꞌeka to ntániꞌna haweꞌ hangko i pembetoá alo moánti petándái to hangko i Pueꞌ Ala to tueꞌ, {bona mampetándái taunána Pueꞌ Ala}. Malaꞌeka iti molaluita napasimbuku mohángáꞌáꞌáheꞌ malaꞌeka to iba to makuasaꞌ mopakarugiꞌ duniáꞌ moliu pepopeahiahiꞌ, nauliꞌ,

³ “Ineeꞌkou sieruꞌ mopakarugiꞌ tahiꞌ, ba lorena ba kakau, ane tiꞌara mani kiwoli tandaꞌ i kireraꞌ taunána Pueꞌ Ala Pueꞌtaꞌ, {bona tiꞌaraheꞌ narampe rugiꞌ iti}.”

⁴ Hai ara to mohángáꞌáꞌaꞌ kahandaꞌraꞌ to rapetándái: hangatu iba puloꞌna hai iba sábuna. To rapetándái iti, hangko i hampuloꞌ hai rontina toSáráeliꞌ.

⁵ Hangko i hantina-hantina, hampuloꞌ hai rosábu to rapoanaꞌi tandaꞌ. Hangko i pemuleꞌána Iudá, hampuloꞌ hai rosábu to rapoanaꞌi tandaꞌ. Noꞌonoꞌ woꞌo hangko i pemuleꞌána Rube, Gati,

⁶ Asere, Natali, Manase,

⁷ Simeoꞌ, Lewi, Isakari,

⁸ Sebuloꞌ, Iusupu, haweꞌ i pemuleꞌána Benami.

Taunána Pueꞌ Ala to handaꞌ ntepuꞌu

⁹ Roo onoꞌ, kuita wopiꞌi tauna to handaꞌ ntepuꞌu. Ánti kahandaꞌraꞌ, tiꞌaraheꞌ peisá teimbaꞌ. Hira iti hangko i humalele duniáꞌ: hangko i upu-upu kadatuá, upu-upu pemuleꞌá hai hangko i upu-upu básá. Meángkáꞌheꞌ i lindoꞌna pehodaꞌá kadatuá hai i lindoꞌna Iesu to rapándiriꞌ nodo Ánáꞌ Dimbá. Mekumbáheꞌ to bulá, hai motibaaꞌheꞌ taweꞌ to potarangke tandaꞌ kagóeꞌraꞌ.

¹⁰ Molaluitaheꞌ rapasimbuku, rauliꞌ: “Maimokeꞌ motóiá Pueꞌ Ala Pueꞌtaꞌ to mepárentá hangko i pehodaꞌá kadatuáNa, láwiꞌ Ia to mohómpókikeꞌ hangko i huku dósántaꞌ, hai mampoweꞌikeꞌ katueꞌ to maroꞌa to tiꞌara mokahópóꞌá moliu Ánáꞌ Dimbá.”

¹¹ Upu-upu malaꞌeka motolelingi pehodaꞌá datu hai totosae to rompuloꞌ hai iba, hingkakani hai pinatueꞌ to iba. Mopalumbáheꞌ i lindoꞌ pehodaꞌá iti, menómbá i Pueꞌ Ala,

¹² rauliꞌ: “Toꞌu ntepuꞌu! Maimokeꞌ motóiá Pueꞌ Ala Pueꞌtaꞌ, Tapomahile hangaꞌNa, Tapahaweꞌ kamapándeNa, Tauliꞌ handaꞌ kamaroꞌana i Hia, Tabiláꞌ Pueꞌ Ala, Tabuhinao kamakuasaꞌNa, Tabámbári kamaróhóNa, duuꞌna i rue-ruena! Ami.”

¹³ Roo onoꞌ, hadua hangko i totosae iti mekuneꞌ i kódóꞌ, nauliꞌ, “Ane tauna to mekumbá to bulá deꞌe, ba nuisá kaheánáraꞌ? Ba nuisá hangko iumbáheꞌ mai?”

¹⁴ Kuhániki, “Tuá, io to moisá. Nuhángáꞌáꞌáꞌaꞌ.” Mewaliꞌ nauliꞌ, “Hira iti tauna to roomoheꞌ mamporárái to rauliꞌ Tempó Pepopeahiahiꞌ to Rumihi Ntepuꞌu. Motibaaꞌheꞌ oaꞌ pepoináláiraꞌ i Iesu to rapándiriꞌ nodo Ánáꞌ Dimbá to rasambale. Ia to mohómpókiheꞌ hangko i huku dósáraꞌ i kamabubuNa waheꞌNa i kamateNa.

¹⁵ Onoꞌ miꞌi haneꞌi peisáheꞌ meángkáꞌ i lindoꞌna pehodaꞌá kadatuána Pueꞌ Ala, hai peisáheꞌ menómbá alo-alona hai wengi-wengina i lalu Támbina Pueꞌ Ala. Hai Pueꞌ Ala to mehoda i pehodaꞌá kadatuáNa ina mokámpáiheꞌ.

¹⁶ Tiꞌarapoheꞌ marimi, tiꞌarapoheꞌ mangkadoꞌu, hai tiꞌarapoheꞌ mohádi kamaꞌámuꞌna alo,

¹⁷ láwiꞌ Ánáꞌ Dimbá to mehoda i pehodaꞌá kadatuá ina mampoewuheꞌ. Ina Nateteꞌheꞌ lao i pentóáꞌána katueꞌ to maroꞌa to tiꞌara mokahópóꞌá, nodo topoewu moeri dimbána lao i uwai to lintuꞌ. Hai Pueꞌ Ala ina mowehángi kapáriraꞌ nodo moumpáhi uwai mata láwiꞌ kawiora tiꞌara piꞌi ina ara.”