Pampetudeꞌá 4 - Sura Magasaꞌ: Bahangapa sura Pototowiá to Sae hai Pototowiá to Woꞌu

Pampetudeꞌá to kaduá (4:1–16:21) Petóiá i surugáꞌ

¹ Roo onoꞌ, ara wopiꞌi pampetudeꞌá to kuita. Kódóꞌ Iohane moitaꞌaꞌ babaꞌ to tebungkáhi i surugáꞌ, hai kuhádi wopiꞌi wambaꞌ nodo to kuhádi rungu-runguna. Pokániꞌna nodo tamburuꞌ. Molaluita, nauliꞌ, “Mengkaheꞌmokoꞌ mai! Ina Kutudeꞌákoꞌ apa to hangaa-ngaa mewaliꞌ i alo to ina haweꞌ.”

² I tempó iti woꞌo, nakuasaꞌimoꞌ Inaona Pueꞌ Ala, hai kuita hambuaꞌ pehodaꞌá datu i surugáꞌ. Ara Hadua to mehoda i pehodaꞌá iti.

³ Lindoꞌna mewangkaꞌ ntepuꞌu nodo watu mpisiꞌ hai watu saridi to malei. Hai mpárágiá nodo watu samburuꞌ to makodaraꞌ motolelingi pehodaꞌá datu iti.

⁴ Hai pehodaꞌá kadatuá iti natolelingi rompuloꞌ hai iba pehodaꞌá ntániꞌna. Pehodaꞌá iti rapehodai totosae to rompuloꞌ hai iba, to mewaruꞌheꞌ to bulá hai metataliheꞌ buláwá.

⁵ Hangko i pehodaꞌá datu iti, mesupaꞌ oaꞌ kiláꞌ hai gumpataꞌ. I lindoꞌna pehodaꞌá iti, ara pitu wuaꞌna huluꞌ to tueꞌ. Huluꞌ iti, lempóna pitu pákáꞌna bágóꞌna Inaona Pueꞌ Ala.

⁶ Ara woꞌo i lindoꞌna pehodaꞌá iti, daula to nodo tahiꞌ kamaeláꞌna, hai malino ntepuꞌu nodo watu mpewaoꞌ. Pehodaꞌá kadatuá iti natolelingi woꞌo iba ngáána pinatueꞌ. Handaꞌ ntepuꞌu mátáraꞌ. Upu-upu wátáraꞌ nakaꞌarai mata, maroꞌa i lindoꞌraꞌ, maroꞌa i taleuꞌraꞌ.

⁷ Pinatueꞌ to kaꞌisáꞌ nodo lenggeꞌ singá. Karombáꞌána nodo gapiꞌ laki. Lindoꞌna pinatueꞌ to katálu nodo lindoꞌ tauna. Kaꞌibána kuita nodo koꞌaaꞌ to tangaꞌna membara.

⁸ Upu-upu pinatueꞌ iti mokapi ini wuaꞌna, hai upu-upu wátáraꞌ momata. Mogalo i wóiꞌ kápiraꞌ, pomata woꞌo. Maroꞌa mabaa ba káindi, tiꞌaraheꞌ oaꞌ mengkangkaroo monani, rauliꞌ: “Magasaꞌ! Magasaꞌ! Magasaꞌ mpuꞌu Pueꞌ Ala! Ia miꞌi to melumbuꞌ kuasaꞌNa hangko i upu-upuna, Ia to ara miꞌi ami hangko i rungu-runguna, to ara deꞌe-deꞌe, hai to ina ara oaꞌ duuꞌna i rue-ruena!”

⁹ Pinatueꞌ itiheꞌ manguliꞌ handaꞌ kamaroꞌana, mobiláꞌ hai mampomahileheꞌ hangaꞌna Hadua to mehoda i pehodaꞌá kadatuá hai to tueꞌ oaꞌ duuꞌna i rue-ruena. I popahaweꞌraꞌ petóiáraꞌ,

¹⁰ totosae to rompuloꞌ hai iba mopalumbáheꞌ menómbá i lindoꞌna Hadua to tueꞌ oaꞌ duuꞌna i rue-ruena to mehoda i pehodaꞌá kadatuá. Motelángaheꞌ tataliraꞌ i lindoꞌna pehodaꞌáNa iti, tandaꞌ pebiláꞌraꞌ. Roo onoꞌ, rauliꞌ:

¹¹ “Pueꞌ Ala Pueꞌkiꞌ! Io miꞌi to hintotoꞌ ratóiá hai rabiláꞌ. Io peá to makuasaꞌ, láwiꞌ Io to mampopewaliꞌ hinángkáꞌna. Ánti peundeꞌáMu, Nupopewaliꞌ hai Nupatueꞌ upu-upuna to ara.”