Pampetudeꞌá 22 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Malaꞌeka iti motudeꞌáꞌáꞌaꞌ woꞌo hampenga uwai to malino. Uwai iti nodo watu mpewaoꞌ, hai mopaꞌara katueꞌ. Uluna mesuwuꞌ hangko i pehodaꞌáraꞌ Pueꞌ Ala hai Iesu to rapándiriꞌ nodo Ánáꞌ Dimbá,

² hai moili i tangaꞌ rárá mahile i kótá iti. Mombetimbali wiwi uwai iti, ara kau to rahangaꞌ Kau to Mopaꞌara Katueꞌ to Tiꞌara Mokahópóꞌá. Kau iti mowuaꞌ hampuloꞌ hai rongkani i lalu hampare, i wulá-wulána mowuaꞌ. Taweꞌna rapakeꞌ mopakauriꞌ tauna i humalele duniáꞌ.

³ I lalu kótá iti, tiꞌara piꞌi ara to mepahárárá i Pueꞌ. Pehodaꞌáraꞌ Pueꞌ Ala hai Ánáꞌ Dimbá ara i lalu kótá iti, hai huoꞌáNa ina menómbáheꞌ i Hia.

⁴ Hira ina moitaheꞌ lindoꞌNa. Hangaꞌna Pueꞌ Ala ina teukiꞌ i kireraꞌ.

⁵ Tiꞌara piꞌi ina ara káindi, hai tauna to toroꞌ ionoꞌ tiꞌarapoheꞌ moparaluu huluꞌ ba pehimbaꞌi alo, láwiꞌ Pueꞌ Ala haduduáNa to ina mowangkaꞌiheꞌ. Hai ina mepárentáheꞌ nodo datu duuꞌna i rue-ruena.

Kahaweꞌna Iesu

⁶ Roo onoꞌ, malaꞌeka iti mohángáꞌáꞌáꞌaꞌ, “Upu-upu laluita to napahaweꞌámokoꞌ Pueꞌ Ala, bateꞌna toꞌu hai bateꞌna ina mewaliꞌ. Pueꞌ Ala to mampeweꞌi InaoNa i upu-upu nábiꞌNa, Ia miꞌi to mohuoꞌ mai malaꞌekaNa mampopaisáꞌáheꞌ huoꞌáNa apa to hangaa-ngaa ina hawiáꞌ mewaliꞌ.”

⁷ Nauliꞌ Pueꞌ Iesu, “Tiꞌara piꞌi marue ina haweꞌAꞌ! Morasiꞌheꞌ tauna to mampeuláꞌi upu-upu laluita to teukiꞌ i lalu sura deꞌe.”

⁸ Upu-upu to ratudeꞌáꞌaꞌ, kódóꞌ miꞌi Iohane to mohádi hai moita mata. Kakuhádina hai kakuitána iti, mopalumbáꞌaꞌ i bitina malaꞌeka iti, ina menómbáꞌaꞌ i hia,

⁹ agáiáná nakóntóaꞌ, nauliꞌ, “Ineeꞌ! Ineeꞌkoꞌ menómbá i kódóꞌ, láwiꞌ kódóꞌ woꞌo huoꞌánaꞌaꞌ Pueꞌ Ala hibali hai io hai hangka nábiꞌMu hai upu-upu tauna to mampeuláꞌi apa to teukiꞌ i lalu sura deꞌe. Bateꞌna peá Pueꞌ Ala to hintotoꞌ nupenómbái.”

¹⁰ Hai nahángáꞌá wopaꞌaꞌ, “Ineeꞌ nuwuniángi apa to teukiꞌ i lalu sura deꞌe, láwiꞌ hungkuꞌ miꞌi tempóna upu-upuna iti ina mewaliꞌ.

¹¹ Heáná tauna to moundeꞌ oaꞌ mobábehi salaꞌ, patodáhi miꞌi mobábehi oaꞌ to salaꞌ. Heáná tauna to moundeꞌ oaꞌ mobábehi to kadake, patodáhi miꞌi mobábehi oaꞌ to kadake. Heáná tauna to moundeꞌ mobábehi oaꞌ to manótó, patodáhi miꞌi mobábehi oaꞌ apa to manótó. Heáná tauna to moundeꞌ oaꞌ mewaliꞌ magasaꞌ, patodáhi miꞌi mobábehi oaꞌ apa to magasaꞌ.”

¹² Nauliꞌ Pueꞌ Iesu, “Tiꞌara piꞌi marue ina haweꞌAꞌ, hai ina Kuháwángi bábehiáraꞌ upu-upu tauna hintotoꞌ hai apa to rabábehi.

¹³ Kódóꞌ miꞌi deꞌe Alpa hai Omega. Kódóꞌ miꞌi to Rungu-runguna hai to Kahópóꞌána. Kódóꞌ miꞌi Pantepuꞌuána hai Kaupuána.

¹⁴ Morasiꞌheꞌ tauna to rawehángi miꞌi dósáraꞌ moliu waheꞌna Iesu, láwiꞌ hira to ina rapaliu mandeꞌ wuaꞌ hangko i Kau to Mopaꞌara Katueꞌ. Hira miꞌi woꞌo to ina rapaliu mesuaꞌ i lalu kótá iti moliu i babaꞌá.

¹⁵ Agáiáná tauna to kadake, topedoti, to mobábehi bábehiá to metitidiꞌi, topepapate, topenómbá i lenggeꞌ ánitu, topodongkoꞌ, hai tauna to mampokagóeꞌ podongkoꞌraꞌ, tiꞌaraheꞌ ina rapaliu mesuaꞌ i lalu kótá iti. Toroꞌ peheꞌ i rawa.

¹⁶ Kódóꞌ miꞌi Iesu to mohuoꞌ malaꞌekaNgkuꞌ mopahaweꞌ laluitaNgkuꞌ i jemaꞌa-jemaꞌa. Kódóꞌ miꞌi deꞌe pemuleꞌánaꞌAꞌ Datu Daudiꞌ. Kódóꞌ miꞌi Betue Tándáꞌ i Mata Alo to mewangkaꞌ ntepuꞌu.”

¹⁷ Inao to Magasaꞌ hai upu-upu tauna to mepoinálái to rapándiriꞌ nodo towawine to ina ratauna hai Ánáꞌ Dimbá manguliꞌ, “MaimoKoꞌ!” Hai upu-upu tauna to mohádi laluita iti ina manguliꞌheꞌ woꞌo, “MaimoKoꞌ!” Heáná to mangkadoꞌu, maimokou! Hai heáná to mau, maimokou mainu uwai to mopaꞌara katueꞌ. Tiꞌara mángkiꞌ nihóló!

Laluita to kahópóꞌána

¹⁸ Kódóꞌ Iohane, kupahaweꞌ i upu-upu tauna to mampehádingi apa to kuꞌukiꞌ i lalu sura deꞌe: Heáná tauna to motámbái hai laluita apa to teukiꞌ miꞌi i lalu sura deꞌe, Pueꞌ Ala ina motámbái woꞌo pehukuNa i tauna iti: ina molámbiꞌheꞌ pepopeahiahiꞌ hintotoꞌ hai apa to teukiꞌ i lalu sura deꞌe.

¹⁹ Hai ane ara tauna to mokurangi laluita hangko i sura deꞌe, Pueꞌ Ala ina mokurangi woꞌo gáláꞌna: tiꞌarapoheꞌ peisá mandeꞌ wuaꞌ hangko i Kau to Mopaꞌara Katueꞌ, hai tiꞌaraheꞌ peisá mesuaꞌ i lalu kótá to magasaꞌ, nodo to teukiꞌ i lalu sura deꞌe.

²⁰ Iesu haduduáNa to mosabiki upu-upu to kuꞌukiꞌ deꞌe, hai Nauliꞌ, “Toꞌu ntepuꞌu. Tiꞌara piꞌi marue, ina haweꞌAꞌ.” Ami! Maranata! MaimoKoꞌ, Pueꞌ Iesu!

²¹ Kupembiáꞌ bona Pueꞌ Iesu mowátiꞌ upu-upu taunána Pueꞌ Ala. Ami.