Pampetudeꞌá 21 - Sura Magasaꞌ: Bahangapa sura Pototowiá to Sae hai Pototowiá to Woꞌu

Langiꞌ hai duniáꞌ to woꞌu

¹ Roo onoꞌ, kuita miꞌi langiꞌ hai duniáꞌ to woꞌu, láwiꞌ langiꞌ, tampoꞌ hai tahiꞌ to rungu-runguna matántá miꞌi, tiꞌara piꞌi ara.

² Hai kuita woꞌo kótá to magasaꞌ, to rahangaꞌ Ierusale to Woꞌu. Kótá iti mendáulu mai hangko i Pueꞌ Ala i surugáꞌ. Meawaꞌ mpuꞌu kótá iti, nodo hadua towawine to rabadui rapamalásáꞌ láwiꞌ ina modupaꞌ tobaleilo to ratauna.

³ Hai kuhádi wopiꞌi wambaꞌ to molaluita napasimbuku hangko i pehodaꞌá kadatuána Pueꞌ Ala, nauliꞌ, “Deꞌe-deꞌe katoroꞌána Pueꞌ Ala ara hingkakani hai tauna. Ia ina toroꞌ hingkakani hai tauna, hai ina Napopewaliꞌheꞌ taunáNa. Ia haduduáNa to ina mamporángáheꞌ hai Ia ina mewaliꞌ Pueꞌraꞌ.

⁴ Ia ina mowehángi kapáriraꞌ nodo moumpáhi uwai mata. Tiꞌara piꞌi ina ara to mate, to masusa laluna, to teriaꞌ, hai to tiꞌara nalalu, láwiꞌ upu-upuna to mewaliꞌ iti maliu miꞌi, hai tiꞌara piꞌi ina mewaliꞌ.”

⁵ Roo onoꞌ, Hadua to mehoda i pehodaꞌá kadatuá manguliꞌ, “Peita, deꞌe-deꞌe Kuwoꞌungi miꞌi upu-upuna. Nuꞌukiꞌ miꞌi laluitaNgkuꞌ deꞌe, láwiꞌ bateꞌna toꞌu hai ina tebukeki.”

⁶ Hangko ionoꞌ, Nahángáꞌá wopaꞌaꞌ, “Hópóꞌ miꞌi! Kódóꞌ miꞌi deꞌe Alpa hai Omega. Kódóꞌ to Pantepuꞌuána hai to Kahópóꞌána. I tauna to mangkadoꞌu, ina Kuweꞌiheꞌ uwai hangko i ulu uwai ngkatueꞌ to maroꞌa to tiꞌara mokahópóꞌá. Uwai iti ina Kuweꞌiheꞌ mbero, tiꞌara mángkiꞌ rahóló.

⁷ Heáná to menangi, ina molámbiꞌheꞌ upu-upuna iti. Kódóꞌ ina mewaliꞌ Pueꞌraꞌ hai hira ina mewaliꞌheꞌ ánáꞌKuꞌ.

⁸ Agáiáná tauna to malááꞌheꞌ meuláꞌ i Kódóꞌ, tauna to tiꞌaraheꞌ mepoinálái i Kódóꞌ, tauna to kadake ntepuꞌu bábehiáraꞌ, topepapate, topobábehi to metitidiꞌi, topedoti, topenómbá i lenggeꞌ ánitu, hai topodongkoꞌ, bateꞌraꞌ ina rahuku upu-upu i lalu tahiꞌ api belerang to roreꞌ ntepuꞌu. Iti miꞌi to rauliꞌ kapate to karongkánina.”

Pampetudeꞌá to kaꞌiba (21:9–22:5) Ierusale to Woꞌu

⁹ Roo onoꞌ, haweꞌ miꞌi hadua hangko i malaꞌeka to pitu to motibaaꞌ pemboliá to bukeꞌ hai pitu pákáꞌna pepopeahiahiꞌ to kaupuána. Malaꞌeka iti mohángáꞌáꞌáꞌaꞌ, “Iohane, maimokoꞌ, ina kutudeꞌákoꞌ towawine to ina ratauna hai Ánáꞌ Dimbá.”

¹⁰ Hangko ionoꞌ, nakuasaꞌiaꞌ Inao to Magasaꞌ, haneꞌi malaꞌeka iti moántiaꞌ lao i tutuꞌ buluꞌ to mahile hai mapángkáꞌ, haneꞌiaꞌ natudeꞌá Ierusale to woꞌu, kótá to magasaꞌ. Kuita kótá iti mendáulu mai hangko i Pueꞌ Ala i surugáꞌ.

¹¹ Kótá iti mewangkaꞌ ánti peawaꞌna Pueꞌ Ala, mengkilaꞌ nodo watu akeꞌ to masuliꞌ hai nodo watu mpisiꞌ, hai malino nodo watu mpewaoꞌ.

¹² Kótá iti natolelingi bente kótá to mapángkáꞌ hai maróhó. I bente iti, ara hampuloꞌ hai rombuaꞌ babaꞌá. Hambuaꞌ-hambuaꞌ babaꞌá nakámpái hadua malaꞌeka, hai i hambuaꞌ-hambuaꞌ babaꞌá, rapoukiꞌi hangaꞌraꞌ hadua-hadua ánáꞌna Sáráeliꞌ to hampuloꞌ hai rodua, to mewaliꞌ toioruraꞌ hampuloꞌ hai rontina toSáráeliꞌ.

¹³ Bente kótá iti, mosulapaꞌ iba, hai hambuaꞌ-hambuaꞌ sulapaꞌ tálu wuaꞌna babaꞌá: tálu tándáꞌ i pembetoá alo, tálu tándáꞌ i wongko, tálu tándáꞌ i wóiꞌ, hai tálu tándáꞌ i katámpuá alo.

¹⁴ Bente kótá iti raꞌaró i wongko hampuloꞌ hai rombuaꞌ watu to mahile ntepuꞌu, hai i hambuaꞌ-hambuaꞌ watu iti, rapoukiꞌi hangaꞌraꞌ hadua-hadua surona Ánáꞌ Dimbá to hampuloꞌ hai rodua.

¹⁵ Malaꞌeka to molaluita i kódóꞌ iti, motibaaꞌ laiꞌ popehukáꞌ to rabábehi hangko i buláwá, bona kótá iti nahukáꞌ, noꞌonoꞌ woꞌo bentena hai babaꞌána.

¹⁶ Kótá iti mosulapaꞌ iba. Kakálángána, kamapángkáꞌna hai tuwewena hibali aha. Malaꞌeka iti mohukáꞌ kótá iti hai laiꞌ popehukáꞌna: kakálángána kótá iti rosábu iba átuna kiló.

¹⁷ Bente kótá iti nahukáꞌ woꞌo: kamapángkáꞌna ini puloꞌna mete. Popehukáꞌ to napakeꞌ malaꞌeka iti hibali hai popehukáꞌ to rapakeꞌ tauna.

¹⁸ Bente kótá iti rabábehi hangko i watu mpisiꞌ to masuliꞌ hólóna. Kótá iti rabábehi hangko i buláwá to mengkilaꞌ ntepuꞌu nodo kaca.

¹⁹ Pehodaꞌána bente kótá iti rabungaꞌi hai watu to mababe hai montaniꞌ-ntaniꞌ. To rungu-runguna ia miꞌi watu mpisiꞌ to makodaraꞌ hai meláni. To karombuaꞌna ia miꞌi watu nilam to meláni hai biru ntepuꞌu. To katálu ia miꞌi watu mira to bulá hai mengkilaꞌ. To kaꞌiba ia miꞌi watu samrud to nodo taweꞌ to mataꞌ hai mengkilaꞌ.

²⁰ To kalima ia miꞌi watu unam to butitoꞌ bulá hai malei makámumu. To kaꞌini ia miꞌi watu sardis to malei mangkakaitiá. To kapitu ia miꞌi watu paramata to mabádáꞌ hai mengkilaꞌ. To kaꞌuwalu ia miꞌi watu beril to makodaraꞌ nodo tulu tádáhi timbokoꞌ. To kahahioꞌ ia miꞌi watu krisolit to mabádáꞌ ntepuꞌu hai mengkilaꞌ. To kahampuloꞌ ia miꞌi watu krisopras to makokodaraꞌ nodo lokaꞌ to tiꞌara mani mangka. To kahampuloꞌ hai isáꞌ ia miꞌi watu lasuardi to biru nodo langiꞌ. Hai to kahampuloꞌna hai rombuaꞌ ia miꞌi watu kecubung to meláni hai malei makámumu.

²¹ Babaꞌá to hampuloꞌ hai rombuaꞌ iti, upu-upuna rabábehi hangko i mutiara to maloriꞌ. Hambuaꞌ-hambuaꞌ babaꞌá rabábehi hangko i hambuaꞌ mutiara to mahile. Rárá mahile i kótá iti rabábehi hangko i buláwá to mengkilaꞌ nodo kaca to mewaoꞌ.

²² Tiꞌara kuita támbi penómbáꞌá i lalu kótá iti, láwiꞌ humalele kótá iti rarekeꞌ nodo támbi penómbáꞌá i Pueꞌ Ala to Makuasaꞌ hai i Ánáꞌ Dimbá.

²³ Kótá iti tiꞌaranto mángkiꞌ nahimbaꞌi alo ba wulá, láwiꞌ peawaꞌna Pueꞌ Ala hai Ánáꞌ Dimbá to mowangkaꞌi kótá iti.

²⁴ Upu-upu tauna i duniáꞌ ina molumao i lalu pewangkaꞌ to hangko i Pueꞌ Ala, hai datu-datu i duniáꞌ ina moántiheꞌ hanggáláꞌ hangko i kapebukuraꞌ mesuaꞌ i lalu kótá iti.

²⁵ Babaꞌá bente kótá iti ina tebungkáhi oaꞌ, tiꞌara ina ratuko, láwiꞌ kamakáindi tiꞌara piꞌi ina ara.

²⁶ Ánti pebiláꞌraꞌ, tauna hangko i upu-upu tampoꞌ i duniáꞌ ina moántiheꞌ kapebukuraꞌ mesuaꞌ i lalu kótá iti.

²⁷ Agáiáná apa to metitidiꞌi tiꞌara mpuꞌu peisá mesuaꞌ i lalu kótá iti. Tauna to mobábehi to kadake ba to modongkoꞌ, tiꞌaraheꞌ peisá mesuaꞌ. To peisá mesuaꞌ, bateꞌna peá tauna to teukiꞌ hangaꞌraꞌ i lalu Sura Ngkatueꞌ, ia miꞌi surana Iesu to rapándiriꞌ nodo Ánáꞌ Dimbá. Sura iti sura poukiꞌá hangaꞌraꞌ tauna to molámbiꞌ katueꞌ to maroꞌa to tiꞌara mokahópóꞌá.