Pampetudeꞌá 20 - Sura Magasaꞌ: Bahangapa sura Pototowiá to Sae hai Pototowiá to Woꞌu

Datu Tokadake ratimpuku

¹ Roo onoꞌ, kuita wopiꞌi hadua malaꞌeka mendáulu hangko i surugáꞌ. Ia moánti hangkau rante to mahile hai pegili babaꞌ pingke pehukuá to tiꞌara tehukáꞌ kakaladuna.

^2-3 Malaꞌeka iti mohakaꞌ naga, ia miꞌi lelótó to sae ntepuꞌu to rauliꞌ woꞌo Datu Tokadake hai Tadulako Setáꞌ. Roo onoꞌ, natimpuku hai rante, haneꞌi natibe i lalu pingke pehukuá to tiꞌara tehukáꞌ kakaladuna. Babaꞌna nagili haneꞌi napetándái bona Datu Tokadake iti tiꞌara piꞌi peisá mopakanawoꞌ tauna i lalu hasábu parena kamaruena. Agáiáná ane hópóꞌ miꞌi tempó iti, ina rakábáhá hampaiꞌ.

Pearóraꞌ tomate to rungu-runguna, hai popárentá to hasábu parena

⁴ Roo onoꞌ, kuita bahangapa pehodaꞌá to rapehodai tauna to raweꞌi kuasaꞌ mobutusi kárá-káráraꞌ tauna. Kuita woꞌo tánuánáꞌraꞌ tauna to rabóhóki tambólóraꞌ ánti popangákuꞌraꞌ kaꞌIesuna Pueꞌraꞌ hai popahaweꞌraꞌ ngkóráꞌna Pueꞌ Ala. Tauna iti, tiꞌaraheꞌ menómbá i binataꞌ to kadake, tiꞌaraheꞌ menómbá i lenggeꞌna, hai tiꞌaraheꞌ woꞌo motarima tandaꞌ binataꞌ iti i kireraꞌ ba i taeraꞌ. Onoꞌ miꞌi haneꞌi rapatueꞌheꞌ huleꞌ hai mepárentáheꞌ hingkakani hai Kerisitu hasábu parena kamaruena.

⁵ Iti miꞌi pearó tomate to rungu-runguna. Agáiáná tauna to ntániꞌna to mate, tiꞌara maniheꞌ rapatueꞌ huleꞌ i lalu hasábu parena iti.

⁶ Morasiꞌheꞌ hai magasaꞌheꞌ tauna to rapatueꞌ huleꞌ i pearóraꞌ tomate to rungu-runguna. Tiꞌara mpuꞌuheꞌ ina rahuku i kapate to karongkánina, agáiáná ina mewaliꞌheꞌ tadulako menómbá i Pueꞌ Ala hai i Kerisitu. Ina mepárentáheꞌ hingkakani hai Kerisitu i lalu hasábu parena kamaruena.

Datu Tokadake ina rahuku

⁷ Ane hópóꞌ miꞌi hasábu parena iti, Datu Tokadake ina rakábáhá hangko i karatarungkuána,

⁸ hai ia ina lao mopakanawoꞌ tauna i humalele duniáꞌ, to rapándiriꞌ nodo Gog hai Magog. Hai ina narámpuheꞌ bona laoheꞌ mombeala. Kahandaꞌraꞌ nodo kahandaꞌna wungi i wiwi tahiꞌ.

⁹ Hangko ionoꞌ, ina laoheꞌ i humalele duniáꞌ, haneꞌi motolelingiheꞌ kótá {Ierusale} to napokaꞌahiꞌ Pueꞌ Ala hai to rakatoroꞌi taunáNa. Agáiáná hangkaꞌ-hangkaꞌ perái ina mendáulu mai api hangko i langiꞌ mopapumpuheꞌ.

¹⁰ Roo onoꞌ, Datu Tokadake to mopakanawoꞌ tauna to handaꞌ iti, ina ratibe i lalu tahiꞌ api belerang to roreꞌ ntepuꞌu. Tahiꞌ api iti miꞌi karatibeáraꞌ binataꞌ to kadake hai nabiꞌ to mepakanawoꞌ. Ionoꞌ, ina rapopeahiahiꞌheꞌ oaꞌ duuꞌna i rue-ruena.

Pueꞌ Ala mohuku tauna to kadake

¹¹ Roo onoꞌ, kódóꞌ Iohane moitaꞌaꞌ hambuaꞌ pehodaꞌá datu to bulá hai mahile, hai kuita woꞌo Hadua to mehoda ionoꞌ. Ánti kamakuasaꞌNa, langiꞌ hai duniáꞌ hangkaꞌ-hangkaꞌ perái matántá, tiꞌara piꞌi ara.

^12-13 Hai kuitaheꞌ tauna to mate to rapatueꞌ huleꞌ, mantepuꞌu to i wóiꞌ tueꞌraꞌ, haweꞌ-haweꞌ i to mokahangaꞌiá tueꞌraꞌ, meángkáꞌheꞌ i lindoꞌna Pueꞌ Ala to mehoda i pehodaꞌá iti. Tauna to mate i tahiꞌ, hai upu-upu tauna to i katoroꞌá tomate, rapatueꞌ huleꞌ, haneꞌiheꞌ meángkáꞌ upu-upu i lindoꞌna Pueꞌ Ala. Roo onoꞌ, sura-sura rabungkáhi. I lalu sura-sura iti, teukiꞌ bábehiáraꞌ upu-upu tauna. Mewaliꞌ, upu-upu tomate ina rahukuheꞌ hintotoꞌ hai apa to teukiꞌ i lalu sura-sura iti. Karahukuraꞌ iti hintotoꞌ hai bábehiáraꞌ haduduáraꞌ. Hai rabungkáhi miꞌi woꞌo sura to ntániꞌna, hangaꞌna Sura Ngkatueꞌ. {Ionoꞌ teukiꞌ hangaꞌ-hangaꞌ tauna to ina molámbiꞌ katueꞌ to maroꞌa to tiꞌara mokahópóꞌá.}

¹⁴ Roo onoꞌ, tiꞌara piꞌi ara to ina mate láwiꞌ kapate hai katoroꞌá to mate ina ratibe i lalu tahiꞌ api to roreꞌ oaꞌ. Pehuku iti ia miꞌi to rahangaꞌ kapate to karongkánina.

¹⁵ Hai heáná peá to tiꞌara teukiꞌ hangaꞌna i lalu Sura Ngkatueꞌ, ina ratibe woꞌo i lalu tahiꞌ api iti.