Pampetudeꞌá 19 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Roo onoꞌ, kuhádi nodo wambaꞌraꞌ tauna to handaꞌ i surugáꞌ. Mongangaheꞌ rapasimbuku, rauliꞌ: “Haleluia! Tatóiá miꞌi Pueꞌ Ala! Ia to mampoweꞌikeꞌ katehómpóꞌ. Ia to meawaꞌ tueꞌNa hai to makuasaꞌ.

² Tatóiá Pueꞌ Ala láwiꞌ pobutusiNa manótó hai toꞌu. Ia mohuku miꞌi towawine to metitidiꞌi ntepuꞌu bábehiána, láwiꞌ ánti bábehiána to tiꞌara hintotoꞌ, duniáꞌ kauláka i hia. Naháwángi miꞌi woꞌo bábehiána towawine iti i kamopapatena huoꞌána Pueꞌ Ala.”

³ Monganga wopaheꞌ tauna to handaꞌ rapasimbuku, rauliꞌ: “Haleluia! Rámbu hangko i api to moandeꞌ kótá iti ina mentumbuꞌ oaꞌ duuꞌna i rue-ruena.”

⁴ Hangko ionoꞌ, pinatueꞌ to iba hai totosae to rompuloꞌ hai iba, mopalumbáheꞌ upu-upu i lindoꞌ pehodaꞌána Pueꞌ Ala, menómbáheꞌ i Hia, rauliꞌ, “Ami! Haleluia!”

⁵ Roo onoꞌ, kuhádi wopiꞌi wambaꞌ to molaluita hangko i pehodaꞌá datu iti, nauliꞌ: “Nitóiá miꞌi Pueꞌ Ala Pueꞌtaꞌ, kómu upu-upu to mewaliꞌ huoꞌáNa! Nitóiá miꞌi, kómu upu-upu to mengkoruꞌ i Hia, mantepuꞌu to i wóiꞌ tueꞌmi, haweꞌ-haweꞌ i to mokahangaꞌiá tueꞌmi!”

⁶ Roo onoꞌ, kuhádi woꞌo pongángá-ngángáraꞌ tauna to handaꞌ. Pongángáraꞌ iti nodo pewoo uwai to mahile, hai nodo pokániꞌ gumpataꞌ. Kuhádiheꞌ manguliꞌ: “Haleluia! Pueꞌ Ala Pueꞌtaꞌ to Makuasaꞌ, mepárentá miꞌi!

⁷ Maimokeꞌ monani-nani i kagóeꞌ-góeꞌ, mampomahilekeꞌ hangaꞌNa, láwiꞌ haweꞌ miꞌi alo karataunána Ánáꞌ Dimbá, Ia miꞌi Iesu, hai toratauna towawine timama miꞌi, iamoheꞌ tauna to mepoinálái i Hia.

⁸ Pueꞌ Ala mopatimamaꞌámoheꞌ waruꞌ to meálu, to bulá ntepuꞌu hai mengkilaꞌ.” Waruꞌna tauna to mepoinálái iti lempóna bábehiáraꞌ taunána Pueꞌ Ala to maroꞌa.

⁹ Hangko ionoꞌ, nahángáꞌáꞌáꞌaꞌ malaꞌeka iti, “Nuꞌukiꞌ miꞌi node: Morasiꞌheꞌ tauna to rakióꞌ lao i posusa petauna, karataunána Ánáꞌ Dimbá.” Hai nauliꞌ wopiꞌi, “Iti miꞌi laluitana Pueꞌ Ala, hai bateꞌna toꞌu.”

¹⁰ Mewaliꞌ mopalumbáꞌaꞌ i bitina malaꞌeka iti ina menómbáꞌaꞌ i hia, agáiáná nahángáꞌáꞌáꞌaꞌ, “Ineeꞌkoꞌ noꞌonoꞌ! Ineeꞌaꞌ nupenómbái, láwiꞌ kódóꞌ deꞌe huoꞌána peaꞌ woꞌo Pueꞌ Ala hibali hai io hai upu-upu halalu hampepepoináláimu to mampoináláiheꞌ paturoꞌna Iesu. Bateꞌna peá Pueꞌ Ala to hintotoꞌ nupenómbái.”

Iesu raita nodo toposaweꞌi dárá to bulá

¹¹ Roo onoꞌ, kuita surugáꞌ tebungkáhi, hai kuita hambaꞌa dárá to bulá. Toposaweꞌi dárá iti, hangaꞌNa “To Tetidaꞌ hai Toꞌu.” Manótó pobutusiNa, hai ane mombeala, mombeala i kanótó-nótóána.

¹² Mátána mewangkaꞌ nodo api to roreꞌ ntepuꞌu, hai i wuáꞌNa handaꞌ tatali datu. I wátáNa teukiꞌ hangaꞌNa, hai Ia peá to moisá lempóna hangaꞌ iti.

¹³ KumbáNa raeme i lalu waheꞌNa haduduáNa. HangaꞌNa ia miꞌi “Ngkóráꞌna Pueꞌ Ala.”

¹⁴ Handaꞌ surudadoꞌ hangko i surugáꞌ to meuláꞌ i bókóꞌNa, mesaweꞌheꞌ woꞌo i dárá to bulá. Waruꞌraꞌ hangko i báná to meálu hai bulá ntepuꞌu.

¹⁵ Hangko i lalu ngángáNa mesuwuꞌ miꞌi laluita to nodo hamata pihoꞌ to mataru. Hai laluitaNa iti ina monangiheꞌ upu-upu tauna to kadake i duniáꞌ. Roo onoꞌ, ina Napárentáheꞌ mouláꞌ kamaróhóNa to nodo kamaróhóna laiꞌ besiꞌ. Ia to ina mopatongawaꞌ kamabukoꞌna Pueꞌ Ala to Makuasaꞌ, nodo to mopieꞌ wuaꞌ anggoroꞌ i lalu popieꞌá anggoroꞌ.

¹⁶ I kumbáNa tándáꞌ i páꞌáNa teukiꞌ hambuaꞌ hangaꞌ: “Datu to Melumbuꞌ Kamakuasaꞌna Hangko i Upu-Upu Datu, Pueꞌ to Melumbuꞌ Kamakuasaꞌna Hangko i Upu-Upu Pueꞌ.”

¹⁷ Roo onoꞌ, kuita hadua malaꞌeka to meángkáꞌ i alo. Malaꞌeka iti mokióꞌheꞌ upu-upu tádáhi to membara-mbara i laerawa, nauliꞌ napasimbuku, “Maimokou i posusa mahile to napaꞌara Pueꞌ Ala.

¹⁸ Maimokou bona peisákou mandeꞌ óntóꞌraꞌ upu-upu tomate: óntóꞌraꞌ datu, óntóꞌraꞌ tadulako, óntóꞌraꞌ tauna to maróhó, óntóꞌraꞌ dárá to rapakeꞌ mombeala, hai óntóꞌraꞌ tauna to mesaweꞌ i dárá. Maimokou mandeꞌ óntóꞌraꞌ upu-upu tauna to mate, mantepuꞌu to i wóiꞌ tueꞌraꞌ, haweꞌ-haweꞌ i to mokahangaꞌiá tueꞌraꞌ, maroꞌa hawiꞌ, maroꞌa to tiꞌara hawiꞌ.”

¹⁹ Roo iti, kuita wopiꞌi binataꞌ to kadake, hai datu-datu i duniáꞌ hai upu-upu surudadoꞌraꞌ, hirámpuheꞌ bona mampombealaꞌáheꞌ Toposaweꞌi dárá to bulá hingkakani hai surudadoꞌNa.

²⁰ Agáiáná binataꞌ to kadake iti rahakaꞌ hingkakani hai nabiꞌ to mepakanawoꞌ. Nabiꞌ to mepakanawoꞌ iti, ia miꞌi to mopakeꞌ kuasaꞌna binataꞌ to kadake mobábehi tandaꞌ kuasaꞌ. Ánti tandaꞌ-tandaꞌ kuasaꞌ iti, ia mopakanawoꞌheꞌ tauna to motarimamoheꞌ tandaꞌ binataꞌ hai to menómbá i lenggeꞌna. To rodua iti, ratibeheꞌ tueꞌ-tueꞌ i lalu tahiꞌ api belerang to roreꞌ ntepuꞌu.

²¹ Mewaliꞌ, Toposaweꞌi dárá to bulá mopapate upu-upu surudadoꞌna binataꞌ iti. Napapateheꞌ hai laluitaNa to mesuwuꞌ nodo pihoꞌ hangko i ngángáNa. Hai roo onoꞌ, haweꞌ mpuꞌumoheꞌ tádáhi, mandeꞌheꞌ óntóꞌ tauna to rapapate duuꞌraꞌ mabuhu ntepuꞌu.