Pampetudeꞌá 15 - Sura Magasaꞌ: Bahangapa sura Pototowiá to Sae hai Pototowiá to Woꞌu

Naniraꞌ topenangi

¹ Roo onoꞌ, kuita wopiꞌi i langiꞌ hambuaꞌ tandaꞌ to mahile hai to mehelei. Kuita pitu to motibaaꞌ pitu pákáꞌna pepopeahiahiꞌ to kahópóꞌána. Ane hópóꞌ miꞌi pepopeahiahiꞌ to pitu iti, ina hópóꞌ miꞌi kamabukoꞌna Pueꞌ Ala i tauna to kadake.

² Hai kuita ara to nodo tahiꞌ kamaeláꞌna, lenggeꞌna nodo kaca mogalo api. Hai i wiwi tahiꞌ to nodo kaca iti, kuita handaꞌ tauna meángkáꞌ. Taunaheꞌ iti to monangi binataꞌ to kadake ánti katiꞌáráraꞌ menómbá i hia ba i lenggeꞌna, hai tiꞌaraheꞌ woꞌo motarima ángkáꞌ binataꞌ iti to molempónga hangaꞌna. Tauna to menangi iti, meángkáꞌ i wiwi tahiꞌ to nodo kaca, hai motibaaꞌheꞌ kasapi to naweꞌiheꞌ Pueꞌ Ala.

³ Monaniheꞌ nani to nodo nanina nabiꞌ Musa, huoꞌána Pueꞌ Ala hangkoia, hai nanina Ánáꞌ Dimbá. Monaniheꞌ node: “Ó Pueꞌ Ala, maroꞌa ntepuꞌu bábehiáMu, melumbuꞌ kuasaꞌMu hangko i upu-upuna! Upu-upu to Nubábehi, bateꞌna manótó hai toꞌu. Io miꞌi Daturaꞌ upu-upu tauna i duniáꞌ haweꞌ i rue-ruena.

⁴ Pueꞌ, heáná paꞌi to tiꞌara mengkoruꞌ i Hio, hai heáná paꞌi to tiꞌara mopangákuꞌ kamahilena hangaꞌMu? Io peá to magasaꞌ. Upu-upu tauna bateꞌna ina menómbá i Hio, láwiꞌ tongawaꞌ miꞌi kamanótóna pobutusiMu i upu-upu tauna.”

Pitu pemboliá (15:5–16:21) Pitu malaꞌeka moánti pitu wuaꞌna pemboliá to moꞌóntóꞌ pehukuna Pueꞌ Ala

⁵ Roo onoꞌ, kuita tebungkáhi miꞌi Lintuꞌ to Melumbuꞌ Kamagasaꞌna i lalu Bambaruꞌ Penómbáꞌá to ara i surugáꞌ.

⁶ Hai pitu malaꞌeka mesuwuꞌ hangko i Támbina Pueꞌ Ala, moántiheꞌ pitu wuaꞌna pemboliá to bukeꞌ hai pitu pákáꞌna pepopeahiahiꞌ. Waruꞌraꞌ malaꞌeka iti rabábehi hangko i báná to bulá hai mengkilaꞌ. Pondáraꞌ rawewehi pampou hangko i buláwá.

⁷ I pesuwuꞌraꞌ malaꞌeka to pitu iti, hambaꞌa hangko i pinatueꞌ to iba mampoweꞌiheꞌ pitu wuaꞌna pemboliá to rabábehi hangko i buláwá hai moꞌóntóꞌ kamabukoꞌna Pueꞌ Ala to tueꞌ oaꞌ duuꞌna i rue-ruena.

⁸ I tempó iti woꞌo, Támbina Pueꞌ Ala i surugáꞌ hangkaꞌ-hangkaꞌ peá bukeꞌ hai rámbu to mesuwuꞌ hangko i peawaꞌna Pueꞌ Ala hai hangko i kuasaꞌNa. Tiꞌara ara haweꞌ hadua to peisá mesuaꞌ i laluna, ane tiꞌara mani hópóꞌ pitu pákáꞌna pepopeahiahiꞌ to raꞌánti malaꞌeka to pitu iti.