Pampetudeꞌá 13 - Sura Magasaꞌ: Bahangapa sura Pototowiá to Sae hai Pototowiá to Woꞌu

Hambaꞌa binataꞌ to kadake mesuwuꞌ hangko i tahiꞌ

¹ Roo onoꞌ, kuita hambaꞌa binataꞌ mesuwuꞌ mai hangko i tahiꞌ. Tánduꞌna hampuloꞌ wuaꞌna, hai wuáꞌna pitu wuaꞌna. I upu-upu tánduꞌna ara tatali datu, hai i upu-upu wuáꞌna teukiꞌ hangaꞌ to motitibei Pueꞌ Ala.

² Binataꞌ to kuita iti, lenggeꞌna nodo lenggeꞌ sóeꞌ lómpu, agáiáná bitina nodo biti beruá, hai humena nodo hume singá. Hai naga mampoweꞌi binataꞌ to kadake iti kamaróhóna kadatuána hai kuasaꞌna mepárentá.

³ Hangko i wuáꞌna to pitu iti, kuita hambuaꞌ nodo to bela to ina napomate, mole riꞌi mauriꞌ peá huleꞌ. Tauna i humalele duniáꞌ tingkáráꞌ ntepuꞌuheꞌ moita binataꞌ to kadake iti, onoꞌ miꞌi haneꞌi meuláꞌheꞌ i hia.

⁴ Menómbáheꞌ i naga, láwiꞌ ia to mampoweꞌi kuasaꞌna i binataꞌ to kadake. Hai menómbáheꞌ woꞌo i binataꞌ iti, rauliꞌ, “Maróhó ntepuꞌu kuasaꞌna binataꞌ iti! Heáná to hibali kamakuasaꞌna, hai heáná to peisá moewaꞌ?”

⁵ Binataꞌ to kadake iti rapoweꞌi tempó mohuwárá laluita to maꞌángkáꞌ hai to mopakóiꞌ Pueꞌ Ala. Ia raweꞌi woꞌo kuasaꞌ mepárentá mouláꞌ peundeꞌána haduduána i lalu iba puloꞌna hai rombulá kamaruena.

⁶ Ia mantepuꞌu mopakóiꞌ Pueꞌ Ala, mosasalaꞌi hangaꞌNa hai katoroꞌáNa i surugáꞌ, hai upu-upu to toroꞌ ionoꞌ.

⁷ Ia rapaliu woꞌo mampombealaꞌá taunána Pueꞌ Ala hai monangiheꞌ. Hai ia rapatodáhi mokuasaꞌi tauna i humalele duniáꞌ: hangko i upu-upu kadatuá, upu-upu pemuleꞌá hai hangko i upu-upu básá.

⁸ Handaꞌheꞌ tauna to toroꞌ i duniáꞌ ina menómbá i hia. To tiꞌara menómbá i hia, bateꞌna peá tauna to teukiꞌ miꞌi hangaꞌraꞌ i lalu Sura Ngkatueꞌ hangko tiꞌara mani duniáꞌ rapopewaliꞌ. Sura Ngkatueꞌ iti ia miꞌi surana Iesu to rapándiriꞌ nodo Ánáꞌ Dimbá to rasambale.

⁹ Mewaliꞌ, hangaa-ngaa nipehádingi laluita deꞌe:

¹⁰ Tauna to tepakanótó karatáwániraꞌ, bateꞌraꞌ ina ratawani. Tauna to tepakanótó karapapateraꞌ hai pihoꞌ, bateꞌraꞌ ina rapapate hai pihoꞌ. Onoꞌ miꞌi haneꞌi taunána Pueꞌ Ala hangaa-ngaa mantaha mantódihá kapári hai hangaa-ngaa maróhó pepoináláiraꞌ.

Binataꞌ to karombáꞌána mesupaꞌ hangko i lalu tampoꞌ

¹¹ Roo onoꞌ, kuita wopiꞌi hambaꞌa binataꞌ to ntániꞌna to mesupaꞌ mai hangko i lalu tampoꞌ. Ara rombuaꞌ tánduꞌna nodo tánduꞌ ánáꞌ dimbá, agáiáná polaluitana nodo polaluitana naga.

¹² Upu-upu kuasaꞌ hangko i binataꞌ to haweꞌ rungu-runguna, napopolumao binataꞌ karombáꞌána iti. Binataꞌ to karombáꞌána iti mopasimbuku upu-upu tauna to toroꞌ i duniáꞌ bona menómbáheꞌ i binataꞌ to rungu-runguna, to rumihi belána agáiáná mauriꞌ miꞌi.

¹³ Binataꞌ to karombáꞌána iti mobábehi handaꞌ tandaꞌ kuasaꞌ. I lindoꞌraꞌ tauna to handaꞌ, ia mampopendáulu api hangko i langiꞌ tóá i duniáꞌ.

¹⁴ Ia raweꞌi kuasaꞌ mobábehi mampopengaa tandaꞌ kuasaꞌ moliu kuasaꞌna binataꞌ to rungu-runguna iti. Hai ánti tandaꞌ kuasaꞌna iti, ia mopakanawoꞌ handaꞌ tauna to tiꞌara mepoinálái. Nahuoꞌheꞌ moaró hambuaꞌ lenggeꞌ to hibali hai lenggeꞌ binataꞌ to rungu-runguna. Binataꞌ iti ia miꞌi binataꞌ to rabataꞌ miꞌi hai pihoꞌ, agáiáná tueꞌ huleꞌ.

¹⁵ Binataꞌ to karombáꞌána iti, raweꞌi kuasaꞌ mampoweꞌi inao i lenggeꞌ binataꞌ to rungu-runguna iti, álána peisá molaluita hai mepapate. Heáná peá to tiꞌara menómbá i lenggeꞌ binataꞌ iti, bateꞌna napapate.

¹⁶ Upu-upu tauna nahuoꞌ bona motarimaheꞌ tandaꞌ binataꞌ to rungu-runguna. Tandaꞌ iti hangaa-ngaa rawoli i tae kuánáraꞌ ba i kireraꞌ. Mewaliꞌ upu-upu tauna, maroꞌa to i wóiꞌ tueꞌraꞌ, maroꞌa to mokahangaꞌiá tueꞌraꞌ, maroꞌa to pebuku, maroꞌa to peahiahiꞌ tueꞌraꞌ, maroꞌa hawiꞌ, maroꞌa to tiꞌara hawiꞌ, upu-upuheꞌ napári-pári bona motarima tandaꞌ binataꞌ iti.

¹⁷ Tiꞌara ara haweꞌ hadua tauna to peisá mehóló ba mobaluꞌ-baluꞌ ane tiꞌara ara tandaꞌ iti i taena ba i kirena. Tandaꞌ binataꞌ iti, ia miꞌi hangaꞌna binataꞌ to rungu-runguna ba ángkáꞌ to molempónga hangaꞌna.

¹⁸ Mewaliꞌ hangaa-ngaa tapembiáꞌ kanótó lalu hangko i Pueꞌ Ala bona taisá lempóna laluita iti. Heáná to mapánde, peisáheꞌ moimbaꞌ hai moisá lempóna ángkáꞌ binataꞌ iti, láwiꞌ ángkáꞌ iti ia miꞌi hangaꞌna hadua tauna. Hai ángkáꞌ iti ia miꞌi ini átuna ini puloꞌna hai ini.