Pampetudeꞌá 12 - Sura Magasaꞌ: Bahangapa sura Pototowiá to Sae hai Pototowiá to Woꞌu

Hadua towawine hai hambaꞌa naga

¹ Roo onoꞌ, kuita i langiꞌ hambuaꞌ tandaꞌ to metingkáráki: ara hadua towawine, waruꞌna nodo pewangkaꞌ alo, hai ara wulá i wóiꞌ bitina. I wuáꞌna ara tatali to rabábehi hangko i hampuloꞌ hai rombuaꞌ betue.

² Towawine iti tangaꞌna morodua. Ia meraruaꞌ ánti kamapárina láwiꞌ ina moánáꞌ miꞌi.

³ Ara mani hampákáꞌ tandaꞌ to metingkáráki to mesupaꞌ i langiꞌ. Ara hambaꞌa naga to malei hai mahile ntepuꞌu, mowuáꞌ pitu wuaꞌna hai motánduꞌ hampuloꞌ. I upu-upu wuáꞌna ara tatali datu.

⁴ Naga iti mohepenga ikuna, nadiiꞌ hanggáláꞌ tálu hangko i betue i langiꞌ hai natibeheꞌ i wongko duniáꞌ. Meángkáꞌ miꞌi naga iti i lindoꞌna towawine to ina moánáꞌ miꞌi, bona moameꞌ Ánáꞌna to ina mesupaꞌ.

⁵ Moánáꞌ mpuꞌu miꞌi towawine iti hadua tobaleilo. Ánángkóiꞌ iti, Ia miꞌi to ina motibaaꞌ laiꞌ besiꞌ, tandaꞌ kamakuasaꞌNa mopárentái humalele duniáꞌ. I tempóna Ánángkóiꞌ iti ina naꞌameꞌ naga, Ia raꞌala miꞌi haneꞌi raꞌánti lao i Pueꞌ Ala, bona mepárentáHeꞌ hingkakani i lalu surugáꞌ.

⁶ Roo onoꞌ, towawine iti melangka miꞌi lao i pádá loriꞌ, haneꞌi rapatoroꞌ i katoroꞌá to napatimamaꞌá miꞌi Pueꞌ Ala. Towawine iti rakádipurá i lalu hasábu rongatu hai ini puloꞌna alona kamaruena.

⁷ Hangko ionoꞌ, kuita pombeala to mahile i surugáꞌ. Handaꞌ malaꞌeka natadulakoiheꞌ Mikaeli moewaꞌ naga iti. Hai naga iti radurei woꞌo malaꞌekana to kadake moewaꞌ Mikaeli.

⁸ Naga iti hai malaꞌekana, ranangiheꞌ, onoꞌ miꞌi haneꞌi tiꞌarapoheꞌ rapaliu toroꞌ i surugáꞌ.

⁹ Naga to mahile iti ratibe miꞌi hangko i surugáꞌ haweꞌ i duniáꞌ hingkakani hai malaꞌekana. Ia miꞌi lelótó to hangkokoia piꞌi kaꞌárána, to rauliꞌ woꞌo Datu Tokadake ba Tadulakoraꞌ Setáꞌ. Ia to mopakanawoꞌ tauna i humalele duniáꞌ.

¹⁰ Roo onoꞌ, kuhádi wopiꞌi wambaꞌ i surugáꞌ to molaluita napasimbuku, nauliꞌ: “Haweꞌ miꞌi tempóna popárentána Pueꞌ Ala Pueꞌtaꞌ. Ia mampoweꞌi katueꞌ to maroꞌa i taunáNa, mopatongawaꞌ kamakuasaꞌNa, hai mantepuꞌu mepárentá láwiꞌ Ia miꞌi Datu. Haweꞌ miꞌi tempóna Datu Topehómpóꞌ to Napileꞌi Pueꞌ Ala ina mopatongawaꞌ kamakuasaꞌNa, láwiꞌ Datu Tokadake rawura miꞌi hangko i surugáꞌ; ia miꞌi to mosalaꞌiheꞌ oaꞌ halalu hampepepoináláintaꞌ i lindoꞌna Pueꞌ Ala Pueꞌtaꞌ.

¹¹ Tauna to mepoinálái iti monangimoheꞌ Datu Tokadake láwiꞌ mehárungáheꞌ i Iesu to rapándiriꞌ nodo Ánáꞌ Dimbá to mabubu waheꞌNa i kamateNa, hai mobámbáriheꞌ oaꞌ kaꞌIesuna Datu Topehómpóꞌ. Menangiheꞌ láwiꞌ kehapiꞌheꞌ rapopeahiahiꞌ ba rapapate, bateꞌna tiꞌaraheꞌ mosuliꞌ hangko i pepoináláiraꞌ.

¹² Onoꞌ miꞌi haneꞌi hangaa-ngaa góeꞌkou, kómu to toroꞌ i surugáꞌ, agáiáná hurewuꞌmokou, kómu to toroꞌ i humalele duniáꞌ {to tiꞌara mengkoruꞌ i Pueꞌ Ala}, láwiꞌ Datu Tokadake mendáulu miꞌi lao i kómu. Rumihi kamabukoꞌna, láwiꞌ naisá tempóna mopamapári tauna ina hópóꞌ miꞌi.”

¹³ I kanaisána naga iti ratibe miꞌi i duniáꞌ, ia modápáꞌ towawine to moánáka Ánángkóiꞌ tobaleilo iti.

¹⁴ Agáiáná towawine iti raweꞌi rombuaꞌ kapi to mahile, nodo kapi koꞌaaꞌ to mahile ntepuꞌu. Onoꞌ miꞌi haneꞌi membara miꞌi lao i pádá loriꞌ i katoroꞌá to rapatimamaꞌá miꞌi ami, bona tiꞌara nalámbiꞌ naga iti. Ionoꞌ, ia rakádipurá tálu parena hantangaꞌ kamaruena.

¹⁵ Roo onoꞌ, naga iti mohupáránga uwai to handaꞌ hangko i ngángána, bona mowaroha towawine iti,

¹⁶ agáiáná duniáꞌ motulungi towawine iti láwiꞌ hangkaꞌ-hangkaꞌ peá tebungkáhi duniáꞌ moameꞌ uwai to nahupárá naga iti.

¹⁷ Mabukoꞌ ntepuꞌu naga i towawine iti, onoꞌ haneꞌi lao miꞌi mampombealaꞌá tauna to mampeuláꞌi hawaꞌna Pueꞌ Ala hai mopangákuꞌ kaꞌIesuna Pueꞌraꞌ. Hira miꞌi iti to nodo pemuleꞌána towawine iti.

¹⁸ Roo onoꞌ, naga iti meángkáꞌ i wiwi tahiꞌ.