Pampetudeꞌá 11 - Sura Magasaꞌ: Bahangapa sura Pototowiá to Sae hai Pototowiá to Woꞌu

Rodua sabiꞌna Pueꞌ Ala

¹ Roo onoꞌ, raweꞌiaꞌ hangkau popehukáꞌ, lenggeꞌna nodo laiꞌ, hai nahángáꞌáꞌáꞌaꞌ Pueꞌ Ala, “Laomokoꞌ mohukáꞌ TámbiNgkuꞌ hai paintuá dupaꞌ, hai nuimbaꞌ hangapa kahandaꞌraꞌ tauna to menómbá ionoꞌ.

² Agáiáná ineeꞌ Nuhukáꞌ tangabaa TámbiNgkuꞌ iti, láwiꞌ tangabaa iti Kupatimamaꞌáheꞌ tauna to tiꞌara toIahudiꞌ. Hira ina mokada-kadaheꞌ Ierusale, kótá to magasaꞌ iti, i lalu iba puloꞌna hai rombulá.

³ I tempó iti, ina Kuhuoꞌ rodua sabiꞌKuꞌ lao mopahaweꞌ laluitaNgkuꞌ. SabiꞌKuꞌ to rodua iti, mopakeꞌheꞌ waruꞌ to rabábehi hangko i karuꞌ, nodo to rapakeꞌ tauna to masusa laluraꞌ, hai ina mopahaweꞌheꞌ laluitaNgkuꞌ i lalu hasábu rongatu hai ini puloꞌna alona kamaruena.”

⁴ Sabiꞌ to rodua iti, rapándiriꞌ nodo rompóꞌá kau saitu hai rombuaꞌ pamboliá huluꞌ to meángkáꞌ i lindoꞌna Pueꞌ Ala Pueꞌna humalele duniáꞌ.

⁵ Ara kuasaꞌraꞌ mampopesupaꞌ api hangko i ngángáraꞌ mopapate ba heáná peá to mampoinao mobábehi to kadake i hira. Onoꞌ miꞌi haneꞌi mateheꞌ upu-upu tauna to moewaꞌheꞌ.

⁶ Ara kuasaꞌraꞌ motuko langiꞌ bona tiꞌara tóá udá tangaꞌraꞌ mopahaweꞌ laluitana Pueꞌ. Makuasaꞌheꞌ woꞌo i upu-upu uwai. Uwai peisá rapopewaliꞌ waheꞌ. Ara woꞌo kuasaꞌraꞌ mopakasusa duniáꞌ moliu mampopengaa kapári, impirá peá mouláꞌ peundeꞌáraꞌ.

⁷ Ane hópóꞌ miꞌi bágóꞌraꞌ mopahaweꞌ laluitana Pueꞌ, ina haweꞌ hambaꞌa binataꞌ to kadake to moewaꞌheꞌ. Ia ina monangiheꞌ hai mopapateheꞌ. Binataꞌ to kadake iti, ia miꞌi binataꞌ to ina mesuwuꞌ hangko i pingke pehukuá to tiꞌara tehukáꞌ kakaladuna.

⁸ Karooraꞌ sabiꞌ to rodua iti napapate, wátáraꞌ ina rapatodáhi i tangaꞌ rárá kótá to mahile. Kótá to mahile iti, kótá karapakuꞌána Pueꞌraꞌ. Kótá iti peisá rapándiriꞌ nodo kótá Sodomo ba tampoꞌ Másiriꞌ hangkoia ánti kakadakeraꞌ.

⁹ Tauna hangko i humalele duniáꞌ: hangko i upu-upu kadatuá, upu-upu pemuleꞌá hai hangko i upu-upu básá, ina moita wátáraꞌ rodua sabiꞌ to rapapate iti. I lalu tálu alona hantangaꞌ, wátáraꞌ ina rapatodáhi i tangaꞌ rárá láwiꞌ tiꞌaraheꞌ rapeweꞌi ratawu.

¹⁰ Tauna to kadake to toroꞌ i duniáꞌ, ina mosusaheꞌ hai mombeparaseeheꞌ ánti kagóeꞌraꞌ láwiꞌ nabiꞌ to rodua iti to mampopeahiahiꞌheꞌ matemoheꞌ.

¹¹ Agáiáná ane liu miꞌi tálu alona hantangaꞌ, Inaona Pueꞌ Ala ina mopatueꞌheꞌ huleꞌ álána mearóheꞌ meángkáꞌheꞌ. Mewaliꞌ, ina malááꞌ ntepuꞌuheꞌ upu-upu tauna to moita apa to pewaliꞌ iti.

¹² Roo onoꞌ, ina rahádi wambaꞌ hangko i surugáꞌ to molaluita masimbuku mokióꞌheꞌ to rodua iti, ina Nauliꞌ, “Mengkaheꞌmokou mai!” Mewaliꞌ ina teoreꞌ mpuꞌuheꞌ lao i surugáꞌ napótóꞌheꞌ gawu. Pengkaoreꞌraꞌ iti ina rasabiki upu-upu ewáliraꞌ.

¹³ Hai i tempó onoꞌ, ina melinu to rumihi. Hanggáláꞌ hampuloꞌ hangko i kótá iti ina magero, hai ánti pelinuna iti, pitu sábuna tauna ina mate. Ina malááꞌ ntepuꞌuheꞌ tauna ntániꞌna, haneꞌi rauliꞌ, “Mahile ntepuꞌu kuasaꞌna Pueꞌ Ala to i surugáꞌ!”

¹⁴ Mewaliꞌ, hópóꞌ miꞌi kapári to karompákáꞌna. Agáiáná ara mani hampákáꞌ kapári to ina meusungi pemiꞌi.

Tamburuꞌ to kapituna ratawueꞌ

¹⁵ Malaꞌeka to kapitu motawueꞌ tamburuꞌna, hai araheꞌ to molaluita rapasimbuku i lalu surugáꞌ, rauliꞌ: “Deꞌe-deꞌe, upu-upu kadatuá i duniáꞌ napárentá miꞌi Pueꞌ Ala Pueꞌtaꞌ, hingkakani hai Ia to Napileꞌi miꞌi mewaliꞌ Datu Topehómpóꞌ, bona mepárentá duuꞌna i rue-ruena.”

¹⁶ Totosae to rompuloꞌ hai iba iti to mehodaheꞌ i pehodaꞌáraꞌ i lindoꞌna Pueꞌ Ala, molingkuduheꞌ motóngkóꞌ haweꞌ i daula menómbá i Hia,

¹⁷ rauliꞌ: “Pueꞌ Ala, mahile kuasaꞌMu hangko i upu-upuna. AramoKoꞌ ami hangko i rungu-runguna, hai araKoꞌ deꞌe-deꞌe. Kiuliꞌ handaꞌ kamaroꞌana i Hio, Pueꞌ, láwiꞌ ánti kamahilena kuasaꞌMu monangi ewáliMu, mantepuꞌumoKoꞌ mepárentá.

¹⁸ Upu-upu tauna to tiꞌara meuláꞌ i Hio, mabukoꞌmoheꞌ moewaꞌKoꞌ. Agáiáná haweꞌ miꞌi tempóna Nupatongawaꞌáheꞌ kamabukoꞌMu. Haweꞌ miꞌi tempóna Nubutusi kárá-káráraꞌ tauna to mate. Haweꞌ miꞌi tempóna Nuháwángi bábehiáraꞌ taunáMu to maroꞌa: i nabiꞌ to mopahaweꞌ laluitaMu, i tauna to meuláꞌ i Hio, iamoheꞌ tauna to mampomahile hangaꞌMu, mantepuꞌu to i wóiꞌ tueꞌraꞌ, haweꞌ-haweꞌ i to mokahangaꞌiá tueꞌraꞌ. Haweꞌ miꞌi tempóna Nuhuku tauna to mopakadake duniáꞌ deꞌe.”

¹⁹ Hangko ionoꞌ, tebungkáhi miꞌi babaꞌ Támbina Pueꞌ Ala i surugáꞌ, hai i lalu TámbiNa iti, Petiꞌ Podándi teita miꞌi. Roo onoꞌ, mekiláꞌ hai megumpataꞌ, melinu, hai tóá miꞌi udá rumihi to mowuaꞌ.