Pampetudeꞌá 10 - Sura Magasaꞌ: Bahangapa sura Pototowiá to Sae hai Pototowiá to Woꞌu

Malaꞌeka to motibaaꞌ hambuaꞌ sura to kókóiꞌ

¹ Roo onoꞌ, kuita hadua malaꞌeka to maróhó ntepuꞌu mendáulu mai hangko i surugáꞌ. Malaꞌeka iti napótóꞌ gawu, hai wuáꞌna natolelingi mpárágiá. Lindoꞌna mewangkaꞌ nodo alo, bitina nodo áriꞌi to keapi.

² Biti kuánána mepangka i tahiꞌ, hai biti kabeoꞌna mepangka i lorena. I taena ara hambuaꞌ sura to kókóiꞌ to tebungkáhi.

³ Monganga-nganga miꞌi malaꞌeka iti napasimbuku, nodo pengao singá. Roo monganga, ara gumpataꞌ to mokániꞌ masimbuku pitu kánina, molaluita nodo tauna.

⁴ Karoona gumpataꞌ iti molaluita, ina kuꞌukiꞌ laluitana, agáiáná hangkaꞌ-hangkaꞌ peá kuhádi wopiꞌi wambaꞌ hangko i surugáꞌ to mohángáꞌáꞌáꞌaꞌ, “Ineeꞌ nuꞌukiꞌ iti! Hangaa-ngaa nuwuniángi apa to nauliꞌ gumpataꞌ to pitu ininá.”

⁵ Roo iti, malaꞌeka to kuita ininá, to mepangka i tahiꞌ hai i lorena, moángkáꞌ miꞌi tae kuánána i langiꞌ,

^6-7 haneꞌi modándi i lalu hangaꞌna Pueꞌ Ala to tueꞌ duuꞌna i rue-ruena, to mampopewaliꞌ langiꞌ, duniáꞌ, tahiꞌ hai upu-upu óntóꞌna. I podándina nauliꞌ node: “Ane malaꞌeka to kapitu motawueꞌ tamburuꞌna, i tempó iti pemiꞌi Pueꞌ Ala ina mampopewaliꞌ tunggáiáNa to marue miꞌi tewuniángi. TunggáiáNa iti bateꞌna ina hawiáꞌ mewaliꞌ, mouláꞌ apa to Napopaisáꞌáheꞌ huoꞌáNa hangkoia, ia miꞌi nabiꞌ-nabiꞌ to moánti ngkóráꞌNa.”

⁸ Roo onoꞌ, wambaꞌ to kuhádi hangko i surugáꞌ ininá mohángáꞌá wopaꞌaꞌ, nauliꞌ, “Laomokoꞌ moala sura to tebungkáhi, to ara i taena malaꞌeka to mepangka i tahiꞌ hai i lorena!”

⁹ Lao mpuꞌumoꞌ i malaꞌeka iti, kuhángáꞌá, “Weꞌiaꞌ sura to kókóiꞌ iti.” Nahángáꞌáꞌáꞌaꞌ, “Nuala miꞌi haneꞌi nuandeꞌ. Ane i ngángámu, ina matáni nodo tináháꞌ, agáiáná ane i lalu taꞌimu, ina mapaiꞌ.”

¹⁰ Kuala mpuꞌu miꞌi sura iti hangko i taena malaꞌeka haneꞌi kuandeꞌ. I ngángángkuꞌ, minána matáni ntepuꞌu nodo tináháꞌ, agáiáná i lalu taꞌingkuꞌ mapaiꞌ.

¹¹ Roo onoꞌ, nahángáꞌáꞌáꞌaꞌ, “Hangaa-ngaa nupahaweꞌ wopiꞌi apa to napakanótó miꞌi Pueꞌ Ala i tauna i humalele duniáꞌ, maroꞌa datu-datu, tampoꞌ, pemuleꞌá hai upu-upu básá.”