Matiu 8 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu mopakauriꞌ hadua tauna to ketánggáꞌ

¹ Karoona Iesu mepaturoꞌ, Ia mendáulu hangko i buluꞌ, hai handaꞌ tauna meuláꞌ i Hia.

² I tempó iti, haweꞌ miꞌi hadua tauna to ketánggáꞌ hai molingkudu i bitina Iesu, nauliꞌ, “Pueꞌ, kuisá kaNubukuna mopakauriꞌaꞌ. Ane Nupokanai, Nupakauriꞌaꞌ wongkódóꞌá!”

³ Napekamaꞌ miꞌi Iesu tauna iti haneꞌi Nauliꞌ, “Kupokana. Mauriꞌmokoꞌ!” Tempó onoꞌ, hakiꞌna kásáliu mauriꞌ.

⁴ Roo onoꞌ, nauliꞌ wopiꞌi Iesu i hia, “Ineeꞌ nupolaluita i heáná peá apa to mewaliꞌ deꞌe. Laomokoꞌ sieruꞌ nupetudeꞌá wátámu i tadulako menómbá bona naita kamauriꞌmu miꞌi, hai hangaa-ngaa nuánti popenómbámu mouláꞌ párentá to teukiꞌ i lalu Paturoꞌna Musa, bona tongawaꞌ i upu-upu tauna kamauriꞌmu miꞌi.”

Iesu mopakauriꞌ hadua hawiꞌna tadulako surudadoꞌ toRoma

⁵ Roo onoꞌ, Iesu lao i wánuá Kapenau. I pesuaꞌNa ionoꞌ, haweꞌ miꞌi hadua tadulako surudadoꞌ toRoma mampohidupaꞌá Iesu hai membiáꞌ tulungi,

⁶ nauliꞌ, “Tuá! Hawiꞌkuꞌ maturu peá oaꞌ i támbi mantódihá. Mapári ntepuꞌu nahádi láwiꞌ paluꞌ.”

⁷ Nauliꞌ Iesu, “Ina lao Kupakauriꞌ.”

^8-9 Nahániki tadulako surudadoꞌ iti, “Tuá, tiꞌara hintotoꞌ Io mesuaꞌ i lalu támbingkuꞌ {láwiꞌ toRomaꞌaꞌ}. Kódóꞌ deꞌe tadulako surudadoꞌ. Ara to i reá lántiꞌna hangko i kódóꞌ, hai araheꞌ woꞌo to kupohawaꞌá. Ane rápáꞌna kupohawaꞌá hadua surudadoꞌ, kuhángáꞌá, ‘Laokoꞌ!’ hangaa-ngaa lao. Ane kukióꞌ surudadoꞌ to ntániꞌna, ‘Maikoꞌ!’ hangaa-ngaa mai. Ane kuhángáꞌá hawiꞌkuꞌ, ‘Nubábehi iti!’ hangaa-ngaa nabábehi. Noꞌonoꞌ woꞌo Io, Tuá. Nuhuwárá peá hantepóꞌ laluita, hawiꞌkuꞌ iti bateꞌna ina mauriꞌ.”

¹⁰ Tingkáráꞌ Iesu mohádi laluitana tadulako surudadoꞌ iti, onoꞌ miꞌi haneꞌi mampehaileꞌ tauna to meuláꞌ i Hia, Nauliꞌ, “Maróhó ntepuꞌu pepoináláina tauna deꞌe! Toꞌu! Hai Kuhángáꞌáꞌákou, i oloꞌraꞌ toSáráeliꞌ, tiꞌara mani haweꞌ hadua to Kulámbiꞌ to maróhó pepoináláina nodo pepoináláina tauna deꞌe to tiꞌara toSáráeliꞌ.

¹¹ Mewaliꞌ, bona niꞌisá: i lalu popárentáNa Pueꞌ Ala, handaꞌ tauna to tiꞌara toIahudiꞌ ina mewaliꞌheꞌ taunáNa. Ina haweꞌheꞌ hangko i humalele duniáꞌ, mehodaheꞌ hai mandeꞌ i kagóeꞌ-góeꞌ i lalu surugáꞌ hingkakani hai Burahima, Isakiꞌ hai Iako, toioruraꞌ toSáráeliꞌ.

¹² Katoꞌuána, kómu riꞌi toSáráeliꞌ to hintotoꞌ mewaliꞌ taunána Pueꞌ Ala i lalu popárentáNa. Agáiáná handaꞌkou to ina ratibe i lalu kakáindiána, karaoꞌ hangko i Pueꞌ Ala. Ionoꞌ, ina teriaꞌkou hai mapári ntepuꞌu nihádi.”

¹³ Roo onoꞌ, nauliꞌ Iesu i tadulako surudadoꞌ iti, “Mesuleꞌmokoꞌ, láwiꞌ apa to nupoinálái, bateꞌna ina mewaliꞌ.” Tempó onoꞌ woꞌo, mauriꞌ mpuꞌu miꞌi hakiꞌna hawiꞌ iti to tangaꞌna maduꞌa i támbina.

Iesu mopakauriꞌ handaꞌ tauna

¹⁴ Roo onoꞌ, Iesu lao i támbina Peturuꞌ. Ionoꞌ, Naita pengántiꞌina Peturuꞌ towawine maturu-turu láwiꞌ malengiꞌ.

¹⁵ Kanatibaaꞌna Iesu taena towawine iti, kásáliu mauriꞌ. Hangko ionoꞌ, ia mearó miꞌi haneꞌi mokádipurá pandeꞌna Iesu.

¹⁶ Kalumbaꞌ miꞌi, handaꞌ tauna lao i Iesu moánti to maduꞌa hai to napesuaꞌi setáꞌ. Iesu mampopesuwuꞌheꞌ setáꞌ iti moliu peá laluitaNa, hai tauna ntániꞌna to maduꞌa Napakauriꞌheꞌ woꞌo.

¹⁷ Upu-upu to nabábehi Iesu iti mobukeki laluitana nabiꞌ Iesaia hangkoia to manguliꞌ: “Ia miꞌi to mokábáhákeꞌ hangko i pantódihántaꞌ hai mopakauriꞌ hakiꞌtaꞌ.” (Iesaia 53:4)

Tauna to mampoinao meuláꞌ i Iesu

¹⁸ Hangkani tempó, lelimoheꞌ tauna to lao i Iesu. KamoitáNa tauna to handaꞌ iti, Nahuoꞌheꞌ topeguruNa mengkalimba lao tándáꞌ i hambali rano.

¹⁹ Agáiáná haweꞌ miꞌi hadua guru agama toIahudiꞌ, mohángáꞌá Iesu, nauliꞌ, “Guru, iumbá kalaoáMu, ionoꞌaꞌ woꞌo ina meuláꞌ!”

²⁰ Nahániki Iesu, “Serigala ara katoroꞌáraꞌ i balamba, hai tádáhi ara háráraꞌ, agáiáná Ánáꞌ Mánusiá, tiꞌara ara támbiNa.”

²¹ Roo onoꞌ, ara woꞌo hadua tauna to meuláꞌ i Hia to manguliꞌ, “Pueꞌ, Nupaliuaꞌ sieruꞌ lao motawu umángkuꞌ. Upu rái ratawu, hangko peisáraꞌaꞌ meuláꞌ i Hio.”

²² Agáiáná nauliꞌ Iesu, “Nupatodáhimoheꞌ tauna to mate pepoináláiraꞌ motawu hangka tomateraꞌ. Agáiáná io, meuláꞌmokoꞌ i Kódóꞌ!”

Iesu mampopengkaroo angi mataꞌ

²³ Roo onoꞌ, mengkaheꞌ miꞌi Iesu i lalu duanga hingkakani hai topeguruNa, haneꞌi pohuꞌmoheꞌ ina mengkalimba i rano Galilea.

²⁴ Hangkaꞌ-hangkaꞌ peá mampohidupaꞌáheꞌ wui to rumihi ntepuꞌu. Duangaraꞌ narokaꞌ bálumbá duuꞌna ina bukeꞌ miꞌi uwai. I tempó iti, Iesu tangaꞌna letaꞌ.

²⁵ TopeguruNa moruaꞌ, rahángáꞌá, “Pueꞌ! Tulungiangkaiꞌ! Ina hurewuꞌkeꞌ!”

²⁶ Iesu mohángáꞌáheꞌ, “Moapa riꞌi haneꞌi malááꞌkou? Makuraꞌ mani pepoináláimi.” Meángkáꞌ miꞌi Iesu haneꞌi mokámbáróá wui hai bálumbá iti. Kásáliu tinda ntepuꞌu rano iti.

²⁷ Tingkáráꞌ ntepuꞌuheꞌ, rauliꞌ, “Heáná ripaꞌi tauna deꞌe? Mogalo riꞌi wui hai bálumbá mouláꞌ hawaꞌNa!”

Iesu mopakauriꞌ rodua tauna to napesuaꞌi setáꞌ

²⁸ Iesu hai topeguruNa haweꞌmoheꞌ i hambali rano i tampoꞌ Gadara. Ionoꞌ ara rodua tauna to napesuaꞌi setáꞌ, to toroꞌheꞌ i balamba popatawuá. Mesuwuꞌheꞌ hangko i popatawuá iti, haneꞌi laoheꞌ mampohidupaꞌá Iesu. Tauna to rodua iti melááꞌ-lááꞌi ntepuꞌuheꞌ, onoꞌ miꞌi haneꞌi tiꞌara piꞌi ara tauna to pebáiꞌ melempó ionoꞌ.

²⁹ Monganga-ngangaheꞌ setáꞌ to mesuaꞌ i tauna to rodua iti, rauliꞌ, “Ánáꞌna Pueꞌ Ala! Moapa riꞌi haneꞌiKoꞌ mai ieneꞌ? Ba ina Nuhukumongkaiꞌ, kehapiꞌ tiꞌara mani haweꞌ tempóna Alo Pobutusi?”

³⁰ Tiꞌara karaoꞌ hangko ionoꞌ, araheꞌ boeꞌ to handaꞌ harómbóngá tangaꞌraꞌ masungkiꞌ.

³¹ Setáꞌ to mesuaꞌ i tauna iti membiáꞌ i Iesu, rauliꞌ, “Ane Nupopelóhóꞌangkaiꞌ hangko ieneꞌ, Nuhuoꞌangkaiꞌ mesuaꞌ i boeꞌ to handaꞌheꞌ doꞌo.”

³² Nauliꞌ Iesu, “Laomokou!” Mesuwuꞌ mpuꞌumoheꞌ setáꞌ iti, haneꞌiheꞌ mesuaꞌ i boeꞌ. Melangkamoheꞌ boeꞌ iti haneꞌi manawoꞌheꞌ i pingke lao i lalu rano, álána mateheꞌ humpu.

³³ Tauna to mokámpái boeꞌ iti moita apa to pewaliꞌ i boeꞌraꞌ hai apa to pewaliꞌ i tauna to napesuaꞌi setáꞌ iti. Melangkamoheꞌ lao i wánuá mopahaweꞌ upu-upu to pewaliꞌ.

³⁴ Onoꞌ miꞌi haneꞌi pueꞌ wánuá mobárárámoheꞌ lao motunggái Iesu. Rahuoꞌ bona pohuꞌ hangko i tampoꞌ Gerasa iti.