Matiu 5 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu mopaturoꞌ tauna to handaꞌ i buluꞌ

¹ Tempóna Iesu moita tauna to handaꞌ iti, Ia mempanaiꞌ miꞌi lao i buluꞌ, haneꞌi mehoda. KamehodaNa peá, laomoheꞌ topeguruNa mengkahungkuꞌ,

² haneꞌi natepuꞌu miꞌi Iesu mepaturoꞌ. Nauliꞌ node:

³ “Morasiꞌ miꞌi tauna to moisá hangaa-ngaa mopaisarengaheꞌ katueꞌraꞌ i Pueꞌ Ala, láwiꞌ hira miꞌi to mewaliꞌ taunána Pueꞌ Ala i lalu popárentáNa.

⁴ Morasiꞌ miꞌi tauna to wiora ntepuꞌuheꞌ, láwiꞌ Pueꞌ Ala ina mopalindóheꞌ.

⁵ Morasiꞌ miꞌi tauna to mengkaiwóiꞌ, láwiꞌ Pueꞌ Ala ina mobukeki dándiNa i hira.

⁶ Morasiꞌ miꞌi tauna to moundeꞌ ntepuꞌu mewaliꞌ tauna to manótó i peitána Pueꞌ Ala, láwiꞌ Pueꞌ Ala ina motulungiheꞌ mewaliꞌ tauna to manótó i peitáNa.

⁷ Morasiꞌ miꞌi tauna to mampokaꞌahiꞌ hángká rángáraꞌ, láwiꞌ Pueꞌ Ala ina mampokaꞌahiꞌheꞌ woꞌo.

⁸ Morasiꞌ miꞌi tauna to mopaioru peundeꞌána Pueꞌ Ala hangko i laluraꞌ ntepuꞌu, láwiꞌ hira ina moitaheꞌ Pueꞌ Ala.

⁹ Morasiꞌ miꞌi tauna to moánti podame i hángká rángáraꞌ, láwiꞌ hira miꞌi to ina rauliꞌ ánáꞌna Pueꞌ Ala.

¹⁰ Morasiꞌ miꞌi tauna to rapopeahiahiꞌ ánti pouláꞌraꞌ peundeꞌána Pueꞌ Ala, láwiꞌ hira miꞌi to mewaliꞌ taunána Pueꞌ Ala i lalu popárentáNa.

¹¹ Morasiꞌmokou ane rasasalaꞌikou, rapopeahiahiꞌkou, hai hangaꞌmi rapakadake ánti peuláꞌmi i Kódóꞌ.

¹² Hangaa-ngaa góeꞌ ntepuꞌukou láwiꞌ mahile háwángina to ina nilámbiꞌ i lalu surugáꞌ, láwiꞌ nabiꞌ-nabiꞌ hangkoia rapopeahiahiꞌheꞌ woꞌo hibali hai kómu.”

Tauna to mepoinálái rapándiriꞌ nodo bure hai pewangkaꞌ

¹³ Iesu mopaliliu laluitaNa, Nauliꞌ, “Kómu to meuláꞌ i Kódóꞌ, nodokou bure to mopamaroꞌa katueꞌraꞌ tauna i duniáꞌ. Agáiáná ane tiꞌarakou mampeuláꞌi paturoꞌKuꞌ, tiꞌarapokou mobunduꞌ, nodo pekou bure to matáweá to tiꞌara piꞌi peisá rapamabure huleꞌ. Rángina miꞌi ratibe peá i rárá hai rakada-kada tauna.

¹⁴ Kómu to meuláꞌ i Kódóꞌ, nodokou pewangkaꞌ to mowangkaꞌi upu-upu tauna i duniáꞌ. Nodokou karaitána kótá to raꞌaró i wongko buluꞌ, bábehiámi tiꞌara peisá rawuniángi.

¹⁵ Noꞌonoꞌ woꞌo tiꞌara ara hadua tauna to motótó palita haneꞌi nahumbáki hai kori to mahile. Huluꞌ bateꞌna nawoli i kamapángkáꞌána bona peisá mowangkaꞌi upu-upu tauna i lalu támbi.

¹⁶ Noꞌonoꞌ woꞌo pewangkaꞌ to ara i lalumi hangaa-ngaa mewangkaꞌ, bona bábehiámi to maroꞌa iti ina raita upu-upu tauna, álána motóiáheꞌ Umámi to ara i surugáꞌ.”

Paturoꞌna Iesu kana i áturá agama Iahudiꞌ

¹⁷ Nauliꞌ Iesu, “Ineeꞌ nipekiri tunggáiáNgkuꞌ maiAꞌ mowoe áturána Pueꞌ Ala to napahaweꞌ Musa hai paturoꞌraꞌ nabiꞌ-nabiꞌ hangkoia. Tiꞌara! Ngkáliꞌna riꞌi maiAꞌ mopakanótó lempóna apa to teukiꞌ i Áturá iti.

¹⁸ Toꞌu ntepuꞌu, hai Kuhángáꞌáꞌákou: upu-upu to teukiꞌ i lalu Sura Áturána Pueꞌ Ala hangaa-ngaa ina mewaliꞌ. Ane ara mani langiꞌ hai tampoꞌ deꞌe, bateꞌna tiꞌara ara hantepóꞌ laluita i lalu Áturána Pueꞌ Ala to tiꞌara ina mewaliꞌ, kehapiꞌ riꞌi áturá to manangkoꞌ ntepuꞌu.

¹⁹ Onoꞌ miꞌi haneꞌi Kuhángáꞌáꞌákou, heáná to tiꞌara mampeuláꞌi hampákáꞌ peá párentá i lalu Áturána Pueꞌ Ala, láwiꞌ napekiri párentá iti manangkoꞌ peá, hai mopaturoꞌ tauna ntániꞌna bona moliungiheꞌ párentá iti, tauna iti ina mewaliꞌ tepaiwóiꞌá ntepuꞌu hangko i upu-upu taunána Pueꞌ Ala. Agáiáná heáná to mampeuláꞌi upu-upu párentá i lalu Áturána Pueꞌ Ala, tepasuaꞌ párentá to manangkoꞌ, hai mopaturoꞌ tauna ntániꞌna bona mampeuláꞌiheꞌ woꞌo párentá iti, tauna iti miꞌi to ina mewaliꞌ tepaireáꞌá hangko i upu-upu taunána Pueꞌ Ala.

²⁰ Mewaliꞌ, Kuhángáꞌáꞌákou: ane niundeꞌi bona mewaliꞌkou taunána Pueꞌ Ala, hangaa-ngaa nipeuláꞌi peundeꞌáNa, hai hangaa-ngaa nipakaróhó ntepuꞌu mani peuláꞌmi hangko i kamaróhóna peuláꞌraꞌ guru-guru agama hai toParisi.”

Ineeꞌ mabukoꞌ

²¹ Iesu mopaliliu laluitaNa, Nauliꞌ, “Niꞌisá miꞌi párentá to rapahaweꞌámoheꞌ toioruntaꞌ hangkoia to manguliꞌ: ‘Ineeꞌ mepapate, hai heáná to mepapate hangaa-ngaa rabutusi kárá-kárána haneꞌi rahuku.’

²² Agáiáná deꞌe-deꞌe Kuhángáꞌáꞌákou: heáná to mokabukoꞌi hángká rángána, Pueꞌ Ala ina mobutusi kárá-kárána. Heáná to mopakóiꞌ hángká rángána, ina raꞌánti i Topepáresáꞌ Mahile. Hai heáná to mohángáꞌá hángká rángána, ‘bebe’, hintotoꞌ ntepuꞌu ratibe i lalu naraka. Ionoꞌ ara api to roreꞌ ntepuꞌu.

²³ Mewaliꞌ, ane rápáꞌna mesuaꞌkoꞌ i Támbina Pueꞌ Ala moánti popenómbámu, hai ane nubuhinaoi kaꞌárána mani rángámu to kóiꞌ inaona i hio,

²⁴ hangaa-ngaa nuwoli sieruꞌ popenómbámu i lindoꞌna paintuá popenómbá, haneꞌi mesuleꞌkoꞌ lao modame hai rángámu iti bona mohintuwuꞌkou huleꞌ. Roo onoꞌ, hangko mesuleꞌrakoꞌ lao mohuhuꞌ popenómbámu i Pueꞌ Ala.

²⁵ Noꞌonoꞌ woꞌo, ane ara ewálimu to ina mobuáꞌkoꞌ i lindoꞌna topebutusi, hangko tiꞌara manikou haweꞌ, hangaa-ngaa nugagu nupodameá rángámu iti, láwiꞌ ane tiꞌarakou modame, ia ina mobuáꞌkoꞌ i topebutusi, hai topebutusi iti ina mampeweꞌikoꞌ i pulisi, hai pulisi iti ina mopusaꞌkoꞌ i lalu tarungku.

²⁶ Toꞌu ntepuꞌu, hai Kuhángáꞌáꞌákoꞌ: tiꞌarakoꞌ ina mesuwuꞌ hangko i tarungku ane tiꞌara mani upu nubaiari bukeꞌ-bukeꞌ dendámu.”

Ineeꞌ mebualosi

²⁷ “Niꞌisá miꞌi párentá to rapahaweꞌámoheꞌ toioruntaꞌ hangkoia to manguliꞌ: ‘Ineeꞌ mebualosi.’

²⁸ Agáiáná deꞌe-deꞌe Kuhángáꞌáꞌákou: heáná to motótói hadua towawine hai napokaelu, lempóna mebualosi miꞌi i laluna hai towawine iti.

^29-30 Mewaliꞌ, maingáꞌ-ingáꞌkou bona ineeꞌkou madósá moliu apa to niꞌita ba apa to nibábehi. Ane rápáꞌna mátámi hambali to moántikou i lalu dósá, rángina miꞌi nidungkiki hai nitibe bona tiꞌarakou madósá. Maroꞌa mani hambali peá mátámi hai tiꞌarakou mobábehi dósá, haneꞌi rombali mátámi, agáiáná ratibekou i lalu naraka. Ane rápáꞌna taemi hambali to moántikou i lalu dósá, rángina miꞌi nibóhóki hai nitibe bona tiꞌarakou madósá. Maroꞌa mani hambali peá taemi hai tiꞌarakou mobábehi dósá, haneꞌi rombali taemi agáiáná ratibekou i lalu naraka.”

Ineeꞌ mampogááka hambokomi

³¹ “Ara woꞌo paturoꞌ to manguliꞌ: Ane ara hadua tobaleilo to mampogááka toinána, ia hangaa-ngaa mobábehi sura pogááꞌ haneꞌi naweꞌi toinána.

³² Agáiáná deꞌe-deꞌe Kuhángáꞌáꞌákou: pogááꞌ i lalu pohamboko peisá mewaliꞌ ane ara to mebualosi. Agáiáná heáná to mampogááka toinána, kehapiꞌ tiꞌaranto masalaꞌ i hia, ia moánti towawine iti madósá, láwiꞌ ánti kanapogáákina, toinána iti ina mebualosi ane motoama huleꞌ. Hai tobaleilo to mampotoina towawine to napogááka toámána, ia woꞌo mebualosi.”

Ineeꞌ modándi mokábelái apa peá

³³ “Niꞌisá miꞌi woꞌo párentá to rapahaweꞌáheꞌ toioruntaꞌ hangkoia to manguliꞌ: ‘Ineeꞌkou molingkaꞌi podándimi. Apa to nidándi i lindoꞌna Pueꞌ Ala, hangaa-ngaa nibukeki.’

^34-35 Agáiáná deꞌe-deꞌe Kuhángáꞌáꞌákou: ineeꞌkou mototowi! Ane modándikou, ineeꞌkou mototowi mokábelái langiꞌ ba tampoꞌ, láwiꞌ langiꞌ ia miꞌi pehodaꞌána Pueꞌ Ala, hai tampoꞌ pepangkaꞌáNa. Ane modándikou, ineeꞌkou mototowi mokábelái kótá Ierusale, láwiꞌ Ierusale katoroꞌána Datu Mahile, Ia miꞌi Pueꞌ Ala.

³⁶ Ineeꞌkou woꞌo mototowi mokábelái wuáꞌmi, láwiꞌ tiꞌara nibuku mopabulá ba mopamaiti weluáꞌmi, kehapiꞌ riꞌi hangkau peá.

³⁷ Ane tunggáiámi manguliꞌ ió, gáná miꞌi niuliꞌ peá ‘Ió.’ Ane tunggáiámi manguliꞌ tiꞌara, gáná miꞌi niuliꞌ peá ‘Tiꞌara.’ Laluita to melumbuꞌ hangko ionoꞌ mentóáꞌ hangko i Datu Tokadake.”

Ineeꞌ moháwángi

³⁸ “Niꞌisá miꞌi párentá to rapahaweꞌámoheꞌ toioruntaꞌ hangkoia to manguliꞌ node: ‘Ane ara to mohakaꞌ hai mabutuꞌ mátána rángána ba marebuꞌ ngihina, hangaa-ngaa ia woꞌo rabutuꞌ mátána, ba rarebuꞌ ngihina.’

³⁹ Agáiáná deꞌe-deꞌe Kuhángáꞌáꞌákou: ineeꞌ nuháwángi bábehiána tauna to mobábehi to kadake i hio. Ane rápáꞌna ara to motampedaꞌ pelimu hambali, ineeꞌ nuháwángi. Rángina nuweꞌi wopiꞌi pelimu to hambali natampedaꞌ.

⁴⁰ Ane ara to mobuáꞌkoꞌ i topebutusi membiáꞌ badumu, nuweꞌi woꞌo kumbámu.

⁴¹ Ane ara surudadoꞌ to mohuoꞌkoꞌ moánti inántina hakiló kakaraoꞌna, nuánti miꞌi inántina rokiló kakaraoꞌna.

⁴² Ane ara to membiáꞌ apa peá to ara i hio, nuweꞌi woia, hai ineeꞌ nukabohiki hángká rángámu to ina mebolo apa peá i hio.”

Hangaa-ngaa nipokaꞌahiꞌ ewálimi

⁴³ “Niꞌisá miꞌi paturoꞌ to manguliꞌ: ‘Nupokaꞌahiꞌ hángká rángámu, hai nukáhihiꞌ ewálimu.’

⁴⁴ Agáiáná deꞌe-deꞌe Kuhángáꞌákou: hangaa-ngaa nipokaꞌahiꞌ ewálimi, hai nipekakaeáheꞌ tauna to mampopeahiahiꞌkou.

⁴⁵ Láwiꞌ ane maroꞌa lalumi i ewálimi, bábehiámi iti ina hibali hai bábehiána Umámi to ara i surugáꞌ, mewaliꞌ ina tongawaꞌ ntepuꞌu kakómuna miꞌi ánáꞌna Pueꞌ Ala, láwiꞌ Pueꞌ Ala maroꞌa i upu-upu tauna. Ia mampopesupaꞌ alo i tauna to maroꞌa hai i tauna to kadake. Napaꞌara udá i tauna to manótó laluraꞌ hai i tauna to kadake bábehiáraꞌ.

⁴⁶ Apa miꞌi to ina nilámbiꞌ hangko i Pueꞌ Ala ane maꞌahiꞌ pekou i tauna to mampokaꞌahiꞌkou? Mogalo riꞌi toperóróꞌ ásele to nirekeꞌ kadake bábehiáraꞌ, maꞌahiꞌheꞌ i tauna to mampokaꞌahiꞌheꞌ.

⁴⁷ Ba niuliꞌ riꞌi bábehiámi maroꞌa ane maroꞌa pekou i rángámi? Mogalo riꞌi tauna to tiꞌara moisá Pueꞌ Ala, noꞌonoꞌ woꞌo bábehiáraꞌ. Apa posisalaꞌána kómu hai hira?

⁴⁸ Mewaliꞌ kómu, {rárá katueꞌmi hangaa-ngaa montaniꞌ hangko i rárá katueꞌraꞌ tauna ntániꞌna}. Hangaa-ngaa nibábehi oaꞌ peundeꞌána Pueꞌ Ala hangko i lalumi ntepuꞌu, láwiꞌ Umámi to ara i surugáꞌ mopatongawaꞌ oaꞌ kamaꞌahiꞌNa i upu-upu tauna, hai tiꞌara ara kamakuraꞌNa.”