Matiu 4 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu nakeloꞌ Datu Tokadake

¹ Roo onoꞌ, Iesu naꞌánti Inaona Pueꞌ Ala lao i pádá loriꞌ bona nakeloꞌ Datu Tokadake.

² Ionoꞌ, Iesu mopuasaꞌ iba puloꞌna alona hai iba puloꞌna wengina kamaruena, onoꞌ haneꞌi Iesu marimi ntepuꞌu.

³ I tempó iti, haweꞌ Datu Tokadake mokeloꞌ Iesu, nauliꞌ, “Ánti kaꞌIona Ánáꞌna Pueꞌ Ala, Nuhuoꞌ miꞌi watu deꞌe mewaliꞌ rótiꞌ!”

⁴ Agáiáná nahániki Iesu, “I lalu Sura Magasaꞌ ara to teukiꞌ node: ‘Tiꞌara peá pandeꞌ to mopatueꞌ tauna, agáiáná to raparaluu ia miꞌi mopailalu ntepuꞌukeꞌ ngkóráꞌna Pueꞌ Ala.’ ”

⁵ Roo onoꞌ, Datu Tokadake moánti Iesu lao i Ierusale, kótá to magasaꞌ, hai napopeángkáꞌ i wumbu Támbina Pueꞌ Ala,

⁶ nauliꞌ, “Ánti kaꞌIona Ánáꞌna Pueꞌ Ala, mengkanawoꞌmoKoꞌ hangko i hindeꞌe! TiꞌaraKoꞌ ina moapa-apa, láwiꞌ ara teukiꞌ i lalu Sura Magasaꞌ to manguliꞌ node: ‘Pueꞌ Ala ina mohuoꞌheꞌ malaꞌekaNa mokámpáiKoꞌ bona tiꞌarakoꞌ hurewuꞌ. Ina rahángkóbáKoꞌ bona bituMu tiꞌara ina tóá i watu.’ ” (Sura Petóiá 91:11-12)

⁷ Agáiáná nahániki Iesu, “Teukiꞌ woꞌo i lalu Sura Magasaꞌ: ‘Ineeꞌkoꞌ mampehukáꞌ Pueꞌ Ala, Pueꞌmu.’ ”

⁸ Roo onoꞌ, Datu Tokadake moánti wopiꞌi Iesu lao i wongko buluꞌ to mapángkáꞌ ntepuꞌu, hai natudeꞌá upu-upu tampoꞌ i duniáꞌ hai peawaꞌraꞌ kadatuá iti,

⁹ nauliꞌ, “Ane molingkuduKoꞌ menómbá i kódóꞌ, upu-upu deꞌe ina kuweꞌiKoꞌ.”

¹⁰ Agáiáná nahániki Iesu, “Pohuꞌmokoꞌ! Teukiꞌ miꞌi i lalu Sura Magasaꞌ node: ‘Hangaa-ngaa mengkoruꞌkoꞌ i Pueꞌ Ala, Pueꞌmu, láwiꞌ Ia peá to hintotoꞌ nupenómbái.’ ”

¹¹ Roo onoꞌ, pohuꞌ miꞌi Datu Tokadake mopálehi Iesu, hai haweꞌmoheꞌ malaꞌeka mokádipurá Iesu.

Bágóꞌna Iesu i tampoꞌ Galilea (4:12–16:12) Iesu mantepuꞌu mobágóꞌ i Galilea

¹² Tiꞌara marue hangko ionoꞌ, Iohane Toperiu rahakaꞌ hai ratarungku. Kanahádina Iesu bámbári iti, pohuꞌ miꞌi mesuleꞌ lao i wánuá Nasare i tampoꞌ Galilea.

¹³ Roo onoꞌ, Ia pohuꞌ hangko i wánuá Nasare lao toroꞌ i wánuá Kapenau. Kapenau iti wánuá to i wiwi rano Galilea, i tampoꞌraꞌ toSebulo hai toNatali.

¹⁴ {Iesu moánti Ngkóráꞌna Pueꞌ i tauna to toroꞌ ionoꞌ,} bona tebukeki laluita to napahaweꞌ nabiꞌ Iesaia hangkoia to manguliꞌ node:

¹⁵ “Tampoꞌraꞌ toSebulo hai toNatali to hungkuꞌ i rano Galilea, ara tándáꞌ i hambali uwai Iarade. Tampoꞌ iti ia miꞌi Galilea to rakatoroꞌi handaꞌ tauna to tiꞌara toIahudiꞌ.

¹⁶ Tauna to ionoꞌ, toroꞌheꞌ i lalu kakáindiána, láwiꞌ katueꞌraꞌ nodoheꞌ tomate ánti dósáraꞌ. Agáiáná deꞌe-deꞌe moitamoheꞌ pewangkaꞌ to mahile, láwiꞌ mesupaꞌ miꞌi Hadua to ina moánti katehómpóꞌ i tauna to tiꞌara mani moisá Pueꞌ Ala.” (Iesaia 9:1-2)

¹⁷ Mewaliꞌ i pesuleꞌna Iesu i tampoꞌ Galilea, Ia mantepuꞌu mopahaweꞌ Ngkóráꞌna Pueꞌ, Nauliꞌ, “Menosoꞌmokou hangko i dósámi, haweꞌ miꞌi tempóna Pueꞌ Ala ina mopatongawaꞌ popárentáNa i duniáꞌ.”

Iesu mokióꞌ topeguruNa to rungu-runguna

¹⁸ Tangaꞌna Iesu molumao i wiwi rano Galilea, Ia moita rodua topohalalu, hangaꞌraꞌ Simoꞌ (to rauliꞌ woꞌo Peturuꞌ) hai Andaria ádina. I tempó iti, tangaꞌraꞌ modálá i rano, láwiꞌ iti miꞌi bágóꞌraꞌ.

¹⁹ Nahángáꞌáheꞌ Iesu, “Maimokou! Meuláꞌkou i Kódóꞌ! Mantepuꞌu deꞌe-deꞌe, tiꞌara piꞌi bouꞌ to nipeliꞌ, agáiáná tauna riꞌi {bona mewaliꞌheꞌ woꞌo topeuláꞌKuꞌ}.”

²⁰ Mantepuꞌu alo iti, mopálehi mpuꞌumoheꞌ bágóꞌraꞌ, hai meuláꞌmoheꞌ i Iesu.

²¹ Iesu mopaliliu polumaoNa, moita wopiꞌi rodua topohalalu, iamoheꞌ Iakobu hai Iohane ádina, ánáꞌna Sebedeu. Tempó iti, tangaꞌraꞌ mopakaroꞌangi dáláraꞌ i lalu duanga hai umáraꞌ. Nakióꞌheꞌ woꞌo Iesu bona meuláꞌheꞌ i Hia,

²² mewaliꞌ rapálehi mpuꞌu miꞌi duangaraꞌ hai umáraꞌ, haneꞌi meuláꞌheꞌ woꞌo i Iesu.

Iesu mopaturoꞌ hai mopakauriꞌ handaꞌ tauna

²³ Iesu molumao i humalele tampoꞌ Galilea hai mepaturoꞌ i handaꞌ támbi penómbáꞌá. Ia mopahaweꞌ Ngkóráꞌ Marasa mokana popárentána Pueꞌ Ala, hai mopakauriꞌheꞌ woꞌo upu-upu tauna to tiꞌara ralalu.

²⁴ Apa to Nabábehi iti tebámbári i upu-upu wánuá i tampoꞌ Siria, álána handaꞌ tauna to mampoinao lao mampohidupaꞌá Iesu. Tauna iti moántiheꞌ rángáraꞌ ba halaluraꞌ to mantódihá handaꞌ pákáꞌna hakiꞌ hai kapári. Araheꞌ woꞌo to napesuaꞌi setáꞌ, to mohakiꞌ mate mataꞌ, hai to paluꞌ. Upu-upuheꞌ iti napakauriꞌ Iesu.

²⁵ I tempó iti, handaꞌ ntepuꞌu tauna to meuláꞌ-uláꞌ oaꞌ i Hia: araheꞌ to hangko i tampoꞌ Galilea, hangko i Dekapoli, hangko i tampoꞌ Iudá tepasuaꞌ hangko i kótá Ierusale, hai araheꞌ woꞌo to hangko i hambali uwai Iarade.