Matiu 3 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iohane Toperiu mopahaweꞌ Ngkóráꞌna Pueꞌ

¹ Bahanoumbái parena hangko i karapoánákana Iesu, hadua tauna to rahangaꞌ Iohane Toperiu lao i pádá loriꞌ i tampoꞌ Iudá, hai mantepuꞌu mopahaweꞌ ngkóráꞌna Pueꞌ i tauna to handaꞌ.

² Nahángáꞌáꞌáheꞌ, “Menosoꞌmokou hangko i dósámi, láwiꞌ tiꞌara piꞌi marue, ina haweꞌ miꞌi popárentána Pueꞌ Ala i duniáꞌ.”

³ Hangkoia, nabiꞌ Iesaia manguliꞌ node: “Ara hadua tauna to molaluita napasimbuku i pádá loriꞌ, nauliꞌ: ‘Ina haweꞌ miꞌi Pueꞌ! Nipatimama lalumi, nodo tauna to mopakanoroꞌ rárá to ina napoliui datu.’ ” (Iesaia 40:3) Iohane iti miꞌi to natunggái nabiꞌ Iesaia.

⁴ Waruꞌna Iohane rabábehi hangko i wulu untá. Pámpouna hangko i koliꞌ binataꞌ. Pandeꞌna katupeeꞌ hai tináháꞌ.

⁵ Handaꞌ tauna to haweꞌ láwiꞌ mampoinaoheꞌ mampehádingi laluitana. Araheꞌ to hangko i humalele tampoꞌ Iudá, tepasuaꞌ kótá Ierusale. Araheꞌ woꞌo to hangko i wánuá-wánuá to i wiwi uwai Iarade.

⁶ Laoheꞌ monóáká dósáraꞌ, haneꞌi nariuheꞌ Iohane i uwai Iarade.

⁷ Handaꞌ woꞌo tadulako agama Iahudiꞌ to rauliꞌ toParisi hai toSaduki laoheꞌ mampoperiu i Iohane. Kanaitáraꞌ haweꞌ, nahángáꞌáheꞌ, “Moapa riꞌi haneꞌi maikou i kódóꞌ membiáꞌkou rariu? Mampe to maroꞌa pekou! Bábehiámi kadake ntepuꞌu nodo lelótó to mobisa. Ba nipekiri peisákou tekábáhá hangko i pehukuna Pueꞌ Ala to ina morampekou i alo to ina haweꞌ?

⁸ Ane toꞌu-toꞌu mpuꞌu menosoꞌmokou hangko i dósámi, hangaa-ngaa nibábehi bábehiá to maroꞌa.

⁹ Ineeꞌ ripaꞌi nipekiri, ‘Kaiꞌ deꞌe, tauna to manótóangkaiꞌ láwiꞌ pemuleꞌánaꞌangkaiꞌ Burahima. {Tiꞌaraꞌangkaiꞌ ina nahuku Pueꞌ Ala.}’ Iti tiꞌara toꞌu! Bona niꞌisá: ane naundeꞌ Pueꞌ Ala, peisá Napopewaliꞌ watu deꞌe mewaliꞌ pemuleꞌána Burahima.

¹⁰ Pehukuna Pueꞌ Ala bateꞌna ina mewaliꞌ! Hai pehuku iti nodo uwahe to timama miꞌi i tóáꞌ kau. Upu-upu kau to tiꞌara maroꞌa wuaꞌna ina ratiwi, duuꞌna haweꞌ i kálándána rawehángi hai ratibe i lalu api.”

¹¹ Nauliꞌ wopiꞌi Iohane, “Kódóꞌ deꞌe moriukou hai uwai, tandaꞌ kamampenosoꞌimi miꞌi dósámi. Agáiáná ina haweꞌ Hadua tauna to melumbuꞌ kuasaꞌNa hangko i kódóꞌ. Mogalo riꞌi mokekehi petakaꞌ sandaleNa, tiꞌaraꞌaꞌ hintotoꞌ. Ia to ina moriukou hai Inao to Magasaꞌ hai api.

¹² Ia peisá rapándiriꞌ nodo hadua tauna to mantápiꞌi bailoꞌ bona ina tepataniꞌ bailoꞌ to moꞌóntóꞌ hangko i bailoꞌ to langkoꞌ. Bailoꞌ to moꞌóntóꞌ ina Napusaꞌ i lalu buhoꞌ, hai bailoꞌ to langkoꞌ ina Natibe i lalu api to tiꞌara ina mate.” {Noꞌonoꞌ woꞌo Ia ina mopataniꞌ tauna to manótó hai tauna to kadake.}

Iesu nariu Iohane

¹³ I tempó iti, Iesu haweꞌ hangko i tampoꞌ Galilea lao i uwai Iarade mampoperiu i Iohane.

¹⁴ Agáiáná Iohane tiꞌara pebáiꞌ moriu, mewaliꞌ nahángáꞌá, “Katoꞌuána, kódóꞌ riꞌi to hintotoꞌ Nuriu. Moapa riꞌi haneꞌi Nupembiáꞌ bona kuriuKoꞌ?”

¹⁵ Agáiáná nahániki Iesu, “Hintotoꞌ miꞌi nubábehi deꞌe, bona tabukeki upu-upu peundeꞌána Pueꞌ Ala.” Napokana mpuꞌu miꞌi Iohane apa to napembiáꞌ Iesu, haneꞌi nariu.

¹⁶ Karoona Iesu rariu, mesore miꞌi hangko i lalu uwai. Hangkaꞌ-hangkaꞌ peá langiꞌ tebungkáhi, hai Naita Inaona Pueꞌ Ala mendáulu i Hia nodo tádáhi manggebodoꞌ.

¹⁷ Roo onoꞌ, rahádi miꞌi wambaꞌna Pueꞌ Ala hangko i langiꞌ to manguliꞌ, “Ia miꞌi deꞌe ÁnáꞌKuꞌ to Kupokaꞌahiꞌ hai Kupokagóeꞌ.”