Matiu 27 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu rabutusi hangaa-ngaa rahuku mate

¹ Kahalona mepulo-pulo, upu-upu kapalaꞌ tadulako menómbá hai totosaeraꞌ toIahudiꞌ to ntániꞌna mobutusi Iesu hangaa-ngaa rahuku mate.

² Hangko ionoꞌ, Ia ratimpuku wopiꞌi haneꞌi raꞌánti lao i lindoꞌna Mágáuꞌ Pilatu {láwiꞌ topopárentá Roma peá to peisá mohuku mate tauna}.

Iudasiꞌ nahohoꞌ inaona mampobaluꞌ Iesu

³ I kanaisána peá Iudasiꞌ to mohuhuꞌ miꞌi Iesu i ewáliNa, kana pobutusiraꞌ tadulako-tadulako menómbá hai totosaeraꞌ toIahudiꞌ to ntániꞌna Iesu hangaa-ngaa rahuku mate, nahohoꞌ miꞌi inaona. Onoꞌ haneꞌi lao miꞌi i kapalaꞌ-kapalaꞌ tadulako menómbá hai totosaeraꞌ toIahudiꞌ, ina mampopesuleꞌáheꞌ dóiꞌ peráꞌ to tálu puloꞌna pepaꞌna.

⁴ Nauliꞌ, “Madósámoꞌ! Mampobaluꞌaꞌ tauna to tiꞌara masalaꞌ, álána rabutusi hangaa-ngaa rahuku mate!” Rahániki, “Apa ripaꞌi haneꞌi kiꞌisá riꞌi kaiꞌ? Iti bábehiámu haduduámu!”

⁵ Hangko ionoꞌ, natelánga Iudasiꞌ dóiꞌ iti i lalu Támbina Pueꞌ Ala, haneꞌi lao menoꞌo mengkalintóe.

⁶ Dóiꞌ iti rarámpu kapalaꞌ-kapalaꞌ tadulako menómbá, haneꞌi rauliꞌ, “Dóiꞌ deꞌe poposuláꞌ waheꞌ. Mouláꞌ áturá ágámántaꞌ, dóiꞌ deꞌe tiꞌara peisá rapakeꞌ i Támbina Pueꞌ Ala.”

⁷ Himpudumoheꞌ bona dóiꞌ iti rapopehóló tampoꞌ to rauliꞌ Tampoꞌ Topoteru Kori, bona tampoꞌ iti rapakeꞌ rapopatawui tauna to tiꞌara toIahudiꞌ.

⁸ Onoꞌ miꞌi haneꞌi tampoꞌ iti rahangaꞌ Tampoꞌ Waheꞌ duuꞌna deꞌe-deꞌe.

⁹ Bábehiáraꞌ kapalaꞌ-kapalaꞌ tadulako menómbá iti mobukeki apa to natunggái nabiꞌ Ieremia hangkoia, to manguliꞌ node: “Tálu puloꞌna pepaꞌna dóiꞌ peráꞌ ina raꞌala láwiꞌ iti miꞌi hólóna hadua tauna to rapakanótó toSáráeliꞌ,

¹⁰ hai ina rapopehóló tampoꞌna topoteru kori. Iti ina mewaliꞌ mouláꞌ hawaꞌna Pueꞌ Ala i kódóꞌ.” (Sakaria 11:12-13)

Iesu i lindoꞌna Pilatu

¹¹ I karabutusina miꞌi Iesu hangaa-ngaa mate, Ia raꞌánti miꞌi i lindoꞌna Mágáuꞌ Pilatu bona peisá rahuku mate. Mekuneꞌ miꞌi Pilatu i Hia, nauliꞌ, “Ba Io mpuꞌui daturaꞌ toIahudiꞌ?” Nahániki Iesu, “Io haduduámu to manguliꞌ noꞌonoꞌ.”

¹² Agáiáná upu-upu to rasalaꞌiá kapalaꞌ-kapalaꞌ tadulako menómbá hai totosaeraꞌ toIahudiꞌ, tiꞌara nahániki Iesu.

¹³ Onoꞌ miꞌi haneꞌi mekuneꞌ wopiꞌi Pilatu i Hia, nauliꞌ, “Tiꞌara paꞌi Nuhádi upu-upu to rasalaꞌiáKoꞌ? {Moapa riꞌi haneꞌi tiꞌaraKoꞌ mampetawaꞌi wátáMu?}”

¹⁴ Agáiáná Iesu maniiꞌ-niiꞌ peá, onoꞌ miꞌi haneꞌi wuli ntepuꞌu Pilatu iti.

Rabutusi bona Iesu rahuku mate hai Baraba rakábáhá

¹⁵ Pare-parena i Alo Mahile Posusa Paska, biásána Mágáuꞌ mokábáhá hadua tauna to ratarungku, mouláꞌ popakanótóraꞌ tauna to handaꞌ.

¹⁶ I pare iti, ara hadua to ratarungku to raisá ntepuꞌu tauna to handaꞌ. Hangaꞌna Iesu Baraba.

¹⁷ Mewaliꞌ, i tempóna Pilatu mehoda ina mobutusi kárá-kárána Iesu, handaꞌ tauna to hirámpu miꞌi ionoꞌ. Nakuneꞌheꞌ Pilatu, nauliꞌ, “Heáná to niundeꞌ kukábáháꞌákou pare deꞌe? Iesu Baraba, ba Iesu to rauliꞌ Datu Topehómpóꞌ?”

¹⁸ Pilatu manguliꞌ noꞌonoꞌ láwiꞌ naisá tadulakoraꞌ toIahudiꞌ mohuhuꞌ Iesu i hia ánti kamahiniꞌraꞌ peá {láwiꞌ handaꞌ ntepuꞌu tauna to meuláꞌ i Hia}.

¹⁹ I tempóna Pilatu mehoda ina mobutusi kárá-kárána Iesu, haweꞌ miꞌi hadua huoꞌá hangko i toinána Pilatu moánti tewái, nauliꞌ, “Ara tewái hangko i toinámu, nauliꞌ node: Masusa lalungkuꞌ láwiꞌ iakáindi mampaturuáꞌaꞌ to meriringkuꞌi mokana i tauna to nuhoda-hoda. Mewaliꞌ, ineeꞌ nuhuku tauna iti to tiꞌara ara salaꞌNa!”

²⁰ Agáiáná kapalaꞌ-kapalaꞌ tadulako menómbá hai totosaeraꞌ toIahudiꞌ to ntániꞌna mopakaꞌamuꞌ laluraꞌ tauna to handaꞌ, rahángáꞌáꞌáheꞌ, “Hangaa-ngaa nipembiáꞌ i Mágáuꞌ Pilatu bona Baraba to nakábáhá, hai Iesu to nahuku mate!”

²¹ Mekuneꞌ wopiꞌi Mágáuꞌ Pilatu i tauna to handaꞌ, nauliꞌ, “Hangko i oloꞌraꞌ tauna to rodua deꞌe, heáná mpuꞌu to niundeꞌ kukábáháꞌákou?” Rahániki peá, “Baraba!”

²² Napekuneꞌ wopiꞌi Pilatu, “Ane noꞌonoꞌi, kupanoumbá miꞌi Iesu to rauliꞌ Datu Topehómpóꞌ?” Rahániki, “Pakuꞌmode!”

²³ Napekuneꞌ wopiꞌi Pilatu, “Salaꞌ apa riꞌi to Nabábehi?” Agáiáná monganga-nganga peheꞌ oaꞌ rapasimbuku, rauliꞌ, “Pakuꞌmode! Pakuꞌmode!”

²⁴ Kahópóꞌána naisá Pilatu tiꞌara piꞌi ara bunduꞌna polaluitana, ngkáliꞌna mantámbái riꞌi pohewo-heworaꞌ, onoꞌ haneꞌi moala miꞌi uwai hai mobahoꞌi taena i lindoꞌraꞌ tauna to handaꞌ, haneꞌi nauliꞌ, “Membahoꞌaꞌ bona niꞌisá tiꞌara kupesuaꞌi kanipapatena tauna deꞌe to tiꞌara ara salaꞌNa! Kómu rái to molámbiꞌ háwángina.”

²⁵ Mehániꞌ tauna to handaꞌ, rauliꞌ, “Tiꞌaranto moapa. Kaiꞌnto to ina mampohurunga kamateNa iti, haweꞌ-haweꞌ i pemuleꞌángkiꞌ.”

²⁶ Hangko ionoꞌ, Mágáuꞌ Pilatu mokábáháꞌámoheꞌ Baraba, hai mohuhuꞌ Iesu i surudadoꞌna haneꞌiheꞌ nahángáꞌá bona Iesu rahepe sieruꞌ hai gulaꞌ, hangko rapakuꞌ i kau mombehape.

Surudadoꞌ mopakóiꞌ Iesu

²⁷ Karoona Iesu rahepe, surudadoꞌnaheꞌ Mágáuꞌ Pilatu moánti Iesu lao i katoroꞌáraꞌ i lalu támbina Mágáuꞌ, hai mokióꞌheꞌ handaꞌ rángáraꞌ lao motolelingi.

²⁸ Ralosu miꞌi kumbána Iesu haneꞌi rapakeꞌá kumbá to malei makámumu.

²⁹ Mobábehiheꞌ hambuaꞌ tatali nodo tatali datu, agáiáná hangko i kau dui to mowáláá, haneꞌi ratataliꞌiá. Raweꞌi woꞌo hambuaꞌ laiꞌ rapopatibaaꞌá tae kuánáNa nodo to natibaaꞌ datu, haneꞌi molingkuduheꞌ i lindoꞌNa. Mopakóiꞌheꞌ Iesu, rauliꞌ, “KibiláꞌKoꞌ, daturaꞌ toIahudiꞌ!”

³⁰ Ratitinuduhi iti Iesu, haneꞌi raꞌala laiꞌ to i taeNa rabóbáꞌá wuáꞌNa.

³¹ Karoona rapakóiꞌ, ralosu miꞌi kumbá to rapakeꞌá ininá, hai rapakeꞌá huleꞌ kumbáNa haduduáNa. Roo onoꞌ, Iesu raꞌánti miꞌi lao i rawa kótá bona rapakuꞌ i kau mombehape.

Iesu rapakuꞌ i kau mombehape

³² Tempóraꞌ Iesu hai surudadoꞌ molumao lao i rawa kótá Ierusale, hidupaꞌheꞌ hai hadua tauna to rahangaꞌ Simoꞌ. Simoꞌ iti hangko i kótá Kirene. Surudadoꞌ toRoma mopasaꞌheꞌ Simoꞌ mopáháꞌá kau popakuꞌána Iesu {láwiꞌ tiꞌara piꞌi nabuku Iesu}.

³³ Tiꞌara marue, haweꞌmoheꞌ i katoroꞌá to rahangaꞌ Gologota, lempóna buluꞌ Bangaꞌwuáꞌ.

³⁴ Ionoꞌ, Iesu rapopainu anggoroꞌ to ragalo hai pákupu to mapaiꞌ {bona tiꞌara gaga mahái Nahádi}, agáiáná Napemina hantódiꞌ peá, haneꞌi lohe mainu.

³⁵ Roo onoꞌ, Iesu {ralosui haneꞌi} rapakuꞌ i kau mombehape, hai waruꞌNa raꞌala ragáláꞌ-gáláꞌheꞌ surudadoꞌ. Agáiáná hangko tiꞌara maniheꞌ mogáláꞌ-gáláꞌ waruꞌna Iesu, ioruheꞌ hampaiꞌ mobolobiaꞌ bona raisá heáná to molámbiꞌ waruꞌna Iesu.

³⁶ Hangko ionoꞌ, mehodaheꞌ mokámpái Iesu.

³⁷ I kau popakuꞌáNa iti, i wongko wuáꞌNa, rapatakaꞌ hambóhóꞌ pata to rapoukiꞌi apa to rasalaꞌiá Iesu. Node ukiꞌna: Deꞌe Miꞌi Iesu Daturaꞌ ToIahudiꞌ.

³⁸ Tempó onoꞌ, ara woꞌo rodua toperampaꞌ to rapakuꞌ i kau mombehape, hadua tándáꞌ i kuánána Iesu, hadua tándáꞌ i kabeoꞌNa.

³⁹ Tauna to melempó ionoꞌ, mobibiliheꞌ mopakóiꞌ Iesu,

⁴⁰ rauliꞌ, “Ee! Nuꞌuliꞌ ina mogeroKoꞌ Támbina Pueꞌ Ala, hai ina Nuaró huleꞌ i lalu tálu peá alona! Ane toꞌu-toꞌu mpuꞌuKoꞌ Ánáꞌna Pueꞌ Ala, Nupelae wátáMu haduduáMu! MendáulumoKoꞌ hangko i kau mombehape iti!”

⁴¹ Noꞌonoꞌ woꞌo kapalaꞌ-kapalaꞌ tadulako menómbá, guru-guru agama hai totosaeraꞌ toIahudiꞌ to ntániꞌna mopakóiꞌheꞌ woꞌo Iesu, rauliꞌ,

⁴² “Tauna ntániꞌna Natulungiheꞌ, agáiáná wátáNa haduduáNa tiꞌara Nabuku Natulungi! Ane toꞌu-toꞌu mpuꞌu kaꞌIana Daturaꞌ toSáráeliꞌ, ina tapoinálái ane Ia mendáulu mpuꞌu hangko i kau mombehape!

⁴³ Ia mehárungá i Pueꞌ Ala, hai Nauliꞌ kaꞌIana Ánáꞌna Pueꞌ Ala. Tapegiá, ba ina haweꞌ mpuꞌui Pueꞌ Ala mai mokábáhá!”

⁴⁴ Mogalo toperampaꞌ to rapakuꞌ woꞌo i kau mombehape, mohuwáráheꞌ laluita to mopakóiꞌ Iesu.

Iesu mate

⁴⁵ Mantepuꞌu tintiꞌ hampuloꞌ hai duá kalialo, hangkaꞌ-hangkaꞌ perái makáindi i humalele tampoꞌ iti tálu jaa kamaruena.

⁴⁶ Tintiꞌ tálu kalumbaꞌ, meraruaꞌ miꞌi Iesu Napasimbuku, Nauliꞌ, “Eli, Eli, lama sabakhtani?” Lempóna: “Pueꞌ AlaNgkuꞌ, Pueꞌ AlaNgkuꞌ, moapa riꞌi haneꞌiAꞌ Nupálehi?”

⁴⁷ Araheꞌ bahangapa tauna to meángkáꞌ hungkuꞌ i popakuꞌáNa. Mohádiheꞌ peraruaꞌNa, rauliꞌ, “Nipehádingi! Ia mokióꞌ nabiꞌ Eliá!”

⁴⁸ Hadua hangko i oloꞌraꞌ melangka lao moala hangkumuꞌ lómóꞌ, naeme i lalu anggoroꞌ to maisu, nahipika i wuntu dáꞌángkau to kókóiꞌ haneꞌi napopadumeá humena Iesu bona Nainu.

⁴⁹ Agáiáná tauna to ntániꞌna manguliꞌ, “Pegiá sieruꞌ, tapeita ba ina haweꞌ mpuꞌui Eliá mai motulungi.”

⁵⁰ Roo onoꞌ, monganga wopiꞌi Iesu Napasimbuku, haneꞌi upu miꞌi inaoNa.

⁵¹ I tempó iti woꞌo, rindi báná to tetóe i lalu Támbina Pueꞌ Ala hangkaꞌ-hangkaꞌ mahepaꞌ ntangaꞌ hangko i wongko haweꞌ i wóiꞌ. Tempó onoꞌ woꞌo melinu to rumihi, hai buluꞌ watu mabikáꞌ.

^52-53 Tempó iti woꞌo, handaꞌ popatawuá tebungkáhi, hai handaꞌ tauna to mengkoruꞌ i Pueꞌ Ala to mate hangkoia rapatueꞌ huleꞌ. Karoona Iesu rapatueꞌ, hira iti mesuaꞌheꞌ i kótá Ierusale to rauliꞌ kótá to magasaꞌ, hai raitaheꞌ handaꞌ tauna.

⁵⁴ Tadulako surudadoꞌ hai upu-upu surudadoꞌ to mokámpái Iesu, malááꞌ ntepuꞌuheꞌ mohádi linu hai moita upu-upu to pewaliꞌ iti. Rauliꞌ, “Toꞌu-toꞌu mpuꞌu kaꞌIana deꞌe Ánáꞌna Pueꞌ Ala!”

⁵⁵ Ionoꞌ, handaꞌ woꞌo towawine to mampeita Iesu hangko karaoꞌ. Hira iti to meuláꞌ i Iesu hai mokádipurá, mantepuꞌu hangko i pobágóꞌNa i tampoꞌ Galilea.

⁵⁶ Hangaꞌna to hadua Maria toMadalena. Ara woꞌo Maria ináraꞌ Iakobu hai Iusupu. Hai hadua woꞌo toinána Sebedeu, {ináraꞌ Iakobu hai Iohane}.

Iesu ratawu

⁵⁷ Ina támpu miꞌi alo, haweꞌ miꞌi hadua topebuku to hangko i wánuá Arimatea, hangaꞌna Iusupu. Iusupu iti mepoinálái i Iesu.

⁵⁸ Ia lao i Pilatu membiáꞌ wátámandoꞌna Iesu bona natawu, hai Pilatu mohuoꞌ miꞌi surudadoꞌna mampeweꞌi wátámandoꞌna Iesu iti i hia.

⁵⁹ Mewaliꞌ, naꞌala mpuꞌu miꞌi Iusupu wátámandoꞌna Iesu, haneꞌi nabungkuhi báná to meálu hai bulá ntepuꞌu.

⁶⁰ Napopaturu i lalu balamba popatawuána haduduána to rapatimama miꞌi. Popatawuá iti woꞌu mani, to rabábehi i pingkena buluꞌ watu. Roo onoꞌ, monduli miꞌi hambuaꞌ watu to mahile napopotuko babaꞌ popatawuá iti, haneꞌi pohuꞌ miꞌi lao i támbina.

⁶¹ Agáiáná Maria toMadalena hai Maria to ntániꞌna mehodaheꞌ i rawa popatawuá iti.

Popatawuána Iesu rakámpái surudadoꞌ

⁶² Kahalona mepulo i alo penómbáꞌá, upuheꞌ mopatimama ina mosusa pandeꞌ Paska, kapalaꞌ-kapalaꞌ tadulako menómbá hai toParisi laoheꞌ i Mágáuꞌ Pilatu,

⁶³ rauliꞌ, “Tuá, kibuhinao laluitana topodongkoꞌ iti, láwiꞌ i tempóNa mani tueꞌ, Nauliꞌ, ‘I katáluna alona, ina tueꞌAꞌ huleꞌ.’

⁶⁴ Onoꞌ miꞌi haneꞌi kipembiáꞌ i tuá bona nuhuoꞌheꞌ surudadoꞌmu lao mokámpái maroꞌa popatawuáNa duuꞌna haweꞌ i katáluna alona, bona tiꞌaraheꞌ lao topeguruNa hai mopanako wátámandoꞌNa. Ane wátámandoꞌNa raꞌala, ina rauliꞌ i tauna to handaꞌ, Iesu tueꞌ huleꞌ, álána handaꞌ tauna to ina rapakanawoꞌ, hai ina melumbuꞌ ntepuꞌu pepakanawoꞌ to kahópóꞌána deꞌe haneꞌi to ioru.”

⁶⁵ Nahániki Pilatu, “Deꞌemoheꞌ surudadoꞌ. Nuántimoheꞌ lao mokámpái pakaroꞌa popatawuáNa.”

⁶⁶ Lao mpuꞌumoheꞌ i popatawuána Iesu. Watu petukona rapetándái bona ineeꞌ paꞌi ara tauna to lao mobungkáhi, hai surudadoꞌ iti rahuoꞌheꞌ mokámpái popatawuá iti, bona tiꞌara ara to mokakaleá.