Matiu 26 - Sura Magasaꞌ: Bahangapa sura Pototowiá to Sae hai Pototowiá to Woꞌu

Totosaeraꞌ toIahudiꞌ moliwo mopapate Iesu

¹ Karoona Iesu mopahaweꞌ upu-upu paturoꞌNa iti i topeguruNa, Nahángáꞌámoheꞌ,

² “Niꞌisá miꞌi, rongalo rái ina haweꞌ Alo Mahile Posusa Paska. Hai Ánáꞌ Mánusiá ina rapehuhuꞌá i taeraꞌ ewáliNa bona rapakuꞌ i kau mombehape.”

³ I tempó iti, kapalaꞌ-kapalaꞌ tadulako menómbá hai totosaeraꞌ toIahudiꞌ to ntániꞌna mogómbóheꞌ i támbina Tadulako Menómbá Mahile to rahangaꞌ Kaiapa.

⁴ I lalu pogómbóáraꞌ iti, himpuduheꞌ mampeliꞌ noumbá ráráraꞌ bona Iesu maꞌala rahakaꞌ hai rahuku mate.

⁵ Agáiáná i poliworaꞌ iti, rauliꞌ, “Ineeꞌ sieruꞌ tahakaꞌ i minggu mahile deꞌe, bona tiꞌara ara pohiho i oloꞌraꞌ tauna to handaꞌ.”

Hadua towawine mobubuhi mina-mina to mawongi i Iesu

⁶ I tempóna Iesu ara i wánuá Betania, Ia lao i támbina hadua tauna to rahangaꞌ Simoꞌ, to hangkoia kana hakiꞌ tánggáꞌ.

⁷ Tangaꞌraꞌ mandeꞌ, haweꞌ miꞌi hadua towawine moánti hambuaꞌ butoloꞌ to bukeꞌ mina-mina to mawongi hai masuliꞌ ntepuꞌu hólóna. Towawine iti mobubuhi wuáꞌna Iesu hai mina-mina to mawongi iti tandaꞌ pebiláꞌna.

⁸ Karaitána topeguruNa apa to nabábehi towawine iti, kóiꞌ miꞌi inaoraꞌ, haneꞌi rauliꞌ, “Moapa riꞌi haneꞌi mina-mina to masuliꞌ hólóna iti napopu-popu mbero peá?

⁹ Rángina miꞌi rapobaluꞌ bona dóiꞌ hólóna raweꞌiheꞌ tauna to meahiahiꞌ tueꞌraꞌ.”

¹⁰ Naisá miꞌi Iesu pekiriraꞌ, onoꞌ miꞌi haneꞌi Nahángáꞌáheꞌ, “Moapa riꞌi haneꞌi nipakasusa laluna towawine deꞌe? Apa to nabábehi i Kódóꞌ deꞌe, maroꞌa.

¹¹ Ane tauna to meahiahiꞌ, ara mani tempómi motulungiheꞌ láwiꞌ arantoheꞌ oaꞌ i oloꞌmi. Agáiáná Kódóꞌ, tiꞌaraPoꞌ marue hingkakani hai kómu.

¹² Towawine deꞌe mobubuhiAꞌ hai mina-mina to mawongi, lempóna ia mopatimama ami wátáNgkuꞌ i kaꞌina ratawuNgkuꞌ.

¹³ Toꞌu to Kuꞌuliꞌ, hai Kuhángáꞌákou: i humalele duniáꞌ, iumbá peá Ngkóráꞌ Marasa rabámbári, apa to nabábehi towawine deꞌe bateꞌna ina tekábelái hai rabuhinao oaꞌ.”

Iudasiꞌ mampobaluꞌ Iesu i ewáliNa

¹⁴ Hangko ionoꞌ, Iudasiꞌ Isikarioꞌ, hadua hangko i topeguruna Iesu to hampuloꞌ hai rodua, lao mekuneꞌ i kapalaꞌ-kapalaꞌ tadulako menómbá,

¹⁵ nauliꞌ, “Ane kuhuhuꞌ Iesu i lalu taemi, apa to ina niweꞌiaꞌ?” Rapokana ntepuꞌu pembiáꞌna Iudasiꞌ, mewaliꞌ moimbaꞌ mpuꞌumoheꞌ dóiꞌ peráꞌ tálu puloꞌna pepaꞌna kahandaꞌna, haneꞌi raweꞌi.

¹⁶ Hangko ionoꞌ, Iudasiꞌ mampeliꞌ tempó to maroꞌa mohuhuꞌ Iesu i hira bona rahakaꞌ.

Iesu mandeꞌ pandeꞌ Posusa Paska hingkakani hai topeguruNaheꞌ

¹⁷ I alo pantepuꞌuána Posusa Rótiꞌ to Tiꞌara Raragiꞌi, laomoheꞌ topeguruNa i Iesu, mekuneꞌ i Hia, rauliꞌ, “Pueꞌ, mouláꞌ peundeꞌáMu, iumbákeꞌ ina mandeꞌ pandeꞌ Paska bona kiꞌisá kipatimama?”

¹⁸ Nahánikiheꞌ Iesu, “Laomokou i hadua tauna i lalu kótá Ierusale, nihángáꞌá node: ‘Nauliꞌ Guru, Hungkuꞌ miꞌi tempó to napakanótó Pueꞌ Ala. Kuꞌundeꞌ mamposusai Alo Mahile Posusa Paska i támbimu hingkakani hai topeguruNgkuꞌheꞌ.’ ”

¹⁹ Lao mpuꞌumoheꞌ rodua topeguruna Iesu mampeuláꞌi apa to Nahángáꞌáheꞌ, hai mopatimamaheꞌ pandeꞌ Posusa Paska.

²⁰ Káindi miꞌi, Iesu hai topeguruNa to hampuloꞌ hai rodua mehodaheꞌ mandeꞌ.

²¹ Tangaꞌraꞌ mandeꞌ, nauliꞌ Iesu, “Bona niꞌisá: hadua hangko i oloꞌmi ina mohuhuꞌAꞌ i ewálingkuꞌ.”

²² Karahádina topeguruNa laluitaNa iti, masusa miꞌi laluraꞌ, haneꞌi mekuneꞌmoheꞌ upu-upu i Iesu, rauliꞌ, “Tiꞌara paꞌi woꞌo kódóꞌ to Nutunggái, Pueꞌ?”

²³ Nahániki Iesu, “Tauna to motubuká rótiꞌna i lalu pamboliá rutuꞌ hingkakani hai Kódóꞌ, ia miꞌi to ina mohuhuꞌAꞌ i ewálingkuꞌ.

²⁴ Ánáꞌ Mánusiá bateꞌna ina mate nodo to tepakanótó miꞌi ami i lalu Sura Magasaꞌ. Agáiáná ina rumihi karahukuna tauna to mohuhuꞌAꞌ i ewáliNgkuꞌ. Rángina miꞌi tauna iti tiꞌara rapoánáka.”

²⁵ Hangko ionoꞌ, nauliꞌ woꞌo Iudasiꞌ to ina mohuhuꞌ Iesu i ewáliNa, “Tiꞌara paꞌi woꞌo kódóꞌ to Nutunggái, Guru?” Nahániki Iesu, “Io miꞌi haduduámu to manguliꞌ noꞌonoꞌ!”

Iesu mopaꞌara dándi to woꞌu

²⁶ Tangaꞌraꞌ Iesu hai topeguruNa mandeꞌ pandeꞌ Posusa Paska, Iesu moala miꞌi rótiꞌ haneꞌi mekakae i Pueꞌ Ala. Roo onoꞌ, Nabiseꞌ-biseꞌ miꞌi rótiꞌ iti hai Nagáláꞌ-gáláꞌáheꞌ topeguruNa, haneꞌi Nauliꞌ, “Deꞌe miꞌi wátáNgkuꞌ. Niala miꞌi hai niandeꞌ.”

²⁷ Roo onoꞌ, Ia moala miꞌi painuá anggoroꞌ, mekakae i Pueꞌ Ala, haneꞌi Nahuhuꞌáheꞌ, Nauliꞌ, “Mainumokou upu-upu,

²⁸ láwiꞌ anggoroꞌ deꞌe mampopotandaꞌ waheꞌKuꞌ to ina mabubu i kamateNgkuꞌ. WaheꞌKuꞌ deꞌe mopakaróhó podándi to woꞌu to ina napaꞌara Pueꞌ Ala, bona moliu waheꞌKuꞌ, handaꞌ tauna peisá mohintuwuꞌ hai Pueꞌ Ala, hai ina Naꞌámpungi dósáraꞌ.

²⁹ Bona niꞌisá: mantepuꞌu deꞌe-deꞌe, tiꞌara piꞌi ina Kuinu anggoroꞌ duuꞌKuꞌ ina mainu anggoroꞌ to woꞌu hingkakani hai kómu i lalu popárentána UmáNgkuꞌ.”

Iesu mampopaisá kaꞌina mesápuákana Peturuꞌ

³⁰ Roo onoꞌ, monaniheꞌ nani petóiá. Karooraꞌ monani, pohuꞌmoheꞌ hangko i kótá lao i buluꞌ Saitu.

³¹ Hangko ionoꞌ, Iesu molaluita i topeguruNa, Nauliꞌ, “Ánti kapári to ina morampeAꞌ, deiná káindi kómu upu-upu ina mopálehiAꞌ. Kuisá kaꞌina mewaliꞌna, láwiꞌ teukiꞌ miꞌi i lalu Ngkóráꞌna Pueꞌ Ala node: ‘Ina Kupapate topoewu, álána dimbáNa mahawuꞌ.’ (Sakaria 13:7)

³² Agáiáná i katueꞌKuꞌ huleꞌ, ina moioruAꞌ lao i tampoꞌ Galilea, hai ina Kupegiákou ionoꞌ.”

³³ Nauliꞌ Peturuꞌ, “Pueꞌ! Kehapiꞌ upu-upu tauna mopálehiKoꞌ, agáiáná kódóꞌ tiꞌara!”

³⁴ Nauliꞌ Iesu, “Toꞌu ntepuꞌu to Kuhángáꞌáꞌákoꞌ: káindi deꞌe, hangko tiꞌara mani motuturuꞌuá manuꞌ, tálu miꞌi kánina nusápuákaꞌAꞌ.”

³⁵ Agáiáná nauliꞌ Peturuꞌ, “Pueꞌ, kehapiꞌaꞌ mate hingkakani hai Io, tiꞌara mpuꞌu ina kusápuáka kakuisáMu!” Noꞌonoꞌ woꞌo laluitaraꞌ topeguruNa to ntániꞌna.

Iesu mekakae i Gesemani

³⁶ I kahaweꞌraꞌ i hinoe to rahangaꞌ Gesemani, Iesu mampolaluitaꞌáheꞌ topeguruNa, Nauliꞌ, “Mehodamokou ieneꞌ, ina laoAꞌ hampaiꞌ mekakae.”

³⁷ Agáiáná Peturuꞌ hai ánáꞌna Sebedeu to rodua, iamoheꞌ Iakobu hai Iohane Naꞌántiheꞌ bona meuláꞌ i Hia. I tempó iti, mapári Nahádi hai wiora laluNa.

³⁸ Nahángáꞌáheꞌ, “Masusa ntepuꞌu laluNgkuꞌ, nodoAꞌ to ina mate. Ieneꞌmokou sieruꞌ, niporángáꞌAꞌ mekakae. Ineeꞌkou letaꞌ!”

³⁹ Roo onoꞌ, Iesu lao karaoꞌ hantóiꞌ, haneꞌi mopalumbá mekakae, Nauliꞌ, “UmáNgkuꞌ, ane peisái, Nupakaraoꞌ hangko i Kódóꞌ kapári to ina morampeAꞌ deꞌe. Agáiáná Kupembiáꞌ bona tiꞌara peundeꞌáNgkuꞌ to mewaliꞌ; ngkáliꞌna riꞌi peundeꞌáMu Umaꞌ.”

⁴⁰ Roo onoꞌ, mesuleꞌ wopiꞌi Iesu lao i topeguruNa to tálu iti, Nahumbaheꞌ tangaꞌraꞌ letaꞌ. Mewaliꞌ Nauliꞌ i Peturuꞌ, “Tiꞌara paꞌi nibuku mamporángáꞌAꞌ, kehapiꞌ hajaa peá?

⁴¹ Maingáꞌ-ingáꞌ hai mekakaekou bona tiꞌarakou narampe pekeloꞌ. I lalumi niundeꞌ mobábehi to maroꞌa, agáiáná wátámi maledeꞌ haneꞌi tiꞌara nibuku.”

⁴² Roo onoꞌ, Iesu lao wopiꞌi mekakae haduduáNa, Nauliꞌ, “UmáNgkuꞌ, ane kapári deꞌe tiꞌara piꞌi peisá Nupakaraoꞌ hangko i Kódóꞌ, Nupopewaliꞌ miꞌi hintotoꞌ hai peundeꞌáMu.”

⁴³ Roo mekakae, Iesu mesuleꞌ wopiꞌi lao i topeguruNaheꞌ. Naita letaꞌ wopaheꞌ ánti kamalelueraꞌ.

⁴⁴ I katáluna kánina, Iesu lao mekakae. PekakaeNa iti hibali hai pekakaeNa to karongkánina ininá.

⁴⁵ KarooNa mekakae, mesuleꞌ miꞌi lao i topeguruNa to tálu iti, Nahángáꞌáheꞌ, “Letaꞌ manikou paꞌi? Bona niꞌisá, haweꞌ miꞌi tempóna Ánáꞌ Mánusiá ina rasápuáka hai rahuhuꞌ i taeraꞌ tauna to kadake.

⁴⁶ Mearómokou, laomokeꞌ! Tauna to ina mohuhuꞌAꞌ i ewálingkuꞌ haweꞌ miꞌi.”

Iesu rahakaꞌ

⁴⁷ Tangaꞌna mani Iesu molaluita, haweꞌ miꞌi Iudasiꞌ, hadua hangko i topeguruna Iesu to hampuloꞌ hai rodua, hingkakani hai handaꞌ tauna to moánti pihoꞌ hai pebóbáꞌ. Tauna iti rapohawaꞌáheꞌ kapalaꞌ-kapalaꞌ tadulako menómbá hai totosaeraꞌ toIahudiꞌ to ntániꞌna bona laoheꞌ mohakaꞌ Iesu.

⁴⁸ Nahángáꞌámoheꞌ ami Iudasiꞌ tandaꞌ bona raisá kaumbánaNa Iesu, nauliꞌ, “Heáná to kuángki, onoꞌ miꞌi tauna to nipeliꞌ. Ia to hangaa-ngaa nihakaꞌ.”

⁴⁹ Mewaliꞌ, i kahaweꞌraꞌ ionoꞌ, lao miꞌi Iudasiꞌ mampohidupaꞌá Iesu, nauliꞌ, “Tabe, Guru!” haneꞌi naꞌángki.

⁵⁰ Nauliꞌ Iesu, “Ale, ara rikaa paꞌi tunggáiámu haneꞌikoꞌ haweꞌ?” Hangkaꞌ-hangkaꞌ perái tauna to handaꞌ iti mohungkuki Iesu haneꞌi rahakaꞌ.

⁵¹ Ionoꞌ, hadua topeguruNa to ara hingkakani hai Iesu mobutuꞌ pihoꞌna motárási hawiꞌna Tadulako Menómbá Mahile. Kana peá talingana haneꞌi mawehángi.

⁵² Nauliꞌ Iesu, “Pusaꞌ huleꞌ pihoꞌmu! Heáná to mepapate mopakeꞌ pihoꞌ, bateꞌna ina rapapate woꞌo hai pihoꞌ.

⁵³ Tiꞌara paꞌi nuisá, ane kemembiáꞌAꞌ tulungi i UmáNgkuꞌ, kásáliu ina Napárentái mai hampuloꞌ hai rontobu surudadoꞌ malaꞌekaNa, ba melábinto riꞌi!

⁵⁴ Agáiáná ane taewaꞌheꞌ to mohakaꞌAꞌ deꞌe, tiꞌara ina tebukeki apa to teukiꞌ hangkoia i lalu Sura Magasaꞌ to manguliꞌ upu-upu iti hangaa-ngaa mewaliꞌ i Kódóꞌ.”

⁵⁵ I tempó iti woꞌo, nauliꞌ Iesu i tauna to handaꞌ, “Moapa riꞌi haneꞌi maiAꞌ nihakaꞌ moántikou pihoꞌ hai pebóbáꞌ? Ba niuliꞌ ripaꞌi tauna to kadakeAꞌ noeneꞌ? Alo-alona mehodaꞌAꞌ i Támbina Pueꞌ Ala mepaturoꞌ. Moapa riꞌi haneꞌi i tempó iti tiꞌaraꞌAꞌ nihakaꞌ?

⁵⁶ Agáiáná upu-upu deꞌe hangaa-ngaa mewaliꞌ, bona tebukeki apa to raukiꞌ nabiꞌ-nabiꞌ hangkoia i lalu Sura Magasaꞌ.” Roo onoꞌ, upu-upu topeguruNa melangkaheꞌ mopálehi Iesu.

Iesu i lindoꞌna Topepáresáꞌ Mahile Agama Iahudiꞌ

⁵⁷ Karoona Iesu rahakaꞌ, Ia raꞌánti lao i támbina Tadulako Menómbá Mahile Kaiapa. Guru-guru agama hai totosaeraꞌ toIahudiꞌ to ntániꞌna hirámpumoheꞌ ionoꞌ.

⁵⁸ Peturuꞌ meuláꞌ ngkaraoꞌ, duuꞌna haweꞌ i tangabaa támbina Tadulako Menómbá Mahile. Ia mesuaꞌ i tangabaa hai mehoda hingkakani hai topokámpái, láwiꞌ mampoinao moisá apa to ina mewaliꞌ i Iesu.

⁵⁹ I tempó iti, kapalaꞌ-kapalaꞌ tadulako menómbá hai upu-upu Topepáresáꞌ Mahile, mampeliꞌheꞌ sabiꞌ dongkoꞌ bona Iesu peisá rahuku mate.

⁶⁰ Kehapiꞌ handaꞌ miꞌi sabiꞌ to mosalaꞌi Iesu, agáiáná tiꞌara ralámbiꞌ salaꞌNa to hintotoꞌ rahukuá mate. Kaupuána, ara rodua sabiꞌ dongkoꞌ to hibali laluitaraꞌ to lao i lindoꞌraꞌ Topepáresáꞌ Mahile iti,

⁶¹ rauliꞌ, “Tauna deꞌe manguliꞌ, ‘Támbina Pueꞌ Ala peisá Kugero, hai i lalu tálu peá alona ina Kuaró huleꞌ.’ ”

⁶² Meángkáꞌ miꞌi Tadulako Menómbá Mahile, mohángáꞌá Iesu, “Tiꞌara paꞌi Nuhániki to mosalaꞌiKoꞌ iti?”

⁶³ Agáiáná Iesu tiꞌara mehániꞌ. Nauliꞌ wopiꞌi Tadulako Menómbá Mahile, “I lalu hangaꞌna Pueꞌ Ala to tueꞌ, Nuhángáꞌáꞌáꞌangkaiꞌ i katoꞌu-toꞌuána, ba toꞌu mpuꞌu kaꞌIoNa Datu Topehómpóꞌ, Ánáꞌna Pueꞌ Ala?”

⁶⁴ Nahániki Iesu, “Io haduduámu to manguliꞌ noꞌonoꞌ. Hai Kuhángáꞌákou: ina niꞌita Ánáꞌ Mánusiá mehoda tándáꞌ i kuánána Pueꞌ Ala to makuasaꞌ, hai ina niꞌita woꞌo i wongko gawu mendáulu mai hangko i surugáꞌ.”

⁶⁵ Kanahádina Tadulako Menómbá Mahile apa to nauliꞌ Iesu, ia mohepaꞌ miꞌi baduna ánti kamabukoꞌna haneꞌi nauliꞌ, “Tauna deꞌe mopahibali kuasaꞌNa hai Pueꞌ Ala! Tiꞌara piꞌi mobunduꞌ ara sabiꞌ! Nihádi miꞌi haduduámi laluitaNa to mopakóiꞌ Pueꞌ Ala.

⁶⁶ Mewaliꞌ noumbá pobutusimi mokana i tauna deꞌe?” Rahániki totosaeraꞌ toIahudiꞌ iti, “Hangaa-ngaa rahuku mate!”

⁶⁷ Mantepuꞌu hangko ionoꞌ, araheꞌ to motinuduhi lindoꞌNa hai mojangguruꞌ wátáNa, araheꞌ woꞌo to mopakóiꞌ. {Rapiriꞌ mátáNa} haneꞌi ratampedaꞌ hai rahángáꞌá:

⁶⁸ “Ane toꞌu-toꞌu Io Datu Topehómpóꞌ, Nuꞌuliꞌ ba heáná to motampedaꞌKoꞌ?”

Peturuꞌ mosápuáka peuláꞌna i Iesu

⁶⁹ I tempóna Peturuꞌ mehoda i tangabaa, haweꞌ miꞌi hadua towawine mohángáꞌá Peturuꞌ, “Io woꞌo hadua rángána Iesu toGalilea iti.”

⁷⁰ Agáiáná nasápuáka Peturuꞌ i lindoꞌraꞌ upu-upu tauna, nauliꞌ, “Tiꞌara kuisá apa tunggáiámu!”

⁷¹ Hangko ionoꞌ, ia lao meángkáꞌ hungkuꞌ i babaꞌá. Ionoꞌ, ara woꞌo hadua towawine to moita Peturuꞌ hai mohángáꞌáheꞌ tauna to ionoꞌ, “Ia deꞌe to paka hingkakani hai Iesu toNasare iti.”

⁷² Nasápuáka wopiꞌi Peturuꞌ hai mokambo, nauliꞌ, “Kupomate ane kuisái tauna iti!”

⁷³ Tiꞌara marue hangko ionoꞌ, tauna to meángkáꞌheꞌ woꞌo i babaꞌá mohungkuki woꞌo Peturuꞌ, rahángáꞌá, “Io mpuꞌu hadua rángáNa! Tongawaꞌ hangko i polaluitamu, io woꞌo toGalilea.”

⁷⁴ Mokambo wopiꞌi Peturuꞌ, nauliꞌ, “Mate-mateaꞌ! Tiꞌara mpuꞌu kuisá tauna iti!” I tempó iti, motuturuꞌuá miꞌi manuꞌ,

⁷⁵ mewaliꞌ nabuhinao miꞌi Peturuꞌ laluitana Iesu to manguliꞌ, “Hangko tiꞌara mani motuturuꞌuá manuꞌ, tálu miꞌi kánimu mosápuákaꞌAꞌ.” Pohuꞌ miꞌi Peturuꞌ lao i rawa teriaꞌ, hai rumihi kawiorana.