Matiu 25 - Sura Magasaꞌ: Bahangapa sura Pototowiá to Sae hai Pototowiá to Woꞌu

Ngkóráꞌ pándiriꞌ kana i hampuloꞌ ánáꞌntawine

¹ Iesu mopaliliu laluitaNa, Nauliꞌ, “Ane haweꞌ huleꞌ Ánáꞌ Mánusiá i kadatuáNa, pewaliꞌna nodo ngkóráꞌ pándiriꞌ deꞌe: hampuloꞌ ánáꞌntawine lao mampegiá modupaꞌ tobaleilo to ratauna. Hadua-haduaheꞌ moánti palitaraꞌ.

² Limaheꞌ to tiꞌara timama, hai limaheꞌ woꞌo to timama.

³ Ánáꞌntawine to lima to tiꞌara timama iti, moántiheꞌ palitaraꞌ, agáiáná tiꞌara melábi minaraꞌ,

⁴ hai ánáꞌntawine to lima to timama, moántiheꞌ palitaraꞌ hai moántiheꞌ woꞌo mina to ina rapopotámbái minana palitaraꞌ.

⁵ Tobaleilo to ina ratauna iti, marue ntepuꞌu hangko haweꞌ riꞌi, álána maleluemoheꞌ ánáꞌntawine iti, hai kahópóꞌána letaꞌmoheꞌ upu-upu.

⁶ Tangaꞌ káindi, hangkaꞌ-hangkaꞌ perái ara tauna to mekióꞌ, ‘Tobaleilo to ratauna haweꞌ miꞌi! Maimokou, nidupaꞌ miꞌi.’

⁷ Kapearóraꞌ ánáꞌntawine to hampuloꞌ iti, hadua-haduaheꞌ mopatimama palitaraꞌ.

⁸ Ánáꞌntawine to tiꞌaraheꞌ timama iti membiáꞌheꞌ mina i rángáraꞌ to timama, rauliꞌ, ‘Donggo, niweꞌi wongkaiꞌkaa minami hantóiꞌ, ina mate miꞌi palitangkiꞌ.’

⁹ Agáiáná rahánikiheꞌ ánáꞌntawine to timama iti, rauliꞌ, ‘Tiꞌara paꞌi gáná kipakeꞌ ane kigáláꞌá wopakou. Rángina miꞌi laokou mehóló i topobaluꞌ-baluꞌ mina.’

¹⁰ Pohuꞌ mpuꞌumoheꞌ ánáꞌntawine to tiꞌara timama iti lao mohóló mina. Tangaꞌraꞌ mehóló, haweꞌ miꞌi tobaleilo to ratauna. Ánáꞌntawine to lima to timama iti, liliuheꞌ lao i támbi posusaꞌá hingkakani hai tobaleilo to ratauna, hai mesuaꞌheꞌ hingkakani hai upu-upu torare. Upu onoꞌ, babaꞌ ratuko miꞌi.

¹¹ Tiꞌara marue hangko ionoꞌ, haweꞌmoheꞌ ánáꞌntawine to tiꞌara timama. Mekióꞌheꞌ hangko i rawa, rauliꞌ, ‘Tuá! Nubungkáhiá wongkaiꞌkaa babaꞌ!’

¹² Agáiáná mehániꞌ tobaleilo to ratauna, nauliꞌ, ‘Tiꞌarakou kuisá.’ ”

¹³ Napahópóꞌ Iesu ngkóráꞌ pándiriꞌ iti, Nauliꞌ, “Mewaliꞌ hangaa-ngaa timamakou oaꞌ, láwiꞌ tiꞌara niꞌisá impirá kaꞌina haweꞌáNgkuꞌ.”

Ngkóráꞌ pándiriꞌ kana i tálu hawiꞌ

¹⁴ Iesu mopahaweꞌ wopiꞌi hampákáꞌ ngkóráꞌ pándiriꞌ, Nauliꞌ, “Ane haweꞌ huleꞌ Ánáꞌ Mánusiá i kadatuáNa, pewaliꞌna nodo ngkóráꞌ pándiriꞌ deꞌe: Hadua tuꞌáná moliwo ina pohuꞌ lao i kótá to karaoꞌ. Hangko tiꞌara mani pohuꞌ, ia mokióꞌheꞌ hawiꞌna hai naweꞌiheꞌ dóiꞌ rapopobunduꞌ bona ara ánáꞌna.

¹⁵ Hadua-hadua naweꞌiheꞌ mouláꞌ pebukuáraꞌ. Hadua naweꞌi lima sábuna dóiꞌ buláwá, hadua rosábu, hai hadua woꞌo hasábu. Roo onoꞌ, pohuꞌ miꞌi.

¹⁶ Hawiꞌ to naweꞌi lima sábuna dóiꞌ buláwá iti, liliu napopobunduꞌ mampeliꞌ ánáꞌna, mewaliꞌ nalámbiꞌ mpuꞌu miꞌi ánáꞌna lima woꞌo sábuna.

¹⁷ Noꞌonoꞌ woꞌo hawiꞌ to raweꞌi rosábu dóiꞌ buláwá molámbiꞌ woꞌo ánáꞌna rosábu.

¹⁸ Agáiáná hawiꞌ to raweꞌi peá hasábu lao riꞌi mokae tampoꞌ napowuniꞌi dóiꞌ to naweꞌi pueꞌna iti.

¹⁹ Marue hangko ionoꞌ, mesuleꞌ miꞌi pueꞌraꞌ hai mokióꞌheꞌ hawiꞌna. I kahaweꞌraꞌ hawiꞌna, napekuneꞌ miꞌi noumbá karapopobunduꞌna dóiꞌna.

²⁰ Hawiꞌ to naweꞌi lima sábuna dóiꞌ buláwá moánti i pueꞌna hampuloꞌ sábuna, nauliꞌ, ‘Tuá, to nuweꞌiaꞌ hangkoia lima sábuna, hai deꞌe miꞌi woꞌo ánáꞌna, lima sábuna.’

²¹ Nauliꞌ pueꞌna, ‘Maroꞌa ntepuꞌu kanupopolumaona bágóꞌ to kuweꞌikoꞌ. Mewaliꞌ ánti katetidaꞌmu i bágóꞌ to manangkoꞌ, kupoináláiákoꞌ bágóꞌ to matimi. Maimokoꞌ hingkakani hai kódóꞌ i lalu kagóeꞌ-góeꞌ.’

²² Hawiꞌ to raweꞌi rosábu dóiꞌ buláwá haweꞌ woꞌo, nauliꞌ, ‘Tuá, to nuweꞌiaꞌ hangkoia rosábu, hai deꞌe miꞌi woꞌo ánáꞌna, rosábu.’

²³ Nauliꞌ pueꞌna iti, ‘Maroꞌa ntepuꞌu kanupopolumaona bágóꞌ to kuweꞌikoꞌ. Mewaliꞌ, ánti katetidaꞌmu i bágóꞌ to manangkoꞌ, kupoináláiákoꞌ bágóꞌ to matimi. Maimokoꞌ hingkakani hai kódóꞌ i lalu kagóeꞌ-góeꞌ.’

²⁴ Roo onoꞌ, haweꞌ miꞌi woꞌo hawiꞌ to raweꞌi hasábu, nauliꞌ, ‘Tuá, kuisá io hadua tauna to masodokoꞌ. Nuisá peá motarima hangko i apa to tiꞌara nupowonggoꞌ. Nuhuoꞌangkaiꞌ mehuꞌá hai mantudaꞌ, bona i hio aha wuaꞌna!

²⁵ Malááꞌaꞌ i hio tuá, onoꞌ miꞌi haneꞌi laoaꞌ mowuni dóiꞌmu i lalu tampoꞌ. Mewaliꞌ, deꞌe miꞌi dóiꞌmu. Kupopesuleꞌ peá huleꞌ.’

²⁶ Nauliꞌ pueꞌna iti, ‘Kadake ntepuꞌukoꞌ hai lohekoꞌ woꞌo mobágóꞌ! Nuisá kódóꞌ deꞌe tauna to mampoweꞌiaꞌ topobágóꞌkuꞌ bágóꞌ to matimi. Kuhuoꞌheꞌ mehuꞌá hai mantudaꞌ, bona i kódóꞌ aha wuaꞌna!

²⁷ Mewaliꞌ, moapa riꞌi haneꞌi tiꞌara nupeweꞌi dóiꞌ iti i tauna ntániꞌna, bona ia to mampopobunduꞌ dóiꞌkuꞌ? Ane kenoꞌonoꞌ to nubábehi, i pesuleꞌkuꞌ ketiꞌara hasábu peá to kutarima, kehangaa-ngaa hante ánáꞌna woꞌo!’

²⁸ Nauliꞌ wopiꞌi pueꞌna iti i hawiꞌna to haduána, ‘Nuala dóiꞌ to ara i hia, nuweꞌi i hawiꞌkuꞌ to molámbiꞌ miꞌi hampuloꞌ sábuna dóiꞌ buláwá,

²⁹ láwiꞌ tauna to peisá rapoinálái hai apa to raweꞌi, ina raweꞌi wopiꞌi bona tetámbái. Agáiáná tauna to tiꞌara peisá rapoinálái, kehapiꞌ hantóiꞌ peá to ara i hia, bateꞌna ina raꞌala huleꞌ.

³⁰ Hai hawiꞌkuꞌ to tiꞌara mobunduꞌ, nitibe karaoꞌ i lalu kakáindiána. Ionoꞌ tauna to rahuku ina teriaꞌ hai mapári ntepuꞌu rahádi.’ ”

I alo pobutusi, Ánáꞌ Mánusiá ina mogááꞌ tauna mewaliꞌ rontobu

³¹ Iesu mopaliliu laluitaNa i topeguruNaheꞌ, Nauliꞌ, “Ane haweꞌ huleꞌ Ánáꞌ Mánusiá, ina meawaꞌ tueꞌNa hai maróhó ntepuꞌu kuasaꞌNa. Ia ina raporángá upu-upu malaꞌeka, hai Ia ina mehoda i pehodaꞌá kadatuáNa to meawaꞌ.

³² Upu-upu tauna i duniáꞌ ina hirámpu i lindoꞌNa hai ina Nagááꞌheꞌ mewaliꞌ rontobu, nodo topoewu mopataniꞌ dimbá hai bekeꞌ.

³³ Tauna to mampeuláꞌi peundeꞌána Pueꞌ Ala ina Napahantobuheꞌ tándáꞌ i kuánáNa, hai tauna to tiꞌara mampeuláꞌi peundeꞌána Pueꞌ Ala ina Napahantobuheꞌ tándáꞌ i kabeoꞌNa.

³⁴ Hai Datu iti ina mohángáꞌáheꞌ to tándáꞌ i kuánáNa, ‘Maimokou to nawátiꞌ UmáNgkuꞌ! Mesuaꞌmokou i lalu popárentáNgkuꞌ to Kupatimamaꞌámokou ami hangko i karapopewaliꞌna duniáꞌ,

³⁵ láwiꞌ i tempóNgkuꞌ marimi, nipaꞌandeꞌAꞌ. MangkadoꞌuAꞌ, nipopainuAꞌ. TempóNgkuꞌ mewaliꞌ torare, nitarimaꞌAꞌ.

³⁶ Tiꞌara ara waruꞌKuꞌ, nipoweꞌiAꞌ waruꞌ. I tempóna tiꞌara Kulalu, nipákupuiAꞌ. TangaꞌKuꞌ ratarungku, niweoꞌAꞌ.’

³⁷ Ina mehániꞌheꞌ tauna to manótó i peitána Pueꞌ Ala to meángkáꞌ tándáꞌ i kuánána Datu iti, rauliꞌ, ‘Pueꞌ, impiráKoꞌ kiꞌita marimi hai kipaꞌandeꞌKoꞌ, ba mangkadoꞌuKoꞌ hai kipopainuKoꞌ?

³⁸ ImpiráKoꞌ haweꞌ, hai kipotorareKoꞌ? ImpiráKoꞌ kiꞌita tiꞌara ara waruꞌMu, hai kipoweꞌiKoꞌ waruꞌ?

³⁹ Impirá tiꞌara Nulalu hai kipákupuiKoꞌ, ba i lalu tarungku, hai kiweoꞌKoꞌ?’

⁴⁰ Hai ina nahánikiheꞌ Datu, ‘Bona niꞌisá: apa to nibábehi i tempómi motulungi tauna ntániꞌna, kehapiꞌ hadua peá to meahiahiꞌ tueꞌna, lempóna, iti miꞌi to nibábehi i Kódóꞌ.’

⁴¹ Roo onoꞌ, ina Nahángáꞌáheꞌ to meángkáꞌ tándáꞌ i kabeoꞌNa, ‘Pohuꞌmokou hangko i lindoꞌKuꞌ, kómu to hárárá i UmáNgkuꞌ! Mesuaꞌmokou i lalu api to roreꞌ oaꞌ, to rapatimamaꞌá miꞌi ami Datu Tokadake hai upu-upu malaꞌekana,

⁴² láwiꞌ i tempóNgkuꞌ marimi, tiꞌaraꞌAꞌ nipaꞌandeꞌ. MangkadoꞌuAꞌ, tiꞌaraꞌAꞌ nipopainu.

⁴³ HaweꞌAꞌ, tiꞌaraꞌAꞌ nipotorare. Tiꞌara ara waruꞌKuꞌ, tiꞌaraꞌAꞌ nipoweꞌi pewaruꞌ. Tiꞌara Kulalu, tiꞌaraꞌAꞌ nipákupui. TangaꞌKuꞌ ratarungku, tiꞌaraꞌAꞌ niweoꞌ.’

⁴⁴ Ina rahániki woꞌo, ‘Pueꞌ, impiráKoꞌ kiꞌita marimi ba mangkadoꞌu ba nodo tohaweꞌ, ba tiꞌaraKoꞌ mewaruꞌ, ba tiꞌara Nulalu, ba ratarungkuKoꞌ, hai tiꞌaraKoꞌ kitulungi?’

⁴⁵ Hai ina nahánikiheꞌ Datu, ‘Bona niꞌisá: ánti katiꞌárámi motulungi tauna to meahiahiꞌ tueꞌraꞌ, lempóna, Kódóꞌ miꞌi to tiꞌara nitulungi.’ ”

⁴⁶ Napahópóꞌ Iesu laluitaNa, Nauliꞌ, “Upu-upu tauna to kadake iti ina ratibeheꞌ i lalu naraka hai ina rahukuheꞌ duuꞌna i rue-ruena, agáiáná tauna to manótó i peitána Pueꞌ Ala ina molámbiꞌheꞌ katueꞌ to maroꞌa to tiꞌara mokahópóꞌá.”