Matiu 22 - Sura Magasaꞌ: Bahangapa sura Pototowiá to Sae hai Pototowiá to Woꞌu

Tadulako agama Iahudiꞌ rapándiriꞌ nodo tauna to lohe lao i posusaꞌá

¹ Molaluita wopiꞌi Iesu i tadulako agama Iahudiꞌ, Napahaweꞌáheꞌ bahangapa ngkóráꞌ pándiriꞌ {bona raisá apa to ina mewaliꞌ i tauna to tiꞌara mampoinálái kaꞌIana Datu Topehómpóꞌ}. Nauliꞌ,

² “Pueꞌ Ala peisá rapándiriꞌ nodo hadua datu to mobábehi susa petauna i ánáꞌna.

³ Datu iti mopárentámoheꞌ huoꞌána lao mokióꞌ tauna bona laoheꞌ i posusaꞌá petauna iti. Agáiáná upu-upuheꞌ to rakióꞌ, tiꞌaraheꞌ mau lao.

⁴ Onoꞌ miꞌi haneꞌi nahuoꞌ wopaheꞌ huoꞌána to ntániꞌna, nahángáꞌáheꞌ, ‘Nipahaweꞌ i tauna to rakióꞌ: gapiꞌ hai ánáꞌ gapiꞌ to maruduꞌ rasambale miꞌi, pandeꞌ leháꞌ miꞌi, upu-upuna timama miꞌi. Laomokeꞌ deꞌe-deꞌe i posusaꞌá petauna!’

⁵ Agáiáná upu-upu tauna to rakióꞌ tiꞌaraheꞌ mampeuláꞌi pekióꞌ iti. Hadua-hadua lao peheꞌ i bágóꞌraꞌ. Araheꞌ to lao i hinoeraꞌ, araheꞌ woꞌo to lao i pobágóꞌáraꞌ ntániꞌna.

⁶ Araheꞌ woꞌo to mohakaꞌ huoꞌána datu iti, rapapahái hai rapapateheꞌ.

⁷ Kanahádina datu apa to pewaliꞌ, mabukoꞌ ntepuꞌu miꞌi, onoꞌ haneꞌi mohuoꞌmoheꞌ surudadoꞌna lao mopapate topepapate iti hai mohunu wánuáraꞌ.

⁸ Roo onoꞌ, nakióꞌ wopaheꞌ huoꞌána to ntániꞌna, nahángáꞌáheꞌ, ‘Posusa petauna timama miꞌi, agáiáná tauna to kukióꞌheꞌ ininá, tiꞌarapoheꞌ hintotoꞌ mai i posusa deꞌe, láwiꞌ tiꞌaraheꞌ mampeuláꞌi pekióꞌkuꞌ.

⁹ Mewaliꞌ, laomokou i upu-upu porompengaꞌá rárá, hai heáná peá to nipohidupaꞌá, niwáwáháheꞌ mai i posusa petauna deꞌe.’

¹⁰ Lao mpuꞌumoheꞌ huoꞌána iti i porompengaꞌá rárá, mokióꞌ upu-upu tauna to rapohidupaꞌá ionoꞌ. Tiꞌara rapopontaniꞌ to maroꞌa bábehiáraꞌ ba to kadake. Kahópóꞌána, handaꞌheꞌ to lao álána bukeꞌ ntepuꞌu támbi petaunaꞌá iti.

¹¹ Roo onoꞌ, datu iti lao mampohidupaꞌá torare. Agáiáná naita i oloꞌraꞌ, ara hadua to tiꞌara mopakeꞌ waruꞌ posusa to napatimama miꞌi.

¹² Nauliꞌ datu, ‘Ee! Moapa riꞌi haneꞌi mesuaꞌkoꞌ i támbi posusaꞌá, agáiáná tiꞌarakoꞌ mopakeꞌ waruꞌ posusa?’ Tauna iti maniiꞌ peá.

¹³ Hangko ionoꞌ, datu iti mopárentáheꞌ huoꞌána, nauliꞌ, ‘Nitimpuku bitina hai taena, haneꞌi nitibe i rawa i lalu kakáindiána! Ionoꞌ, ina teriaꞌheꞌ hai mapári rahádi.’ ”

¹⁴ Napahópóꞌ Iesu ngkóráꞌ pándiriꞌ iti node: “Handaꞌ ntepuꞌu tauna to nakióꞌ Pueꞌ Ala, agáiáná tiꞌaraheꞌ handaꞌ to Napileꞌi mewaliꞌ taunáNa i lalu popárentáNa.”

ToParisi mekuneꞌ i Iesu kana pobaiari ásele

¹⁵ Roo onoꞌ, pohuꞌmoheꞌ toParisi {hangko i Támbina Pueꞌ Ala} haneꞌiheꞌ mogómbó bona mampeliꞌheꞌ rárá mopakanawoꞌ Iesu moliu pekuneꞌraꞌ to maꞌángkárá rahániki.

¹⁶ Onoꞌ miꞌi haneꞌi rapohawaꞌámoheꞌ bahangapa topegururaꞌ hai bahangapa taunána Datu Herode bona laoheꞌ mekuneꞌ i Iesu kana pobaiari ásele. Kahaweꞌraꞌ i Iesu, rahángáꞌá, “Guru, kiꞌisá miꞌi kaꞌIona tauna to manótó. MepaturoꞌKoꞌ i katoꞌu-toꞌuána apa peundeꞌána Pueꞌ Ala. Tiꞌara Nupeuláꞌi pampekiriraꞌ ba heáná peá, láwiꞌ tiꞌaraKoꞌ mampopontaniꞌ tauna,

¹⁷ onoꞌ miꞌi haneꞌi kipembiáꞌ bona Nuhángáꞌáꞌangkaiꞌ noumbá polámbiꞌMu: mouláꞌ áturá ágámántaꞌ, ba hintotoꞌkeꞌ mobaiari ásele i topopárentá toRoma, ba tiꞌara?”

¹⁸ Agáiáná naisá miꞌi Iesu tunggáiána laluraꞌ to kadake, onoꞌ miꞌi haneꞌi Nahángáꞌáheꞌ, “Mampe to maroꞌa pekou! Moapa riꞌi haneꞌi nipeliꞌ kamasalaꞌna laluitaNgkuꞌ?

¹⁹ NiweꞌiAꞌ mai dóiꞌ to biásá nipakeꞌ mobaiari ásele i toRoma.” Mewaliꞌ raweꞌi mpuꞌu miꞌi hampepaꞌ dóiꞌ peráꞌ.

²⁰ Mekuneꞌ Iesu, “Lenggeꞌna hai hangaꞌna heáná to ara i dóiꞌ deꞌe?”

²¹ Rahániki, “Lenggeꞌna hai hangaꞌna Datu Mahile i Roma.” Nauliꞌ Iesu, “Ane noꞌonoꞌi, niweꞌi topopárentá toRoma apa to hintotoꞌ raweꞌi, hai niweꞌi woꞌo Pueꞌ Ala apa to hintotoꞌ raweꞌi.”

²² Karahádina pehániꞌna Iesu, tingkáráꞌmoheꞌ hai pohuꞌ pemoheꞌ mopálehi Iesu.

ToSaduki mekuneꞌ i Iesu kana i katueꞌna huleꞌ tomate

²³ I alo iti woꞌo, araheꞌ bahangapa toSaduki to haweꞌ i Iesu. ToSaduki iti, iamoheꞌ bahangapa tadulako agama Iahudiꞌ to tiꞌara mampoinálái tauna to mate ina rapatueꞌ huleꞌ.

²⁴ Kahaweꞌraꞌ toSaduki iti, mampeliꞌheꞌ woꞌo kamanawoꞌána Iesu, rahángáꞌá, “Guru, teukiꞌ i Paturoꞌna Musa node: ane arai tobaleilo to mate, agáiáná tiꞌara ara ánáꞌna, halaluna hangaa-ngaa mampohambokoá bembaꞌna, bona ara pemuleꞌána toámána to mate miꞌi.

²⁵ Mewaliꞌ, araheꞌ pitu topohalalu, paka tobaleilo. To towutuꞌ mampotoina hadua towawine, agáiáná hangko tiꞌara mani woia ara ánáꞌraꞌ, mate miꞌi towutuꞌ iti. Bembaꞌna napohambokoá ádina.

²⁶ Tiꞌara mani woꞌo nampakaꞌ memuleꞌ, mate miꞌi. Noꞌonoꞌ woꞌo to mewaliꞌ i katáluna duuꞌna haweꞌ i kapituna.

²⁷ Kahópóꞌána, mate miꞌi woꞌo towawine iti.

²⁸ Mewaliꞌ i alo pobutusi, ane toꞌu-toꞌu tueꞌ huleꞌ upu-upu tomate, heáná hangko i oloꞌraꞌ to pitu iti to mewaliꞌ toámána towawine iti, láwiꞌ upu-upuheꞌ mampohambokoá?”

²⁹ Nahániki Iesu, “Salaꞌ ntepuꞌu pekirimi, láwiꞌ tiꞌara niꞌisá apa to teukiꞌ i lalu Sura Magasaꞌ, hai tiꞌara woꞌo niꞌisá kuasaꞌna Pueꞌ Ala.

³⁰ Láwiꞌ ane rapatueꞌmoheꞌ huleꞌ tauna to mate, katueꞌraꞌ hibali miꞌi hai katueꞌraꞌ malaꞌeka i lalu surugáꞌ, lempóna: tiꞌarapoheꞌ mohamboko.

³¹ Tiꞌara mani paꞌi nibásá i lalu Sura Magasaꞌ laluita to mopakanótó katueꞌraꞌ huleꞌ tomate? Teukiꞌ node:

³² ‘Kódóꞌ miꞌi Pueꞌ Ala to rapenómbái oaꞌ Burahima, Isakiꞌ, hai Iako.’ Mewaliꞌ, hangko i laluitaNa Pueꞌ Ala iti, taisá ntepuꞌu Burahima, Isakiꞌ hai Iako bateꞌna tueꞌ maniheꞌ, láwiꞌ tiꞌara riꞌi tauna to mate to menómbá i Pueꞌ Ala, agáiáná bateꞌna peá tauna to tueꞌ to menómbá i Hia.”

³³ Tauna to handaꞌ mokamaleá ntepuꞌu paturoꞌna Iesu iti.

ToParisi mekuneꞌ i Iesu kana i párentá to hangaa-ngaa rapaioru

³⁴ ToSaduki iti tiꞌara piꞌi rabuku mohániki Iesu, onoꞌ miꞌi haneꞌi toParisi mogómbó wopaheꞌ {mampeliꞌheꞌ oaꞌ rárá bona mopakanawoꞌheꞌ Iesu}.

³⁵ Mewaliꞌ hadua hangko i oloꞌraꞌ guru agama mampehukáꞌ mopakanawoꞌ Iesu moliu pekuneꞌna, nauliꞌ,

³⁶ “Guru, hangko i upu-upu párentá i lalu Paturoꞌna Musa, párentá apa to hangaa-ngaa tapaioru ntepuꞌu?”

^37-38 Nahániki Iesu, “Párentá to hangaa-ngaa tapaioru ntepuꞌu ia miꞌi: ‘Nipokaꞌahiꞌ Pueꞌ Ala Pueꞌmi, i sukáꞌna kabulána lalumi, i sukáꞌna pekirimi hai i sukáꞌna kapándemi.’

³⁹ Hai párentá to karompákáꞌna to mobunduꞌ ntepuꞌu woꞌo ia miꞌi: ‘Nipokaꞌahiꞌ hángká rángámi nodo pampokaꞌahiꞌmi wátámi haduduámi.’

⁴⁰ Upu-upu Paturoꞌna Musa hai paturoꞌraꞌ nabiꞌ-nabiꞌ mentóáꞌ hangko i párentá to rompákáꞌ deꞌe.”

Iesu mekuneꞌ i toParisi heáná iti Datu Topehómpóꞌ

⁴¹ Tangaꞌraꞌ mani toParisi hirámpu ionoꞌ, Iesu mekuneꞌ i hira, Nauliꞌ,

⁴² “Mouláꞌ polámbiꞌmi: heáná iti Datu Topehómpóꞌ to nadándi Pueꞌ Ala hangkoia? Pemuleꞌána heáná?” Rahániki, “Pemuleꞌána Datu Daudiꞌ.”

⁴³ Nauliꞌ Iesu, “Mewaliꞌ, moapa riꞌi haneꞌi nauliꞌ Daudiꞌ, pemuleꞌána ia miꞌi Pueꞌ to napenómbái? Láwiꞌ hangkoia ánti peteteꞌna Inao to Magasaꞌ, Daudiꞌ mampolaluita kana i Datu Topehómpóꞌ node:

⁴⁴ Pueꞌ Ala molaluita i Pueꞌkuꞌ to kupenómbái, Nauliꞌ: ‘MehodamoKoꞌ tándáꞌ i kuánáNgkuꞌ, duuꞌna Kupopengkoruꞌheꞌ upu-upu ewáliMu i Hio.’ (Sura Petóiá 110:1)

⁴⁵ Mewaliꞌ, ane Datu Daudiꞌ manguliꞌ Datu Topehómpóꞌ Ia miꞌi Pueꞌ to napenómbái, noumbá haneꞌi Ia mewaliꞌ woꞌo pemuleꞌána Daudiꞌ?”

⁴⁶ Tiꞌara ara haweꞌ hadua to nabuku mohániki. Mantepuꞌu i alo iti, tiꞌara piꞌi woꞌo ara haweꞌ hadua to pebáiꞌ mampekuneꞌ ba apa-apa i Iesu {bona mampeliꞌ kamanawoꞌNa}.