Matiu 21 - Sura Magasaꞌ: Bahangapa sura Pototowiá to Sae hai Pototowiá to Woꞌu

Minggu to kahópóꞌána Iesu i Ierusale (21:1–27:66) Iesu mesuaꞌ i kótá Ierusale, hai ratóiá tauna to handaꞌ

¹ Hungkuꞌmoheꞌ Iesu hai topeguruNa i kótá Ierusale, haweꞌmoheꞌ i wánuá Betepage to i buluꞌ Saitu. Ionoꞌ, Iesu mohuoꞌ rodua hangko i oloꞌraꞌ topeguruNa lao moioru,

² Nahángáꞌáheꞌ, “Mesuaꞌmokou i wánuá to ina taduuꞌ deꞌe, hai ina niꞌita hambaꞌa kalide hai ánáꞌna tetakaꞌ ionoꞌ. Nikekehi haneꞌi niántiáꞌAꞌ mai.

³ Ane ara to mokóntókou, nihángáꞌáꞌáheꞌ, ‘Pueꞌ moparaluu, hai ina Napopesuleꞌá pekou deiná.’ ”

⁴ Iti mewaliꞌ bona tebukeki apa to nauliꞌ nabiꞌ hangkoia node:

⁵ “Nihángáꞌáꞌámoheꞌ tauna to toroꞌ i buluꞌ Sio i kótá Ierusale: Peita, domi maiꞌo Datumi! Ia mengkaiwóiꞌ, onoꞌ miꞌi haneꞌi Ia mosaweꞌi hambaꞌa kalide. Ia mosaweꞌi hambaꞌa kalide to maleheꞌ mani.” (Iesaia 62:11; Sakaria 9:9)

⁶ Mewaliꞌ, lao mpuꞌumoheꞌ topeguruNa to rodua iti hai rapeuláꞌi mpuꞌu miꞌi to nahángáꞌáheꞌ Iesu iti.

⁷ Kalide to ntaliánáꞌheꞌ iti raꞌántiá Iesu hai ralámpiꞌi kumbáraꞌ, haneꞌi Iesu mesaweꞌ i kalide to maleheꞌ mani.

⁸ I polumaona Iesu, handaꞌ ntepuꞌu tauna mowálá kumbáraꞌ i tangaꞌ rárá to Napelempói. Ara woꞌo to mobátáki taweꞌ to potarangke hai ratale i tangaꞌ rárá, tandaꞌ pampomahileraꞌ Iesu.

⁹ Handaꞌheꞌ woꞌo to meuláꞌ i Iesu, araheꞌ to moioru, ara maniheꞌ woꞌo to i bókóꞌ. Mohoraꞌ-horaꞌheꞌ oaꞌ, rauliꞌ: “Hosana! Tatóiá miꞌi pemuleꞌána Datu Daudiꞌ! Pueꞌ Ala mowátiꞌ Tauna to haweꞌ to mewaliꞌ HuoꞌáNa! Hai tatóiá miꞌi Pueꞌ Ala to i surugáꞌ!” (Sura Petóiá 118:25-26)

¹⁰ Pesuaꞌna Iesu i kótá Ierusale, mahewoheꞌ pueꞌ wánuá hai mombekuneꞌ-kuneꞌheꞌ, rauliꞌ, “Heáná tauna to haweꞌ iti?”

¹¹ Rahániki tauna to meuláꞌ i Hia, “Ia miꞌi deꞌe Iesu, hadua nabiꞌ to hangko i wánuá Nasare i tampoꞌ Galilea.”

Iesu mowuraheꞌ tauna to mobaluꞌ-baluꞌ i Támbina Pueꞌ Ala

¹² Roo onoꞌ, mesuaꞌ miꞌi Iesu i tangabaa Támbina Pueꞌ Ala. Ionoꞌ, Ia mowuraheꞌ upu-upu tauna to mobaluꞌ-baluꞌ. Ia modungká mejáraꞌ toposuláꞌ dóiꞌ, hai modungká woꞌo pehodaꞌáraꞌ to mampobaluꞌ tádáhi manggebodoꞌ.

¹³ Nahángáꞌáheꞌ, “I lalu Sura Magasaꞌ, Pueꞌ Ala manguliꞌ node: ‘TámbiNgkuꞌ hangaa-ngaa mewaliꞌ támbi pekakaeá.’ Agáiáná kómu, nipopewaliꞌ riꞌi támbi kahirámpuá topanako!”

¹⁴ I Támbina Pueꞌ Ala, tauna to bilo hai to paluꞌ haweꞌ i Iesu, hai Napakauriꞌheꞌ.

¹⁵ Agáiáná kapalaꞌ-kapalaꞌ tadulako menómbá hai guru-guru agama, mabukoꞌheꞌ mampeita tandaꞌ kuasaꞌ to nabábehi Iesu iti. Hai kóiꞌ inaoraꞌ mohádi ánángkóiꞌ i lalu Támbina Pueꞌ Ala to mohoraꞌ-horaꞌheꞌ manguliꞌ, “Tatóiá miꞌi pemuleꞌána Datu Daudiꞌ!”

¹⁶ Onoꞌ miꞌi haneꞌi rahángáꞌáꞌá Iesu, “Tiꞌara paꞌi Nuhádi apa to rauliꞌ ánángkóiꞌ iti?” Nahániki Iesu, “Kuhádinto. Tiꞌara mani paꞌi nibásá apa to teukiꞌ i lalu Sura Magasaꞌ to manguliꞌ: ‘Pueꞌ Ala to mopaturoꞌámoheꞌ ánángkóiꞌ hai ánáꞌlei mohuwárá laluita petóiá.’ ” (Sura Petóiá 8:3)

¹⁷ Hangko ionoꞌ, napálehimoheꞌ Iesu haneꞌi pohuꞌ hangko i Ierusale, lao hambengi i wánuá Betania.

Iesu mokambo kau ara

¹⁸ Kahalona mepulo-pulo, Iesu hai topeguruNa mesuleꞌmoheꞌ lao i Ierusale. Tempó iti woꞌo, marimi miꞌi Iesu.

¹⁹ I wiwi rárá, Ia moita hampóꞌá kau ara. Lao miꞌi i tóáꞌna mampeita ba arai wuaꞌna, agáiáná tiꞌara ara haweꞌ hambuaꞌ, taweꞌna peá to ara, {kehapiꞌ raita nodo to mowuaꞌ miꞌi}. Onoꞌ miꞌi haneꞌi Iesu mokambo kau iti, Nauliꞌ, “Mantepuꞌu alo deꞌe, tiꞌarapokoꞌ ina mowuaꞌ!” Kau ara iti kásáliu malau hai bangi.

²⁰ Karaitána topeguruNa apa to pewaliꞌ iti, rapotingkáráꞌ ntepuꞌu haneꞌi rauliꞌ, “Noumbá haneꞌi kau iti kásáliu malau hai bangi?”

²¹ Nahániki Iesu, “Bona niꞌisá: ane maróhó pepoináláimi hai tiꞌara bata-bata lalumi, peisákou woꞌo mobábehi nodo to Kubábehi i kau iti. Mogalo riꞌi buluꞌ doꞌo, peisá nipohawaꞌá, ‘Teángkáꞌmokoꞌ hai manawoꞌkoꞌ i tahiꞌ!’ hai bateꞌna ina mewaliꞌ.

²² Apa peá to nipembiáꞌ i lalu pekakaemi, ane nipoináláiꞌi, bateꞌna ina mewaliꞌ {ane hintotoꞌ hai peundeꞌána Pueꞌ Ala}.”

Tadulako agama Iahudiꞌ tiꞌaraheꞌ mampoinálái kuasaꞌna Iesu hangko i Pueꞌ Ala

²³ Roo onoꞌ, Iesu mesuaꞌ i lalu tangabaa Támbina Pueꞌ Ala hai mepaturoꞌ. TangaꞌNa mepaturoꞌ, haweꞌmoheꞌ kapalaꞌ-kapalaꞌ tadulako menómbá hai totosaeraꞌ toIahudiꞌ to ntániꞌna, mekuneꞌ i Hia, rauliꞌ, “Nuhángáꞌáꞌangkaiꞌ, heáná to moweꞌiKoꞌ kuasaꞌ {mowura topobaluꞌ-baluꞌ iamáindi hai mopaturoꞌ tauna i Támbina Pueꞌ Ala}?”

²⁴ Nahániki Iesu, “Ara woꞌo hampákáꞌ pekuneꞌKuꞌ i kómu. Ane nihánikiAꞌ, hangko Kuhángáꞌárakou kaheánána to mampoweꞌiAꞌ kuasaꞌ mobábehi upu-upuna iti.

²⁵ PekuneꞌKuꞌ node: heáná to moweꞌi kuasaꞌ i Iohane Toperiu moriu tauna? Pueꞌ Ala, ba tauna?” Molaluitamoheꞌ tadulakoraꞌ toIahudiꞌ iti hadua hai hadua, rauliꞌ, “Noumbá miꞌi katahánikina pekuneꞌNa? Ane tauliꞌi Pueꞌ Ala moweꞌi kuasaꞌna, ina Nahángáꞌákeꞌ Iesu, ‘Ane noꞌonoꞌi, moapa riꞌi haneꞌi tiꞌarakou mampoinálái apa to nauliꞌ Iohane?’

²⁶ Agáiáná ane tauliꞌi tauna peá to moweꞌi kuasaꞌna, malááꞌkeꞌ i tauna to handaꞌ, láwiꞌ handaꞌheꞌ to mampoinálái Iohane iti hadua nabiꞌ.”

²⁷ Mewaliꞌ, rahániki, “Tiꞌara kiꞌisá.” Onoꞌ miꞌi haneꞌi Iesu mohángáꞌáheꞌ huleꞌ, “Ane noꞌonoꞌi, tiꞌarakou woꞌo ina Kuhángáꞌá heáná to moweꞌiAꞌ kuasaꞌKuꞌ iti!”

Tadulako agama Iahudiꞌ rapándiriꞌ nodo hadua tobaleilo to tiꞌara mouláꞌ peundeꞌána umána

²⁸ Iesu mopaliliu laluitaNa i tadulakoraꞌ toIahudiꞌ, Nauliꞌ, “Noumbá polámbiꞌmi? Ara hadua umaꞌ, rodua ánáꞌna paka tobaleilo. Hangkani tempó, ia lao i ánáꞌna towutuꞌ nahángáꞌá, ‘Ánáꞌkuꞌ, laokoꞌ mobágóꞌ i hinoe dehangaloá.’

²⁹ Nahániki riꞌi ánáꞌna to wutuꞌ, ‘Loheaꞌ, umaꞌ!’ Agáiáná kaupuána tebáliki laluna, hai lao mobágóꞌ i hinoe.

³⁰ Hangko ionoꞌ, lao wopiꞌi umána iti i ánáꞌna to adi, nahángáꞌá, ‘Ánáꞌkuꞌ, laokoꞌ mobágóꞌ i hinoe.’ Nahániki ánáꞌna to adi iti, ‘Laontoaꞌ, umaꞌ,’ mole riꞌi tiꞌaranto lao!”

³¹ Roo onoꞌ, mekuneꞌ Iesu i tadulakoraꞌ toIahudiꞌ, Nauliꞌ, “Mewaliꞌ, hangko i ánángkóiꞌ to rodua iti, heáná to mampeuláꞌi hawaꞌna umáraꞌ?” Rahániki tadulakoraꞌ toIahudiꞌ iti, rauliꞌ, “Towutuꞌ.” Nauliꞌ Iesu, “Toꞌu pehániꞌmi. Agáiáná Kuhángáꞌáꞌákou: tauna to nirekeꞌ tauna to tiꞌara maroꞌa, to nodo toperóróꞌ ásele hai towawine to tiꞌara maroꞌa bábehiáraꞌ, mole hira riꞌi to ina natarima Pueꞌ Ala mewaliꞌ taunáNa i lalu popárentáNa, tiꞌara kómu.

³² Láwiꞌ kómu, tiꞌarakou mampoinálái laluitana Iohane Toperiu to mopaturoꞌákou rárá to manótó. Agáiáná toperóróꞌ ásele hai towawine to tiꞌara maroꞌa bábehiáraꞌ, hira riꞌi to mepoinálái {hai menosoꞌheꞌ hangko i dósáraꞌ}. Agáiáná kómu, kehapiꞌ niꞌita miꞌi pepoináláiraꞌ iti, tiꞌarantokou mampenosoꞌi bábehiámi hai tiꞌarakou woꞌo mampoinálái paturoꞌna Iohane.”

Tadulako agama Iahudiꞌ rapándiriꞌ nodo topobágóꞌ hinoe to tiꞌara mampeuláꞌi peundeꞌána pueꞌ hinoe

³³ Iesu mopaliliu wopiꞌi laluitaNa i tadulakoraꞌ toIahudiꞌ, Nauliꞌ, “Nipehádingi wopiꞌi ngkóráꞌ pándiriꞌ to ntániꞌna. Ara hadua pueꞌ hinoe to mantudaꞌ anggoroꞌ i hinoena haneꞌi nabosoꞌ mantoleli, mokae tampoꞌ popieꞌána anggoroꞌ, hai moaró woꞌo pangka pokámpáiá. Roo onoꞌ, mosaromoheꞌ bahangapa tauna bona mokámpái hinoena, haneꞌi pohuꞌ lao i tampoꞌ to karaoꞌ.

³⁴ Ina haweꞌ miꞌi tempóna mopupu wuaꞌ anggoroꞌ, ia mohuoꞌmoheꞌ bahangapa hawiꞌna lao membiáꞌ gáláꞌna hangko i topokámpái hinoena.

³⁵ Agáiáná topokámpáiheꞌ hinoe iti mohakaꞌheꞌ hawiꞌ to rahuoꞌ: hadua rapapahái, hadua ratelá watu, hai hadua rapapate.

³⁶ Onoꞌ miꞌi haneꞌi pueꞌ hinoe iti mohuoꞌ wopiꞌi hawiꞌna to ntániꞌna, to melumbuꞌ kahandaꞌraꞌ hangko i to lao rungu-runguna. Agáiáná noꞌonoꞌ-onoꞌ peá rabábehi.

³⁷ Kaupuána, ánáꞌna miꞌi haduduána to nahuoꞌ lao i topokámpái hinoena. Nauliꞌ pueꞌ hinoe i laluna, ‘Bateꞌna ina mengkoruꞌheꞌ láwiꞌ ánáꞌkuꞌ miꞌi haduduángkuꞌ.’

³⁸ Agáiáná, i tempóraꞌ topokámpái hinoe moita ánáꞌna iti, mogómbó wopaheꞌ, rauliꞌ, ‘Peita! Louꞌ mai ánáꞌna, ia to ina mewaliꞌ pueꞌ sosora hinoe deꞌe. Maroꞌa ane tapapate woꞌo, haneꞌi taꞌala hinoena hai upu-upu óntóꞌna.’

³⁹ Mewaliꞌ, rahakaꞌ mpuꞌu miꞌi ánáꞌna iti, radiiꞌ lao i rawa hinoe haneꞌi rapapate.”

⁴⁰ Roo onoꞌ, napekuneꞌ Iesu, “Mewaliꞌ, ane mesuleꞌ huleꞌ pueꞌ hinoe, apa to ina nabábehi i topokámpái hinoena?”

⁴¹ Rahániki, “Manótó ia ina mopapate tauna to kadake iti, hai hinoena ina nasaroáheꞌ tauna ntániꞌna to moundeꞌ mampeweꞌi gáláꞌna i hia i tempó mopupu wuaꞌ anggoroꞌ.”

⁴² Nahángáꞌáheꞌ Iesu, “Tiꞌara mani paꞌi nibásá apa to teukiꞌ i lalu Sura Magasaꞌ to manguliꞌ node: ‘Watu to ratibe topoaró támbi, watu iti riꞌi to mewaliꞌ pehodaꞌá támbi. Iti mewaliꞌ hintotoꞌ hai peundeꞌána Pueꞌ Ala, hai maroꞌa ntepuꞌu apa to nabábehi Pueꞌ Ala iti.’ ” (Sura Petóiá 118:22-23)

⁴³ Nauliꞌ wopiꞌi Iesu, “Kuhángáꞌáꞌákou: tiꞌarakou woꞌo ina natarima Pueꞌ Ala mewaliꞌ taunáNa. Gáláꞌmi i lalu popárentána Pueꞌ Ala ina raꞌala hangko i kómu hai raweꞌiheꞌ tauna ntániꞌna to toꞌu-toꞌu mampeuláꞌi peundeꞌána Pueꞌ Ala. [

⁴⁴ Heáná to manawoꞌ i watu iti ina marugiꞌ, hai heáná to nadumpingi watu iti ina mate.”] {Noꞌonoꞌ woꞌo, heáná to mosápuáka tauna to rapándiriꞌ nodo watu iti, ina molámbiꞌ pehukuna Pueꞌ Ala.}

⁴⁵ Karahádina kapalaꞌ-kapalaꞌ tadulako menómbá hai toParisi ngkóráꞌ pándiriꞌ to napahaweꞌ Iesu, raisá kahirana to Natunggái hai laluitaNa iti.

⁴⁶ Onoꞌ miꞌi haneꞌi rapoinao mohakaꞌ Iesu, agáiáná tiꞌaraheꞌ pebáiꞌ láwiꞌ mampokalááꞌheꞌ tauna to handaꞌ, láwiꞌ tauna to handaꞌ mampoinálái kaꞌIesuna miꞌi hadua nabiꞌ.