Matiu 20 - Sura Magasaꞌ: Bahangapa sura Pototowiá to Sae hai Pototowiá to Woꞌu

Ngkóráꞌ pándiriꞌ kana i topobágóꞌ hinoe

^1-2 Nauliꞌ Iesu, “Ane Pueꞌ Ala moháwángi pobágóꞌraꞌ upu-upu taunáNa i alo to ina haweꞌ, kaNabábehina nodo ngkóráꞌ pándiriꞌ deꞌe: Hadua pueꞌ hinoe anggoroꞌ lao mampeliꞌ tauna to moundeꞌ mobágóꞌ i hinoena. Mepulo-pulo nalámbiꞌheꞌ bahangapa tauna, hai nahángáꞌáheꞌ, ‘Laomokou mobágóꞌ i hinoengkuꞌ, hai ina kuweꞌikou saromi hadua-hadua nodo to biásá i tauna to mobágóꞌ hangaloá, ia miꞌi hampepaꞌ dóiꞌ peráꞌ.’ Rapokana miꞌi laluitana iti, haneꞌi lao mpuꞌumoheꞌ.

³ Tintiꞌ hahioꞌ mepulo, lao wopiꞌi pueꞌ hinoe mampeliꞌ to ntániꞌna. Naita bahangapa tauna mehoda-hoda peheꞌ i pobaluꞌ-baluꞌá,

⁴ nahángáꞌáheꞌ, ‘Laomokou mobágóꞌ i hinoengkuꞌ. Ina kuweꞌintokou saromi to hintotoꞌ hai pobágóꞌmi.’ Lao mpuꞌumoheꞌ.

⁵ Kalialo miꞌi, lao wopiꞌi pueꞌ hinoe iti mampeliꞌ tauna. Nahángáꞌáheꞌ, ‘Laomokou mobágóꞌ i hinoengkuꞌ.’ Noꞌonoꞌ woꞌo to nabábehi tintiꞌ tálu kalumbaꞌ.

⁶ Tintiꞌ lima miꞌi kalumbaꞌ, nalámbiꞌ wopiꞌi tauna to mehoda-hoda, nakuneꞌheꞌ, ‘Moapa riꞌi haneꞌi mehoda-hoda pekou hangaloá? Tiꞌarantokou mobágóꞌ?’

⁷ Rahániki, ‘Tiꞌara ara to mampopobágóꞌangkaiꞌ.’ Nauliꞌ pueꞌ hinoe iti, ‘Ane noꞌonoꞌi, laomokou mobágóꞌ i hinoengkuꞌ.’ Lao mpuꞌumoheꞌ mobágóꞌ.

⁸ Támpu miꞌi alo, nauliꞌ miꞌi pueꞌ hinoe i mandorona, ‘Nukióꞌmoheꞌ topobágóꞌ iti, hai nuweꞌimoheꞌ saroraꞌ. Nuweꞌiheꞌ sieruꞌ saroraꞌ tauna to mantepuꞌu mobágóꞌ hangko i tintiꞌ lima ininá. Roo onoꞌ, nuweꞌiheꞌ woꞌo saroraꞌ tauna to mantepuꞌu mobágóꞌ tintiꞌ tálu. Nubábehi noꞌonoꞌ duuꞌna haweꞌ i tauna to mobágóꞌ mantepuꞌu mepulo.’

⁹ Haweꞌ mpuꞌumoheꞌ to mobágóꞌ mantepuꞌu tintiꞌ lima kalumbaꞌ. Molámbiꞌheꞌ saroraꞌ hadua-hadua hampepaꞌ dóiꞌ peráꞌ.

¹⁰ Noꞌonoꞌ oaꞌ kanabábehina duuꞌna haweꞌ i topobágóꞌ to mantepuꞌu mepulo. Topobágóꞌ to mantepuꞌu mepulo-pulo iti manguliꞌ i laluraꞌ, ‘Manótó hangaa-ngaa melábi to ina naweꞌikeꞌ, láwiꞌ hangaloákeꞌ mobágóꞌ!’ Agáiáná to raweꞌiheꞌ woꞌo hampepaꞌ peá dóiꞌ peráꞌ.

¹¹ I polámbiꞌraꞌ saroraꞌ iti, mohume-humeheꞌ pueꞌ hinoe, rauliꞌ,

¹² ‘To haweꞌ i bókóꞌ, mobágóꞌheꞌ hajaa peá. Agáiáná kaiꞌ, mobágóꞌangkaiꞌ hangaloá hai nahimbaꞌiangkaiꞌ alo to mahárá. Moapa riꞌi haneꞌi nupahibali peá baiaringkiꞌ hai hira?’

¹³ Nahániki pueꞌ hinoe iti, ‘Ale, tiꞌaraꞌaꞌ masalaꞌ i kómu. Tiꞌara paꞌi kudándi iamepulo ina molámbiꞌkou saromi hampepaꞌ dóiꞌ peráꞌ to biásá ane tauna mobágóꞌ hangaloá?

¹⁴ Niala miꞌi saromi hai pohuꞌmokou! Kakuꞌundeꞌnamonto mopahibali saroraꞌ tauna to haweꞌ i bókóꞌ hai kómu.

¹⁵ Ane kuꞌuláꞌ peundeꞌángkuꞌ mampopobunduꞌ dóiꞌkuꞌ, moapa riꞌi haneꞌi nipokóiꞌ inao ane kuꞌundeꞌ mopahibali saroraꞌ tauna to haweꞌ i bókóꞌ hai kómu? Moapa riꞌi haneꞌi mahiniꞌkou i tauna ntániꞌna ane maroꞌa lalungkuꞌ i hira?’ ”

¹⁶ Napahópóꞌ Iesu ngkóráꞌ pándiriꞌ iti, Nauliꞌ, “Noꞌonoꞌ woꞌo i alo pobutusi: handaꞌ tauna to tepaibókóka tueꞌraꞌ tempó deꞌe ina mewaliꞌ tepaioruá i alo to ina haweꞌ. Hai handaꞌ woꞌo tauna to tepaioruá tueꞌraꞌ tempó deꞌe ina mewaliꞌ tepaibókóka i alo to ina haweꞌ.”

Iesu mampopaisá wopiꞌi kaꞌina mateNa

¹⁷ I tempóna Iesu molumao lao i kótá Ierusale, topeguruNa to hampuloꞌ hai rodua meuláꞌheꞌ woꞌo i Hia. Nakióꞌmoheꞌ mopataniꞌ, haneꞌiheꞌ Nahángáꞌá,

¹⁸ “Nipehádingi maroꞌa! Deꞌe-deꞌe, tangaꞌtaꞌ lao i Ierusale. Ionoꞌ miꞌi Ánáꞌ Mánusiá ina rahuhuꞌ i kapalaꞌ-kapalaꞌ tadulako menómbá hai guru-guru agama, hai ina rabutusi bona rahuku mate.

¹⁹ Roo onoꞌ, Ánáꞌ Mánusiá ina rahuhuꞌ i tauna to tiꞌaraheꞌ toIahudiꞌ bona rasasalaꞌi, rahepe hai gulaꞌ, hai kahópóꞌána ina rapapate i kau mombehape. Agáiáná i katáluna alona, Ia ina tueꞌ huleꞌ.”

Tauna to mengkaiwóiꞌ, hira miꞌi to i reá tueꞌraꞌ i peitána Pueꞌ Ala

²⁰ I tempó iti, toinána Sebedeu hai ánáꞌna rodua laoheꞌ i Iesu. Ináraꞌ Iakobu hai Iohane iti molingkudu motóngkóꞌ i bitiNa láwiꞌ ara to ina napembiáꞌ.

²¹ Nakuneꞌ Iesu, “Apa to nupoinao Kubábehi i hio?” Nahániki ináraꞌ Iakobu hai Iohane iti, nauliꞌ, “Kupembiáꞌ bona ane mewaliꞌKoꞌ Datu, ánáꞌkuꞌ to rodua deꞌe ina mehoda mepárentá hingkakani hai Io, hadua tándáꞌ i kuánáMu, hadua tándáꞌ i kabeoꞌMu.”

²² Agáiáná Iesu mohángáꞌá Iakobu hai Iohane, Nauliꞌ, “Kómu, tiꞌara niꞌisá apa to nipembiáꞌ. Nibuku paꞌi mantódihá kapári to hangaa-ngaa Kutódihá?” Rahániki, “Kibuku!”

²³ Nauliꞌ wopiꞌi Iesu, “Toꞌu, hangaa-ngaa nitódihá kapári nodo to ina Kutódihá. Agáiáná tiꞌara Kódóꞌ to mopakanótó heáná to ina mehoda tándáꞌ i kuánáNgkuꞌ hai heáná tándáꞌ i kabeoꞌKuꞌ, bateꞌna peá UmáNgkuꞌ to mopakanótó.”

²⁴ I karahádina peá to hampuloꞌ pembiáꞌraꞌ Iakobu hai Iohane iti, mabukoꞌheꞌ,

²⁵ onoꞌ miꞌi haneꞌi Iesu mokióꞌ upu-upu topeguruNa, Nahángáꞌáheꞌ, “Niꞌisánto tauna to tiꞌara moisá Pueꞌ Ala masodoheꞌ ane mopárentá tauna, hai tauna to mapángkáꞌ lántiꞌraꞌ iti pakaheꞌ mopasimbuku tauna, bona mampeuláꞌiheꞌ hawaꞌraꞌ.

²⁶ Agáiáná kómu, ineeꞌkou noꞌonoꞌ. Heáná to mampoinao bona i reá tueꞌna, hangaa-ngaa mewaliꞌ sieruꞌ hadua topekádipurá.

²⁷ Hai heáná to mampoinao bona tepaioruá, hangaa-ngaa mewaliꞌ sieruꞌ nodo hadua hawiꞌ.

²⁸ Hangaa-ngaa nipeuláꞌi pambiárána Ánáꞌ Mánusiá, láwiꞌ tunggáiáNa mai i duniáꞌ deꞌe tiꞌara bona mewaliꞌ topohawaꞌ, ngkáliꞌna riꞌi bona mewaliꞌ hawiꞌ, hai ina mohuhuꞌ wátáNa rapapate bona handaꞌ tauna peisá Nahómpóki hangko i huku dósáraꞌ.”

Iesu mopakauriꞌ rodua tobilo

²⁹ Kapohuꞌraꞌ Iesu hai topeguruNa hangko i kótá Ieriko, handaꞌ tauna meuláꞌ i Hia.

³⁰ I polumaoraꞌ, araheꞌ rodua tobilo to mehoda i wiwi rárá. Karaisána peá kaꞌIesuna to melempó, meraruaꞌheꞌ, rauliꞌ, “Pueꞌ, pemuleꞌána Datu Daudiꞌ! Nupokaꞌahiꞌangkaiꞌ!”

³¹ Handaꞌ tauna mokabukoꞌiheꞌ, rauliꞌ, “Maniiꞌkou!” Agáiáná tobilo iti mekióꞌ-kióꞌ peheꞌ rapasimbuku, rauliꞌ, “Pueꞌ, pemuleꞌána Datu Daudiꞌ! Nupokaꞌahiꞌ wongkaiꞌkaa!”

³² Mengkaroo mpuꞌu miꞌi Iesu, Nakióꞌheꞌ, haneꞌi Napekuneꞌ, “Apa to niundeꞌ Kubábehi i kómu?”

³³ Rahániki, “Pueꞌ, kiundeꞌ ntepuꞌu meita!”

³⁴ Maꞌahiꞌ laluna Iesu i hira, haneꞌi Nakamaꞌ mátáraꞌ. Kásáliu meitaheꞌ, hai meuláꞌheꞌ i Hia.