Matiu 2 - Sura Magasaꞌ: Bahangapa sura Pototowiá to Sae hai Pototowiá to Woꞌu

Tomata Alo mampeliꞌ Iesu

¹ Iesu rapoánáka i wánuá Beteleme i tampoꞌ Iudá, i tempóna Datu Herode Mahile mepárentá. Tempó iti, araheꞌ bahangapa tauna to haweꞌ i kótá Ierusale hangko i tampoꞌ to karaoꞌ tándáꞌ i mata alo. Tomata Alo iti moisá ntepuꞌuheꞌ mampeita tandaꞌ i betue.

² Mekuneꞌ-kuneꞌheꞌ i tauna to toroꞌ i Ierusale, rauliꞌ, “Iumbá Ánángkóiꞌ to hangko mesupaꞌ, to ina mewaliꞌ daturaꞌ toIahudiꞌ? Kiꞌita miꞌi betue tándáꞌ i mata alo to mopakanótó kamesupaꞌna miꞌi Ánángkóiꞌ iti. Onoꞌ miꞌi haneꞌi maiangkaiꞌ, láwiꞌ kipoinao menómbá i Hia.”

³ I kanahádina peá Datu Herode bámbári iti, napokalááꞌ, noꞌonoꞌ woꞌo upu-upu tauna to i Ierusale.

⁴ Hangko ionoꞌ, ia mokióꞌ upu-upu kapalaꞌ tadulako menómbá hai guru-guru agama Iahudiꞌ, bona hirámpuheꞌ. Kahirámpuraꞌ, mekuneꞌ miꞌi Datu Herode i hira, nauliꞌ, “Ambiꞌ iumbá karapoánákaꞌána Datu Topehómpóꞌ to nadándi Pueꞌ Ala hangkoia?”

⁵ Mehániꞌheꞌ, rauliꞌ, “I wánuá Beteleme i tampoꞌ Iudá, láwiꞌ ara miꞌi laluitana Pueꞌ to naukiꞌ nabiꞌ Mika hangkoia, to manguliꞌ node:

⁶ ‘Wánuá Beteleme i tampoꞌ Iudá, tiꞌarapokoꞌ ina rauliꞌ wánuá to tepakóika hangko i oloꞌna upu-upu wánuá to ara i tampoꞌ Iudá, láwiꞌ hangko i hio ina mesupaꞌ hadua Tadulako Mahile to ina mokádipurá taunáNgkuꞌ toSáráeliꞌ.’ ” (Mika 5:2)

⁷ I kanahádina peá Herode, nahuoꞌmoheꞌ taunána lao mokióꞌ Tomata Alo bona tiꞌara raisá tauna ntániꞌna. Nakuneꞌheꞌ impirá katoꞌuána betue iti mantepuꞌu mesupaꞌ.

⁸ Rooheꞌ mehániꞌ, nahuoꞌmoheꞌ lao i Beteleme, nauliꞌ, “Nipeliꞌ mpiiꞌ Ánángkóiꞌ iti. Ane nilámbiꞌi, maiaꞌ nihángáꞌá, bona laoaꞌ woꞌo menómbá i Hia.”

^9-10 Lao mpuꞌumoheꞌ. I tangaꞌ rárá, góeꞌ ntepuꞌuheꞌ moita wopiꞌi betue to raita iaꞌo tándáꞌ i mata alo. Betue iti mampoioruáheꞌ duuꞌna haweꞌ i wongko katoroꞌána Ánángkóiꞌ iti.

¹¹ Kahaweꞌraꞌ, mesuaꞌheꞌ i lalu támbi. Kamoitáraꞌ Ánángkóiꞌ iti hai Maria inána, liliuheꞌ molingkudu motóngkóꞌ haweꞌ i tampoꞌ menómbá i Ánángkóiꞌ iti. Roo onoꞌ, mobungkáhimoheꞌ inántiraꞌ haneꞌi mohuhuꞌheꞌ popenómbáraꞌ i Hia. Popenómbáraꞌ iti ia miꞌi buláwá, dupaꞌ hai mire.

¹² Roo onoꞌ, napaingáꞌimoheꞌ Pueꞌ Ala moliu patururaꞌ bona ineeꞌmoheꞌ mesuleꞌ lao i Datu Herode. Onoꞌ miꞌi haneꞌi tiꞌarapoheꞌ lao huleꞌ i Ierusale, agáiáná mesuleꞌheꞌ lao i tampoꞌraꞌ mouláꞌ rárá to ntániꞌna.

Iusupu moánti Maria hai Iesu lao i tampoꞌ Másiriꞌ

¹³ Kapesuleꞌraꞌ Tomata Alo, mampatongawaꞌ wopiꞌi malaꞌekana Pueꞌ i Iusupu moliu paturuna. Nauliꞌ malaꞌeka iti, “Iusupu! Herode ina mampeliꞌ Ánángkóiꞌ iti láwiꞌ napoinao napapate. Mearómokoꞌ, nuánti miꞌi Ánángkóiꞌ iti hai inána lao i tampoꞌ Másiriꞌ! Toroꞌmokou sieruꞌ ionoꞌ duuꞌna molaluita wopaꞌAꞌ i kómu.”

¹⁴ Káindi iti woꞌo, mearó mpuꞌu miꞌi Iusupu, moánti Iesu hai ináNa lao i tampoꞌ Másiriꞌ.

¹⁵ Toroꞌheꞌ ionoꞌ duuꞌna Datu Herode mate. Upu-upuna iti mewaliꞌ bona tepabukeꞌi miꞌi Ngkóráꞌna Pueꞌ to napahaweꞌ nabiꞌ Hosea hangkoia, to manguliꞌ node: “Hangko i tampoꞌ Másiriꞌ, ÁnáꞌKuꞌ Kukióꞌ mai.”

Ánángkóiꞌ i Beteleme rapapate

¹⁶ Kanaisána peá Datu Herode Mahile karaꞌákálángina Tomata Alo, rumihi ntepuꞌu kamabukoꞌna, onoꞌ miꞌi haneꞌi ia mampohawaꞌáheꞌ surudadoꞌna lao mopapate upu-upu ánángkóiꞌ tobaleilo to rompare tinuwuꞌna haweꞌ-haweꞌ i ánáꞌmpálei, to i Beteleme hai i wánuá-wánuá to hungkuꞌ ionoꞌ, bona Ánángkóiꞌ to ina mewaliꞌ Datu iti ina kana woꞌo rapahipapate. Nabábehi noꞌonoꞌ láwiꞌ napekuneꞌ miꞌi i Tomata Alo, onoꞌ miꞌi haneꞌi naisá ntepuꞌu impirá pesupaꞌána betue iti.

¹⁷ {Handaꞌ pueꞌ wánuá Beteleme moteriahi ánáꞌraꞌ to rapapate surudadoꞌna Herode.} Onoꞌ haneꞌi tebukeki miꞌi laluitana nabiꞌ Ieremia hangkoia {mokana wánuá Rama to hungkuꞌ i wánuá Beteleme}, to manguliꞌ node:

¹⁸ “I wánuá Rama tehádi toteriaꞌ hai topetatangi. Raheli moteriahi ánáꞌnaheꞌ láwiꞌ tiꞌarapoheꞌ ara, onoꞌ miꞌi haneꞌi tiꞌara mau rapalindó.” (Ieremia 31:15)

Iusupu moánti Maria hai Iesu mesuleꞌ hangko i tampoꞌ Másiriꞌ

¹⁹ Tangaꞌraꞌ mani Iusupu, Maria hai Iesu i tampoꞌ Másiriꞌ, mate miꞌi Datu Herode. Roo onoꞌ, haweꞌ wopiꞌi malaꞌekana Pueꞌ i Iusupu moliu paturuna.

²⁰ Nauliꞌ malaꞌeka iti, “Tauna to mampoinao mopapate Ánángkóiꞌ iti mate miꞌi. Mewaliꞌ mearómokoꞌ, nuánti miꞌi Ánángkóiꞌ iti hai ináNa mesuleꞌ lao i tampoꞌ Sáráeliꞌ.”

²¹ Liliu mearó Iusupu, moánti Ánángkóiꞌ iti hai ináNa mesuleꞌ lao i tampoꞌraꞌ toSáráeliꞌ.

²² Agáiáná i kanahádina Iusupu, Akelau ánáꞌna Herode Mahile mopaháwángi miꞌi umána mewaliꞌ datu i tampoꞌ Iudá, malááꞌ Iusupu mesuleꞌ lao ionoꞌ. Ánti kanapatuntuna wopiꞌi Pueꞌ Iusupu iti moliu paturuna, hangaa-ngaa laoheꞌ toroꞌ i tampoꞌ Galilea, onoꞌ miꞌi haneꞌi laoheꞌ ionoꞌ,

²³ hai toroꞌheꞌ i wánuá Nasare. Mewaliꞌ tepabukeꞌi miꞌi laluitaraꞌ nabiꞌ hangkoia kana i Datu Topehómpóꞌ, to manguliꞌ node: “Ia ina rauliꞌ toNasare.”