Matiu 19 - Sura Magasaꞌ: Bahangapa sura Pototowiá to Sae hai Pototowiá to Woꞌu

Bágóꞌna Iesu i tampoꞌ Iudá hai Perea (19:1–20:34) Iesu mampolaluita áturá pogááꞌ i lalu pohamboko

¹ Karoona Iesu mopahaweꞌ upu-upuna iti, pohuꞌ miꞌi hangko i tampoꞌ Galilea lao i tampoꞌ Iudá to tándáꞌ i hambali uwai Iarade.

² Handaꞌ tauna meuláꞌheꞌ woꞌo i Hia, hai to maduꞌa Napakauriꞌheꞌ.

³ Araheꞌ bahangapa toParisi to lao woꞌo bona mampeliꞌ peheꞌ kamanawoꞌána Iesu. Mekuneꞌheꞌ i Hia, rauliꞌ, “Mouláꞌ áturá ágámántaꞌ, ba peisá paꞌi tobaleilo mampogááka toinána, kehapiꞌ apa peá ntóáꞌna?”

⁴ Nahániki Iesu, “Tiꞌara paꞌi nibásá apa to teukiꞌ i lalu Sura Magasaꞌ? Rungu-runguna Pueꞌ Ala mampopewaliꞌ tauna, Ia mampopewaliꞌheꞌ tobaleilo hai towawine.

⁵ Roo onoꞌ, mongkóráꞌ miꞌi, Nauliꞌ, ‘Tobaleilo hangaa-ngaa mopálehi umána hai inána, haneꞌi tueꞌ hingkakani hai toinána, bona to rodua iti mewaliꞌheꞌ hawátá-wátá.’

⁶ Mewaliꞌ i peitána Pueꞌ Ala, tiꞌarapoheꞌ rodua, agáiáná mewaliꞌmoheꞌ nodo to hadua. Onoꞌ miꞌi haneꞌi Kuhángáꞌáꞌákou: heáná to napahintuwuꞌ miꞌi Pueꞌ Ala, tiꞌara mpuꞌu peisá napopogááꞌ tauna.”

⁷ Mekuneꞌheꞌ huleꞌ toParisi, “Ane noꞌonoꞌi, moapa riꞌi haneꞌi Musa mopakanótó bona tobaleilo to mampoinao mampogááka toinána hangaa-ngaa mampeweꞌi sura pogááꞌ?”

⁸ Nahániki Iesu, “Ánti kamatuꞌana lalumi haneꞌi Musa mopaliu tauna mogááꞌ. Agáiáná katoꞌuána, hangko i rungu-runguna tiꞌara noꞌonoꞌ.

⁹ Bona niꞌisá: hambuaꞌ peá álásá mogááꞌ, ia miꞌi ane toinána mebualosi. Heáná tauna to mampogááka toinána hai mampotoina towawine to ntániꞌna, ia woꞌo mebualosi.”

¹⁰ Hangko ionoꞌ, topeguruNa mohángáꞌáheꞌ Iesu, “Ane noꞌonoꞌi kamatimina áturá pohamboko, rángina miꞌi ineeꞌkeꞌ mohamboko.”

¹¹ Nahánikiheꞌ Iesu, “Tiꞌara upu-upu tauna to peisá motarima laluita iti. Agáiáná ara tauna to napakanótó Pueꞌ Ala bona tiꞌaraheꞌ mohamboko.

¹² Rápáꞌna, ara tauna to tiꞌara peisá mohamboko láwiꞌ noꞌonoꞌ miꞌi powátána hangko i karapoánákana. Ara woꞌo to tiꞌara mohamboko ánti kaꞌárána bábehiána tauna i wátána. Ara woꞌo to tiꞌara mohamboko ánti peundeꞌána haduduána, bona nampakaꞌ mampopolumao bágóꞌna Pueꞌ Ala. Heáná to peisá motarima paturoꞌ deꞌe, maroꞌa ane napeuláꞌi.”

Iesu mowátiꞌ ánángkóiꞌ

¹³ Hangkani tempó, araheꞌ tauna lao moánti ánáꞌraꞌ i Iesu bona Napekamaꞌheꞌ hai Napekakaeáheꞌ. Tauna iti rakabukoꞌiheꞌ topeguruNa,

¹⁴ agáiáná nauliꞌ Iesu, “Nipatodáhimoheꞌ ánángkóiꞌ mai i Kódóꞌ. Ineeꞌheꞌ nikóntó, láwiꞌ tauna to nodo ánángkóiꞌ deꞌe ina mewaliꞌheꞌ taunána Pueꞌ Ala i lalu popárentáNa.”

¹⁵ Nakamaꞌmoheꞌ ánángkóiꞌ iti, haneꞌiheꞌ Nawátiꞌ. Roo onoꞌ, pohuꞌ miꞌi hangko ionoꞌ.

Maꞌángkárá tauna to pebuku mewaliꞌ taunána Pueꞌ Ala

¹⁶ Hangkani tempó, ara hadua tobaleilo to lao i Iesu mekuneꞌ, nauliꞌ, “Guru, bábehiá apa to maroꞌa to hangaa-ngaa kubábehi bona molámbiꞌaꞌ katueꞌ to maroꞌa to tiꞌara mokahópóꞌá?”

¹⁷ Nauliꞌ Iesu, “Moapa riꞌi haneꞌi nupekuneꞌ kana i apa to maroꞌa? Tiꞌara ara ntániꞌna to maroꞌa, bateꞌna peá Pueꞌ Ala. Agáiáná ina Kuhániki pekuneꞌmu. Ane mampoinaokoꞌ molámbiꞌ katueꞌ to maroꞌa to tiꞌara mokahópóꞌá, hangaa-ngaa nupeuláꞌi hawaꞌna Pueꞌ Ala.”

¹⁸ Mekuneꞌ wopiꞌi tauna iti, “Hawaꞌ to noumbá?” Nahániki Iesu, “Ineeꞌ mepapate, ineeꞌ mebualosi, ineeꞌ manako, ineeꞌ mosabiki dongkoꞌ,

¹⁹ nubiláꞌ inámu hai umámu, hai nupokaꞌahiꞌ hángká rángámu nodokoꞌ mampokaꞌahiꞌ wátámu haduduámu.”

²⁰ Nauliꞌ ánáꞌntomoane iti, “Upu-upu hawaꞌ iti, kupeuláꞌi miꞌi. Apa mani to hangaa-ngaa kubábehi?”

²¹ Nahániki Iesu, “Ane toꞌu-toꞌu mpuꞌu i lalumu nupoinao mampeuláꞌi upu-upu peundeꞌána Pueꞌ Ala, laomokoꞌ sieruꞌ mampobaluꞌ párewámu, hai dóiꞌ hólóna nugáláꞌ-gáláꞌáheꞌ tauna to meahiahiꞌ tueꞌraꞌ. Ane nubábehiꞌi noꞌonoꞌ, ina mahile háwángina to nulámbiꞌ i lalu surugáꞌ. Roo onoꞌ, maimokoꞌ meuláꞌ i Kódóꞌ.”

²² Kanahádina ánáꞌntomoane iti laluitana Iesu, masusa laluna hai pohuꞌ miꞌi, láwiꞌ handaꞌ ntepuꞌu tampoꞌna hai párewána.

²³ Onoꞌ miꞌi haneꞌi nauliꞌ Iesu i topeguruNa, “Nipehádingi maroꞌa apa to Kuhángáꞌáꞌákou: maꞌángkárá ntepuꞌu tauna to pebuku mewaliꞌ taunána Pueꞌ Ala i lalu popárentáNa.

²⁴ Kuhángáꞌá wopakou: madoli mani hambaꞌa untá mesuaꞌ i lalu kalolu daru haneꞌi topebuku mewaliꞌ taunána Pueꞌ Ala i lalu popárentáNa.”

²⁵ I karahádina topeguruNa laluitana Iesu, rapotingkáráꞌ ntepuꞌu {láwiꞌ rapekiri topebuku nawátiꞌ Pueꞌ Ala}, onoꞌ miꞌi haneꞌi rauliꞌ, “Ee, ane noꞌonoꞌi, heáná paꞌi to nabuku molámbiꞌ katueꞌ to maroꞌa to tiꞌara mokahópóꞌá?”

²⁶ Natótóiheꞌ Iesu hai Nahángáꞌáheꞌ, “Tiꞌara ara to peisá nabábehi tauna bona mewaliꞌheꞌ taunána Pueꞌ Ala. Agáiáná Pueꞌ Ala peá to peisá mohómpóki dósá tauna. Peisá mewaliꞌ, láwiꞌ tiꞌara ara to tiꞌara Nabuku Nabábehi.”

²⁷ Onoꞌ miꞌi haneꞌi nauliꞌ Peturuꞌ i Iesu, “Noumbámongkaiꞌ? Kipálehi miꞌi hinángkáꞌna bona meuláꞌangkaiꞌ i Hio. Apa to ina kilámbiꞌ?”

²⁸ Nahánikiheꞌ Iesu, “Bona niꞌisá: i alo pobutusi i tempóna Pueꞌ Ala mopawoꞌu upu-upu to ara, Ánáꞌ Mánusiá ina mehoda i pehodaꞌá kadatuáNa to meawaꞌ hai ina mepárentá. I tempó iti, kómu to meuláꞌ i Kódóꞌ ina mehodakou woꞌo i pehodaꞌá kadatuá to hampuloꞌ hai rombuaꞌ, mopárentá toSáráeliꞌ to hampuloꞌ hai rontina.

²⁹ Heáná peá to mopálehi halaluna, inána ba umána, ánáꞌna ba támbina ba hinoena ánti peuláꞌna i Kódóꞌ, bateꞌna ina molámbiꞌ háwángina to handaꞌ kánina hangko i apa to napálehi, hai ina molámbiꞌ woꞌo katueꞌ to maroꞌa to tiꞌara mokahópóꞌá.

³⁰ Agáiáná handaꞌ tauna to tepaioruá miꞌi tueꞌraꞌ deꞌe-deꞌe ina mewaliꞌheꞌ tepaibókóka i alo to ina haweꞌ. Hai handaꞌ woꞌo tauna to tepaibókóka tueꞌraꞌ deꞌe-deꞌe ina mewaliꞌheꞌ tepaioruá i alo to ina haweꞌ.”