Matiu 16 - Sura Magasaꞌ: Bahangapa sura Pototowiá to Sae hai Pototowiá to Woꞌu

ToParisi hai toSaduki membiáꞌ bona Iesu mobábehi tandaꞌ kuasaꞌ

¹ Hangko ionoꞌ, bahangapaheꞌ toParisi hai toSaduki haweꞌ i Iesu mampeliꞌheꞌ kamanawoꞌáNa. Rapembiáꞌ i Iesu, rauliꞌ, “Nupopaitaꞌangkaiꞌ tandaꞌ kuasaꞌ bona tongawaꞌ ntepuꞌu kahangko i Pueꞌ AlaMu.”

² Nahánikiheꞌ Iesu, “Ane mesibuburaꞌi kalumbaꞌ, niuliꞌ, ‘Ina magasaꞌ rawana.’

³ Hai ane mesibuburaꞌi mepulo hai móngkó alona, niuliꞌ, ‘Ina keudá.’ Niꞌisá miꞌi mampetándái rawa, agáiáná tiꞌara niꞌisá mampetándái apa to nabábehi Pueꞌ Ala i tempó deꞌe.

⁴ Kadake ntepuꞌukou! Mosápuáka pekou oaꞌ Pueꞌ Ala! Nipembiáꞌ bona Kupopaitaꞌákou tandaꞌ kuasaꞌ, agáiáná tiꞌara ara tandaꞌ kuasaꞌ to ina Kupopaitaꞌákou, bateꞌna peá tandaꞌ to mewaliꞌ i nabiꞌ Iunu hangkoia.” Roo onoꞌ, pohuꞌ miꞌi Iesu mopálehiheꞌ.

Paturoꞌraꞌ toParisi hai toSaduki rapándiriꞌ nodo ragiꞌ

⁵ Iesu hai topeguruNa laomoheꞌ mengkalimba i rano Galilea, agáiáná topeguruNa mokáláliꞌáheꞌ moánti bokuraꞌ.

⁶ I tempó iti, Iesu mohángáꞌáheꞌ node: “Maroꞌa-roꞌakou, hai maingáꞌ-ingáꞌkou i ragiꞌraꞌ toParisi hai toSaduki!”

⁷ Agáiáná mombekuwi-kuwimoheꞌ hadua hai hadua, rauliꞌ, “Tiꞌara tabuhinao moánti mai rótiꞌ.” Rauliꞌ noꞌonoꞌ láwiꞌ tiꞌara mani raisá tunggáiána laluitana Iesu iti.

⁸ Agáiáná naisá Iesu apa to rauliꞌ, onoꞌ miꞌi haneꞌi Nahángáꞌáheꞌ, “Moapa riꞌi haneꞌi nipolaluita katiꞌárámi moánti rótiꞌ? Tiꞌara iti to Kutunggái. Makuraꞌ mani pepoináláimi!

⁹ Tiꞌara mani paꞌi niꞌisá lempóna apa to Kubábehi i tauna to handaꞌ. Tiꞌara paꞌi nibuhinao rótiꞌ to lima peá wuaꞌna to Kupakeꞌ mopaꞌandeꞌheꞌ tauna to lima sábuna? Hangapa mani kárándina pelábiána to nirámpu?

¹⁰ Noumbá woꞌo hai rótiꞌ to pitu wuaꞌna to Kupakeꞌ mopaꞌandeꞌheꞌ tauna to iba sábuna? Hai hangapa mani woꞌo kárándina pelábiána to nirámpu?

¹¹ Moapa riꞌi haneꞌi tiꞌara mani niꞌisá katiꞌárána rótiꞌ to Kutunggái ininá? Mewaliꞌ Kuhángáꞌá wopakou: maingáꞌ-ingáꞌkou i ragiꞌraꞌ toParisi hai toSaduki.”

¹² Karahádina peá laluitaNa iti, hangko raisá riꞌi topeguruNa katiꞌárána ragiꞌ hai rótiꞌ to natunggái Iesu, mole paturoꞌraꞌ riꞌi toParisi hai toSaduki {to paka mamporáráꞌáheꞌ pekirina tauna haneꞌi mouláꞌheꞌ pekiri to salaꞌ}.

Peturuꞌ mopangákuꞌ kaꞌIesuna Datu Topehómpóꞌ

¹³ Iesu hai topeguruNa laomoheꞌ i tampoꞌ to hungkuꞌ i kótá Kaisarea Pilipi. Ionoꞌ, Iesu mekuneꞌ i hira, “Mouláꞌ panguliꞌraꞌ tauna to handaꞌ, heáná iti Ánáꞌ Mánusiá?”

¹⁴ Mehániꞌheꞌ topeguruNa, “Araheꞌ to manguliꞌ Iohane Toperiu to tueꞌ huleꞌ. Araheꞌ woꞌo to manguliꞌ hadua nabiꞌ to tueꞌ huleꞌ, ia miꞌi nabiꞌ Eliá, nabiꞌ Ieremia, ba nabiꞌ to ntániꞌna.”

¹⁵ Nakuneꞌ wopaheꞌ, “Ane kómu, mouláꞌ polámbiꞌmi, Kódóꞌ deꞌe, heánáꞌAꞌ?”

¹⁶ Nahániki Simoꞌ Peturuꞌ, “Io miꞌi Datu Topehómpóꞌ, Ánáꞌna Pueꞌ Ala to tueꞌ haweꞌ i rue-ruena.”

¹⁷ Nauliꞌ wopiꞌi Iesu, “Simoꞌ ánáꞌna Iunu, morasiꞌ ntepuꞌukoꞌ, láwiꞌ tiꞌara tauna to mampopaisáꞌákoꞌ iti, agáiáná UmáNgkuꞌ to ara i surugáꞌ.

¹⁸ Mewaliꞌ, io miꞌi Peturuꞌ, to ralempónga ‘watu.’ Hai i wongko watu deꞌe ina Kupahirámpu upu-upu tauna to mepoinálái i Kódóꞌ. Hai kuasaꞌ kapate tiꞌara peisá monangiheꞌ.

¹⁹ Ina Kuweꞌikoꞌ kuasaꞌ mopatente taunána Pueꞌ Ala: apa to nupekóntói i duniáꞌ, iti woꞌo to napekóntói miꞌi Pueꞌ Ala i surugáꞌ. Ane nuꞌuliꞌi hadua tauna raꞌámpungi dósána, naꞌámpungi miꞌi woꞌo Pueꞌ Ala.”

²⁰ Roo onoꞌ, nahángáꞌáheꞌ Iesu, “Ineeꞌ sieruꞌ niuliꞌ-uliꞌ kaKódóꞌna miꞌi deꞌe Datu Topehómpóꞌ.”

Iesu mampolaluita kana i kaꞌina mateNa hai kana i rárá meuláꞌ i Hia

²¹ Mantepuꞌu hangko ionoꞌ, Iesu mopakanótó i topeguruNaheꞌ apa to hangaa-ngaa ina mewaliꞌ i wátáNa. Nahángáꞌáheꞌ, “BateꞌKuꞌ lao i Ierusale. Ionoꞌ, upu-upu totosae, kapalaꞌ-kapalaꞌ tadulako menómbá hai guru-guru agama ina mampopeahiahiꞌAꞌ. Ina rapapateAꞌ, agáiáná i katáluna alona, ina tueꞌAꞌ huleꞌ.”

²² Agáiáná Peturuꞌ modiiꞌ Iesu hangko ionoꞌ hai nakámbáróá, nauliꞌ, “Ineeꞌ Nuꞌuliꞌ noꞌonoꞌ, Pueꞌ! Kupembiáꞌ i Pueꞌ Ala bona iti Napakaraoꞌ hangko i Hio.”

²³ Agáiáná Iesu mampehaileꞌ Peturuꞌ, hai Nauliꞌ, “Pobaeꞌ! Io nodokoꞌ Datu Tokadake {láwiꞌ mampehukáꞌkoꞌ mokeloꞌAꞌ bona tiꞌaraꞌAꞌ mampeuláꞌi peundeꞌána UmáNgkuꞌ}. Pekirimu iti pekiri tauna peá, tiꞌara pekirina Pueꞌ Ala.”

²⁴ Roo onoꞌ, Iesu molaluita i topeguruNa, Nauliꞌ “Heáná to mampoinao meuláꞌ i Kódóꞌ, hangaa-ngaa mokábáhá peundeꞌána haduduána hai hangaa-ngaa timama mantódihá kapári haneꞌi meuláꞌ i Kódóꞌ.

²⁵ Heáná to mokábáhá peundeꞌána haduduána ánti peuláꞌna i Kódóꞌ, kehapiꞌ rapapate, ia to ina molámbiꞌ katueꞌ to maroꞌa to tiꞌara mokahópóꞌá. Agáiáná heáná to mampeuláꞌi peundeꞌána haduduána, tiꞌara ina molámbiꞌ katueꞌ to maroꞌa to tiꞌara mokahópóꞌá.

²⁶ Apa bunduꞌna morámpukou upu-upu kapebuku i duniáꞌ agáiáná tiꞌarakou molámbiꞌ katehómpóꞌ i alo pobutusi? Láwiꞌ tiꞌara ara to peisá rapoposuláꞌ katueꞌ to maroꞌa iti.

²⁷ Hangkani tempó, Ánáꞌ Mánusiá ina haweꞌ mai hangko i surugáꞌ mampetudeꞌá peawaꞌna tueꞌNa to hibali hai peawaꞌna UmáNa. I tempó iti, handaꞌ woꞌo malaꞌeka ina meuláꞌ, hai bateꞌna ina Naháwángi bábehiáraꞌ upu-upu tauna hintotoꞌ hai bábehiáraꞌ.

²⁸ Nipehádingi maroꞌa apa to Kuhángáꞌákou deꞌe: ara i oloꞌmi tauna to tiꞌara ina mate hangko tiꞌara maniheꞌ moita Ánáꞌ Mánusiá haweꞌ nodo Datu i kadatuána.”