Matiu 10 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu mampoweꞌi kuasaꞌ i topeguruNa to hampuloꞌ hai rodua

¹ Iesu mokióꞌheꞌ topeguruNa to hampuloꞌ hai rodua, hai Naweꞌiheꞌ kuasaꞌ mampopesuwuꞌ tokadake hai mopakauriꞌ upu-upu tauna to maduꞌa hai to tiꞌara masilolonga wátáraꞌ.

^2-4 Deꞌe miꞌi hangaꞌraꞌ to mewaliꞌ surona Iesu to hampuloꞌ hai rodua: Simoꞌ to rauliꞌ woꞌo Peturuꞌ hai Andaria ádina Simoꞌ, Iakobu ánáꞌna Sebedeu hai Iohane ádina, Pilipu hai Batolomeu, Tómá hai Matiu toperóróꞌ ásele, Iakobu ánáꞌna Alapeu, hai Tadeu, Simoꞌ toSeloꞌ, hai Iudasiꞌ Isikarioꞌ to mampobaluꞌ Iesu i ewáliNaheꞌ.

Iesu mopaturoꞌheꞌ topeguruNa hai mohuoꞌheꞌ lao moánti Ngkóráꞌ Marasa

⁵ Iesu mohuoꞌheꞌ to hampuloꞌ hai rodua lao mopahaweꞌ Ngkóráꞌ Marasa. Hangko tiꞌara maniheꞌ pohuꞌ, Napaturoꞌheꞌ, Nauliꞌ node: “Ineeꞌkou lao i wánuáraꞌ to tiꞌaraheꞌ toIahudiꞌ, tepasuaꞌ wánuáraꞌ toSamaria.

⁶ Agáiáná laomokou sieruꞌ i hangka toSáráeliꞌtaꞌ, láwiꞌ hira nodoheꞌ dimbá to tiꞌara ara to mampoewu.

⁷ Nipahaweꞌáheꞌ node: ‘Tiꞌara piꞌi marue, Pueꞌ Ala ina mopatongawaꞌ popárentáNa i duniáꞌ!.’

⁸ Nipakauriꞌheꞌ tauna to maduꞌa, nipatueꞌ tauna to mate, nipakauriꞌ tauna to ketánggáꞌ, nipopesuwuꞌ setáꞌ to mampesuaꞌi tauna. Kuweꞌimokou mbero kuasaꞌ mobábehi upu-upuna iti, mewaliꞌ hangaa-ngaa nibábehi woꞌo mbero-mbero.

⁹ Ineeꞌkou moánti dóiꞌ ba buláwá ba peráꞌ i polumaoámi.

¹⁰ Ineeꞌkou meboku, ineeꞌkou moánti badumi morontau ba sapatuꞌ ba laiꞌ, láwiꞌ hintotoꞌkou molámbiꞌ kaparaluuámi hangko i tauna to nipobámbáriá Ngkóráꞌna Pueꞌ.

¹¹ Ane haweꞌkou i hambuaꞌ wánuá, nipeliꞌ tauna to bulá laluraꞌ motarimakou i lalu támbiraꞌ. Menóntómokou ionoꞌ duuꞌmi pohuꞌ lao i wánuá to ntániꞌna.

¹² Ane mesuaꞌkou i lalu támbiraꞌ, nitabeheꞌ haneꞌi nihángáꞌá node: ‘Roꞌa ngkatueꞌ to hangko i Pueꞌ Ala mamporángákou!’

¹³ Ane bulá laluraꞌ pueꞌ támbi motarimakou, bateꞌna ina nawátiꞌheꞌ Pueꞌ Ala. Agáiáná ane tiꞌara bulá laluraꞌ motarimakou, tiꞌaraheꞌ ina molámbiꞌ pewátiꞌ hangko i Pueꞌ Ala.

¹⁴ Ane ara pueꞌ támbi ba pueꞌ wánuá to tiꞌara motarimakou ba to tiꞌara moundeꞌ mampehádingi laluitami, nipálehi támbi ba wánuá iti, hai nitarónta awu to mentakaꞌ i pálántáꞌ bitimi, tandaꞌna hira to ina nahuku Pueꞌ Ala.

¹⁵ Toꞌu ntepuꞌu, hai Kuhángáꞌákou: i alo pobutusi i kahópóꞌána duniáꞌ, ina melumbuꞌ kamatimina pehukuna Pueꞌ Ala i tauna to tiꞌara motarimakou, haneꞌi pehukuNa i upu-upu toSodomo hai toGumora hangkoia.”

Pepopeahiahiꞌ i alo to ina haweꞌ

¹⁶ “Maingáꞌ-ingáꞌkou, láwiꞌ Kuhuoꞌkou lao i oloꞌraꞌ tauna to kadake. Hangaa-ngaa mapándekou, hai hangaa-ngaa maꞌálusuꞌkou i poántimi.

¹⁷ Maingáꞌ-ingáꞌkou i tauna, láwiꞌ ina rahakaꞌkou hai raꞌánti i lindoꞌraꞌ tadulako agama. Ina rahepekou i lalu támbi penómbáꞌá.

¹⁸ Ánti peuláꞌmi i Kódóꞌ, ina rahuhuꞌkou i lindoꞌraꞌ topopárentá hai datu-datu. I tempó iti, ina raweꞌikou lógá mopahaweꞌ kana pepoináláimi i Kódóꞌ i topopárentá hai i tauna to tiꞌaraheꞌ moisá Pueꞌ Ala.

¹⁹ Mewaliꞌ ane rahakaꞌkou hai raꞌánti i lindoꞌraꞌ topopárentá, ineeꞌkou malááꞌ ba noumbá pehániꞌmi, láwiꞌ tempó iti, kuasaꞌna Pueꞌ Ala ina mokale i lalumi mopakanótó apa to hangaa-ngaa nihuwárá.

²⁰ Tempó iti, apa to nihuwárá iti tiꞌara ina mesupaꞌ hangko i pekirimi, agáiáná laluitami iti ina mentóáꞌ hangko i Inao to Magasaꞌ to naweꞌikou Umámi to ara i surugáꞌ. Ia miꞌi to ina mopakanótóákou apa to hangaa-ngaa niuliꞌ.

²¹ Ina haweꞌ tempóna tauna ina mampehuhuꞌá halaluraꞌ ba ánáꞌraꞌ bona rapapate ánti peuláꞌraꞌ i Kódóꞌ. Ara woꞌo ánángkóiꞌ to ina moewaꞌ tosaeraꞌ hai mampehuhuꞌá bona rapapate.

²² Ánti peuláꞌmi i Kódóꞌ, ina rakáhihiꞌkou handaꞌ tauna. Agáiáná tauna to mepoinálái oaꞌ i Kódóꞌ duuꞌna i kahópóꞌána, ina molámbiꞌheꞌ katueꞌ to maroꞌa to tiꞌara mokahópóꞌá.

²³ Ane rapopeahiahiꞌkou i wánuá hambuaꞌ, pohuꞌkou lao i wánuá to hambuaꞌna. Bona niꞌisá, Kuhángáꞌáꞌákou: hangko tiꞌara manikou roo moánti Ngkóráꞌ Marasa i humalele tampoꞌraꞌ toSáráeliꞌ, Ánáꞌ Mánusiá ina mesuleꞌ.

²⁴ Toposikolaꞌ tiꞌara melumbuꞌ karabiláꞌna hangko i guruna. Hawiꞌ tiꞌara melumbuꞌ karabiláꞌna hangko i pueꞌna.

²⁵ Apa to mewaliꞌ i guru, iti woꞌo to ina mewaliꞌ i topeguruna. Apa to mewaliꞌ i pueꞌ hawiꞌ, iti woꞌo to ina mewaliꞌ i hawiꞌna. Maroꞌa-roꞌakou, láwiꞌ Kódóꞌ deꞌe Pueꞌmi, hai kómu topeguruNgkuꞌ. Mewaliꞌ, ane rápáꞌna Kódóꞌ rauliꞌ Belesebu {daturaꞌ upu-upu setáꞌ}, apa mani kómu to meuláꞌ i Kódóꞌ, ina rasasalaꞌikou woꞌo.

²⁶ Mewaliꞌ, kehapiꞌ ara to moewaꞌkou, ineeꞌheꞌ nipokalááꞌ. Upu-upu to tetámbungi ina tebungkáhi, hai upu-upu to tewuniángi ina tongawaꞌ.

²⁷ Hai apa to Kuhángáꞌákou to tiꞌara mani rahádi tauna ntániꞌna, hangaa-ngaa nipolaluita i upu-upu tauna. Apa to Kupaturoꞌákou ngkábuni, hangaa-ngaa nipatongawaꞌámoheꞌ.

²⁸ Ineeꞌkou mampokalááꞌ tauna to mampoinaoheꞌ mopapatekou, láwiꞌ wátámi peá to peisá rapapate, agáiáná tiꞌaraheꞌ makuasaꞌ mopapate tánuánáꞌmi. To hangaa-ngaa nipokalááꞌ ia miꞌi Pueꞌ Ala, láwiꞌ Ia to makuasaꞌ mohuku wátámi hai tánuánáꞌmi i lalu naraka duuꞌna i rue-ruena.

²⁹ Peita dena. Rombaꞌa peisá rahóló hampepaꞌ peá dóiꞌ see. Agáiáná kehapiꞌ noꞌonoꞌ, tiꞌara ara hambaꞌa to mate ane tiꞌara peundeꞌána Pueꞌ Ala Umámi.

³⁰ Pelumbuꞌna mani kómu. Mogalo riꞌi imbaꞌna weluáꞌmi, naisá Pueꞌ Ala kahandaꞌna.

³¹ Mewaliꞌ, ineeꞌkou malááꞌ i tauna to moewaꞌkou. Melumbuꞌ pekádipurána Pueꞌ Ala i kómu haneꞌi pokádipuráNa dena to handaꞌ.

³² Heáná to mopangákuꞌ i lindoꞌraꞌ tauna peuláꞌna i Kódóꞌ, ia woꞌo ina Kupangákuꞌ i UmáNgkuꞌ to ara i surugáꞌ.

³³ Agáiáná heáná to mosápuákaꞌAꞌ i lindoꞌraꞌ tauna, ia woꞌo ina Kusápuáka i lindoꞌna UmáNgkuꞌ to ara i surugáꞌ.”

Maꞌángkárá meuláꞌ i Iesu

³⁴ “Ineeꞌ nihárungá kamaiNgkuꞌ deꞌe bona mopahintuwuꞌAꞌ tauna to i duniáꞌ. Tiꞌara! Ngkáliꞌna riꞌi kamaiNgkuꞌ deꞌe bona moántiAꞌ posisalaꞌ i oloꞌraꞌ tauna.

^35-36 Ánti kamaiNgkuꞌ deꞌe, tauna to hantámbi ina mosisalaꞌ, láwiꞌ hantángáꞌ ina meuláꞌ i Kódóꞌ, agáiáná hantángáꞌ tiꞌara. Ánáꞌ tobaleilo ina moewaꞌ umána, ánáꞌ towawine ina moewaꞌ inána, mániána ina moewaꞌ pengántiꞌina.

³⁷ Heáná to melumbuꞌ pampokaꞌahiꞌna inána ba umána haneꞌi pepokaꞌahiꞌna i Kódóꞌ, tiꞌara hintotoꞌ mewaliꞌ topeuláꞌKuꞌ. Heáná to melumbuꞌ pampokaꞌahiꞌna ánáꞌna haneꞌi pepokaꞌahiꞌna i Kódóꞌ, tiꞌara hintotoꞌ mewaliꞌ topeuláꞌKuꞌ.

³⁸ Heáná to tiꞌara timama mantódihá kapári ánti peuláꞌna i Kódóꞌ, tiꞌara hintotoꞌ mewaliꞌ topeuláꞌKuꞌ.

³⁹ Heáná to mokábáhá peundeꞌána haduduána ánti peuláꞌna i Kódóꞌ, kehapiꞌ rapapate, ia miꞌi to ina molámbiꞌ katueꞌ to maroꞌa to tiꞌara mokahópóꞌá. Agáiáná heáná to mampeuláꞌi peundeꞌána haduduána, tiꞌara ina molámbiꞌ katueꞌ to maroꞌa to tiꞌara mokahópóꞌá.

⁴⁰ Heáná to motarimakou, hibali miꞌi hai Kódóꞌ to natarima. Noꞌonoꞌ woꞌo, heáná to motarimaꞌAꞌ, hibali miꞌi Pueꞌ Ala to natarima, láwiꞌ Ia miꞌi to mohuoꞌAꞌ mai.

⁴¹ Heáná to motarima hadua tauna to mopahaweꞌ laluitana Pueꞌ Ala ánti pobágóꞌna, ia ina molámbiꞌ háwángina to hintotoꞌ i tauna to mopahaweꞌ laluitana Pueꞌ Ala. Heáná to motarima hadua tauna to manótó ánti kamanótóna, ia ina molámbiꞌ háwángina to hintotoꞌ i tauna to manótó.

⁴² Heáná to motulungi hadua topeuláꞌKuꞌ to i wóiꞌ tueꞌna ánti peuláꞌna i Kódóꞌ, kehapiꞌ napoweꞌi peá uwai ntooꞌ, ina molámbiꞌ háwángina i alo to ina haweꞌ.”