Marakusi 9 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Nauliꞌ wopiꞌi Iesu, “Nipehádingi maroꞌa apa to Kuhángáꞌákou deꞌe: ara i oloꞌmi to tiꞌara ina mate hangko tiꞌara mani moita kamakuasaꞌna Pueꞌ Ala hai kahaweꞌna popárentáNa.”

Iesu rapomahile i wongko buluꞌ

² Ini alona hangko ionoꞌ, Iesu moánti Peturuꞌ, Iakobu hai Iohane ádina, mempanaiꞌheꞌ lao i wongko buluꞌ to mapángkáꞌ. Mewaliꞌ hira peá, tiꞌara ara tauna ntániꞌna. Ionoꞌ tebáliki miꞌi lenggeꞌna Iesu mewaliꞌ meawaꞌ.

³ WaruꞌNa mewaliꞌ bulá hai mengkilaꞌ; tiꞌara ara hadua tauna i duniáꞌ deꞌe to peisá mobahoꞌi badu duuꞌna noꞌonoꞌ pengkilaꞌna.

⁴ Hangkaꞌ-hangkaꞌ perái topeguruNa moitaheꞌ rodua nabiꞌ to molaluita hai Iesu. Nabiꞌ to rodua iti ia miꞌi Musa hai Eliá.

⁵ Hangko ionoꞌ, nauliꞌ Peturuꞌ i Iesu, “Guru. Maroꞌa ntepuꞌu kihádi kitaꞌ arakeꞌ ieneꞌ. Rángina kibábehi tálu wuaꞌna bambaruꞌ: hambuaꞌ i Hio Pueꞌ, hambuaꞌ i Musa, hai hambuaꞌ woꞌo i Eliá.”

⁶ Katoꞌuána, tiꞌara nahádiá Peturuꞌ apa to nauliꞌ ánti kamalááꞌna.

⁷ Hangkaꞌ-hangkaꞌ perái, napótóꞌheꞌ gawu. Hangko i lalu gawu iti, rahádi miꞌi wambaꞌ to manguliꞌ, “Deꞌe miꞌi ÁnáꞌKuꞌ to Kupokaꞌahiꞌ. Nipehádingi miꞌi laluitaNa!”

⁸ Upu onoꞌ, rapepeita riꞌi, tiꞌara piꞌi ara tauna ntániꞌna hingkakani hai hira; Iesu perái haduduáNa.

⁹ Pendáuluraꞌ hangko i wongko buluꞌ iti, nahángáꞌáheꞌ Iesu, “Ineeꞌ sieruꞌ niuliꞌ-uliꞌ i heáná peá apa to niꞌita ininá, ane tiꞌara mani Ánáꞌ Mánusiá rapopearó hangko i kapate.”

¹⁰ HawaꞌNa iti rapeuláꞌi mpuꞌu. Tiꞌara rapolaluita i heáná peá apa to mewaliꞌ iti, agáiáná mombekuneꞌ-kuneꞌheꞌ apa tunggáiána Iesu manguliꞌ kaꞌina mearóNa huleꞌ hangko i kapate.

¹¹ Mekuneꞌheꞌ i Iesu, rauliꞌ, “Wuliangkaiꞌ. Mouláꞌ paturoꞌraꞌ guru agama, nabiꞌ Eliá hangaa-ngaa haweꞌ ioru, hangko haweꞌ riꞌi Datu Topehómpóꞌ. Noumbá riꞌi haneꞌi noꞌonoꞌ?”

^12-13 Nahánikiheꞌ Iesu, “Toꞌu to rapaturoꞌákou iti. Eliá hangaa-ngaa haweꞌ ioru, láwiꞌ ia to mopatimama upu-upuna. Hai Kuhángáꞌákou, haweꞌ miꞌi nabiꞌ Eliá, hai rapopeahiahiꞌ tauna mouláꞌ peundeꞌáraꞌ, nodo to teukiꞌ i lalu Sura Magasaꞌ. Agáiáná noumbá Ánáꞌ Mánusiá? Moapa riꞌi haneꞌi teukiꞌ i lalu Sura Magasaꞌ, Ia woꞌo ina molámbiꞌ handaꞌ kapári hai ina rapakóiꞌ tauna.”

Iesu mopakauriꞌ hadua ánángkóiꞌ to napesuaꞌi setáꞌ

¹⁴ I tempó iti, Iesu hai topeguruNa to tálu mesuleꞌmoheꞌ hangko i wongko buluꞌ lao mampohidupaꞌá topeguruNa to ntániꞌna. Kahaweꞌraꞌ ionoꞌ, raita handaꞌ tauna to motolelingi topeguruNa, hai bahangapaheꞌ guru agama tangaꞌraꞌ mombeheheꞌ hai topeguruna Iesu iti.

¹⁵ Karaitána tauna to handaꞌ Iesu iti, tingkáráꞌheꞌ hai melangkaheꞌ lao mampohidupaꞌá.

¹⁶ Mekuneꞌ Iesu i hira, “Apa to nipombeheheꞌi hai topeguruNgkuꞌ?”

¹⁷ Hadua hangko i tauna to handaꞌ iti manguliꞌ, “Guru! Deꞌe wongkódóꞌá ánáꞌkuꞌ kuánti bona Nupakauriꞌ. Ia tiꞌara peisá molaluita láwiꞌ napesuaꞌi tokadake.

¹⁸ Ane napesuaꞌi tokadake, madungká i tampoꞌ, mobireꞌ ngángána, mangkukuꞌ bágána, hai matodoꞌ wátána. Kupembiáꞌ miꞌi i topeguruMu bona mampopesuwuꞌheꞌ tokadake iti, agáiáná tiꞌara rabuku.”

¹⁹ Mewaliꞌ nahángáꞌáheꞌ Iesu, “Ee, noumbárakou noeneꞌ? Moapa riꞌi haneꞌi tiꞌara manikou mepoinálái? Hangapa mani kamaruena ina hingkakaniAꞌ hai kómu? Hangapa mani kamaruena hangaa-ngaa sabaraꞌAꞌ i kómu hangko mepoináláirakou? Ánti mai ánángkóiꞌ iti!”

²⁰ Raꞌánti mpuꞌu miꞌi ánángkóiꞌ iti i Iesu. Kanaitána tokadake iti Iesu, ia mampoporidiꞌ-ridiꞌ wátána ánángkóiꞌ iti duuꞌna madungká mengkakanduli, hai mobireꞌ ngángána.

²¹ Mekuneꞌ Iesu i umána ánángkóiꞌ iti, Nauliꞌ, “Hangapa miꞌi kamaruena pantódihána?” Nauliꞌ umána, “Hangko i kaꞌánángkóiꞌána mani.

²² Handaꞌ kánina tokadake modungká wátána i lalu api ba i lalu uwai, láwiꞌ napoinao napapate. Ane Nubuku, Guru, kupembiáꞌ bona Nupokaꞌahiꞌangkaiꞌ hai Nutulungi wongkaiꞌkaa!”

²³ Nauliꞌ Iesu, “Moapa riꞌi haneꞌi nuꞌuliꞌ ‘Ane Nubuku?’ Upu-upu peisá mewaliꞌ i tauna to mepoinálái.”

²⁴ Nahániki umána ánángkóiꞌ iti napasimbuku, “Mepoináláiaꞌ i Hio, Pueꞌ! Nutulungiaꞌ wongkódóꞌá, láwiꞌ kódóꞌ deꞌe makuraꞌ mani pepoináláingkuꞌ.”

²⁵ Kanaitána Iesu handaꞌ tauna melangka ina hirámpu, Ia mokámbáróá tokadake iti, Nauliꞌ, “Ee, tokadake to mepabongoꞌ hai mepabebeꞌ! Mesuwuꞌmokoꞌ hangko i ánángkóiꞌ deꞌe, hai ineeꞌmokoꞌ mesuaꞌ huleꞌ.”

²⁶ Monganga-nganga tokadake, mampoporidiꞌ-ridiꞌ ánángkóiꞌ iti, haneꞌi mesuwuꞌ miꞌi. I pesuwuꞌna tokadake, ánángkóiꞌ iti tiꞌara piꞌi mokale-kale, nodo miꞌi to mate, onoꞌ miꞌi haneꞌi handaꞌ tauna manguliꞌ, “Mate miꞌi!”

²⁷ Agáiáná Iesu motibaaꞌ taena hai Napopearó. Mearó mpuꞌu miꞌi ánángkóiꞌ iti láwiꞌ nalalu miꞌi!

²⁸ Hangko ionoꞌ, Iesu hai topeguruNa mesuaꞌheꞌ i lalu hambuaꞌ támbi. Kapesuaꞌraꞌ, mekuneꞌmoheꞌ topeguruNa i Hia, rauliꞌ, “Guru. Moapa riꞌi haneꞌi tiꞌara kibuku mampopesuwuꞌ tokadake iti ininá?”

²⁹ Nahánikiheꞌ, “Tokadake to noꞌonoꞌ kamaróhóna, tiꞌara peisá niwura ntooꞌ peá noꞌonoꞌ. Hangaa-ngaa nipekakaeá riꞌi i Pueꞌ Ala.”

Karongkánina Iesu mampolaluita kana i kaꞌina mateNa

³⁰ Iesu hai topeguruNa pohuꞌmoheꞌ hangko i Kaisarea Pilipi, mopaliliu polumaoraꞌ i tampoꞌ Galilea. Tunggáiána Iesu bona tiꞌara raisá tauna to handaꞌ iumbá kalaoáNa,

³¹ láwiꞌ i tempó iti, Napoinao peá mopaturoꞌ topeguruNa. Nahángáꞌáheꞌ, “Ánáꞌ Mánusiá ina rapehuhuꞌá i taeraꞌ tauna, ina rahuku mate, agáiáná i katáluna alona, Ia ina tueꞌ huleꞌ.”

³² Agáiáná topeguruNaheꞌ tiꞌara moisá tunggáiána laluitana Iesu iti, hai tiꞌaraheꞌ woꞌo pebáiꞌ mekuneꞌ i Hia.

Heáná to mengkaiwóiꞌ, hira miꞌi to mahile tueꞌraꞌ

³³ Iesu hai topeguruNa haweꞌ mpuꞌumoheꞌ i wánuá Kapenau. Tempóraꞌ ara i lalu támbi, mekuneꞌ miꞌi Iesu i topeguruNaheꞌ, Nauliꞌ, “Apa to nipolaluita oaꞌ i tangaꞌ rárá ininá?”

³⁴ Agáiáná tiꞌaraheꞌ mehániꞌ, láwiꞌ to rapolaluita i tangaꞌ rárá, heáná hangko i oloꞌraꞌ to melumbuꞌ kamahilena tueꞌna.

³⁵ Mewaliꞌ, mehoda miꞌi Iesu hai mokióꞌ topeguruNa to hampuloꞌ hai rodua, haneꞌi Nahángáꞌáheꞌ, “Heáná to mampoinao bona tepaireáꞌá hangko i oloꞌmi, hangaa-ngaa mengkaiwóiꞌ ntepuꞌu hai mewaliꞌ topokádipurá upu-upu tauna.”

³⁶ Roo onoꞌ, Ia moala hadua ánángkóiꞌ, Napopeángkáꞌ i tangaꞌraꞌ, Nakápui, haneꞌi Nahángáꞌáheꞌ topeguruNa, Nauliꞌ,

³⁷ “Heáná to motarima hadua tauna i lalu hangaꞌKuꞌ, tepasuaꞌ tauna to i wóiꞌ tueꞌna nodo ánángkóiꞌ deꞌe, lempóna Kódóꞌ miꞌi to natarima. Hai heáná to motarimaꞌAꞌ, tiꞌara Kódóꞌ peá to natarima, agáiáná motarima miꞌi woꞌo Pueꞌ Ala to mohuoꞌAꞌ mai.”

³⁸ Roo onoꞌ, nauliꞌ Iohane, “Guru. Ara kiꞌita hadua tauna to mampopesuwuꞌ setáꞌ i lalu hangaꞌMu, agáiáná kikóntó láwiꞌ ia tiꞌara hangko i kaiꞌ.”

³⁹ Nauliꞌ Iesu, “Ineeꞌ nikóntó, láwiꞌ tauna to mobábehi tandaꞌ kuasaꞌ i lalu hangaꞌKuꞌ, tiꞌara ina peisá mampoewaliáꞌAꞌ.

⁴⁰ Tauna to tiꞌarakeꞌ moewaꞌ, hira miꞌi to hingkakani hai kitaꞌ.

⁴¹ Toꞌu to Kuꞌuliꞌ, hai Kuhángáꞌákou: heáná peá to motulungikou ánti peuláꞌmi i Datu Topehómpóꞌ, kehapiꞌ hamangku peá uwai ntooꞌ naweꞌikou ánti peuláꞌmi i Datu Topehómpóꞌ, ia ina molámbiꞌ háwángina hangko i bábehiána to maroꞌa.

⁴² Agáiáná heáná to mopakanawoꞌ hadua tauna to mengkaiwóiꞌ tueꞌna nodo ánángkóiꞌ deꞌe, álána tiꞌara piꞌi mepoinálái i Kódóꞌ, ina rumihi ntepuꞌu pehukuna Pueꞌ Ala i tauna iti. Rángina miꞌi watu pogiliá to mahile ratóe i tambólóna hai ia ratibe i lalu tahiꞌ.

⁴³ Maroꞌa-roꞌakou bona ineeꞌkou madósá. Ane rápáꞌna taemu hambali moántikoꞌ mobábehi dósá, nubóhóki pemiꞌi. Maroꞌa mani hambali peá taemu, asalaꞌ molámbiꞌkoꞌ katueꞌ to maroꞌa hingkakani hai Pueꞌ Ala, haneꞌi rombali taemu, agáiáná kahópóꞌána ratibekoꞌ i lalu naraka. Ionoꞌ ara api to roreꞌ oaꞌ. [

⁴⁴ Ionoꞌ, api roreꞌ oaꞌ, hai uliꞌ tiꞌara ina mate.]

⁴⁵ Ane rápáꞌna bitimu hambali moántikoꞌ mobábehi dósá, nubóhóki pemiꞌi. Maroꞌa mani hambali peá bitimu, asalaꞌ molámbiꞌkoꞌ katueꞌ to maroꞌa hingkakani hai Pueꞌ Ala, haneꞌi rombali bitimu, agáiáná kahópóꞌána ratibekoꞌ i lalu naraka. [

⁴⁶ Ionoꞌ, api roreꞌ oaꞌ, hai uliꞌ tiꞌara ina mate.]

⁴⁷ Hai ane rápáꞌna mátámu hambali moántikoꞌ mobábehi dósá, nudungkiki pemiꞌi. Maroꞌa mani hambali peá mátámu, asalaꞌ mewaliꞌkoꞌ taunána Pueꞌ Ala i lalu popárentáNa, haneꞌi rombali mátámu, agáiáná kahópóꞌána ratibekoꞌ i lalu naraka.

⁴⁸ Ionoꞌ, api roreꞌ oaꞌ, hai uliꞌ tiꞌara ina mate.

⁴⁹ Mouláꞌ Paturoꞌna Musa, upu-upu pandeꞌ to rapopenómbá i Pueꞌ Ala hangaa-ngaa rapamagasaꞌ hai bure. Noꞌonoꞌ woꞌo upu-upu tauna hangaa-ngaa mantódihá kapári nodo to rapamagasaꞌ hai api.

⁵⁰ Bure mobunduꞌ ntepuꞌu. Agáiáná ane matáweá miꞌi, peisá paꞌi rapamabure huleꞌ? Noꞌonoꞌ woꞌo, kómu to meuláꞌ i Kódóꞌ hangaa-ngaa mobunduꞌkou oaꞌ nodo bure. Lempóna, ineeꞌ nipatodáhi pepoináláimi mewaliꞌ maledeꞌ, hai hangaa-ngaa mohintuwuꞌkou oaꞌ hadua hai hadua.”