Marakusi 6 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu tiꞌara rapoinálái toNasare

¹ Hangko ionoꞌ, Iesu hai topeguruNa pohuꞌ hangko i wánuá Kapenau lao i Nasare, wánuá karapakahileána Iesu.

² I alo penómbáꞌá, Ia lao i támbi penómbáꞌá mopaturoꞌ tauna, hai handaꞌheꞌ ionoꞌ. Kamohádiraꞌ paturoꞌna Iesu iti, tingkáráꞌheꞌ haneꞌi rauliꞌ, “Heáná riꞌi to mopaturoꞌ tauna deꞌe, haneꞌi noꞌonoꞌ kamapándeNa. Kapánde apa to ara i Hia haneꞌi Nabuku mobábehi tandaꞌ kuasaꞌ.

³ Tiꞌara paꞌi Ia deꞌe to mobasi peá bágóꞌNa? Ia ánáꞌna Maria. ÁdiNaheꞌ Iakobu, Iose, Iudasiꞌ hai Simoꞌ. Hai tiꞌara paꞌi ádiNaheꞌ towawine araheꞌ woꞌo hingkakani hai kitaꞌ ieneꞌ?” Onoꞌ miꞌi haneꞌi mosápuákaheꞌ laluitana Iesu.

⁴ Hangko ionoꞌ, Nahángáꞌáheꞌ, “Hadua nabiꞌ rabiláꞌ iumbá peá kalaoána. Agáiáná ane i wánuána haduduána ba i támbina, ba i oloꞌraꞌ halaluna, tiꞌara rabiláꞌ.”

^5-6 Napotingkáráꞌ Iesu láwiꞌ tiꞌaraheꞌ mepoinálái i Hia. Onoꞌ miꞌi haneꞌi Ia tiꞌara peisá mobábehi handaꞌ tandaꞌ kuasaꞌ ionoꞌ. Ia mampekamaꞌ peá bahangapa tauna to tiꞌara ralalu bona mauriꞌheꞌ. Roo onoꞌ, Iesu hai topeguruNa molumaoheꞌ i wánuá-wánuá to hungkuꞌ i Nasare, hai Iesu mopaturoꞌheꞌ tauna.

Iesu mohuoꞌheꞌ suroNa mopahaweꞌ ngkóráꞌna Pueꞌ

⁷ Ia mokióꞌ topeguruNa to hampuloꞌ hai rodua, haneꞌi Nahuoꞌheꞌ rodua-rodua lao moánti Ngkóráꞌna Pueꞌ hai Naweꞌiheꞌ kuasaꞌ mampopesuwuꞌ tokadake.

⁸ Hangko tiꞌara maniheꞌ pohuꞌ, Nahángáꞌáheꞌ Iesu node: “Ineeꞌkou moánti ba apa-apa i polumaoámi, bateꞌna peá laiꞌ. Ineeꞌkou moánti rótiꞌ ba boku ba dóiꞌ.

⁹ Peisákou mesapatuꞌ, agáiáná ineeꞌkou moánti badumi morontau.”

¹⁰ Haneꞌi Nahángáꞌá maniheꞌ, “Ane haweꞌkou i hambuaꞌ wánuá, hai araheꞌ tauna to motarimakou i támbiraꞌ, toroꞌmokou ionoꞌ duuꞌmi pohuꞌ mopaliliu polumaomi lao i wánuá to ntániꞌna.

¹¹ Ane ara pueꞌ wánuá to tiꞌarakou motarima ba to tiꞌara moundeꞌ mampehádingi laluitami, nipálehi wánuá iti, hai nitarónta awu to mentakaꞌ i pálántáꞌ bitimi, tandaꞌna hira to ina motarima pehukuna Pueꞌ Ala.”

¹² Karoona Iesu mopaturoꞌ topeguruNa, pohuꞌ mpuꞌumoheꞌ lao mopaturoꞌ tauna to handaꞌ bona menosoꞌheꞌ hangko i dósáraꞌ.

¹³ Topeguruna Iesu mampopesuwuꞌ handaꞌ setáꞌ to mampesuaꞌi tauna, hai moparirohaheꞌ lana i tauna to tiꞌara ralalu, hai mauriꞌ mpuꞌu miꞌi hakiꞌraꞌ.

Kamatena Iohane Toperiu

¹⁴ I tempó iti, Datu Herode Antipa mohádi apa to nabábehi Iesu, láwiꞌ hangaꞌna Iesu tebámbári iumbá-umbá peá. Ara to manguliꞌ, “Iesu iti ia miꞌi Iohane Toperiu to tueꞌ huleꞌ! Onoꞌ miꞌi haneꞌi Nabuku mobábehi handaꞌ tandaꞌ kuasaꞌ.”

¹⁵ Agáiáná ara woꞌo to manguliꞌ, “Babilaꞌ Iesu ia miꞌi nabiꞌ Eliá {to haweꞌ wopiꞌi}.” Hai araheꞌ woꞌo to manguliꞌ, “Ia miꞌi hadua nabiꞌ, to hibali hai nabiꞌ to tueꞌ hangkoia.”

¹⁶ Kanahádina Datu Herode bámbári iti, nauliꞌ, “Ia hangaa-ngaa Iohane Toperiu! Hangkoia kuhuoꞌ tauna mobóhóki tambólóna. Babilaꞌ deꞌe-deꞌe tueꞌ huleꞌ.”

^17-18 Kamatena Iohane Toperiu, node daritakáná: Datu Herode mobualosi ádina, ia miꞌi Pilipu, láwiꞌ moala Herodia napotoina. Mewaliꞌ handaꞌ kánina Iohane mokámbáróá Herode ánti bábehiána iti, nauliꞌ, “Tiꞌarakoꞌ peisá mampotoina toinána halalumu! Bábehiámu iti moliungi Hawaꞌna Musa.” Onoꞌ miꞌi haneꞌi Herode mohuoꞌ surudadoꞌna lao mohakaꞌ Iohane. Ratimpuku hai rapopesuaꞌ i lalu tarungku.

¹⁹ I tempó iti, Herodia mokáhihiꞌ Iohane, onoꞌ miꞌi haneꞌi napoinao napapate. Agáiáná tiꞌara tebukeki tunggáiána iti,

²⁰ láwiꞌ Herode mohuoꞌheꞌ surudadoꞌna mokámpái Iohane i lalu tarungku. Herode tiꞌara pebáiꞌ mopapate láwiꞌ naisá kaꞌiana tauna to manótó laluna hai magasaꞌ tueꞌna. Ane mampehádingi laluitana Iohane, wuli ntepuꞌu pekirina, agáiáná naundeꞌ woꞌo mampehádingi apa to nauliꞌ Iohane.

²¹ Hangkani, ara tempó to maroꞌa i Herodia mampopolumao tunggáiána. Tempó iti, Datu Herode mobábehi posusa pambuhinaona alo karapoánákana. Handaꞌ tuꞌáná, tadulako-tadulako, hai topebuku to hangko i tampoꞌ Galilea to nakióꞌ lao i posusa iti.

²² Tangaꞌraꞌ mosusa, ánáꞌna Herodia towawine mesuaꞌ hai monariꞌ i lindoꞌraꞌ torare. Góeꞌ ntepuꞌu Datu Herode mampeita ponariꞌna ánáꞌntawine iti, noꞌonoꞌ woꞌo torarena. Nauliꞌ Herode i ánáꞌntawine iti, “Apa to nuꞌundeꞌ? Apa peá to nupembiáꞌ, ina kuweꞌikoꞌ!”

²³ Ia modándi wopiꞌi i lindoꞌna torarena, nauliꞌ, “Apa peá to nupembiáꞌ, kehapiꞌ miꞌi hantangaꞌ hangko i kadatuángkuꞌ, ina kuweꞌikoꞌ!”

²⁴ Pohuꞌ miꞌi ánáꞌntawine iti lao mekuneꞌ i inána, nauliꞌ, “Inaꞌ, apa to hangaa-ngaa kupembiáꞌ?” Nauliꞌ inána, “Nupembiáꞌ wuáꞌna Iohane Toperiu!”

²⁵ Hangko ionoꞌ, kawiáꞌ pemiꞌi ánáꞌntawine iti lao i datu, haneꞌi nauliꞌ, “Kupembiáꞌ wuáꞌna Iohane Toperiu deꞌe-deꞌe rawoli i wongko bakiꞌ.”

²⁶ Kanahádina Herode pembiáꞌna iti, masusa laluna, agáiáná dándina i ánáꞌntawine iti tiꞌara piꞌi peisá nadiiꞌ huleꞌ, láwiꞌ ia modándi miꞌi i lindoꞌraꞌ torarena.

²⁷ Onoꞌ miꞌi haneꞌi kásáliu nahuoꞌ hadua surudadoꞌna lao mobóhóki tambólóna Iohane Toperiu. Lao mpuꞌu miꞌi surudadoꞌ iti i tarungku mobóhóki tambólóna Iohane.

²⁸ Wuáꞌna nawoli i wongko bakiꞌ haneꞌi lao nahuhuꞌ i ánáꞌntawine iti, hai ánáꞌntawine iti lao mampeweꞌi i hinána.

²⁹ Karahádina topeguruna Iohane apa to pewaliꞌ iti, laomoheꞌ moala wátámandoꞌna Iohane haneꞌi ratawu. {Eneꞌ miꞌi daritána kamatena Iohane Toperiu.}

Iesu mopaꞌandeꞌ lima sábuna tauna

³⁰ I kapesuleꞌraꞌ suro to nahuoꞌ Iesu lao mopahaweꞌ ngkóráꞌna Pueꞌ Ala, rapodarita miꞌi i Iesu upu-upu to rabábehi hai to rapaturoꞌáheꞌ tauna to handaꞌ.

³¹ I tempó iti, handaꞌ ntepuꞌu tauna mombeháwá-háwá lao i Iesu, duuꞌna Iesu hai topeguruNa tiꞌarapoheꞌ ina nampakaꞌ mandeꞌ. Onoꞌ miꞌi haneꞌi nauliꞌ Iesu i topeguruNa, “Rángintaꞌ pohuꞌ lao mopataniꞌ i katoroꞌá to malaheꞌ hangko i tauna, bona peisákou mengkaroo hampaiꞌ.”

³² Mewaliꞌ, mengkaheꞌmoheꞌ i duanga lao i kalaheꞌána.

³³ Agáiáná tauna to handaꞌ moita kapohuꞌáraꞌ, hai raisá woꞌo iumbá kalaoáraꞌ. Mewaliꞌ handaꞌ tauna hangko i wánuá-wánuá to hungkuꞌ manggaguheꞌ woꞌo lao ionoꞌ mouláꞌ rárá to i wiwi rano, áláraꞌ ioru haweꞌ haneꞌi Iesu hai topeguruNaheꞌ.

³⁴ Pendáuluna Iesu hangko i duanga, Ia moita wopaheꞌ tauna to handaꞌ mepegiá. Maꞌahiꞌ laluNa mampeitaheꞌ, láwiꞌ nodoheꞌ dimbá to tiꞌara rapoewu. Mewaliꞌ natepuꞌu wopiꞌi Iesu mopaguruheꞌ mampopengaa paturoꞌ.

³⁵ Ina támpu miꞌi alo, laomoheꞌ topeguruNa i Hia haneꞌi rahángáꞌá, “Guru, katoroꞌá deꞌe tiꞌara ara apa-apa, hai ina támpu miꞌi alo.

³⁶ Rángina miꞌi Nuhuoꞌheꞌ tauna to handaꞌ iti lao i wánuá-wánuá to hungkuꞌ bona mohólóheꞌ pandeꞌraꞌ.”

³⁷ Agáiáná nauliꞌ Iesu, “Kómu riꞌi to hangaa-ngaa mopaꞌandeꞌheꞌ.” Rahániki topeguruNa, “Apa miꞌi paꞌi to ina kiweꞌiheꞌ? Mogalo riꞌi rongatu dóiꞌ peráꞌ, tiꞌara gáná tapopehóló rótiꞌ tapopopaꞌandeꞌáheꞌ tauna to nodeꞌe kahandaꞌraꞌ.”

³⁸ Nauliꞌ Iesu, “Nipeita. Hangapa wuaꞌna rótiꞌ to ara i kómu?” Karoona rapeita, rauliꞌ, “Lima peá wuaꞌna rótiꞌ hai rombaꞌa bouꞌ.”

³⁹ Roo onoꞌ, nahuoꞌmoheꞌ Iesu bona tauna mehodaheꞌ motobu-tobu i wongko pádá to kerumpuꞌ to woꞌu.

⁴⁰ Mewaliꞌ mehodamoheꞌ motobu-tobu. Ara to hangatu kahandaꞌraꞌ, ara woꞌo to lima puloꞌna.

⁴¹ Roo onoꞌ, Iesu moala miꞌi rótiꞌ to lima wuaꞌna hai bouꞌ to rombaꞌa iti, haneꞌi mengoaꞌ i langiꞌ mekakae i Pueꞌ Ala. Nabiseꞌ-biseꞌ miꞌi rótiꞌ iti, haneꞌi Naweꞌiheꞌ topeguruNa bona ragáláꞌ-gáláꞌáheꞌ tauna to handaꞌ. Noꞌonoꞌ woꞌo, karagáláꞌ-gáláꞌna bouꞌ to rombaꞌa iti.

⁴² Mandeꞌmoheꞌ upu-upu duuꞌraꞌ mabuhu.

⁴³ Karooraꞌ mandeꞌ, pelábiána pandeꞌ rarámpu topeguruna Iesu, hampuloꞌ mani hai rongkárándi.

⁴⁴ Kahandaꞌraꞌ tauna to mandeꞌ tempó iti, rekeꞌ-rekeꞌna lima sábuna tobaleilo, {tiꞌara teimbaꞌ towawine hai ánángkóiꞌ}.

Iesu molumao i wongko uwai

⁴⁵ Roo onoꞌ, Iesu mohuoꞌmoheꞌ topeguruNa moduanga moioru lao tándáꞌ i hambali rano Galilea, lao i wánuá Besaida, hai Ia mohuoꞌmoheꞌ woꞌo tauna to handaꞌ bona mesuleꞌheꞌ.

⁴⁶ Karoona Iesu mampopesuleꞌ tauna to handaꞌ, Ia pohuꞌ miꞌi woꞌo lao i buluꞌna mekakae.

⁴⁷ Káindi miꞌi, topeguruNa aramoheꞌ i tangaꞌ rano, agáiáná Ia haduduáNa ara mani i lorena.

⁴⁸ I kanaitána Iesu mapári ntepuꞌu rahádi topeguruNa mowose duangaraꞌ, láwiꞌ mampohidupaꞌá wui to rumihi hangko i lindoꞌ, onoꞌ miꞌi haneꞌi hungkuꞌ mabaa, rekeꞌ-rekeꞌna tintiꞌ tálu, Ia molumao i wongko uwai ina lao monóntóhiheꞌ. Natunggáiheꞌ Naliu,

⁴⁹ agáiáná karaitána topeguruNa ara tauna to molumao i wongko uwai, monganga-ngangaheꞌ, rauliꞌ, “Doꞌo maiꞌo tometánuánáꞌ!”

⁵⁰ Upu-upuheꞌ moita ara to molumao i wongko uwai iti, hai malááꞌ ntepuꞌuheꞌ. Kásáliu nahángáꞌáheꞌ Iesu, “Pakaróhó lalumi! Ineeꞌkou malááꞌ! Kódóꞌnto.”

⁵¹ Kapengkaheꞌna Iesu i duangaraꞌ topeguruNa, wui kásáliu mengkaroo. Tingkáráꞌ ntepuꞌuheꞌ

⁵² láwiꞌ kehapiꞌ tiꞌara maniheꞌ marue moita tandaꞌ kuasaꞌ i tempóNa mopaꞌandeꞌ tauna to handaꞌ, tiꞌara mani manótó i pekiriraꞌ kaheánána Iesu iti. Bateꞌna mani bata-bata laluraꞌ mepoinálái i Hia.

Iesu mopakauriꞌ handaꞌ tauna to maduꞌa i Genesare

⁵³ Kahaweꞌraꞌ Iesu hai topeguruNa i hambali rano Galilea, mengkarooheꞌ i tampoꞌ to rauliꞌ Genesare.

⁵⁴ Pendáuluraꞌ hangko i duanga, pueꞌ wánuá moita kaꞌIesuna miꞌi to haweꞌ i tampoꞌraꞌ.

⁵⁵ Melangkamoheꞌ lao i wánuá-wánuá to hungkuꞌ, hai upu-upu rángáraꞌ to maduꞌa rakowaꞌ raꞌánti lao i Iesu. Iumbá peá rahádi kaꞌárána Iesu, ionoꞌ raꞌánti rángáraꞌ to maduꞌa.

⁵⁶ Iumbá peá kalaoána Iesu, ba i wánuá to mahile ba i wánuá to kókóiꞌ, moántiheꞌ rángáraꞌ to maduꞌa, rawoli i kahirámpuá tauna to handaꞌ, hai rapembiáꞌ i Iesu bona Napaliuheꞌ mampetóbóꞌ hubaꞌ wuntu kumbáNa peá. Upu-upu tauna to mampetóbóꞌ kumbáNa, kásáliu mauriꞌ mpuꞌu hakiꞌraꞌ.