Marakusi 4 - Sura Magasaꞌ: Bahangapa sura Pototowiá to Sae hai Pototowiá to Woꞌu

Ngkóráꞌ pándiriꞌ kana i iba pákáꞌna tampoꞌ

¹ Hangkani tempó, Iesu mepaturoꞌ wopiꞌi i wiwi rano Galilea. Handaꞌ ntepuꞌu tauna to lao i Iesu, álána mombegaeꞌ-gaeꞌmoheꞌ, onoꞌ miꞌi haneꞌi Ia lao mengkaheꞌ i duanga to i wongko uwai hai mehoda ionoꞌ. Hai tauna to handaꞌ meángkáꞌheꞌ i wiwi rano.

² Handaꞌ pákáꞌna to Napaturoꞌáheꞌ moliu ngkóráꞌ pándiriꞌ. Rápáꞌna, Nauliꞌ,

³ “Nipehádingi! Ara hadua topohinoe to lao mohawuꞌ i hinoena, {agáiáná tampoꞌ i hinoena iti ionoꞌ miꞌi aha: ara to kedui, ara to matuꞌa, ara to kewatu pealeꞌ, hai ara woꞌo tampoꞌ to maruduꞌ}.

⁴ Mewaliꞌ i pohawuꞌna iti, ara tinudaꞌ to manawoꞌ i tampoꞌ to matuꞌa láwiꞌ paka raporárái tauna. Haweꞌheꞌ tádáhi motilóꞌ tinudaꞌ iti duuꞌna upu.

⁵ Ara woꞌo tinudaꞌ to manawoꞌ i tampoꞌ to kewatu pealeꞌ i wóiꞌna. Tinudaꞌ iti hawiáꞌ tueꞌ láwiꞌ mahábáꞌ tampoꞌna,

⁶ agáiáná ane nahimbaꞌi alo, malau duuꞌna bangi, láwiꞌ tiꞌara kaladu kálándána.

⁷ Ara woꞌo tinudaꞌ to manawoꞌ i lalu dui. Tinudaꞌ iti tueꞌ, agáiáná dui mopótóꞌ duuꞌna mate, onoꞌ miꞌi haneꞌi tiꞌara mowuaꞌ.

⁸ Ara woꞌo tinudaꞌ to manawoꞌ i tampoꞌ to maruduꞌ. Maroꞌa katueꞌna. Kamahile-hileá duuꞌna mowuaꞌ. Ara to tálu puloꞌna kánina kahandaꞌna pewaliꞌna hangko i tinudaꞌna, ara to ini puloꞌna kánina, ara woꞌo to hangatu kánina hangko i tinudaꞌna.”

⁹ Roo mopahaweꞌ ngkóráꞌ pándiriꞌ iti, Nahángáꞌámoheꞌ, “Maroꞌa ntepuꞌu ane ara tauna to mopailalu apa to nahádi.”

Tunggáiána Iesu mopakeꞌ ngkóráꞌ pándiriꞌ

¹⁰ Roo onoꞌ, i tempóna Iesu haduduána, laomoheꞌ topeguruNa to hampuloꞌ hai rodua, hai topeuláꞌNa to ntániꞌna, mekuneꞌ i Hia, rauliꞌ, “Apa lempóna ngkóráꞌ pándiriꞌ to Nupahaweꞌ ininá?”

¹¹ Nauliꞌ Iesu, “Hangkoia, tewuniángi mani paturoꞌ kana i popárentána Pueꞌ Ala. Deꞌe-deꞌe naweꞌimokou Pueꞌ Ala pekiri bona niꞌisá lempóna paturoꞌ iti. Agáiáná ane tauna to tiꞌara meuláꞌ i Kódóꞌ, Kupaturoꞌheꞌ moliu ngkóráꞌ pándiriꞌ,

¹² bona tebukeki to teukiꞌ i lalu Sura Magasaꞌ node: ‘Kehapiꞌ raita miꞌi apa to Kubábehi, agáiáná tiꞌara raisá lempóna. Kehapiꞌ rahádi miꞌi paturoꞌKuꞌ, agáiáná tiꞌara raisá tunggáiáNgkuꞌ, bona tiꞌaraheꞌ mesuleꞌ i Pueꞌ Ala, hai dósáraꞌ tiꞌara teámpungi.’ ” (Iesaia 6:9-10)

Iesu mopakanótó lempóna ngkóráꞌ pándiriꞌ kana i iba pákáꞌna tampoꞌ

¹³ Roo onoꞌ, Iesu mohángáꞌáheꞌ, “Ane tiꞌara niꞌisá lempóna ngkóráꞌ pándiriꞌ to ininá, noumbá kaniꞌisána lempóna ngkóráꞌ pándiriꞌ to ntániꞌna?

¹⁴ Topohawuꞌ iti, ia miꞌi to mopahaweꞌ ngkóráꞌna Pueꞌ Ala.

¹⁵ Araheꞌ tauna to peisá rapándiriꞌ nodo iba pákáꞌna tampoꞌ iti. Araheꞌ to peisá rapándiriꞌ nodo tampoꞌ to matuꞌa. Mohádintoheꞌ ngkóráꞌna Pueꞌ Ala, agáiáná Datu Tokadake mopawuli laluraꞌ, álána tiꞌarapoheꞌ mopailalu Ngkóráꞌna Pueꞌ Ala to rahádi miꞌi iti.

¹⁶ Araheꞌ woꞌo tauna to peisá rapándiriꞌ nodo tampoꞌ to kewatu pealeꞌ. Runguraꞌ mohádi ngkóráꞌna Pueꞌ Ala, liu-liu rapogóeꞌ.

¹⁷ Agáiáná hampaiꞌ peá rapoinálái láwiꞌ tiꞌara maróhó pokálándána ngkóráꞌna Pueꞌ Ala i laluraꞌ, onoꞌ miꞌi haneꞌi tiꞌaraheꞌ tetidaꞌ. Ane rapopeahiahiꞌheꞌ ba rapamapári ánti pepoináláiraꞌ i ngkóráꞌna Pueꞌ, mosuliꞌheꞌ hangko i pepoináláiraꞌ.

¹⁸ Araheꞌ woꞌo tauna to rapándiriꞌ nodo tampoꞌ to kedui. Rahádi ntepuꞌu ngkóráꞌna Pueꞌ hai raisá lempóna,

¹⁹ agáiáná mampekiriheꞌ oaꞌ katueꞌraꞌ i duniáꞌ deꞌe, hai mampoinao peheꞌ morámpu párewá ngkáduniáꞌ. Upu-upu iti mopaꞌara peá katiꞌárána maróhó pepoináláiraꞌ, álána ngkóráꞌna Pueꞌ Ala tiꞌara piꞌi mobunduꞌ i lalu katueꞌraꞌ.

²⁰ Araheꞌ woꞌo tauna to rapándiriꞌ nodo tampoꞌ to maruduꞌ. Kamohádiraꞌ ngkóráꞌna Pueꞌ Ala, liu-liu ratarima. Rapailalu ntepuꞌu hai rapopobunduꞌ, álána ngkóráꞌna Pueꞌ Ala iti mowuaꞌ i lalu katueꞌraꞌ. Ara to tálu puloꞌna kánina kahandaꞌna hangko i tinudaꞌna, ara to ini puloꞌna kánina kahandaꞌna, ara woꞌo to hangatu kánina kahandaꞌna hangko i tinudaꞌna.”

Ngkóráꞌ pándiriꞌ kana i huluꞌ to rahumbáki

²¹ Molaluita wopiꞌi Iesu i tauna to handaꞌ, Nauliꞌ, “Ba ara tauna to motótó palita i lalu támbi haneꞌi nahumbáki kori ba nawoli i wóiꞌ kóiꞌ? Hangaa-ngaa tiꞌara ara. Palita bateꞌna rawoli i kamapángkáꞌána bona mahingkaaꞌ, raita upu-upu tauna to i lalu támbi.

²² Noꞌonoꞌ woꞌo upu-upuna paturoꞌKuꞌ, tiꞌara piꞌi ara to ina tewuniángi. Ina niꞌisá lempóna.

²³ Maroꞌa ntepuꞌu ane ara tauna to mopailalu apa to nahádi.”

²⁴ Nauliꞌ wopiꞌi Iesu, “Nipailalu apa to nihádi deꞌe, láwiꞌ ane nipoinao mohádi hai mampeuláꞌi ngkóráꞌna Pueꞌ iti, handaꞌ mani to ina napakanótóákou Pueꞌ Ala.

²⁵ Tauna to motarima hai mampoinálái ngkóráꞌna Pueꞌ Ala, ina tetámbái apa to raisá kana i ngkóráꞌna Pueꞌ iti. Agáiáná tauna to tiꞌaraheꞌ mampoinálái ngkóráꞌna Pueꞌ Ala, kehapiꞌ hantódiꞌ peá to raisá, bateꞌna tiꞌara mobunduꞌ láwiꞌ ina naꞌala huleꞌ Pueꞌ Ala.”

Popárentána Pueꞌ Ala rapándiriꞌ nodo katueꞌna tinudaꞌ

²⁶ Nauliꞌ Iesu, “Ane haweꞌ miꞌi popárentána Pueꞌ Ala i duniáꞌ, pewaliꞌna nodo ngkóráꞌ pándiriꞌ deꞌe: hadua tauna mantudaꞌ pare i hinoena.

²⁷ Maroꞌa mabaa ba káindi, maroꞌa i tempóna maturu ba i tempóna mearó, tinudaꞌ iti tueꞌ oaꞌ haweꞌ mahile. Agáiáná tiꞌara naisá topohinoe noumbá katueꞌna tinudaꞌna iti duuꞌna mahile.

²⁸ Rungu-runguna tampoꞌ iti mampopesupaꞌ káuna, haneꞌi taweꞌna. Hangko ionoꞌ, mowuaꞌ miꞌi, duuꞌna moꞌóntóꞌ.

²⁹ Ane mangka miꞌi, pueꞌna ina lao mampepare pare iti, láwiꞌ tempóna miꞌi.”

Popárentána Pueꞌ Ala rapándiriꞌ nodo lihu to marámbóꞌ ntepuꞌu

³⁰ Nauliꞌ Iesu, “Ane popárentána Pueꞌ Ala haweꞌ i duniáꞌ, noumbá pewaliꞌna? Popárentána Pueꞌ Ala peisá rapándiriꞌ nodo lihu to marámbóꞌ ntepuꞌu rápáꞌna nodo lihu duiꞌá.

³¹ Ara to mohawuꞌ lihu iti i wiwi hinoena. Lihu iti marámbóꞌ ntepuꞌu, melumbuꞌ kamarámbóꞌna hangko i upu-upu lihu to ara i duniáꞌ.

³² Agáiáná ane rahawuka hai tueꞌi, ina melumbuꞌ kamapángkáꞌna hangko i rampaꞌ-rampaꞌ to ntániꞌna, láwiꞌ tueꞌ nodo hampóꞌá kau, duuꞌna mahile ntepuꞌu hai dáꞌána peisá rapohárái tádáhi hai rapebóungái.”

³³ Hai handaꞌ mani ngkóráꞌ pándiriꞌ to napakeꞌ Iesu mopahaweꞌ ngkóráꞌna Pueꞌ Ala i tauna to handaꞌ. Napaturoꞌheꞌ mouláꞌ pebukuáraꞌ molempónga.

³⁴ Tiꞌara ara to Napaturoꞌáheꞌ to tiꞌara moliu ngkóráꞌ pándiriꞌ. Agáiáná ane Ia perái hai topeguruNaheꞌ, hangko Napakanótóáraheꞌ upu-upu lempóna.

Iesu mampopengkaroo wui to rumihi

³⁵ I alo iti woꞌo, kalumbaꞌna, Nauliꞌ Iesu i topeguruNa, “Maimokou, laokeꞌ tándáꞌ i hambali rano Galilea.”

³⁶ Mewaliꞌ mengkaheꞌ mpuꞌumoheꞌ i duanga, haneꞌiheꞌ pohuꞌ mopálehi tauna to handaꞌ to i wiwi rano. Hai ara woꞌo duanga to ntániꞌna to meuláꞌ i hira.

³⁷ Tiꞌara marue hangko ionoꞌ, mampohidupaꞌáheꞌ wui to rumihi ntepuꞌu. Duangaraꞌ narokaꞌ bálumbá to mahile, duuꞌna ina bukeꞌ miꞌi uwai.

³⁸ I tempó iti, Iesu letaꞌ i pehoda-hodaꞌá to tándáꞌ i wuntuna duanga, hai mopakeꞌ álónga to ara ionoꞌ. TopeguruNaheꞌ iti moruaꞌ Iesu, rauliꞌ, “Guru! Moapa riꞌi haneꞌi tiꞌarakeꞌ Nupotepe? Nupatodáhi pekeꞌ hurewuꞌ!”

³⁹ Kapearóna peá Iesu, liliu mokámbáróá wui hai bálumbá, Nauliꞌ, “Pengkaroo wui! Tindamokoꞌ bálumbá!” Mengkaroo mpuꞌu miꞌi wui, hai kásáliu rano iti tinda huleꞌ.

⁴⁰ Roo onoꞌ, Nahángáꞌáheꞌ topeguruNa, “Moaparakou haneꞌi malááꞌ? Moapa riꞌi haneꞌi tiꞌara maniAꞌ nipoinálái?”

⁴¹ Tingkáráꞌ ntepuꞌuheꞌ topeguruNa, haneꞌi mombekuneꞌheꞌ, “Heáná ripaꞌi tauna deꞌe? Mogalo riꞌi wui hai bálumbá mampeuláꞌi hawaꞌNa.”