Marakusi 3 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu mopakauriꞌ tauna i alo penómbáꞌá

¹ Hangkani tempó, lao wopiꞌi Iesu i támbi penómbáꞌá. Ionoꞌ, ara hadua tauna to mate taena hambali.

² Araheꞌ woꞌo toParisi to molelemata Iesu, babilaꞌ ina mepakauriꞌ i alo penómbáꞌá. Onoꞌ miꞌi haneꞌi rapeita ntepuꞌu apa to ina nabábehi Iesu.

³ Nauliꞌ Iesu i tauna to mate taena hambali, “Maikoꞌ! Meángkáꞌkoꞌ i lindoꞌ,”

⁴ haneꞌi Iesu mokuneꞌheꞌ toParisi, “Mouláꞌ áturá ágámántaꞌ, apa to peisá tabábehi i alo penómbáꞌá: mobábehikeꞌ to maroꞌa ba to kadake? Motulungikeꞌ tauna ba mopapatekeꞌ tauna?” Agáiáná, tiꞌaraheꞌ mehániꞌ, maniiꞌ-niiꞌ peheꞌ.

⁵ Mewaliꞌ masusa laluna Iesu láwiꞌ matuꞌa gaga laluraꞌ. {Rapaioru mani áturá haneꞌi motulungi tauna.} Ánti kamabukoꞌNa, Natótóiheꞌ mantoleli haneꞌi Nahángáꞌá iti tauna to mate taena hambali, “Ónáꞌ taemu!” Kanaónáꞌna taena, kásáliu mauriꞌ.

⁶ {I karaitána toParisi, Iesu mopakauriꞌ tauna i alo penómbáꞌá,} pohuꞌmoheꞌ hangko i támbi penómbáꞌá, haneꞌi laoheꞌ mohawaꞌ ngkábuni hai taunána Datu Herode, mampeliꞌheꞌ rárá bona Iesu rahuku mate.

Iesu mopakauriꞌ handaꞌ tauna

⁷ Roo onoꞌ, Iesu hai topeguruNa pohuꞌheꞌ lao i wiwi rano Galilea. Handaꞌ toGalilea to meuláꞌ i Hia. Handaꞌ woꞌo tauna to haweꞌ hangko i tampoꞌ Iudá,

⁸ tepasuaꞌ kótá Ierusale, hangko i tampoꞌ Idumea, hangko i hambali uwai Iarade, hai ara woꞌo to hangko i kótá Tiru hai Sido. Handaꞌ ntepuꞌu tauna to lao i Iesu láwiꞌ mohádimoheꞌ bámbári kana i upu-upu to Nabábehi.

^9-10 Handaꞌ tauna to tiꞌara ralalu Napakauriꞌ, álána mombegaeꞌ-gaeꞌmoheꞌ tauna lao mohungkuki bona mampekamaꞌheꞌ Iesu. Ánti kahandaꞌraꞌ tauna, onoꞌ miꞌi haneꞌi Iesu mohuoꞌ topeguruNa mopatimama duanga ina Napengkaheꞌi, bona ineeꞌ ragihiꞌ-gihiꞌ tauna to handaꞌ.

¹¹ Noꞌonoꞌheꞌ woꞌo tauna to napesuaꞌi setáꞌ. I poitáraꞌ Iesu, liu-liuheꞌ mopalumbá i bitiNa, hai setáꞌ iti monganga-ngangaheꞌ rapasimbuku, rauliꞌ, “Io miꞌi Ánáꞌna Pueꞌ Ala!”

¹² Agáiáná Iesu mokóntó ntepuꞌuheꞌ, bona ineeꞌ rapehángáꞌá kaheánáNa.

Iesu mopileꞌi topeguruNa to hampuloꞌ hai rodua

¹³ Roo onoꞌ, Iesu lao i kaꞌaraꞌá to ara i buluꞌ-buluꞌna, haneꞌi mokióꞌ tauna to Naundeꞌ ina meuláꞌ i Hia.

¹⁴ Kahaweꞌraꞌ ionoꞌ, Ia mopileꞌi hampuloꞌ hai rodua tauna hangko i oloꞌraꞌ bona mewaliꞌ suroNa. Nahángáꞌáheꞌ, “Kupilekiꞌou bona niporángáꞌAꞌ. Ina Kuhuoꞌkou lao mopahaweꞌ Ngkóráꞌ Marasa,

¹⁵ hai ina Kuweꞌikou kuasaꞌ mampopesuwuꞌ setáꞌ.”

^16-19 Deꞌe miꞌi hangaꞌraꞌ to hampuloꞌ hai rodua iti: Simoꞌ to nahangaꞌ Iesu Peturuꞌ; roo onoꞌ, Iakobu, ánáꞌna Sebedeu, hai Iohane ádina Iakobu. Iesu mohangaꞌheꞌ Boanege, lempóna: ánáꞌ gumpataꞌ; roo onoꞌ, Andaria, Pilipu, Bartolomeu, Matiu, Tómá, Iakobu ánáꞌna Alapeu, Tadeu, Simoꞌ toSeloꞌ, hai Iudasiꞌ Isikarioꞌ to mampobaluꞌ Iesu i ewáliNa.

Iesu hai Belesebu

²⁰ Karoona Iesu mopileꞌi topeguruNa, Ia mesuleꞌ {lao i wánuá Kapenau} haneꞌi mesuaꞌ i lalu támbi. Handaꞌ woꞌo tauna lao metolelingi, álána Iesu hai topeguruNa tiꞌaraheꞌ nampakaꞌ mandeꞌ.

²¹ Araheꞌ woꞌo tauna ionoꞌ to molaluita kana i Iesu, rauliꞌ “Ia tiꞌara piꞌi manótó!” Onoꞌ miꞌi haneꞌi ádiNaheꞌ ina lao moala Iesu.

²² Araheꞌ woꞌo guru agama toIahudiꞌ to haweꞌ hangko i kótá Ierusale. Rauliꞌ guru agama iti, “Ia napesuaꞌi Belesebu, daturaꞌ upu-upu setáꞌ. Ia mopakeꞌ kuasaꞌ datu setáꞌ iti mampopelóhóꞌ setáꞌ.”

²³ Onoꞌ miꞌi haneꞌi nakióꞌheꞌ Iesu haneꞌi Napolaluitaꞌá moliu bahangapa pákáꞌna ngkóráꞌ pándiriꞌ. Nauliꞌ, “Peisá paꞌi setáꞌ mampopelóhóꞌ hangka setáꞌna?

²⁴ Rápáꞌna, ane arai hadua datu, hai tauna to handaꞌ i lalu kadatuána mosisalaꞌheꞌ oaꞌ hai mombeꞌewaꞌheꞌ, kadatuá iti ina magero.

²⁵ Ane tauna hampohalaluá pakaheꞌ mosisalaꞌ, ina magero pohalaluraꞌ iti.

²⁶ Noꞌonoꞌ woꞌo i kadatuá setáꞌ. Ane Datu Tokadake moewaꞌ hangka tokadakena, lempóna setáꞌ moewaꞌ hangka setáꞌna, áláraꞌ magero kadatuá setáꞌ iti.

²⁷ Datu Tokadake peisá rapándiriꞌ nodo tauna to maróhó. Ane mesuaꞌkeꞌ i lalu támbina tauna to maróhó hai mampoinaokeꞌ mamperampaꞌi párewá to ara i támbina, hangaa-ngaa tatimpuku sieruꞌ pueꞌ támbi iti, hangko peisárakeꞌ moala párewána. {Noꞌonoꞌ woꞌo, ane Kódóꞌ mampopelóhóꞌAꞌ setáꞌ, lempóna, Kunangi miꞌi Datu Tokadake.}

²⁸ Toꞌu to Kuꞌuliꞌ, hai Kuhángáꞌákou: upu-upu dósá hai laluita pesápuáka peisá raꞌámpungi,

²⁹ agáiáná heáná to mosápuáka Inao to Magasaꞌ, tiꞌara ara ámpungina, láwiꞌ bábehiá iti ina naposalaꞌ duuꞌna i rue-ruena.”

³⁰ Iesu manguliꞌ noꞌonoꞌ láwiꞌ ara to manguliꞌ Ia napesuaꞌi tokadake.

Iesu hai halaluna

³¹ Tiꞌara marue hangko ionoꞌ, haweꞌmoheꞌ inána hai ádina Iesu, agáiáná meángkáꞌ peheꞌ i rawa támbi, hai mohuoꞌheꞌ tauna lao mokióꞌ Iesu, láwiꞌ rapoinao ina rapolaluitaꞌá.

³² I tempó iti, handaꞌ tauna to mehoda motolelingi Iesu. Rahángáꞌá, “Guru. InáMu hai ádiMu araheꞌ i rawa, maiKoꞌ rapeliꞌ.”

³³ Napekuneꞌ Iesu, “Heáná ináNgkuꞌ hai halaluNgkuꞌ?”

³⁴ Haneꞌi Iesu motótói tauna to metolelingi, Nauliꞌ, “Kómu riꞌi ináNgkuꞌ hai halaluNgkuꞌ.

³⁵ Heáná peá to mobábehi peundeꞌána Pueꞌ Ala, hira miꞌi ináNgkuꞌ hai halaluNgkuꞌ.”