Marakusi 16 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu tueꞌ huleꞌ

¹ Liu miꞌi alo penómbáꞌá, Maria toMadalena, Maria inána Iakobu, hai Salome, laoheꞌ mohóló mina-mina to mawongi. Tunggáiáraꞌ, bona laoheꞌ mominaꞌ-minaꞌi wátámandoꞌna Iesu.

² Mewaliꞌ, mepulo-pulo i alo Minggu, i pembetona miꞌi alo, laoheꞌ i popatawuá.

^3-4 I tangaꞌ rárá molaluitamoheꞌ, rauliꞌ, “Heánákeꞌ to ina motulungi mogesuꞌ watu petuko babaꞌ popatawuá iti?” láwiꞌ watu iti matimi ntepuꞌu. Agáiáná kahaweꞌraꞌ i popatawuá, raita watu iti tegesuꞌ miꞌi.

⁵ Pesuaꞌraꞌ i lalu popatawuá, moitaheꞌ hadua ánáꞌntomoane to mehoda tándáꞌ i kuáná, mewaruꞌ to bulá. Malááꞌ ntepuꞌuheꞌ towawine iti.

⁶ Agáiáná nauliꞌ ánáꞌntomoane iti, “Ineeꞌkou malááꞌ! Kuisá to nipeliꞌ Ia miꞌi Iesu toNasare to rapakuꞌ i kau mombehape. Ia tiꞌara piꞌi ara ieneꞌ. Ia tueꞌ miꞌi huleꞌ! Nipeita karawoliáNa.

⁷ Mesuleꞌmokou, nihángáꞌáheꞌ Peturuꞌ hai topeguruna Iesu to ntániꞌna node: Tueꞌ miꞌi huleꞌ Iesu. Ia ina moioru lao i tampoꞌ Galilea, hai ina nipohidupaꞌá ionoꞌ nodo to Nahángáꞌáꞌámokou ami.”

⁸ Melangkaheꞌ towawine iti hangko i popatawuá. Wuliheꞌ apa to pewaliꞌ hai moridiꞌheꞌ. Ánti kamalááꞌraꞌ, tiꞌaraheꞌ sieruꞌ mopahaweꞌ bámbári iti i heáná peá. [Towawineheꞌ iti laoheꞌ i Peturuꞌ hai rángána, hai mopahaweꞌ upu-upu to nahángáꞌáheꞌ ánáꞌntomoane iti ininá, agáiáná raparerembe peá. Roo onoꞌ, Iesu mohuoꞌmoheꞌ topeguruNa mopahaweꞌ Ngkóráꞌ Marasa i upu-upu tauna i humalele duniáꞌ. Bámbári to maroꞌa iti mopakanótóákeꞌ rárá molámbiꞌ katueꞌ to maroꞌa to tiꞌara mokahópóꞌá.] [

Iesu mopatongawaꞌ wátáNa i Maria toMadalena hai i topeguruNa

⁹ Kapearóna Iesu hangko i kapate i alo Minggu hungkuꞌ mabaa, rungu-runguna Ia mopatongawaꞌ wátáNa i Maria toMadalena. Maria iti to napakauriꞌ Iesu hangkoia i kanapesuaꞌina setáꞌ to pitu.

^10-11 Mewaliꞌ lao miꞌi Maria i topeuláꞌna Iesu, nahumbaheꞌ tangaꞌraꞌ teriaꞌ láwiꞌ masusa laluraꞌ. Nahángáꞌáheꞌ, “Tueꞌ miꞌi huleꞌ Pueꞌ! Kuita miꞌi ininá!” Agáiáná upu-upu to napolaluita Maria iti tiꞌara mpuꞌu rapoinálái.

¹² Roo onoꞌ, Iesu mopatongawaꞌ wopiꞌi wátáNa hai rárá ntániꞌna i rodua topeuláꞌNa to tangaꞌraꞌ mesuleꞌ hangko i kótá Ierusale lao i wánuáraꞌ.

¹³ I karaisána peá kaꞌIesuna, tauna to rodua iti liliuheꞌ mesuleꞌ huleꞌ lao i kótá Ierusale, mopahaweꞌ i topeuláꞌna Iesu to ntániꞌna apa to mewaliꞌ. Agáiáná hira woꞌo tiꞌara mepoinálái.

Iesu mopatongawaꞌ wátáNa i topeguruNaheꞌ

¹⁴ Hangko ionoꞌ, Iesu mopatongawaꞌ mpuꞌu miꞌi wátáNa i topeguruNa to hampuloꞌ hai hadua tangaꞌraꞌ mandeꞌ. Nakámbáróáheꞌ láwiꞌ pepoináláiraꞌ makuraꞌ hai matuꞌa laluraꞌ. Tiꞌaraheꞌ mampoinálái laluitaraꞌ tauna to moita Iesu i katueꞌNa miꞌi huleꞌ.

¹⁵ Upu onoꞌ, Nahángáꞌámoheꞌ, “Laomokou i humalele duniáꞌ, mopahaweꞌ Ngkóráꞌ Marasa i upu-upu tauna.

¹⁶ Heáná peá to mepoinálái i Kódóꞌ hai rariu, ia ina tehómpóki hangko i huku dósá. Agáiáná heáná to tiꞌara mepoinálái, bateꞌna ina molámbiꞌ pehuku.

¹⁷ Heáná peá tauna to mepoinálái, ina Kuweꞌiheꞌ kuasaꞌ mobábehi tandaꞌ kuasaꞌ to node: i lalu hangaꞌKuꞌ, hira ina mampopesuwuꞌheꞌ setáꞌ. Ina molaluitaheꞌ i lalu básá to tiꞌara raisá.

¹⁸ Araheꞌ to ina motibaaꞌ lelótó, ba mainu rasu, agáiáná tiꞌaraheꞌ ina moapa. Ane mampekamaꞌheꞌ tauna to tiꞌara ralalu bona napakauriꞌheꞌ Pueꞌ Ala, bateꞌraꞌ mauriꞌ.”

Iesu mengkaoreꞌ lao i surugáꞌ

¹⁹ Karoona Pueꞌ Iesu mampolaluitaꞌá topeguruNaheꞌ, Ia mengkaoreꞌ lao i surugáꞌ. Ionoꞌ Ia mehoda tándáꞌ i kuánána Pueꞌ Ala.

²⁰ Hangko ionoꞌ, laomoheꞌ topeguruNa mopahaweꞌ Ngkóráꞌ Marasa iumbá-umbá peá. Pueꞌ mamporángáheꞌ. Naweꞌiheꞌ kuasaꞌ mobábehi tandaꞌ to metingkáráki bona tongawaꞌ katoꞌuna bámbári to raꞌánti.]